定期送上世界各地最新、最地道嘅旅遊資訊!

【香港櫻花2019】香港賞櫻攻略 — 超方便!編輯嚴選5大香港櫻花秘點!

想睇櫻花?唔一定要飛去日本、韓國嘅,香港都一樣有櫻花睇㗎!小編精選咗5大香港櫻花秘點俾大家,有齊交通資訊、賞櫻資料、拍攝穿搭技巧等等,喺香港賞櫻都一樣可以玩得開心玩得盡興!

 

香港櫻花地點|香港單車館公園

香港單車館公園-櫻花
@香港單車館公園官網
講到香港櫻花,位於將軍澳嘅香港單車館公園相信會係唔少朋友嘅選擇。香港單車館自2014年起用,係香港首座擁有單車賽道嘅室內體育館,交通方便; 而單車館公園佔地達5.3公頃,入面仲有兒童遊樂場、各類康樂設施,同埋大草地可以野餐或者休息,特別適合一家大細嚟玩足全日!公園內種植櫻花樹的位置主要有2個,包括單車館旁邊以及中央草坪近將軍澳的公園旁。

 

香港單車館公園-櫻花_2
@canon.com.hk
將軍澳單車公園主要係種植咗台灣品種鐘花櫻桃,又名為山櫻花,仲有日本品種嘅吉野櫻。台灣山櫻嘅色彩較日本吉野櫻鮮艷,山櫻嘅花瓣偏粉紅,而吉野櫻就較為雪白。每年初春時份,櫻花盛開,都吸引唔少人嚟散步賞櫻㗎。

 

香港單車館公園
地址:將軍澳寶康路105-107號 (顯示地圖)
交通:港鐵坑口站B出口/將軍澳站A出口步行約 10 分鐘
開放時間:24小時
入場費用 (只供參考):免費
官網:https://www.lcsd.gov.hk/tc/parks/vdp/index.html

 

香港櫻花地點|長洲關公忠義亭

長洲關公忠義亭
@canon.com.hk
講到香港櫻花地點,長洲一定係熱門之一!1975 年,由長洲關公忠義亭值理會主席何炳釗引入台灣山櫻樹,種喺廟外兩旁,起初有 67 棵,係香港最大型嘅櫻花群。因為土壤問題,又經歷多年風吹雨打,近年櫻花樹數量大減,但係每年春季櫻花綻放之時,依然有唔少遊人慕名而至㗎。

 

長洲關公忠義亭_櫻花
@canon.com.hk
台灣山櫻樹與常見嘅緋寒櫻相似,花形細小密集,顏色呈桃紅,開花時全株無葉,花期大概係每年 2 月中下旬至 3 月上旬。Facebook 上有有心人整咗個長洲櫻花情報專頁,同大家 update 開花情況,大家記得去睇睇喇。


長洲魚蛋@ctyingz
一場嚟到,除咗賞櫻當然都要遊覽埋長洲先算圓滿!知名景點有張寶仔洞同五行石,當然唔少得長洲最出名嘅美食,芒果糯米糍同大大粒魚蛋啦!

 

長洲關公忠義亭
地址:長洲觀音灣路 (顯示地圖)
交通:到達長洲後,沿東灣路一直走,再右轉至警署徑,然後沿斜坡走約8分鐘
開放時間:24小時
入場費:免費

 

香港櫻花地點|嘉道理農場

嘉道理農場
@hkeeu.org
每臨近農曆新年就充斥賞花之人嘅嘉道理農場,當然都係小編推介嘅香港櫻花秘點之一啦!
嘉道理農場暨植物園佔地148公頃,當中逾2,200種獲記錄嘅植物,花卉分別喺唔同月份盛開。


嘉道理農場-櫻花@vjmedia.com.hk
其中有230棵鐘花櫻桃,主要種喺上山區嘅胡挺生先生紀念亭周邊,有幾棵特別高大,開花時紅噹噹,影相打卡一流!

 

嘉道理農場-櫻桃開花指數

@@嘉道理農場暨植物園 Facebook
而且農場仲非常貼心,喺Facebook專頁上推出鐘花櫻桃開花指數,等市民可以及時賞櫻,唔會錯過「花見」嘅時刻。一般嚟講花期只有大約兩星期,大家記住要密切留意嘉道理農場Facebook 專頁嘅最新消息呀!

