定期送上世界各地最新、最地道嘅旅遊資訊!

【歐洲自由行】東歐自由行10日懶人包+東歐電話卡推介 (包括布達佩斯景點、維也納行程推薦)

一講到歐洲自由行,大家可能會覺得旅費不菲!但其實大部份東歐國家,例如匈牙利,奧地利同捷克物價普遍比較平,而且交通方便,好適合想以最短時間,最低消費,遊最多地方嘅旅客!小編已經整合好一個

東歐自由行10日懶人包,推介布達佩斯景點維也納行程,帶埋大家去人間仙境哈修塔特同世界級觀光城市布拉格!仲話埋你知國與國間嘅交通同推介東歐電話卡東歐自由行話咁易啦!

 

第一日|布達佩斯 (Budapest)
布達佩斯景點推介|蓋勒特山 (Gellert Hill)

蓋勒特山 (Gellert Hill)@Flickr

布達佩斯 (Budapest) 係匈牙利首都,位於多瑙河畔,堪稱東歐最靚嘅城市,亦有「多瑙河之珠」嘅美譽!所以嚟到布達佩斯,第一件事就係要去高達235米嘅蓋勒特山 (Gellert Hill),由高空俯瞰布達佩斯市,鏈橋同多瑙河兩岸嘅絕美景色!

自由女神像@Flickr

蓋勒特山頂除咗有廣闊嘅視野,山上仲有一座自由女神像,係為咗紀念匈牙利脫離德國納粹同俄羅斯統治而建,氣勢磅薄,係必到打卡點!

 

第二日|布達佩斯 (Budapest)
布達佩斯景點推介|塞切尼浴場 (Szechenyi Baths)
塞切尼浴場 (Szechenyi Baths)
@Flickr

歐洲溫泉文化喺古羅馬帝國時期就已經開始興盛,而布達佩斯溫泉資源豐富,有「歐洲溫泉之都」嘅稱號!嚟到布達佩斯,去最大、最豪華同有過百年歷史嘅塞切尼浴場 (Szechenyi Baths)浸溫泉,絕對係指定動作!

塞切尼浴場 (Szechenyi Baths)_2@Flickr

塞切尼浴場係一座充滿巴洛克風格嘅建築,外觀猶如皇宮,內部奢華!而浴場規模超大,有分唔同溫度,室內、室外嘅溫泉,喺到浸一浸,真係畢生難忘!

 

塞切尼浴場 (Szechenyi Baths)
地址:Budapest, Állatkerti krt. 9-11, 1146 匈牙利 (顯示地圖)
營業時間:星期一至日 06:00-22:00

 

第三日|布達佩斯 (Budapest)
布達佩斯景點推介|中央市場 (Nagy Vasarcsarnok)

中央市場 (Nagy Vasarcsarnok)@Flickr

要真正認識一個地方,就要去當地人平日去嘅市場。位於達佩斯市中心嘅中央市場 (Nagy Vasarcsarnok),主要賣當地嘅農產品,新鮮食材同香料,仲有好多地道餐廳,係布達佩斯人嘅大廚房!

中央市場 (Nagy Vasarcsarnok)_2@Flickr

中央市場一共有三層,佔地廣闊,除咗食材之外,仲有賣手工藝品同紀念品!有得食又有得shopping!而且市場本身嘅建築加入咗新哥德式設計元素,好有特色!必到!

 

中央市場 (Nagy Vasarcsarnok)
地址:Budapest, Vámház krt. 1-3, 1093 匈牙利 (顯示地圖)
營業時間:星期一 06:00-17:00,星期二至五 06:00-18:00,星期六 06:00-15:00

 

歐洲自由行|布達佩斯住宿推介|茲茨皇家公寓酒店
茲茨皇家公寓酒店
@hotel.com

去旅行最緊要揀一間地點方便,又住得舒服嘅酒店,而呢間4星級嘅茲茨皇家公寓酒店就完全滿足到大家啦!酒店座落於特雷茲法羅斯,去匈牙利國家歌劇院同聖史蒂芬大教堂都只係10分鐘路程!公寓式嘅設計,有客廳又有廚房,最重要係設備齊全,令人有家嘅感覺!


