定期送上世界各地最新、最地道嘅旅遊資訊!

【高鐵旅遊】品味潮汕風味原產地!汕頭美食、潮州美食特集!

自從西九龍高鐵站開通之後,大家北上玩樂除咗去深圳之外都多咗好多選擇。而香港人嘅高鐵旅遊熱點一定要數潮汕地區,“食在廣州,味在潮汕” ,就等小編帶大家搭高鐵食盡潮州美食汕頭美食啦!潮州同汕頭非常近,一般都會一次過去曬兩個地方。

 

高鐵旅遊|汕頭美食推薦|杏花吳記牛肉火鍋

杏花吳記牛肉火鍋
@mafengwo.cn

去潮汕唔食返餐牛肉火鍋,都唔好意思話自己到此一遊。汕頭最出名嘅當然係海記同福和埕牛肉火鍋,而當地人就推介杏花吳記牛肉火鍋,牛肉超新鮮,湯底仲用牛骨煲足六個鐘添。

杏花吳記牛肉火鍋_2
@kknews.cc

潮汕人將牛肉部位分得好仔細,嫩肉、吊龍伴、匙柄、花趾等等,吊龍伴非常受歡迎,牛肉火鍋必食!帶些少肥肉極之香嫩滑口,入口完全無渣。

 

杏花吳記牛肉火鍋
地址:汕頭市杏花西路16號 (顯示地圖)
營業時間:09:30 – 21:00
電話:0754-87225148

 

高鐵旅遊|汕頭美食推薦|富苑飲食

富苑飲食
@yyyyyyinn

要數汕頭嘅潮州菜,點少得打冷,當中最有名氣一定係富苑飲食,《舌尖上的中國》都介紹過,不論是係百度定係大眾點評等網站,富苑飲食都高倨排行榜之上。

富苑堪稱潮汕打冷嘅百科全書,超豪華陣容嘅食材真係令人眼花撩亂。老闆一直堅持「最好的食材,最傳統的加工」,每日凌晨兩點親自採購,親自把關所有出品。

富苑飲食_2
@kknews.cc

隆江豬腳係呢到嘅第一招牌菜,一開始就係靠佢起家,肥而不膩係佢最吸引之處,女士們可以瘋狂補充骨膠原喇。

富苑飲食_3
@sohu.com

店面裝修雅緻,包廂、露天座位應有盡有,環境出乎意料地好。

 

富苑飲食
地址:汕頭市龍湖區金砂路朝陽莊北區12棟 (顯示地圖)
營業時間:17:30-02:00
電話:0754-88887683

 

高鐵旅遊|汕頭美食推薦|適口餐廳

適口餐廳
@blog.sina.com.cn

砂鍋粥都係汕頭美食之一,因為臨海關係,海鮮粥用料非常新鮮適口餐廳2000年開業,先後被CCTV央視節目《味道》及省市美食節目採訪,喺當地十分出名!

適口餐廳_2
@you.ctrip.com

用砂鍋現場熬製嘅粥可以搭配各式海鮮,唔加多餘調味品,完全靠食材嘅原汁原味。鮑魚鮮蝦粥,一鍋入面有4隻鮑魚,用料十足,簡單加少少胡椒粉就已經好好食!

 

適口餐廳
地址:汕頭市金平區百花東巷水仙園38棟1樓 (顯示地圖)
營業時間:11:00 – 02:00
電話:0754-83266356

 

汕頭住宿推薦|汕頭龍光喜來登酒店

汕頭龍光喜來登酒店
@喜來登官網

酒店地理位置優越,位處於市中心,行街食飯逛景點都好方便。酒店設有游泳池、健身中心,並設有會議室、兒童俱樂部及商務中心,滿足住客多方面嘅需求。

汕頭龍光喜來登酒店_2
@喜來登官網

房間好新淨光猛,空間較大,面且有唔少貼心設備。每間客房裝現代化得嚟,亦保留咗潮州特色風格,好用心。

 

