定期送上世界各地最新、最地道嘅旅遊資訊!

【四國漫活小島】 高松小豆島交通、景點、美食攻略大全!

小豆島係瀨戶內海嘅第2大島嶼。因為近年舉行嘅瀨戶內海藝術祭,令到愈嚟愈多人認識到小豆島!呢度充滿地中海風情,風景優美,連宮崎駿動畫《魔女宅急便》真人版都喺度取景,再加上呢度有好多特色美食,真係好值得嚟㗎!就等小編帶你地發掘小豆島景點同美食,再教埋你小豆島交通攻略啦!

 

四國漫活小島|高松小豆島交通攻略|高松港前往小豆島

高松港前往小豆島
@setouchiexplorer

由高松港渡輪碼頭出發,乘搭渡輪就可以去到小豆島上3個港口,分別係土庄港、池田港同草壁港。建議大家可以揀去土庄港嘅渡輪,因為一落船就可以轉乘小豆島定期觀光巴士。來回船飛嘅成人價錢係¥1,380,而6-12歲小童就係¥680,大家可以直接喺渡輪碼頭買船飛,大約1小時嘅船程就會到達小豆島。船班時間可以直接上官方網站睇。

 

四國漫活小島|高松小豆島交通攻略|小豆島上交通

小豆島上交通
@veltra

其實小豆島上嘅主要景點搭公共巴士就可以到達,但問題係班次唔多,而且路線比較複雜。所以小編就建議大家坐小豆島定期觀光巴士,可以帶你去晒所有小豆島必去景點。不過觀光巴士每日9:45am就會出發,為咗趕上巴士,大家就要由高松港搭8:02am班次嘅船前往小豆島。雖然觀光巴士車飛可以喺渡輪碼頭買,但為免滿坐,建議大家提早7日前上官方網站預購,價錢係成人¥4,100,小童¥2,050 (只供參考)。

 

四國漫活小島|高松小豆島景點推薦|寒霞溪

寒霞溪
@TravelBar

位於瀨戶內海國立公園入面嘅寒霞溪係全日本最靚嘅3大溪谷之一,亦係日本百大風景名所之一。由於1,300萬年前嘅火山運動,令呢度嘅岩石受到地殼變動同侵蝕影響,形成咗造型奇特嘅岩石群同斷崖,加上綠樹林蔭,構成如畫般嘅絕美景色!

寒霞溪_2
@setouchifinder

每年秋天呢度都會佈滿楓葉,美不勝收,係四國嘅人氣賞楓地點!大家仲可以乘搭纜車,由高空俯瞰,將一片紅色嘅楓葉海盡收眼底!

 

寒霞溪纜車
地址:〒761-4433 香川県小豆郡小豆島町神懸通乙168 (顯示地圖)
營業時間每日08:30 – 17:00 ※會因季節而有所調整
來回車票費用 (只供參考)成人 ¥1,760;小童 ¥8,00
網址http://www.kankakei.co.jp/

 

四國漫活小島|高松小豆島景點推薦|天使之散步道

天使之散步道
@how_howl

天使之散步道其實係一條喺潮退嘅時候先會出現嘅沙洲步道。據聞只要情侶拖住手一齊行過天使之散步道,感情就會長長久久,所以呢度亦係戀人聖地!咁浪漫又夢幻嘅天然奇景,又點可以錯過?不過想睇呢條天使之散步道,就要留意小豆島官網上每日潮退同潮漲嘅時間,因為散步道一日只有2次潮退嘅時候先會出現㗎!

天使之散步道_2
@melodyliu0830

行完沙路仲可以去埋弁天島上嘅約束之丘展望台,上面俯瞰天使之散步道嘅全景,展望台上仲有一座幸福之鐘,記得要同愛人一齊敲響佢喇!

 

天使之散步道
地址:〒761-4661 香川県小豆郡土庄町銀波浦 (顯示地圖)

 

四國漫活小島|高松小豆島景點推薦|橄欖公園

橄欖公園
@matcha-jp

小豆島嘅氣候同地中海相似,溫和宜人,而且降雨量唔多,非常適合種植橄欖,所以呢度出產嘅橄欖製品係全日本之冠!小豆島嘅橄欖樹主要集中喺橄欖公園內,一片綠油油嘅景色,加上四周充滿希臘風格嘅建築物,不禁令人愛上!大家嚟到呢度,可以搵下有冇心型嘅橄欖葉,搵到嘅話可以摘落嚟,然後喺橄欖紀念館買張書籤裱起佢㗎!