@hotel.com

公寓空間非常大,最適合一家大細入住,而且樓底夠高,又夠光猛,夜晚又可以欣賞到特雷茲法羅斯嘅迷人夜景!咁舒適!包你晚晚都叉足電啦!

 

茲茨皇家公寓酒店
地址:HUN布達佩斯Zichy J. u. 30. III. emelet (顯示地圖)
星級 | ★★★★☆  
位置 | ★★★★☆  
設施 | ★★★★☆  
環境 | ★★★★☆
價格 | 查看價格

 

東歐自由行|布達佩斯去維也納交通
由布達佩斯去維也納最方便同快速嘅方法就係坐OBB火車,如果想以最平嘅方法買車票,大家可以提早至少1個月,上奧地利國家鐵路 ÖBB嘅網站訂火車早鳥票。

 

第四日|維也納
維也納景點推介|維也納市政廳 (Rathaus)

維也納市政廳 (Rathaus)@Flickr

維也納市政廳始建於1872年,當年建造嘅時候,規定非教堂建築物都唔可以高過100米,所以最高嘅尖塔只係建成98米,但設計者為咗向教會勢力挑戰,喺塔尖上建造一座3.5米高嘅市政廳鐵人 (Rathausmann),自此就成為維也納最具代表性嘅地標!

維也納市政廳 (Rathaus)_2@Flickr

維也納市政廳前嘅廣場經常都會舉辦活動同市集,尤其係冬季嘅時候,仲有溜冰場同聖誕市集!好有氣氛!

 

維也納市政廳 (Rathaus)
地址:Rathauspark W, 1010 Wien, 奧地利 (顯示地圖)

 

第五日|維也納
維也納景點推介|霍夫堡皇宮 (Hofburg Imperial Palace)

霍夫堡皇宮 (Hofburg Imperial Palace)@Flickr

霍夫堡皇宮係哈布斯堡王朝皇帝嘅冬宮,已經有超過600年歷史!而且面積有成24萬平方米,佔據咗維也納內城區大部份嘅面積,所以又被稱為「城中城」!

霍夫堡皇宮 (Hofburg Imperial Palace)_2
@Flickr
皇家公寓 (Imperial Appartements)

霍夫堡皇宮總共有19座庭院同18個廂宮,現今已經被改變為唔同嘅用途,例如係西西博物館 (Sisi Museum)、皇家公寓 (Imperial Appartements)、皇家銀器收藏 (Silver Collection)、奧地利國家圖書館 (Österreichische Nationalbibliothek) 等等,全部都好值得參觀!

 

霍夫堡皇宮 (Hofburg Imperial Palace)
地址:Michaelerkuppel, 1010 Wien, 奧地利 (顯示地圖)
營業時間:星期一至日 09:00-17:30

 

第六日|維也納
維也納景點推介|百水公寓 (Hundertwasserhaus)

百水公寓 (Hundertwasserhaus) @Flickr

百水公寓(Hundertwasserhaus)係由著名嘅藝術家漢德瓦薩所建設計,以自然同人類共存為主題嘅一座公寓。漢德瓦薩一生致力推舉環保同生態平衡,作品大多色彩繽紛,而且唔受傳統建築風格限制,用不規則嘅建築特色同大自然元素融合,呈現出對自然嘅熱愛!

@Fotocommunity
百水藝術村 (Hundertwasser Village)

百水公寓對面仲有一條百水藝術村,係仿照咗百水公寓建築風格打造嘅一條購物村!大家記得去行吓!買吓特別嘅紀念品呀!

 

百水公寓 (Hundertwasserhaus)
地址:Kegelgasse 36-38, 1030 Wien, 奧地利 (顯示地圖)

 

歐洲自由行|維也納住宿推介|施泰根博閣莊園酒店

施泰根博閣莊園酒店@hotel.com

施泰根博閣莊園酒店位於維也納第一區,係維也納最旺嘅地段,正正就喺霍夫堡皇宮旁邊,行去Herrengasse地鐵站都係幾分鐘!地理位置無得輸!酒店被精品購物區、藝術館同充滿巴洛克建築風格嘅文化建築包圍,氣氛典雅高尚!

