定期送上世界各地最新、最地道嘅旅遊資訊!

【飲野好去處】編輯高質推薦!五大特色香港酒吧推薦大全

香港人工作忙碌,生活節奏急速,摸摸酒杯底慰藉心靈係一眾都市人嘅指定動作。香港作為夜貓嘅天堂,酒吧多不勝數。小編精選咗5間高質特色香港酒吧推薦畀大家,無論係三五知己輕鬆傾計,抑或係一班好友派對聚頭都非常適合。睇完小編推介嘅飲野好去處,一齊體驗精彩嘅香港夜生活啦!

 

飲野好去處 |何蘭正

何蘭正
@65peel

想體驗諧趣香港味,相信何蘭正一定唔會令你失望。店名何蘭正取自廣東話粗口諧音 (你懂的)。喺中西文化融合嘅蘇豪區,有別於其他歐美風格酒吧,何蘭正散發出濃濃嘅土炮地踎香港氣息!

何蘭正_2
@65peel

巨大嘅霓虹燈寫住「鬼佬涼茶」四字,滿滿嘅港式幽默,同時亦係店內最受歡迎、最標誌性嘅打卡影相位。綠白瓷磚配合灰牆、電線外露嘅燈泡、鑄鐵櫈、大木枱、鐵製窗花欄等等,每一處空間都有濃濃嘅懷舊老香港風情。

何蘭正以香港本土手工啤酒同埋特色啤酒為主,另外仲有一系列本地新鮮自釀嘅生啤,十幾種款式任君選擇。

 

地址:香港中環蘇豪卑利街65-65A號地舖
交通:港鐵上環站E1出口步行約11分鐘
營業時間:星期一至四 16:00 – 00:00;星期五至六 16:00 – 02:00;星期日 14:00 – 00:00
電話:2342 2224

 

飲野好去處 |Dr.Fern’s Gin Parlour

Dr.Fern’s Gin Parlour
@laimark_

Dr. Fern’s Gin Parlour係一間型格「地下酒吧」,位於置地廣場地庫,門口位置非常隱閉,好容易就行過龍。而寫住Waiting Room 嘅嗰道門其實係假門嚟,裡面較細嘅嗰一道門先係真正嘅入口!

Dr.Fern’s Gin Parlour_2
@drfernshk

Dr. Fern’s Gin Parlour以一間老式藥劑診所作為整體設計主題,周圍擺放咗木櫃桶同埋黑膠DJ櫃台,牆紙同花卉擺設都經過精心設計,成個空間令綠色植物同燈光交織,加上手工刺繡同埋招牌式嘅獨有印花圖案,環境非常優美復刻。

酒吧由獲獎無數嘅首席調酒師Gerry Olino主理,以氈酒 (Gin) 為主,店內更有多達250款收藏,而且更曾勇奪「亞洲50最佳酒吧2017」之一嘅殊榮,鍾意飲氈酒嘅朋友一定唔會失望!

 

地址:中環皇后大道中15號置地廣場地庫B31A號舖
交通:港鐵上環站G出口步行約3分鐘
營業時間:星期一至四 12:00 – 01:00;星期五至六 12:00 – 02:00;星期日 12:00 – 01:00
電話:2111 9449

 

飲野好去處 |J.Boroski

J.Boroski
@jboroskihongkong

J.Boroski隱藏喺中環荷李活道嘅小巷之中,而且冇門牌,非常神秘。推開大門之後見到嘅唔係五光十色嘅絢爛世界,而係鑲滿甲蟲裝飾嘅酒吧。呢度嘅甲蟲裝飾全部都係真標本,有昆蟲恐懼症嘅人就要小心喇!

呢間酒吧只招待獲邀嘅客人,而且無登記地址,亦都無menu。呢套經營方式喺曼谷嘅J.Boroski非常成功,一開業就即刻成為城中最受歡迎嘅酒吧之一。同曼谷店一樣,香港店都係由Ashley Sutton設計。設計重點係弧形嘅天花板,其中一半以大型嘅犀牛甲蟲裝飾,營造出神秘又俐落嘅氛圍,散發獨特迷人嘅魅力。 

J.Boroski_2
@ jboroskihongkong

呢度所有飲品都係根據客人嘅喜好調製,製作你專屬嘅飲品,好似帶你探索一個前所未知嘅雞尾酒世界咁。

 

地址:中環荷里活道1-13號華懋荷李活中心地庫
交通:港鐵香港站C出口步行約8分鐘
營業時間:星期一至三 18:00 – 02:00;星期四至六 18:00 – 03:00;星期日 18:00 – 02:00
電話:2603 6020

 

飲野好去處 |Ping Pong 129 Gintonería

Ping Pong 129 Gintonería
@grace.com.tw

Ping Pong 129 Gintoneria,前身真係一個乒乓球室比會員打波。酒吧老闆保留咗原本嘅名、招牌、標語同埋紅色鐵門,睇落就好似一間好old school嘅乒乓球室咁,相信大家經過都唔會知道佢其實係一間地下酒!

酒吧樓底極高,店內並無華麗嘅裝潢,反而係簡約嘅水泥牆,營造出頹廢工業風,好似走入咗紐約下城區嘅酒吧一樣。

Ping Pong 129 Gintonería_2
@missj1227

另外,吧台後擺滿成面牆嘅玻璃酒樽,同埋寫著「鍛鍊身體」嘅霓虹燈,係每個到酒吧嘅客人都必定打卡嘅焦點!

 

地址西環西營盤第二街129號南昌樓
交通:港鐵西營盤站B3出口步行約4分鐘
營業時間:星期二至日 18:00 – 23:30
電話:9158 1584

 

飲野好去處 |The Old Man

The Old Man
@theoldman_hk

海明威嘅經典作品《老人與海》相信大家都耳熟能詳,而The Old Man嘅設計概念就係嚟自呢位作家。酒吧由Agung Prabowo、James Tamang同埋Roman Ghale三位高手掌舵,自開幕以嚟已經相當受歡迎,仲勇奪「亞洲50間最佳酒吧」排行榜嘅第5名,同埋喺2018年名列「世界最佳酒吧」十大位置,實力非凡!

The Old Man_2
@ theoldman_hk

酒吧佔地1,000平方呎,設計獨特,呈英文字母「I」字形。 Menu上所有雞尾酒都係以海明威嘅經典作品命名,酒吧更以裝修剩餘物料製作咗海明威嘅肖像作為設計重點,非常切合主題。

 

地址中環蘇豪鴨巴甸街37號低座地下
交通:港鐵上環站E1出口步行約10分鐘
營業時間:星期一至六 17:00 – 02:00
電話:2703 1899

 

Hotels.com酒店優惠Hotels.com酒店優惠