橄欖公園_2
@olive_pk

橄欖園內仲有一個必去嘅打卡位,就係米洛斯白色風車!呢座白色風車係希臘米洛斯島送比小豆島嘅禮物,而且仲係真人版《魔女宅急便》嘅其中一個場景。為咗比大家重現電影場景,橄欖紀念館仲提供咗掃把比大家免費租借,扮小魔女琪琪影相!咁具代表性,又咁有童話feel嘅地方,一定要嚟啦!

 

橄欖公園
地址:〒761-4434 香川県小豆郡小豆島町西村甲1941-1 (顯示地圖)
營業時間每日08:30 – 17:00 ※會因季節而有所調整
網址http://www.olive-pk.jp/

 

四國漫活小島|高松小豆島美食推薦|橄欖油雪糕 

橄欖油雪糕
@Yunique
橄欖油雪糕 ¥300

嚟到小豆島,橄欖公園係必去景點,而橄欖油雪糕就係必食美食!一開頭聽到用橄欖油製成嘅雪糕,其實都有啲抗拒,覺得會好奇怪。但原來橄欖嘅獨特香味,加上奶滑嘅雪糕,味道甜得嚟,又有好清香嘅感覺。橄欖油雪糕仲要係小豆島限定,其他地方冇得食㗎,冇理由唔試吓掛! 

 

橄欖公園紀念館
地址:〒761-4434 香川県小豆郡小豆島町西村甲1941-1 (顯示地圖)

 


四國漫活小島|高松小豆島美食推薦|OLIVAZ

OLIVAZ
@lifemagazine

小豆島上有一間人氣地中海料理餐廳OLIVAZ,OLIVAZ係西班牙文橄欖山嘅意思,真係好切合小豆島呀!餐廳位於橄欖公園內,橄欖紀念館嘅第2層,設計簡約舒適,而且有廣闊嘅景觀,最啱就係喺橄欖公園玩到攰,喺度嘆返個午餐。 

OLIVAZ_2
@haruna299
Olivaz chilindron rice ¥1,300

人氣必點就一定係西班牙鄉土料理Olivaz chilindron rice,用咗小豆島出產嘅雞肉、蕃茄、蔬菜、香草燉煮而成,配飯真係一流! 

 

OLIVAZ
地址:〒761-4434 香川県小豆郡小豆島町西村甲1941-1 (顯示地圖)
營業時間星期三至日 08:30 – 17:00
網址http://www.olive-pk.jp/eat/olivaz.html

 

四國漫活小島|高松小豆島美食推薦|Hishio

Hishio
@setouchifinder

除咗橄欖之外,醬油都係小豆島嘅名產,所以嚟到小豆島就一定要去食醬油拉麵。Hishio拉麵店採用小豆島出品嘅特級醬油,加上每日捕獲嘅鯷魚,熬製出濃郁嘅湯底!不過小編最欣賞嘅就係佢嘅麵質好彈牙,掛湯功力一流!為咗中和醬油嘅鹹味,仲加入咗柚子皮,食起嚟有一種清爽嘅感覺,真係無得輸! 

 

Hishio
地址:〒761-4121 香川県小豆郡土庄町甲24−18 (顯示地圖)
營業時間星期四至二 11:00 – 14:00,17:00 – 21:00
網址http://www.hishiosoba.com/

 

📖延伸閱讀:【去旅行用日本app】超實用!日本旅遊app + 日本交通app推薦
📖延伸閱讀:【日本必食】終極嚴選京都、大阪、沖繩、東京必食特集2018!
📖延伸閱讀:【長崎自由行】終於可以直飛長崎!4日3夜長崎景點行程+必食餐廳+住宿懶人包!
📖延伸閱讀:【廣島自由行】廣島+大久野島+宮島一日遊連廣島必食廣島蠔餐廳推薦!

 

Hotels.com酒店優惠Hotels.com酒店優惠