定期送上世界各地最新、最地道嘅旅遊資訊!

【親子好去處戶外篇】5大香港親子郊遊好去處 + 附近必食餐廳推薦!

 

平時返工體力透支,就算放假想一家大細出去玩,可能都冇時間plan⋯⋯不過唔洗愁啦,今次小編就肩負起呢個重任,悉心搜羅咗5大香港親子郊遊好去處,搵埋交通方法同活動內容,唔少得梗係介紹埋親子好去處戶外特色影相位,同場加映附近必食餐廳推薦,幫你計劃好行程,同屋企人朋友一齊去戶外親親大自然!

 

親子郊遊好去處|佐敦谷公園

佐敦谷公園
@ milkmilklui

要數香港市區嘅綠洲,位於牛頭角嘅佐敦谷公園係不二之選,多條巴士及小巴線直達,亦有停車場,方便一家大細前往。公園內擁有兩個大草坪、迷宮花園、溫室等多元化設施,仲有一個達國際水平嘅遙控模型車場,各位小車手可以隨時落場風馳電掣一番。放眼一片綠茵,夏天可以同陽光玩遊戲,秋天又可以放風箏,幾時去都咁啱玩!

 

佐敦谷公園
適合活動:放風箏、野餐、遙控模型車
地址:觀塘新清水灣道71 號(顯示地圖)
交通:26、27、29M、91、91M、92巴士,或54S小巴
開放時間:05:00 – 23:00
網址:https://www.lcsd.gov.hk/tc/parks/jvp/index.html

 

親子郊遊好去處|附近必食餐廳推薦|順豐潮菜

順豐潮菜@openrice

小編私心推介嘅屋村打冷大排檔!正宗潮洲菜,價錢又親民,由佐敦谷公園出發行約10分鐘可到達,值得一試。

 

順豐潮菜
地址:觀塘順安道9號順天邨大排檔1-2號舖(顯示地圖)

 

親子郊遊好去處|九龍仔公園+ 洋紫荊園

九龍仔公園
@wingkate

想帶埋寵物一齊玩,可以考慮九龍仔公園,園內設施豐富,包括足球場、籃球場、滾軸溜冰場、兒童遊樂場,以及寵物公園!

洋紫荊園
@lcsd

呢度仲有個隱世嘅世外桃源:洋紫荊園,種有超過120棵洋紫荊樹,每年花期都成為不少人嘅打卡勝地,屆時滿園萬紫千紅,靚嘅程度甚至令佢升格為熱門婚禮場地!

 

九龍仔公園
適合活動:野餐、滾軸溜冰、賞花
地址:九龍城延文禮士道(顯示地圖)
交通:1、75X、85、85A、85B、113巴士
開放時間:24小時
洋紫荊花期:每年9月至2月
網址:https://www.lcsd.gov.hk/tc/parks/ktsp/index.html

 

親子郊遊好去處|附近必食餐廳推薦|小曼谷海鮮燒烤屋

小曼谷海鮮燒烤屋
@minibangkok

嚟得九龍城當然要試吓泰國菜,呢間必食菜式有泰皇咖喱炒膏蟹同埋原隻魷魚筒釀糯米飯,仲有好受大人小朋友歡迎嘅原隻靚椰青!

 

小曼谷海鮮燒烤屋
地址:九龍城太子道西398號御太子地下1-3號舖(顯示地圖)

 


親子郊遊好去處|昂坪市集+天壇大佛+心經簡林

昂坪市集@xoxo.travelia

想親子遊,又想爺孫樂?去大嶼山昂坪就最適合不過!行程首站當然唔可以錯過被譽為世界十大最佳纜車體驗之一嘅昂坪360纜車,短短車程就可以眺望整片大嶼山自然生態,之後除咗可以行昂坪市集、天壇大佛,小編大推老少咸宜嘅「心經簡林」,走進由38條木柱組成嘅大型戶外木刻群,體驗國學大師饒宗頤嘅墨寶,沿途靚景不在話下,保證你煩惱盡消~

