定期送上世界各地最新、最地道嘅旅遊資訊!

【Grad Trip好去處】地上最強Grad Trip歐洲攻略!東歐 + 西歐 + 南歐 + 北歐遊玩路線大全!

Grad Trip係出嚟社會工作之前,一個無任何讀書同工作壓力嘅旅行,當然要玩盡佢!小編心目中嘅Grad Trip好去處一定係非歐洲莫屬!歐洲係好多人夢寐以求嘅旅遊地點,但去歐洲絕對唔係玩兩三日咁簡單嘅事,出嚟工作之後又點會咁易請到長假期?所以趁喺有時間就梗係要去歐洲闖一闖啦!以下已經為大家整合好一個地上最強Grad Trip歐洲攻略!推介4條熱門東歐 + 西歐 + 南歐 + 北歐遊玩路線,仲提埋大家歐遊注事項𠻹!

 

📖延伸閱讀:【歐遊攻略篇】歐洲旅遊必讀!3大歐洲自由行路線及常見問題!
📖延伸閱讀:【歐洲上網卡推介】歐洲電話卡大評比!邊隻歐洲Sim Card最抵?!

 

Grad Trip好去處|4條熱門東歐 + 西歐 + 南歐 + 北歐遊玩路線
東歐路線:波蘭捷克奧地利匈牙利>羅馬尼亞
南歐路線:萄葡牙>西班牙>瑞士>意大利>希臘
西歐路線:英國>法國>比利時>荷蘭>德國
北歐路線:丹麥>挪威>瑞典>芬蘭>俄羅斯

 

Grad Trip好去處|東歐路線
第一站|波蘭

克拉科夫 - 聖母聖殿 (Krakow St. Mary’s Basilica)
@Flickr
克拉科夫 – 聖母聖殿 (Krakow St. Mary’s Basilica)

東歐多國中,波蘭唔算係最熱門嘅旅遊地,但其實波蘭蘊含豐富藝術文化同歷史背景,更加係鋼琴家蕭邦嘅故鄉,每年喺首都華沙(Warsaw)都會舉行名聞國際嘅蕭邦鋼琴大賽!而第二大城市克拉科夫(Krakow)亦被聯合國評為十二座世界最美麗城市之一!正所謂讀萬卷書不如行萬里路,喺波蘭除咗參觀聖母聖殿(Krakow St. Mary’s Basilica)、維利奇卡地下鹽礦(Wieliczka)、龍洞(Dragon’s Den)等等名勝,更重要係去奧斯威辛集中營(Aosiweiqin camp)了解人類史上最兇殘嘅種族滅絕!

 

波蘭
國內交通:城市與城市間嘅交通主要以PKP國家鐵路為主,而每個城市內都有電車同巴士,而車票就電車同巴士通用,可以按需要購買20/40/60分鐘時般票或一日票。
特色美食:酸湯 (Zurek)、獵人燉肉 (Bigos)、吉普賽烤肉 (Gipsy BBQ),拿破倫 (Napoleonka)
建議逗留日數:3-4日

 

📖延伸閱讀:【波蘭自由行】從維利奇卡鹽礦、奥斯威辛集中營探索東歐歷史

 

Grad Trip好去處|東歐路線
第二站|捷克

布拉格 - 老城廣場 (Prague Old Town Square)
@Flickr
布拉格 – 老城廣場 (Prague Old Town Square)

捷克一向都係東歐遊必到國家!去布拉格老城廣場(Old Town Square)留下腳印、聽吓天文鐘(Astronomical Clock)嘅鐘聲、走過查理大橋(Charles Bridge)、欣賞世界聞名建築師Frank Grey嘅作品跳舞房子(Dancin House),再去埋啤酒SPA,有邊一樣唔係人生bucket list必做嘅事?捷克仲有好多特色小鎮,例如怖滿彩色房子嘅童話小鎮庫倫洛夫(Cesky Krumlov)同溫泉之鄉卡羅維瓦利(Karlovy Vary)都好值得到訪!

 

捷克
國內交通:城市與城市間嘅交通主要以穿梭巴士Student Agency為主,而主要城市內亦有電車同巴士,但其實大部分景點都好集中,可以步行。
特色美食:肉桂卷 (Trdelnik)、烤鴨(Pečená Kachna),蜂蜜蛋糕 (Medovník)
建議逗留日數:3日

 

📖延伸閱讀:【布拉格自由行】布拉格市內散步地圖連布拉格景點一覽 (布拉格必買小物推介)
📖延伸閱讀:【CK小鎮一日遊點夠】捷克庫倫洛夫CK小鎮行程攻略(連CK小鎮住宿推薦!)