 

嘉道理農場-櫻花_2
@嘉道理農場暨植物園 Facebook
沿住山路由山下行上山頂,沿途就會見到隱藏喺路邊嘅鐘花櫻桃喇。

 

嘉道理農場暨植物園
地址:大埔林錦公路 (顯示地圖)
交通:巴士64K;提供10個車位可供遊人網上預約,名額有限,先到先得
開放時間:9:30am-5pm ( 4pm後謝絕遊客入場)
入場費:$30
官網www.kfbg.org.hk

 

香港櫻花地點|鰂魚涌公園

鰂魚涌公園
@carmenkennylukeyip
位於市區嘅鰂魚涌公園亦係近年受歡迎嘅香港賞櫻地點,港島區嘅市民唔駛山長水遠走出去就可以欣賞綺麗嘅櫻花喇!鰂魚涌公園近東廊天橋下跑步徑嘅轉彎位,種咗有大約十幾棵富士櫻,吸引唔少少攝影愛好者及市民拍照。


鰂魚涌公園-櫻花@francis.swiss_1300
種植櫻花嘅位置就喺唔少跑步人士都會駐足觀賞㗎。公園內第一棵富士櫻,喺2014 年香港花卉展覽東區園圃中展出過然後被移植於鰂魚涌。結果呢棵富士櫻大受市民歡迎,康文署於是喺 2015 年 5 月再喺公園種多 11 棵富士櫻,去營造一個特色景區俾市民觀賞,而家就成為香港其中一個賞櫻熱點喇。


鰂魚涌公園-櫻花_2@francis.swiss_1300
富士櫻,原本係富士山山麓、箱根等地嘅原生品種,故此而命名。富士櫻唔會好高、花形單瓣而小,開粉紅或者白色小花,又名豆櫻。因為佢插枝都可以生長開花,所以有時都會被栽種喺盆中欣賞。

 

鰂魚涌公園
地址:鰂魚涌海堤街 (顯示地圖)
交通:從太古地鐵站 E 出口,直行至太古城中心第四座公園出口,到了海旁向北角方向約 1 分鐘;或鰂魚涌太古坊出口行至海旁,往太古城中心方向,就可見到櫻花。
開放時間:24小時
入場費:免費
官網www.lcsd.gov.hk/tc/parks/qbp/index.html

 

香港櫻花地點|大埔海濱公園

大埔海濱公園
@metropop.com.hk
大埔海濱公園係全香港最大嘅公園,園內除咗有大埔地標香港回歸塔之外,塔旁嘅花海會因應季節種植唔同嘅鮮花,例如雀尾花、矮牽牛、萬壽菊、鳳尾球等,每年都吸引好多愛花人士同攝影發燒友㗎!

 

大埔海濱公園-櫻花
@normanswords
而呢到嘅櫻花品種同樣係鐘花櫻桃,喺公園近大草地處有十幾棵櫻花樹,櫻花盛開時期,花多密集,影出嚟真係好有驚喜,完全唔會輸俾日本、韓國嘅櫻花!另外,海濱公園有草地可以野餐、放風箏,園內仲有自然教育徑同昆蟲屋,好啱小朋友學習生態知識。除咗嚟賞櫻打卡,都係一家大細嚟活動嘅好地方!

 

大埔海濱公園
地址:新界大埔大發街 (顯示地圖)
交通:大埔墟站轉港鐵巴士K17, 富善巴士總站下車步行至完善公園,經行人隧道便到達開放時間:24小時
入場費:免費
官網https://www.lcsd.gov.hk/tc/parks/tpwp/index.html

 

香港賞櫻攻略|拍攝穿搭

櫻花樹@ruki_ranran.ashu
嚟得打卡,當然想影返張靚相,襯返套啱嘅衫就梗係事半功倍啦!小編就覺得白色衫最易襯,無論係桃紅色、粉紅色、定白色嘅櫻花,影出嚟效果都好清新!

 

櫻花樹_2
@weiweidonai
如果鐘意繽紛啲嘅效果,可以揀返花花衫或者粉色衫,咁就成張相都「櫻花味」十足喇。

 

📖延伸閱讀:【旅行青蛙去咗邊?】原來去咗睇日本櫻花!2018東京櫻花景點全攻略
📖延伸閱讀:【北海道櫻花景點】札幌櫻花邊度睇?本地人推薦賞櫻路線連櫻花品種大解構!
📖延伸閱讀:【日本櫻花2018】京都櫻花賞玩路線攻略 (最新櫻花花期公佈)
📖延伸閱讀:【首爾櫻花遊】首爾慶熙大學賞櫻攻略!(連首爾三清洞、仁寺洞咖啡室推薦)

 

Hotels.com酒店優惠Hotels.com酒店優惠