定期送上世界各地最新、最地道嘅旅遊資訊!

【桂林美食篇】桂林夜市必食Items + 桂林手信特產必買推薦!(桂林辣椒醬點揀好?)

 

除咗美景,桂林美食亦都非常出名。小編就為你精選桂林夜市嘅必食之選,仲同場加映必買桂林手信,順便教埋你揀出曬名嘅桂林辣椒醬!

 

桂林美食推介 | 桂林夜市必食Items | 桂林米粉

 桂林米粉
@studycli

桂林米粉可以話係頭號桂林美食,出名到中國南方各城市都見到佢嘅踪影,香港當然都有,但一場嚟大桂林梗係要食正宗地道嘅桂林米粉啦!

傳統桂林米粉口感比較煙韌,當地人鍾意就咁乾拌米粉,通常以肉類為主要配菜,另加蔥花同酸菜撈勻就食得喇!簡單好味,去夜市嘅時候食亦都方便一路行一路食。除咗乾拌米粉,鹵水桂林米粉亦都非常受歡迎。精粹在於佢嘅鹵水湯底,米粉索曬鹵水嘅精華,非常香濃。傳統嘅桂林米粉之所以用鹵水為湯底,其實係因為呢度嘅鹵水都加咗祛濕藥材。廣西、雲南一帶濕氣重,自然需要呢種補身嘅鹵水啦!

 

桂林美食推介 | 桂林夜市必食Items | 啤酒魚

啤酒魚
@jjhoooooooooo

啤酒魚係另一道馳名嘅桂林美食,嚟桂林冇試過啤酒魚的話,就等於冇嚟過一樣!啤酒魚煮法大致上就係用啤酒去燜鯉魚,或者其他當地土產淡水魚。首先,廚師會將鯉魚炸到所有魚鱗都脆卜卜,非常香口,之後可以直接食埋。然後再加入啤酒、醬油同埋辣椒、蔥等香料燜煮,酒精揮發後,只剩下啤酒香味,同嫩滑魚肉出奇地夾。或者有人會嫌鯉魚多骨,太麻煩,呢度好多啤酒魚都可以改用其他少骨啲嘅魚去整,例如劍骨魚。桂林有好多啤酒魚餐廳,連鎖店有大師傅啤酒魚、劉姐啤酒魚同埋西街傳人等,宜家呢道名菜亦都走出餐廳,喺夜市都食得到!

 

桂林美食推介 | 桂林夜市必食Items | 荔浦芋扣肉

荔浦芋扣肉
@jtcg91

梅菜扣肉就食得多,芋頭扣肉你又食過未呢?荔浦芋扣肉係一道非常邪惡嘅菜式,但又非常惹味,令人忍唔住不停咁食。做法同梅菜扣肉大同小異,先將五花肉稍微淥熟,然後再搽上醬汁,之後炸至皮肉呈金黃色。而芋頭就切條,炸至金黃色,再一層五花肉,一層芋頭咁排喺碟度,然後大火蒸至熟透。同啤酒魚一樣,呢道菜唔單止可以喺餐廳同酒樓食到,有啲夜市檔攤都有得賣!

 

桂林美食推介 | 桂林夜市必食Items | 桂林鬆糕

桂林鬆糕
@uuguilin

桂林鬆糕主要材料係糯米粉同黃糖,甜香鬆軟,係桂林人傳統節慶時不可或缺嘅甜品。喺夜市,唔難見到有小食檔售賣桂林鬆糕,做飯口甜品就最適合。有啲造工較複雜嘅桂林鬆糕,係會加埋土產芋頭,令口感更綿密、實淨,甜味方面亦都唔只得黃糖味,層次較豐富。

 

桂林手信推介 | 桂林辣椒醬

桂林辣椒醬深受香港人歡迎,無論用嚟炒飯,點蘿蔔糕或者炒麵,都可以用絕配嚟形容。佢嘅特色就係味道唔係死辣,而係糅合咗唔同嘅香料辣味,非常有層次。桂林辣椒醬除咗用辣椒為主要材料,仲有上豆瓣醬同埋蒜頭,辣味因而帶鹹、鮮味。小編為你搜羅幾款受當地人歡迎嘅桂林辣椒醬,有機會去桂林玩嗰陣,不妨買幾樽返香港自用或者做手信!

桂林辣椒醬推薦
桂林花橋牌

桂林辣椒醬
@花橋牌官網

要推薦桂林嘅土產辣椒醬牌子,首推桂林花橋牌。佢有50多年製造辣椒醬嘅歷史,而且種類越來越多,除咗原味,仲有蒜蓉辣椒、豆豉、腐乳味等,係當地人最鍾意食嘅辣椒醬牌子之一。

挑選辣椒醬冇既定準則,純粹從個人口味出發就可以。傳統桂林辣椒醬辣中帶鹹,但現今已經有多種辣中帶少少甜嘅選擇。雖然辣椒醬本身已經非常多用途,但仍然可以就你要煮嘅菜式細分邊種辣椒醬適合一啲。例如送飯、炒飯或者炒菜就可以用味道偏重嘅辣椒醬;用嚟沾醬配糕點(例如蘿蔔糕)就可以揀味道偏淡或者甜嘅辣椒醬;宜家甚至有牌子推出咗牛肉醬油味嘅辣椒醬,適合打邊爐時用嚟點肉類。

 

桂林手信推介 | 腐乳

腐乳
@網上商城

唔講唔知,原來腐乳都係桂林特產之一,與辣椒醬同埋三花酒並列為桂林三寶。桂林腐乳主要有兩種,分別係辣椒腐乳同埋五香腐乳。腐乳入面嘅豆腐切成小方塊,每塊大約5至6cm,索曬腐乳汁嘅精華,送飯一流。桂林腐乳講求辣、鹹、香三者平衡,而且豆腐表皮色澤要呈橙黃色,製造過程絕不簡單。

 

桂林手信推介 | 三花酒

三花酒
@kocha0505

桂林三寶最後一寶就係三花酒。三花酒係一種大米蒸餾酒,傳統三花酒採用漓江嘅水釀製,清澈透明,一開蓋已經聞到酒香。三花酒入口唔會太啃,算係比較溫和,易入口,而且仲有淡淡嘅回甜。不過三花酒酒精濃度起碼有55度,飲嘅時候要適可而止呀!

 

📖延伸閱讀:【深圳過夜】高顏值高CP—嚴選6大深圳機場酒店!連最新深圳地鐵遊玩文青秘點推介!
📖延伸閱讀:【深圳火鍋】深圳打邊爐餐廳推薦 (各大熱門深圳商場大比併)
📖延伸閱讀:【深圳酒店邊間好】深圳酒店邊際泳池大評選!5大深圳靚酒店推介2019!
📖延伸閱讀:【深圳美食攻略】編輯私藏隱世美食!深圳酸菜魚餐廳環境、味道、價格大評比!

 

Hotels.com酒店優惠Hotels.com酒店優惠