 

Grad Trip好去處|東歐路線
第三站|奧地利

哈修塔特 (Hallstatt)
@Flickr
哈修塔特 (Hallstatt)

一講到奧地利,大家一定會先諗到音樂之都維也納(Vienna),因為史上最聞名嘅音樂家都係喺維也納出生或學藝,音樂之都美名當之無愧!但其實奧地利必去嘅地方非世界文化遺產小鎮哈修塔特特(Hallstatt)莫屬,呢個小鎮雖然細,但有人間仙景美譽,可以嚟個一日遊!其次就係去薩爾斯堡(Salzburg)探訪莫扎特之家(Mozarts Geburtshaus)同行吓格特萊德街(Getreidegasse),仲可以去埋國王湖(Konigssee)𠻹!

 

奧地利
國內交通:城市與城市間嘅交通主要以OBB聯邦鐵路為主,而主要城市內都有電車同巴士,如果一日搭兩程車以上,建議買24小時票比較優惠。
特色美食:炸雞 (Backhendl)、維也納咖啡 (Viennese coffee),蘋果批 (Apfelstrudel)
建議逗留日數:3-4日

 

📖延伸閱讀:【奧地利自由行】音樂‧藝術‧咖啡館—3日2夜慢活維也納景點行程、美食懶人包

 

Grad Trip好去處|東歐路線
第四站|匈牙利


@Flickr
布達佩斯 – 國會大廈 (Budapest Parliament)

《藍色多瑙河》呢首曲就聽過,但多瑙河景色係咪真係咁迷人?不如自己親身去匈牙利睇下啦!匈牙利首都布達佩斯就有「多瑙河上的明珠」嘅美名,大家可以坐船夜遊多瑙河,欣賞沿途經過嘅鎖鏈橋(Chain Bridge)、國會大廈 (Budapest Parliament)、布達皇宮(Budai Vár)多個地標!仲可以去多瑙河曲灣上嘅迷人小鎮瓦茨(Vac)探索古羅馬遺蹟!

 

匈牙利
國內交通:城市與城市間嘅交通主要以MAV火車為主,而主要城市內都有電車、地鐵同巴士,建議可以一次過買10次有效票,價錢會比較優惠。
特色美食:牛肉湯 (Gulyas)、烤鵝肝 (Libamáj),奶油蛋糕 (Ruszwurm Krémes)
建議逗留日數:4日或以上

 

📖延伸閱讀:【歐洲自由行】東歐自由行10日懶人包+東歐電話卡推介 (包括布達佩斯景點、維也納行程推薦)

 

Grad Trip好去處|東歐路線
第五站|羅馬尼亞

鍚納亞 - 佩雷斯城堡 (Sinaia Peles Castle)
@Flickr
鍚納亞 – 佩雷斯城堡 (Sinaia Peles Castle)

有東歐巴黎之稱嘅羅馬尼亞擁有壯麗山河,久遠嘅歷史,經歷多個帝國變遷,仍然保留著好多完整嘅中世紀古蹟、城堡同教堂!有豐富古文化嘅遺產,同時亦產生好多神秘傳說,好似吸血鬼德古拉嘅故事就係源自布朗城堡(Bran Castle)!不過其實錫納亞嘅佩雷斯城堡 (Sinaia Peles Castle)就更有古堡feel啦!除咗古堡,布加勒斯特(Bucharest)仲有好多充滿中世紀風情嘅街道同商店,仲有唔可以錯過嘅都市村莊 – 鄉村博物館(Muzeul Satului)!

 

羅馬尼亞
國內交通:城市與城市間嘅交通主要以CRF國營鐵路為主,而主要城市內有電車、火車同巴士,巴士車站多,價錢比較平,另外亦可以試吓坐渡輪。
特色美食:烤肉捲 (Mici)、肉球湯 (Ciorba de perisoare),炸冬甩 (Papanași)
建議逗留日數:4日

 

Grad Trip好去處|南歐路線
第一站|萄葡牙

里斯本 - 28號電車 (Lisbon Tram 28)
@visiting.lisbon
里斯本 – 28號電車 (Lisbon Tram 28)

萄葡牙被《Lonely Planet》評為2018全球最佳旅行目的地之一,全因葡萄牙價廉物美、有復古建築、有絕美景色、又有迷人海灘,咁多元化,唔怪得吸引到咁多遊客啦!鐘意睇歐陸建築嘅可以去坐28號電車遊走里斯本市、吃貨嘅可以去Time Out Market、鐘意陽光與海灘嘅可以去辛特拉(Sintra)、鐘意睇景又可以去亞速爾群島(Azores)睇火山同火山湖,總有一樣啱你玩!