 

大嶼山昂坪
適合活動:行山、纜車遊、素食
地址:離島大嶼山昂坪 (顯示地圖)
交通:港鐵東涌站B出口乘坐纜車,或23號巴士
市集開放時間:週末 09:00 – 18:30
網址:https://www.np360.com.hk/tc/

 

親子郊遊好去處|附近必食餐廳推薦|寶蓮禪寺齋堂

寶蓮禪寺齋堂
@chikpi-eateatshare

除咗食素,可以試埋齋堂嘅招牌香滑豆腐花,但提提大家係冇得預訂或留位,只接受現場買餐,營業時間4點半止。

 

寶蓮禪寺齋堂
地址:大嶼山昂坪昂坪路寶蓮禪寺(顯示地圖)

 

親子郊遊好去處|嘉道理農場暨植物園

嘉道理農場暨植物園
@kfbg

嘉道理農場暨植物園位於大埔附近,佔地148公頃,園內有果園、各種動物屋、溫室,同埋農場博物館,小朋友可以親親動植物,邊玩邊學,就連野生赤麂、蝙蝠、野豬都可以近距離見到!亦可以即場報名參加導賞團及工作坊,爸爸媽媽們就可以趁機放break抖吓~

 

嘉道理農場暨植物園
適合活動:野餐、動植物教育、有機農場
地址:香港新界大埔林錦公路 (顯示地圖)
交通:64K巴士
開放時間:09:30 – 17:00
網址:https://www.kfbg.org/chi/index.aspx

 


親子郊遊好去處|附近必食餐廳推薦|嘉道理農場素食亭

嘉道理農場素食亭
@bigdogkee

素食亭係同新生精神康復會聯合經營嘅社企,提供素食、沙律等,坐喺露天茶座嘆有機小食,別有一番風味㗎。

 

嘉道理農場素食亭
地址:大埔林村林錦公路嘉道理農場內(顯示地圖)

 

親子郊遊好去處|大埔海濱公園

大埔海濱公園
@ hayashihk

大埔海濱公園係康文署轄下面積最大嘅公園,平時踩單車都會經過,但其實園內設施豐富,唔止有昆蟲屋同多個主題花園,入面嘅香港回歸紀念塔仲係必到嘅影相位,日落時登塔,可以一眼望哂吐露港,靚景程度滿分!公園內種咗唔少本地及外來植物,較罕有嘅桂葉黃梅、大果西番蓮、依蘭和金花茶都有得睇!

 

大埔海濱公園
適合活動:放風箏、野餐、賞花、踩單車等
地址:大埔大喜街 (顯示地圖)
交通:72A、73、73X、75X、271、275R、74K、75K、71K或71S號巴士
開放時間:24小時
網址:https://www.lcsd.gov.hk/tc/parks/tpwp/index.html

 

親子郊遊好去處|附近必食餐廳推薦|亞婆豆腐花

亞婆豆腐花
@taiwanxhk

唔使加糖都夠哂清甜,識食一定食亞婆豆腐花!大埔墟站行約5分鐘可達,如果諗住踩單車,可以先食一碗加加油再出發。

 

亞婆豆腐花
地址:大埔大光里2A地舖 (顯示地圖)

 

📖延伸閱讀:【香港假期好去處】2019公眾假期請假攻略 (連長短線旅遊地點推薦)
📖延伸閱讀:【帶小朋友去玩】香港室內好去處 + 香港親子旅行好去處連住宿推薦
📖延伸閱讀:【香港中秋好去處】八月十五去邊度?本地隱世賞月地點靜靜雞話你知!
📖延伸閱讀:【香港郊遊樂】香港行山路線懶人包(西貢、大嶼山、港島區) (連超抵住香港郊區酒店推薦)

 

Hotels.com酒店優惠Hotels.com酒店優惠