施泰根博閣莊園酒店_2@hotel.com

酒店外觀復古,但內部就加入咗現代化設計元素!房間雅緻,而且隔音設備做得非常完善,比大家一個寧靜嘅休息環境!仲有SPA同健身室比旅客使用,真係好梳乎!

 

施泰根博閣莊園酒店
地址:AUT維也納Herrengasse 10 (顯示地圖)
星級 | ★★★★☆  
位置 | ★★★★★  
設施 | ★★★★☆  
環境 | ★★★★☆
價格 | 查看價格

 

東歐自由行|維也納去哈爾施塔特交通
先坐奧地利國家鐵路 ÖBB由Wien Westbahnhof站去到Hallstatt站,然後再轉船,由Hallstatt Bahnhst碼頭去到Hallstatt Markt碼頭。

 

第七日|哈爾施塔特 (Hallstatt)
哈爾施塔特景點推介|哈爾施塔特湖 (Lake Hallstatt)

哈爾施塔特湖 (Lake Hallstatt)@Flickr

位於奧地利中部嘅湖畔小鎮哈爾施塔特 (Hallstatt),絕對係一生人只少要去一次嘅地方!呢個小鎮唔大,只有一條街,但呢度嘅景色,足以令人畢生難忘!哈爾施塔特喺1997年被列為世界文化遺產,歷史悠久,係歐洲重要嘅考古遺跡!

哈爾施塔特湖 (Lake Hallstatt)_2@Flickr

哈爾施塔特湖 (Lake Hallstatt) 有歐洲最美湖泊嘅美譽!嚟到呢度,就好似去咗童話入面嘅仙境!

 

日|哈爾施塔特
哈爾施塔特景點推介|鹽礦 (Salzwelten Hallstatt)

鹽礦 (Salzwelten Hallstatt)@franks-travelbox

哈爾施塔特最主要嘅景點就係參觀世上最古老嘅鹽礦 (Salzwelten Hallstatt),鹽礦曾經係奧地利皇室主要財政來源嚟㗎!鹽礦由公元前2000年已經開採,直到1965年先成為旅遊景點。大家可以喺鹽礦親身體驗採礦工人所用過嘅工具同運鹽軌道車,仲有45度超長木製滑梯,好玩又刺激!

鹽礦 (Salzwelten Hallstatt)_2@Flickr
木製滑梯

 

哈爾施塔特鹽礦 (Salzwelten Hallstatt)
地址:Salzbergstraße 21, 4830 Hallstatt, 奧地利 (顯示地圖)
營業時間:星期一至日 09:30-14:30

 

歐洲自由行|哈爾施塔特住宿推介|哈爾施塔特歷史酒店

哈爾施塔特歷史酒店@Hallstatt

哈爾施塔特歷史酒店唔係呢度最高級高豪華嘅酒店,但呢間酒店卻係最受歡迎,長年都爆滿!全因呢度有欣賞哈爾施塔特湖嘅最佳景觀!酒店分別有3座大樓,每一座都各具特色,最重要係全部都面向哈爾施塔特湖,一定唔會錯過絕美景色!

哈爾施塔特歷史酒店_2@Facebook

每一座大樓都只係有5-10間房,每間房都舒服寧靜,木地板加上柔和嘅燈光,感覺好溫馨!

哈爾施塔特湖@Facebook

酒店最大賣點就係哈爾施塔特嘅湖光山色,淨喺由房間露台望出去呢個景,已經值回票價!