 

葡萄牙
國內交通:城市與城市間嘅交通主要以Rede Expressos直通巴士為主,而主要城市內都有電車、地鐵同巴士,每個城市都分別有交通卡,通用於所有公共交通。
特色美食:葡撻 (Pastel de Belém)、葡式海鮮飯 (Arroz de Marisco)、豬扒包 (Bifana),炸馬介休球 (Pastel de Bacalhau)
建議逗留日數:3日

 

📖延伸閱讀:【遊葡萄牙首都】4日3夜玩盡里斯本電車沿線景點攻略!
📖延伸閱讀:【葡萄牙自由行】里斯本自由行景點路線攻略 (連葡萄牙手信必買推薦)

 

Grad Trip好去處|南歐路線
第二站|西班牙

巴塞隆拿 - 聖家堂 (Barcelona Sagrada Familia)
@LivingTours
巴塞隆拿 – 聖家堂 (Barcelona Sagrada Familia)

南歐多國中,充滿熱情嘅西班牙係小編最愛!去巴塞隆拿(Barcelona)睇高第嘅建築奇跡,就算唔係建築師,都深深被巧奪天工嘅聖家堂(Sagrada Familia)感動!又或者係去魯營球場(Camp Nou)朝聖,睇番場波,親眼見證美斯風彩!西班牙每個城市都各有特色,馬德里(Madrid)可以睇費拉明戈舞(Flamenco),行傳統西班牙市集聖米格爾市場(Mercado de San Miguel),去格拉納達(Granada)又可以睇世界文化遺產阿爾罕布拉宮(La Alhambra)!好玩到唔捨得走!

 

西班牙
國內交通:城市與城市間嘅交通主要以Renfe國家鐵路為主,而主要城市內亦有巴士,西班牙人鐘意以電動滑板車或單車代步,可以去到當地單車店租車,體驗當地人生活。
特色美食:利比亞火腿 (Jamón ibérico)、海鮮飯 (Paella),Tapas
建議逗留日數:4日

 

📖延伸閱讀:【西班牙手信特集】巴塞隆拿自由行攻略之西班牙必買手信 (連西班牙outlet推薦)
📖延伸閱讀:【巴塞隆拿景點】巴塞隆拿足球Fans必去—魯營球場Camp Nou懶人包!
📖延伸閱讀:【去歐洲必買】西班牙巴塞隆拿哥德區散步+必逛設計師小店!西班牙必買設計師單品 + 古著 + 波鞋!
📖延伸閱讀:【西班牙自由行】巴塞隆拿自由行必去人氣街區Las Ramblas、Gothic Quarter連住宿推薦

 

Grad Trip好去處|南歐路線
第三站|瑞士

少女峰地區 (Jungfrau Region)
@Flickr
少女峰地區 (Jungfrau Region)

被阿爾卑斯山脈圍繞的瑞士,冰川雪山,綠樹林蔭,任何一個角落都睇到夢幻景色!一定登上少女峰(Jungfrau),企喺歐洲最高點,體驗大地在我腳下嘅滿足感!到訪全世界最靚小鎮之一嘅格林德瓦(Grindelwald),去費爾斯特(First)滑雪同玩各式各樣極限運動!記得要去埋首都熊城伯恩(Bern)尋覓大黑熊踪影,同去瑞士最靚城市琉森(Luzern)欣賞吓琉森湖(Lake Luzern)同精雕傑作垂死獅子像(Lion Monument)呀!

 

瑞士
國內交通:城市與城市間嘅交通主要以SBB聯邦鐵路為主,而主要城市內亦有電車,可以購買Swiss Half Fare Pass國內大部分交通都可以享有半價優惠。
特色美食:芝士火鍋 (Cheese Fondue)、風乾牛肉 (Bundner fleisch),烤芝士 (Raclette)
建議逗留日數:5日以上

 

📖延伸閱讀:【尋找瑞士山區肺】瑞士少女峰一日遊—少女峰交通、住宿攻略!
📖延伸閱讀:【瑞士自由行】瑞士遊記 — 坐瑞士火車 嘆零污染舒適假期!

