定期送上世界各地最新、最地道嘅旅遊資訊!

【澳門水上樂園大比併】巴黎人水世界 VS 澳門天浪淘園攻略比較一文睇哂!

香港人得閒都會過澳門放鬆一下,除咗去食好西、小賭兩手,嚟一個兩日一夜澳門遊都係好多人嘅選擇。如果酒店具備一個五星級水上樂園,真係可以全日留喺酒店chill住過。小編就為你整合咗兩大澳門水上樂園巴黎人水世界同埋澳門天浪淘園嘅攻略,一文介紹並比較兩者分別。

 

澳門水上樂園推介 | 澳門天浪淘園

澳門天浪淘園
@酒店官網

凡係入住澳門銀河旗下嘅6間酒店,姐係銀河酒店澳門Ritz-Carlton澳門悅榕莊JW萬豪酒店澳門大倉酒店同埋澳門百老匯,就可以嚟天浪淘園任玩。

澳門天浪淘園面積有7萬5千平方米咁大,最大賣點係全球最大嘅空中滑浪池,同埋全球最長嘅空中激流。空中滑浪池佔地8,000平方米,每日都會幾次人造浪時段,屆時滑浪池將會掀起1.5至2米高嘅人造海浪。至於空中激流,其實係一條全長575米嘅滑水道,其實水流並唔會好急,透明設計俾你一路隨波漂流,一路欣賞四周景色。

澳門天浪淘園_2
@sillynanomag

想齋chill嘅話,你可以乜都唔做,就咁攤喺連綿150米嘅人造沙灘,呢度嘅沙都係白沙,俾到你一種身處馬爾代夫嘅感覺!而且,天浪淘園有池畔餐廳同埋酒吧,玩到又攰又肚餓,就可以即刻醫肚,又唔需要進出天浪淘園園區,非常方便。你亦都可以漫步池畔空中花園,享受片刻寧靜,猶如身處繁華澳門中一處綠洲。

 

天浪淘園貼心位
除咗主要設施出色外,天浪淘園嘅其他配套設施亦都非常貼心。園內設有儲物櫃,方便你存放個人物品,等你可以放心咁玩得盡興。最貼心嘅係,更衣室入面有部快速乾衣機,可以俾你快速整乾件泳衣,咁就唔洗成身滴住水咁走嚟走去咁尷尬啦!而且,唔單止住宿期間可以進入園區無限暢玩,連check out之後都可以繼續玩到下晝2點,包你盡興而歸!

 

天浪淘園
地址:澳門路氹城聖德母灣大馬路澳門銀河2樓 (顯示地圖)
開放時間:星期一至日 09:00-18:00

 

澳門水上樂園推介 | 巴黎人水世界

巴黎人水世界
@酒店官網

巴黎人水世界連接住巴黎人酒店,就算唔係住巴黎人酒店都可以付費入場。巴黎人水世界佔地較天浪淘園細,遊樂設施都較傾向適合家庭式旅客。巴黎人水世界大致可以分為泳池區、遊樂區同埋休憩區。

遊樂區有唔同高度嘅滑水梯,成人或者青少年可以玩高12米嗰條滑水梯,而小朋友玩嘅滑水梯就只有5米高,非常貼心。遊樂區亦有一艘飛船,船上面有唔同機關,四周圍都有水槍、水管向住你噴水。而休憩區就有小食亭同埋座椅區,玩到攰玩到肚餓都唔洗擔心冇地方醫肚。

 

巴黎人水世界
地址:澳門巴黎人6樓 (顯示地圖)
開放時間:星期一至日 10:00-18:00

 

澳門水上樂園比較 | 天浪淘園 vs 巴黎人水世界
天浪淘園面積完勝巴黎人水世界,遊樂設施亦都明顯多好多,刺激度都高啲。但如果想帶埋小朋友一齊玩,巴黎人水世界就較合適,因為呢度嘅遊樂設施比較照顧到小朋友嘅需要,相對較安全。收費方面,假設你唔係澳門銀河旗下酒店或者巴黎人酒店嘅住客,正價收費如下:

 

天浪淘園全日通:
澳門幣468元起 (包含1位成人和1位6歲或以下小童);
澳門幣888元起 (包含2位成人和最多2位6歲或以下小童)

 

巴黎人水世界
澳門幣160元
家庭套票 (買3送1):每日澳門幣480元

澳門水上樂園比較
澳門天浪淘園 澳門巴黎人水世界
面積 較大 較細
設施 較多元化 較單一
水上樂園風格 動靜皆宜 較輕鬆,適合小朋友
價錢 較高 較相宜

 

總括而言,天浪淘園比較適合年輕人一班朋友去玩,而巴黎人水世界就較適合一家大細去玩,好難話呢兩個澳門水上樂園邊個比較好,畢竟都視乎你嘅遊樂需要。

 

📖延伸閱讀:【澳門自助餐攻略】澳門新酒店大評比2018 (連五大澳門美食推介)
📖延伸閱讀:【澳門快閃之旅】豪玩豪食澳門兩日一夜行程懶人包 (氹仔舊城區、大潭山滑草場)
📖延伸閱讀:【澳門聖誕自助餐】Top 4澳門酒店自助餐美食推介連澳門光影節打卡攻略!
📖延伸閱讀:【香港假期好去處】2019公眾假期請假攻略 (連長短線旅遊地點推薦)

 

Hotels.com酒店優惠Hotels.com酒店優惠