定期送上世界各地最新、最地道嘅旅遊資訊!

【香港食海鮮】一篇帶你食盡鯉魚門、西貢、流浮山海鮮美食!

 

香港食海鮮嘅地方有好多,當中以流浮山、西貢同埋鯉魚門海鮮餐廳選擇最多,可以話係食海鮮嘅傳統勝地。小編就為你搜羅呢3個地方嘅必去海鮮酒家同埋必食海鮮菜式,一於趁週末叫埋屋企人或者朋友去嘆吓海鮮!

 

流浮山海鮮
一講起流浮山,大家都會諗起蠔田同海鮮,呢度嘅海鮮街亦都非常出名,唔少已經開業多年嘅海鮮酒家同埋海鮮檔都紮根於此。流浮山毗鄰香港西部海域,呢度漁獲多,所以一眾流浮山海鮮酒家都可以攞到最新鮮嘅本地海鮮食材。因此,流浮山多年嚟都備受海鮮老饕追捧。

 

流浮山必食海鮮餐廳推介 | 海景海鮮酒家

海景海鮮酒家
@creepyeater

海景海鮮酒家招牌菜係白灼流浮山出產嘅九蝦,九蝦多數喺香港西部海域捕捉,體型唔大,但非常彈牙鮮甜,唔需要花巧烹調技巧,簡單白灼已經夠好味。蜜餞金蠔亦係嚟流浮山食海鮮嘅必較菜式,金蠔表面裹著一層蜜糖,鮮中帶甜,口感煙韌。豉椒炒蟶子亦係必食海鮮小菜,你可以自己喺海鮮檔揀海鮮,再加錢請海鮮酒家幫你即刻煮埋,保證新鮮。

 

海景海鮮酒家
地址:流浮山正大街56號地下 (顯示地圖)
營業時間:星期一至日 11:00-22:30

 

流浮山必食海鮮餐廳推介 | 明記海鮮酒家

明記海鮮酒家
@leicasimon

明記喺流浮山口碑甚佳,全因收費老實,菜牌明碼實價,你可以問定當日海鮮價位,再決定入唔入去食。招牌菜係奄仔蟹,蟹膏甘香,肉質細嫩,簡單清蒸已經令人回味無窮。你都可以試吓果皮蒸鮑魚,夠曬新鮮彈牙,微微糖心,間唔中豪番一次都不為過。另外,油鹽蟹亦係拿手菜式之一,非常惹味,亦都可以揀薑蔥蟹,同樣風味十足!

 

明記海鮮酒家
地址:新界流浮山正大街40號 (顯示地圖)
營業時間:星期一至日 11:00-22:30

 

西貢海鮮
鍾意食海鮮嘅人一定去過西貢海鮮街,但海鮮酒家眾多,而且酒家都直接從鄰近西貢碼頭嘅漁船、艇家入貨,保證新鮮啦!你都自行喺碼頭附近嘅艇家買海鮮,再交俾海鮮酒家代煮,食幾多同乜嘢煮法都由你話事!

 

西貢必食海鮮餐廳推介 | 勝記海鮮酒家

 勝記海鮮酒家
@charlespmok

勝記海鮮酒家來頭不小,全因佢係西貢唯一一間米芝蓮一星海鮮酒家,酒家亦設有VIP房間連卡拉OK設備,適合一大班人嚟食海鮮兼party。講番佢哋嘅招牌菜,一定要講吓鮑魚系列:椒鹽鮑魚、古法扣南非鮑同埋蠔皇扣鮑魚,總有款啱你口味。呢度都有多款蠔類招牌菜,包括砵酒焗桶蠔、天婦羅桶蠔等,瀨尿蝦、刺身類菜式同埋海魚類菜式同樣非常出色。

 

勝記海鮮酒家
地址:西貢大街39號 (顯示地圖)
營業時間:星期一至日 11:00-23:00

 

西貢必食海鮮餐廳推介 | 通記海鮮酒家

通記海鮮酒家
@lovecathcath

雖然食海鮮價錢上就冇可能平,但通記海鮮酒家就出名份量大,食物質素高,屬於西貢海鮮酒家中嘅高人氣之選。必點菜式有黃金鮑魚,彈牙嘅鮑魚同鹹香惹味嘅鹹蛋芡汁非常夾。另外,芝士龍蝦同椒鹽瀨尿蝦都係熟客必點,新鮮龍蝦鮮甜爽口,瀨尿蝦亦近乎一隻半手掌咁大,大件夾抵食。呢度仲有得叫刺身,款式包括三文魚、象拔蚌同帶子,比得上日本餐廳水準㗎!

 

通記海鮮酒家
地址:西貢萬年街98-102號 (顯示地圖)
營業時間:星期一至日 07:00-22:00

 

鯉魚門海鮮
鯉魚門三家村係另一個喺香港食海鮮嘅熱點,匯聚多間海鮮酒家同埋海鮮檔,而且相比流浮山同西貢,呢度地點比較就腳,搭多種交通工具都可以到。由油塘地鐵站出發,只需要步行大約20分鐘就到鯉魚門三家村。

 

鯉魚門必食海鮮餐廳推介 | 南大門

 南大門
@Deedee Mik

未真係行到鯉魚門三家村,你已經可以遠望到南大門誇張嘅霓虹燈牌,Google map都唔洗,一定搵得到。屹立鯉魚門多年總有佢原因,除咗遊客,仲有好多熟客捧場。呢度自設魚缸,款款海鮮都好生猛,雖然價錢較高,但可以坐窗邊位睇住海景嘆海鮮,真係值回票價哦。呢度招牌海鮮包括扣鮑魚、長腳蟹、椒鹽瀨尿蝦、象拔蚌等,全部新鮮,你亦可以喺海鮮檔自帶海鮮俾佢地烹調,加工費亦都會清楚列明。

 

南大門
地址:觀塘鯉魚門海傍道中58A號 (顯示地圖)
營業時間:星期一至日 11:00-23:00

 

鯉魚門必食海鮮餐廳推介  | 快樂漁港酒家

快樂漁港酒家
@foodsmelbourne

快樂漁港酒家係鯉魚門另一間開業已久嘅海鮮酒家,裝潢雖然不及南大門咁豪華,但多年嚟都足秤老實,人氣絕對唔輸蝕。呢度嘅招牌菜都比較惹味有鑊氣,啱曬鍾意食濃味啲嘅朋友,必叫菜式包括芝士焗龍蝦、椒鹽瀨尿蝦、粉絲蒸帶子同埋豉椒炒蜆。想食番清啲嘅話,可以點白灼蝦、清蒸石斑等,中和一下。

 

快樂漁港酒家
地址:鯉魚門海傍道中53號A地下 (顯示地圖)
營業時間:星期一至日 11:30-23:30

 

📖延伸閱讀:【香港假期好去處】2019公眾假期請假攻略 (連長短線旅遊地點推薦)
📖延伸閱讀:【香港郊遊樂】香港行山路線懶人包(西貢、大嶼山、港島區) (連超抵住香港郊區酒店推薦)
📖延伸閱讀:【香港中秋好去處】八月十五去邊度?本地隱世賞月地點靜靜雞話你知!
📖延伸閱讀:【堅尼地城好去處】一篇帶你食盡隱世港島美食:西環、上環、中環、西營盤美食大全

 

Hotels.com酒店優惠Hotels.com酒店優惠