 

Grad Trip好去處|南歐路線
第四站|意大利

羅馬競技場 (Rome Colosseum)
@best_rome_photos
羅馬競技場 (Rome Colosseum)

意大利係歐洲好重要嘅國家,因為首都羅馬(Rome)正正就係歐洲文化發源地,係全球最多世界文化遺產嘅地方!一生人點都要去一次意大利!一睹圓形競技場(Colosseum)同比薩斜塔(Torre di Pisa)嘅真貌!去文藝復興時期嘅代表城市佛羅倫斯(Florence),尋找米開蘭基羅嘅踪跡!唔洗去澳門望梅止渴,可以到訪真正嘅水都威尼斯(Venice),坐著水上巴士穿過嘆息橋(Ponte dei Sospiri)、聖馬可大教堂(Basilica di San Marco)、聖馬可鐘樓(Campanile di San Marco)等等世界名勝!

 

意大利
國內交通:城市與城市間嘅交通主要以Trenitalia國家鐵路為主,雖然有得買通票,但其實每次用都要收手續費,如果唔係搭好多次,單買更抵。而主要城市內亦有地鐵同巴士,威尼斯就有水上巴士,留意巴士車票需要喺便利店預先購買。
特色美食:豬肉捲 (Porchetta)、意式炸飯團 (Arancini),帕爾瑪火腿 (Parma Ham)
建議逗留日數:4日

 

📖延伸閱讀:【佛羅倫斯自由行之食軟雪糕】佛羅倫斯三大必食特色 Gelato 意大利雪糕!
📖延伸閱讀:【意大利自由行】意大利五漁村遊記-必去景點彩色小屋逐個捉!
📖延伸閱讀:【意大利自由行】4日3夜羅馬景點散步行程路線圖 (連羅馬美食推介)
📖延伸閱讀:【米蘭購物狂】必去米蘭景點—米蘭Outlet血拼全攻略!(連必買意大利名牌推薦)
📖延伸閱讀:【威尼斯自由行】景點太逼人?教你一日快閃威尼斯玻璃島、彩色島!
📖延伸閱讀:【西西里島自由行】 西西里島遊記—帶你去意大利行街市 (連意大利手信必買攻略)
📖延伸閱讀:【羅馬自由行】$600有找!意大利羅馬住宿酒店推薦!
📖延伸閱讀:【威尼斯住宿推薦】$700有找!意大利威尼斯酒店超抵住推薦!

 

Grad Trip好去處|南歐路線
第五站|希臘

聖托里尼島 Santorini Island
@DiscoverGreece
聖托里尼島 Santorini Island

愛琴海上嘅藍白小屋令人對希臘充滿幻想,好似喺存在喺令一世界嘅天堂咁!趁住Grad Trip呢個人生咁重要嘅旅行,不如親身去到聖托里尼島(Santorini Island),置身於咁唯美嘅地方,睇全世界最靚嘅日落啦!仲要去奠定西方文明基楚嘅首都雅典(Athens),登上衛城(Acropolis)揭開希臘神話嘅神秘面紗!歐洲旅程奔波勞碌,不如去渡假聖地米克諾斯島(Mykonos) 喺沙灘上hea吓,聽吓音樂,食吓海鮮都係人生大享受!

 

希臘
國內交通:城市與城市間嘅交通主要以Ktel長途巴為主,去島嶼就坐渡輪比坐飛機平,主要城市內都有地鐵同巴士,地鐵治安一般,建議坐巴士。
特色美食:羊肉批 (Moussaka)、麻花麵包 (Koulouri)、烤肉串 (Souvlaki),捲餅 (Gyros Pitta)
建議逗留日數:4日

 

📖延伸閱讀:【希臘自由行】希臘蜜月嘆世界級日落!Top 9 聖托里尼藍白色民宿推介

 

Grad Trip好去處|西歐路線
第一站|英國

倫敦 (London)
@London
倫敦 (London)

英國係歐遊嘅熱門地點,有唔少人都會以英國為單一目的地,因為好多地方都好值得遊覽!但Grad Trip就梗係想走多幾個地方,咁就要重點精華遊啦!首都倫敦(London)當然係必去,無睇過倫敦塔橋 (Tower Bridge)同大笨鐘(Big Ben),又點叫去過英國?小編亦好推介大家去整個城市被列入為世界文化遺產嘅巴斯(Bath),呢度有好多古羅馬建築,仲有天然溫泉,有小羅馬城之稱!