 

哈爾施塔特歷史酒店
地址:AUT哈修塔特Landungsplatz 101 (顯示地圖)
星級 | ★★★★☆  
位置 | ★★★★★  
設施 | ★★★★☆  
環境 | ★★★★★
價格 | 查看價格

 

東歐自由行|哈爾施塔特去布拉格交通
由哈爾施塔特去布拉格要先坐穿梭巴士Ck Shuttle去到庫倫洛夫小鎮,Ck Shuttle要提前喺網上book,可以㨂喺酒店pick up同drop off,到達庫倫洛夫再轉坐Student Agency巴士去布拉格。

 

第九日|布拉格
布拉格景點推介|查理大橋 (Charles Bridge)

查理大橋 (Charles Bridge)@Flickr

除咗布拉格廣場,布拉格最聞名於世嘅就係查理大橋 (Charles Bridge)!查理大橋於1700年建成,橫跨伏爾塔瓦河,連接住布拉格舊城區同城堡區。呢座古橋唔單止係連接布拉格城區嘅重要橋樑,橋上嘅雕刻全部都係出自著名藝術家手筆,係橋上行,就好似走過露天嘅藝術館!

@Flickr

橋上最有名氣嘅就係聖約翰尼伯繆克像底下嘅兩副金屬畫,相傳摸過之後會帶嚟好運,女士摸嘅話,仲會有美好嘅愛情𠻹!

 

第十日|布拉格
布拉格景點推介|跳舞房子 (Dancing House)

跳舞房子 (Dancing House)@Flickr

跳舞房子 (Dancing House) 由近代世界聞名嘅建築師Frank Owen Gehry所設計,據聞靈感源自漫步街上,一對手搭對方膊頭嘅情侶!建築物外觀望落真係好似一對跳緊舞嘅情侶,設計前衛大膽,同四周圍古色古香嘅歷史建築形成強烈對比!呢個咁任性嘅設計,絕對係Frank Gehry最具代表性嘅作品,一定要嚟朝聖!

 

跳舞房子 (Dancing House)
地址:Jiraskovo nam. 1981, 120 00 Nove Mesto, 捷克 (顯示地圖)

 

歐洲自由行|布拉格住宿推介|斯美塔那酒店

斯美塔那酒店@hotel.com

斯美塔那酒店係一座建於17世紀嘅別墅,充滿迷人古典氣息!嚟到布拉格呢個浪漫嘅城市,梗係要住間有中世紀建築風格,仿如皇宮嘅酒店啦!酒店位於布拉格市中心,一望出去就係查理大橋,有靚景之餘,又夠方便!

斯美塔那酒店_2@hotel.com

房間寬敞,設計復古,加上水晶吊燈,令整體感覺奢華氣派!真係可以扮吓貴族!

 

斯美塔那酒店
地址:CZE布拉格Karoliny Svetle 34 (顯示地圖)
星級 | ★★★★★  
位置 | ★★★★★  
設施 | ★★★★☆  
環境 | ★★★★★
價格 | 查看價格

 

歐洲自由行|東歐電話卡推介
去歐洲跨國旅行,最緊要有張夠平又接收得好嘅電話卡。主要比較出名嘅電訊公司有Uk 3、Vodafone,O2同EE,而選擇電話卡時,要留意以下幾點:

  1. 買預付卡,唔好買按用量收費卡,有幾多credit就用幾多,咁就唔怕突然收到天價電話費單。
  2. 留意電話卡覆蓋邊啲國家,一般電話卡都會覆蓋歐洲經濟區(EEA)內嘅國家,但買電話卡前,一定要問清楚!
  3. 留意上網速度,一般口碑比較好嘅係Vodafone,大家可以考慮一吓。

 

 

📖延伸閱讀:【奧地利自由行】音樂‧藝術‧咖啡館—3日2夜慢活維也納景點行程、美食懶人包
📖延伸閱讀:【布拉格自由行】布拉格市內散步地圖連布拉格景點一覽 (布拉格必買小物推介)
📖延伸閱讀:【CK小鎮一日遊點夠】捷克庫倫洛夫CK小鎮行程攻略(連CK小鎮住宿推薦!)
📖延伸閱讀:【玩到盡】歐洲之星倫敦、巴黎、布魯塞爾景點懶人包! (連票務行李全攻略)
📖延伸閱讀:【柏林自由行】必去柏林景點推介!Top 3人氣柏林打卡精品咖啡店連美食推薦!
📖延伸閱讀:【波蘭自由行】從維利奇卡鹽礦、奥斯威辛集中營探索東歐歷史

 

 

Hotels.com酒店優惠