汕頭龍光喜來登酒店
地址:汕頭市11街區龍光世紀大廈 (顯示地圖)
星級 | ★★★★☆
位置 | ★★★★☆
設施 | ★★★★☆
環境 | ★★★★☆
價格 | 查看價格

 

高鐵旅遊|潮州美食推薦|官塘兄弟牛肉店

官塘兄弟牛肉店
@mafengwo.cn

想試地道風味,小編建議大家去距離市區約20分鐘車程嘅官塘鎮,呢間火鍋店專賣鮮牛,屠宰場就喺附近,確保大家食到溫體牛。無論室內室外都人頭湧湧,皆因呢到嘅新鮮牛肉喺整個潮汕地區都好出名。

官塘兄弟牛肉店_2
@dianping.com

平時喺香港打邊爐,一碟牛肉閒閒哋都要二三百蚊,而呢到嘅牛肉二三十蚊就有交易,平到你唔信,而且碟碟都份量十足。必試「匙柄」,呢個部位好矜貴,一隻500公斤嘅黃牛,只有不足3公斤!入口肉質鮮嫩,牛味濃郁,食完真係返唔到轉頭。

 

官塘兄弟牛肉店
地址:潮州市湘橋區鳳東路官塘綜合農貿市場門口 (顯示地圖)
營業時間:11:00 – 22:00
電話:13631027322

 

高鐵旅遊|潮州美食推薦|胡榮泉

胡榮泉
@mafengwo.cn

胡榮泉創立於1911年,至今已經傳承至第三代,係好出名嘅潮州美食百年老店,連《舌尖上的中國》都嚟過拍攝。

胡榮泉_2
@mafengwo.cn

呢到最受歡迎嘅係一種潮州著名小食「鴨母捻」,鴨母捻係一種甜嘅糯米湯圓。同湯圓喺外形上有啲分別,比起普通湯圓大粒啲,形狀唔係全圓而係有個尖角,即係“捻”嘅效果,望落好似鴨子漂浮喺水面而得名。鴨母捻加上鵪鶉蛋、銀耳、蓮子、百合、白果、綠豆等配料,非常豐富。

 

胡榮泉
地址:廣東省潮州市湘橋區太平街140號 (顯示地圖)
營業時間:09:00-19:00
電話:0768-2256831

 

潮州住宿推薦|載陽客棧

載陽客棧
@kknews.cc

想感受傳統潮州文化,不妨試吓潮州第一間由清代民居修復而成嘅客棧,前座係典型潮州「四點金」古民居府第;後院閣樓係清末騎樓二層建築。傳統「四點金」格局同北京嘅四合院有啲相似,以前只有顯貴家庭先可以建造㗎。位置唔錯,距離開元寺、廣濟橋等熱門景點只係5分鐘路程,十分方便。

載陽客棧_2
@tripadvisor.com.hk

客棧好巧妙地保存咗潮州清代民居嘅風貌,同時增添咗好多現代化設施,唔駛擔心住唔慣。房間唔算好大,但係乾淨整潔,設備齊全,甚至有埋小米電視同智能馬桶𠻹!

 

載陽客棧
地址:潮州市太平路載陽巷 15 號 (顯示地圖)
星級 | ★★★☆☆
位置 | ★★★★☆
設施 | ★★★☆☆
環境 | ★★★★☆
價格 | 查看價格

 

📖延伸閱讀:【深圳火鍋】深圳打邊爐餐廳推薦 (各大熱門深圳商場大比併)
📖延伸閱讀:【深圳美食攻略】編輯私藏隱世美食!深圳酸菜魚餐廳環境、味道、價格大評比!
📖延伸閱讀:【深圳必食】編輯私心推 — 隱世深圳牛肉火鍋餐廳連必食部位推薦!
📖延伸閱讀:【深圳cafe推薦】5大深圳下午茶餐廳及Cafe推薦!(連深圳地鐵景點一日遊路線懶人包)

 

Hotels.com酒店優惠Hotels.com酒店優惠