 

英國
國內交通:城市與城市間嘅交通主要以英國國鐵為主,主要城市內都有Underground同巴士,建議大家一定要坐吓好出名嘅紅色雙層巴士。
特色美食:炸魚薯條 (Fish&Chips)、血腸 (Blood Pudding)、查佛蛋糕 (Trifle)
建議逗留日數:4日或以上

 

📖延伸閱讀:【倫敦景點地圖】倫敦遊玩必備London Pass攻略 (連London Pass景點大全)
📖延伸閱讀:【英國超市必買】香港冇得賣!英國必買化妝品、零食、手信逐個數!
📖延伸閱讀:【倫敦自由行】三大必去倫敦美食市集連必食精選推介!
📖延伸閱讀:【倫敦景點—倫敦市集精選】南倫敦布里克斯頓活化市集遊玩攻略
📖延伸閱讀:【倫敦酒店推介】$600蚊有找!英國倫敦Zone 2至抵住宿推薦!
📖延伸閱讀: 【倫敦遊記】倫敦必去近郊之選—最美海邊小鎮布萊頓!
📖延伸閱讀:【英國必買品牌】Oxford Street購物攻略連英國退稅須知 (Harrods, Liberty London, Poundland, Primark)

 

Grad Trip好去處|西歐路線
第二站|法國

巴黎 - 艾菲爾鐵塔 (Paris Eiffel Tower)
@Flickr
巴黎 – 艾菲爾鐵塔 (Paris Eiffel Tower)

西歐路線又點少得法國?去巴黎艾菲爾鐵塔(Paris Eiffel Tower)打卡、去羅浮宮(The Louvre)欣賞世界名畫蒙羅麗莎的微笑、仲有去歐洲最華麗,最壯觀嘅宮殿凡爾賽宮(Palace of Versailles),再去埋畢加索美術館(Musée Picasso)感受巴黎嘅藝術氣息!覺得去巴黎太遊客?不如去南法嘅蔚藍海岸尼斯(Nice)同薰衣草之鄉普羅旺斯(Provence),享受吓法國純樸嘅村土風情!

 

法國
國內交通:城市與城市間嘅交通主要以OUISncf國家鐵路為主,而主要城市內以地鐵為主要交通,不過記得要去拎一張地鐵圖,Google Map有時唔太準確,建議可以一次過買10次或20次有效票,價錢會比較優惠。
特色美食:法式蝸牛 (Escargots)、法式薄餅 (Crepe)勃根地牛肉 (Boeuf Bourguignon),法式燉菜 (Ratatouilles)
建議逗留日數:3-4日

 

📖延伸閱讀:【Grad Trip窮游歐洲】法國巴黎景點、巴黎博物館慳錢大法!
📖延伸閱讀:法國自由行】慢活法國南部—尼斯、蔚藍海岸必食、行程懶人包
📖延伸閱讀:【巴黎購物篇】巴黎Outlet全攻略 (連必買品牌 + 手信推薦)
📖延伸閱讀:【巴黎酒店點揀好】$600蚊有找!巴黎住宿推薦(巴黎住宿安全常見問題)
📖延伸閱讀:【巴黎美食地圖】朝聖人氣法國巴黎必食甜品店
📖延伸閱讀:【非一般巴黎必買清單】名牌以外!Top 6巴黎購物必逛小店、特色巴黎手信推薦!

 

Grad Trip好去處|西歐路線
第三站|比利時

布魯塞爾廣場 (Brussels Grand Place)
@Flickr
布魯塞爾廣場 (Brussels Grand Place)

比利時係歐盟創始國之一,而充滿濃厚藝術文化氣息嘅首都布魯塞爾(Brussels)亦係歐盟總部嘅所在地!比利時仲係歐洲出名多美食,最有獨特時尚風格嘅國家,好多世界知名品牌都出自此地!除咗去睇歐洲三大最靚廣場之一嘅布魯塞爾廣場(Grand Place)同可愛嘅尿尿童子像(Manneken Pis),記得去埋充滿驚喜嘅古城根特(Gent)呀!

 

比利時
國內交通:城市與城市間嘅交通主要以比利時國家鐵路為主,而各個城市內亦有電車、巴士同地鐵,但其實比利時唔大,主要城市內景點集中,步行都可以。
特色美食:青口配薯條 (Moules&Frites)、窩夫 (Waffle),啤酒 (White Beer)
建議逗留日數:2-3日

 

📖延伸閱讀:【聖誕去邊度旅行】最強歐洲火車路線!歐洲之星巴黎 – 倫敦 – 布魯塞爾景點懶人包! (連票務行李全攻略)

 

Grad Trip好去處|西歐路線
第四站|荷蘭


@amsterdam
阿姆斯特丹 (Amsterdam)

荷蘭被認為係世上文化最開放嘅國家,淨係首都(Amsterdam)以紅燈區(De Wallen)為最受歡迎嘅旅遊地點,就知道呢個國家幾特別!不過開放唔等如文化水平低!荷蘭人嚮往自由奔放嘅生活,但亦因為咁喺藝術上嘅發展非常蓬勃!例如鹿特丹(Rotterdam)嘅方塊屋(The Cube House)同拱廊市場(De Markthal)都係當代極具代表性嘅建築!而成個荷蘭,博物館同藝術館加埋超過1000間,有排你行啦!

