定期送上世界各地最新、最地道嘅旅遊資訊!

【檳城必買】檳城手信特集!嚴選超人氣檳城白咖哩麵、檳城蝦麵!

📖延伸閱讀【檳城美食地圖】當地人教路:檳城美食、檳城壁畫打卡點、熱門檳城景點推薦!

 

檳城必買手信 Top 7|Aik Cheong益昌拉茶

Aik Cheong益昌拉茶
@eklecia_corner

拉茶類似香港嘅奶茶,但港式嘅茶膽較濃,而拉茶就會比較易入口。相信唔少朋友都聽過BOH嘅拉茶,但益昌嘅拉茶都相當出名,唔少當地人都大力推介!而益昌最特別嘅就緊係薑味拉茶啦,裡面加入咗生薑粉,令每啖都會有淡淡嘅薑味同辛辣感,充滿香料嘅獨特風味。

 

檳城必買手信 Top6|甘草豆蔻

甘草豆蔻
@foodconnection.com.my

檳城盛產香料,而豆蔻就係檳城嘅特產之一,主要種植喺浮羅山一帶。由於豆蔻嘅藥用價值非常高,所以被廣泛應用,整成唔同嘅產品。加上當地人醃製技巧成熟,會將新鮮嘅生果、豆蔻拎去醃製,保持原來嘅鮮味之餘,亦可以存放更耐。檳城人非常推介醃製咗嘅豆蔻,酸酸甜甜,爽口開胃,仲帶有少少豆蔻嘅香味,做零食一流!

 

檳城必買手信 Top5|馨香淡汶餅

馨香淡汶餅
@cheng_neanderthal

淡汶餅喺檳城嘅傳統小食,外型的的骰骰,類似香港嘅蛋黃酥。淡汶餅主要用綠豆沙、砂糖同紅蔥頭製成,估唔到嘅係豆沙同炸蔥頭異常哋夾,口感濃郁,味道咸香。而外層嘅酥皮香脆鬆化,帶有芝麻香,真係令人忍唔住一嚿接一嚿!義香淡汶餅以人手製造,加上無添加防腐劑,所以存放限期只有一個星期到,開咗之後就要盡快食用喇。

 

檳城必買手信 Top 4|義香麻油

義香麻油
@fenghegarden

義香喺檳城當地一間好出名嘅百年老字號,佢哋嘅麻油到依家都仍然保留人手工序,有專人負責篩選芝麻,古法炮製,造出嚟嘅芝麻油味道香濃、「麻而不油」,連蘇施黃都點名激讚!加上老闆堅持剩係用上等嘅芝麻,提煉出嚟嘅油非常純正,仲有活血補氣嘅功效,所以唔少當地人都會買比女士進補咖! 近來仲有研究指出芝麻油可預防口腔癌及喉癌,關心健康嘅你點可以唔買返枝做手信呢?

 

義香餅家 Ghee Hiang
地址:216, Macalister Road, Penang (顯示地圖)
營業時間:09:00 – 21:00 全年無休

 

📖延伸閱讀:【吉隆坡自由行】亞羅街夜市、茨廠街必食懶人包!馬來西亞吉隆坡美食特集

 

檳城必買手信 Top 3|Beryl’s朱古力

Beryl’s朱古力
@niahomestaykl

馬來西亞係亞洲主要嘅可可製成品國家,仲喺東部擁有自己嘅可可園,去到咁出名朱古力嘅檳城,點可以唔試吓Beryl’s嘅朱古力呢?Beryl’s早喺1995年成立,研發出香滑嘅朱古力,再加入當地各種新鮮嘅水果,有榴槤、芒果、士多啤梨、菠蘿等等口味,無論喺國內定國外都享譽盛名。在咁多款之中呢,小編就最推薦榴槤味,榴槤夾心非常濃郁,加上牛奶調配嘅朱古力,唔會太甜之餘味道又有層次,認真好食!Beryl’喺Gurney同Penang Sentral Outlet都分別設有專門店,甚至Jusco呢啲大型超市都可以搵到。

 

Beryl’s Chocolate & Confectionery
地址:L3-05, Terminal Pengangkutan Penang Sentral, Jalan Bagan Dalam, Bagan Dalam, 12100 Butterworth, Penang (顯示地圖)
營業時間:10:00 – 22:00 全年無休
網址:http://www.berylschocolate.com.my/

 

檳城必買手信 Top 2|Ibumie Har Mee檳城蝦麵

Ibumie Har Mee檳城蝦麵
@anakmieinstan

檳城蝦麵,當地人通常會叫佢做福建麵。蝦麵,顧明思義指運用咗大量蝦,再加入紅辣椒煮成嘅湯頭。由於早期喺檳城生活嘅福建人,漁穫多數上繳日軍,於是當地漁民就利用蝦頭、蝦殼炒香煮湯,用唔同嘅香料調配,再加入蕹菜同麵整成美食,後來就慢慢發展成受歡迎嘅檳城特色小食。而Ibumie依款嘅蝦麵麵底爽滑厚實,湯底仲加入咗蝦膏,蝦味突出,鮮甜得嚟後勁帶辣,完全可以媲美檳城街頭嘅味道。

 

📖延伸閱讀:【新加坡肉骨茶特集】必買新加坡手信、必試肉骨茶店連膠囊旅館住宿

 

檳城必買手信 Top 1|MyKuali益福檳城白咖哩麵

MyKuali益福檳城白咖哩麵
@joyce_lai_728

講到檳城必買,又點少得2014年即食麵排行榜第一嘅檳城白咖哩麵呢。益福係馬來西亞知名嘅品牌,有33年造麵歷史,佢哋小麥麵底非常出色,彈牙又有咬口,口感類似韓國辛辣麵。至於湯底方面就以馬來西亞馳名嘅白咖喱為主,由於加入咗大量嘅奶,大大減輕辣味,質地亦會會較為厚身,呈奶白色,所以又被稱之為白咖哩。除此之外,湯底仲加入咗蝦乾、紅蔥、檸檬香茅、高良薑、大蒜、乾辣椒等等嘅香料,層次豐富得嚟又香濃惹味,啱曬為食又唔太食得辣嘅朋友仔!

 

📖延伸閱讀:【馬來西亞必買手信】吉隆坡手信買咩好?當地人推薦八大馬來西亞手信!
📖延伸閱讀:【馬來西亞自由行】吉隆坡必去景點3日2夜行程攻略!
📖延伸閱讀:【沙巴潛水懶人包】馬來西亞沙巴local tour點樣揀?連超抵住沙巴villa推薦!
📖延伸閱讀:【沙巴自由行】2日1夜沙巴神山行程攻略!(連神山攻頂注意事項)

 

Hotels.com酒店優惠Hotels.com酒店優惠