 

荷蘭
國內交通:城市與城市間嘅交通主要以NS國家鐵路為主,而主要城市內亦有電車、巴士同地鐵,可以購買OV Chipkaart通用交通卡,荷蘭單車網絡完善,建議大家可以租單車喺市內遊走。
特色美食:可樂餅 (Kroket)、生鯡魚 (Haring),小圓鬆餅 (Poffertjes)
建議逗留日數:4日

 

📖延伸閱讀:【荷蘭遊記】荷蘭自由行必去!鹿特丹三大必睇摩登建築景點!
📖延伸閱讀:【荷蘭自由行】一日快閃阿姆斯特丹遊記 (連單車路線及租車攻略)
📖延伸閱讀:【荷蘭過暑假】$600蚊有找!阿姆斯特丹住宿推薦 (連紅燈區觀光指南)
📖延伸閱讀:【阿姆斯特丹自由行】阿姆斯特丹紅燈區遊覽指南大全 + 注意事項

 

Grad Trip好去處|西歐路線
第五站|德國

慕尼黑 - 皇家啤酒屋 (Munich Hofbräuhaus)
@geheimtippmuenchen
慕尼黑 – 皇家啤酒屋 (Munich Hofbräuhaus)

德國可能係歐洲CP值最高嘅旅遊地點!首先喺物價低,但無論係去玩,買嘢同食嘢,得到嘅都係高級享受!德國眾多城市都充斥著震憾人心嘅建築,好似斯圖加特市圖書館(Stuttgart City Library)、羅馬廣場(Romerberg)、科隆大教堂(Cologne Cathedral),仲有迪士尼城堡藍本新天鵝堡(Neuschwanstein)!都未提各大名車展覽館,一定要去超現代感嘅Benz Museum,同埋去慕尼黑皇家啤酒屋 (Munich Hofbräuhaus)飲黑啤同食豬手,包你玩到樂而忘返!

 

德國
國內交通:城市與城市間嘅交通主要以DB國家鐵路為主,而城市內嘅火車就分為U-Bahn同S-Bahn,而買車票嘅時候可以買Bayern Ticket會抵好多。
特色美食:酸菜豬手 (Schweinshaxe Sauerkraut)、白香腸 (Weisswurst),蝴蝶餅麵包 (Pretzel)
建議逗留日數:5日或以上

 

📖延伸閱讀:【德國自由行攻略】薩爾斯堡一日遊 — 德國薩爾斯堡國王湖交通、住宿攻略!
📖延伸閱讀:【柏林自由行】必去柏林景點推介!Top 3人氣柏林打卡精品咖啡店連美食推薦!
📖延伸閱讀:【法蘭克福景點攻略】家品控必買!三大法蘭克福家品店
📖延伸閱讀:【慕尼黑景點】慕尼黑自由行程攻略-安聯球場、BMW博物館、奧林匹克公園!
📖延伸閱讀:【迪士尼城堡藍本】德國必去!舊、新天鵝堡交通行程攻略懶人包!
📖延伸閱讀:【德國必買2018】德國手信系列清單!(連慕尼黑自由行住宿推薦)
📖延伸閱讀:【聖誕德國自由行】五大必去德國聖誕市集+必食必買攻略2018!

 

Grad Trip好去處|北歐路線
第一站|丹麥

哥本哈根 - 新港 (Copenhagen Nyhavn)
@Flickr
哥本哈根 – 新港 (Copenhagen Nyhavn)

丹麥被國家地理雜誌列為世界近乎完美嘅國家,完善嘅福利制度、北歐慢活文化、優美海港風情,令呢度瀰漫著幸福開心嘅氣氛!北歐之旅就喺安徒生筆下嘅童話世界哥本哈根(Copenhagen)展開啦!去尋找《海的女兒》嘅主角小美人魚像(Den Lille Havfrue),漫步於充滿彩色建築同木船嘅新港(Nyhavn),感受丹麥嘅純樸同優雅。然後就去到莎士比亞名著《王子復仇記》嘅哈姆雷特古堡(Kronborg Castle),探索最具悲劇神秘色彩嘅宮殿,嚟一個夢幻之旅!

 

丹麥
國內交通:城市與城市間嘅交通主要以DSB國家鐵路為主,而主要城市內亦有巴士同渡輪,而哥本哈根有單車之城嘅稱號,無理由唔踩單車。
特色美食:豬肉丸 (Frikadeller)、丹麥三明治(Smørrebrød),炸比目魚 (Rødspættefilet)
建議逗留日數:3日

 

📖延伸閱讀:【丹麥自由行】Hea遊哥本哈根景點之選!(連哥本哈根住宿推薦)

 

Grad Trip好去處|北歐路線
第二站|挪威

松恩峽灣 (Sognefjord)
@flamnorway
松恩峽灣 (Sognefjord)

擁有世界自然遺產松恩峽灣(Sognefjord)嘅挪威,係歐洲最多山嘅國家,亦造就咗無數瀑布、秀麗湖泊同原始森林!挪威嘅壯麗景色,絕對係舉世無雙!就連首都奧斯陸(Oslo)都係被綠樹林蔭包圍嘅綠色都市,遊走奧斯陸市,睇吓挪威最大嘅藝術文化建築奧斯陸歌劇院 (Operahuset),然後去松恩峽灣區嘅人間仙景弗洛姆 (Flam),坐世上風景最靚嘅鐵路!再去埋斯瓦爾巴 (Svalbard)追極光,咁就完美啦!

 

挪威
國內交通:城市與城市間嘅交通主要以NSB國家鐵路為主,而主要城市內亦有巴士、地鐵同電車,但其實坐渡輪亦係遊覽挪威嘅好方法。
特色美食:三文魚 (Røkt laks)、鯨魚肉 (Hval),蘋果蛋糕 (Eplekaka)
建議逗留日數:4-5日

 

📖延伸閱讀:【挪威自由行】挪威旅遊景點、行程、住宿攻略大全 (連挪威極光秘點推薦)

 

Grad Trip好去處|北歐路線
第三站|瑞典

斯德哥爾摩 (Stockholm)
@Flickr
斯德哥爾摩 (Stockholm)

瑞典玩,第一樣諗到嘅就係要去當地嘅Ikea朝聖!但其實去瑞典,重點係要去斯德哥爾摩(Stockholm)探究一吓點解呢度會成為全球最宜居生活嘅城市,體驗同學習瑞典人文風情!當然諾貝爾博物館(Nobelmuseet)、斯德哥爾摩王宮(Stockholms slott)同全球15大最美地鐵站之一嘅中央車站(T-Centralen)都係絕不令人失望嘅景點!不過真正識玩,一定要豪一次,去世上第一間長期零吓5度嘅Ice Hotel住一晚,就算唔入住,都要去參觀!嚟一場冰雪奇緣!

 

瑞典
國內交通:城市與城市間嘅交通主要以SJ國家鐵路為主,而主要城市內亦有巴士,車票要預先喺便利店購買。
特色美食:魚湯 (Kajsa Fishsoup)、芝士蛋糕 (Ostkaka)、薯仔煎餅 (Raggmunk),肉丸 (köttbullar)
建議逗留日數:4日

 

Grad Trip好去處|北歐路線
第四站|芬蘭

羅凡聶米 - 聖誕老人村 (Rovaniemi Santa Claus Village)
@SantaClausVillage
羅凡聶米 – 聖誕老人村 (Rovaniemi Santa Claus Village)

芬蘭梗係要去搵聖誕老人啦!位於羅凡聶米(Rovaniemi)嘅聖誕老人村(Santa Claus Village),一年365日都咁有聖誕氣氛,就算係夏天,一樣可以搵到聖誕老人嘅踪影!記得要跨過北極圈線,證明自己去過北極!而且要喺長年積雪嘅拉普蘭(Lapland)坐馴鹿雪橇,扮吓聖誕老人!原來芬蘭人好鐘意焗桑拿,如果有勇氣,可以學吓芬蘭人咁焗完桑拿即刻跳落冰湖,絕對係難忘體驗!

 

芬蘭
國內交通:城市與城市間嘅交通主要以VR國家鐵路為主,而主要城市內亦有巴士,電車同地鐵,可以買通用日制車票。
特色美食:炸小青魚 (Muikku)、白菜肉卷 (Kaalikääryle),餡餅 (Riisipiirakka)
建議逗留日數:3日

 

📖延伸閱讀:【聖誕旅行好去處2018】八大聖誕節旅遊推薦
📖延伸閱讀:【聖誕去邊度旅行】最強歐洲火車路線!歐洲之星巴黎 – 倫敦 – 布魯塞爾景點懶人包! (連票務行李全攻略)

 

Grad Trip好去處|北歐路線
第五站|俄羅斯

莫斯科 - 聖瓦西里大教堂 (Moscow St. Basil’s Cathedral)
@moscow
莫斯科 – 聖瓦西里大教堂 (Moscow St. Basil’s Cathedral)

俄羅斯一向比人嘅感覺就係充滿異國風情、色彩繽紛同戰鬥民族。但唔去過又點會知原來俄羅斯人係好灰諧風趣同豪邁爽朗?而色彩鮮豔嘅建築,好似莫斯科嘅聖瓦西里大教堂 (Moscow St. Basil’s Cathedral)同紅場(Red Square)其實係展現咗俄羅斯唔同時代嘅信仰同獨特嘅藝術風格!除咗以俄羅斯娃娃同名劇天鵝湖聞名,金碧輝煌嘅凱薩琳大帝皇宮(Catherine Palace)同世界四大博物館之一嘅隱士廬博物館(The State Hermitage Museum)亦令人趨之若騖!俄羅斯絕對會為北歐旅程畫上完美句號!

 

俄羅斯
國內交通:城市與城市間嘅交通主要以RZhD國家鐵路為主,而主要城市內亦有巴士,電車同地鐵,電車最方便同最完善。
特色美食:布利尼薄餅(Blini)、紅菜湯(Borscht),俄式餃子 (Pelmeni)
建議逗留日數:4日

 

📖延伸閱讀:【俄羅斯手信特集】世界盃熱潮!Top 6必買俄羅斯手信 (連俄羅斯美食推介)
📖延伸閱讀: 【聖彼得堡遊記】7日6夜俄羅斯聖彼得堡自由行景點行程攻略

 

歐洲國與國之間交通

火車:歐洲鐵路系統完善,每論係玩東南西北歐任何一條線,坐火車就可以輕鬆穿梭歐洲各國!而最方便嘅方法就係買歐鐵跨國聯票Eurail。Eurail主要係喺車票有效期內嘅特定天數,任意搭各國火車。大家可以因應自己行程去買票,例如1個月內隨意選取5日任搭。重點係27歲以下青少年可以享有8折優惠!

巴士:巴士雖然車程長,但價錢就經濟實惠!Flixbus、Eurolines、Megabus同Ouibus都係好有信譽嘅長途巴士公司。

飛機:最快捷嘅方法當然係坐飛機,而歐洲境內,即使係跨國都好似係坐普通內陸機咁,起飛前一個鐘check in就可以,唔洗浪費時間等。雖然價錢貴,但有時愈早買就有機會買到平價機票,有機會比火車平!

 

Grad Trip注意事項

  1. 歐洲唔似得亞洲咁方便,好多時喺交通上唔係有錢就可以隨時有車坐,一定要預早計劃好路線,book定車票同住宿,尤其係國與國之間嘅交通!如果唔係分分鐘無車坐,影響行程!
  2. 為咗慳錢,大家都可能會選擇青年旅舍多人合宿,但始終歐洲治安無香港咁好,所以建議大家盡量住返酒店。想慳錢又住得安心,其實可以揀ibis旗下嘅酒店都比較優惠,又或者住市中心周邊區域嘅酒店,價錢都會平好多,以安全為最重要考慮。
  3. 去歐洲參觀博物館同美術觀係指定動作,學生好多時都會有優惠,所以記得帶學生證!
  4. 大部分歐洲國家嘅商店都好早閂門,甚至連食肆都可以7-8點就收工!公眾假期嘅時候,連超級市場都唔會開,大家記得check清楚各個景點同餐廳嘅開放時間呀!

 

📖延伸閱讀:【2019公眾假期請假攻略】Hotels.com 訂酒店優惠折扣攻略!
📖延伸閱讀:【北歐自由行】法羅群島旅遊全記錄2018 (景點+餐廳+住宿+交通大全)
📖延伸閱讀:【蘇格蘭自由行】蘇格蘭高地自駕行程攻略(連愛丁堡住宿推薦)
📖延伸閱讀:【海外婚紗攝影特集】布拉格、巴黎、濟州、澳門、輕井澤景點大解構!

 

Hotels.com酒店優惠Hotels.com酒店優惠