定期送上世界各地最新、最地道嘅旅遊資訊!

【香港宵夜推介】勁抵食!尖沙咀宵夜自助餐廳 +必食Item懶人包!

自助餐係一個價錢,可以任食國際美食,有唔少香港人都好鍾意呢一種任食嘅餐飲模式。宵夜係有唔少香港人因為超時工作又或者夜生活,而需要喺深夜被美食療癒。夜媽媽食宵夜心大心細唔知食咩好?宵夜自助餐係一個好選擇!今次小編會同大家分享香港宵夜推介,集中介紹尖沙咀宵夜自助餐,等一眾foodie深夜時份都可以食到勁抵食嘅好西!

 

香港宵夜推介|尖沙咀宵夜自助餐推介九龍酒店倚窗閣

九龍酒店倚窗閣
@The Kowloon Hotel

九龍酒店倚窗閣提出嘅宵夜自助餐一向都出名高質同抵食!雖然宵夜自助餐嘅美食冇自助午餐同埋自助晚餐咁多款式,但係酒店絕對冇將價就貨!宵夜自助餐依然都有提供唔少海鮮、刺身款式、超過20款熱食,仲有精緻甜品供選擇,食品方面真係相當有誠意同驚喜!

九龍酒店倚窗閣_2
@candylai0911

喺眾多食物當中,有唔少回本必食推介,尤其係海鮮控就絕對要留意喇!平時唔係間間酒店都有嘅生蠔,喺呢間酒店嘅宵夜自助餐就有喇,識食就要食返一打半打喇!另外仲有唔少凍海鮮例如青口、海蝦等等提供!刺身都有三至四款咁多呀!甜品當中嘅亮點就係可以任食Mövenpick 雪糕!價錢方面,每人唔洗三百錢,真係好抵!不過留意返,呢間宵夜自助餐唔係日日供應,酒店只會喺逢星期三至星期六同埋公眾假期先會供應㗎咋!

 

九龍酒店倚窗閣
地址:尖沙咀彌敦道19-21號九龍酒店2樓 (顯示地圖)
宵夜時段:星期三至星期六、公眾假期前夕 10:00pm – 12:00mn
價錢 (只供參考):星期三、四 成人 $268 / 小童 $238;星期五、六、公眾假期前夕 $298 / 小童 $268 (設加一服務費)

 

香港宵夜推介|尖沙咀宵夜自助餐餐廳|帝苑酒店雅苑座

帝苑酒店雅苑座
@borkee3

帝苑酒店所推出嘅自助餐喺4星酒店嚟講,質素真係唔差!雖然酒店裝修唔算新,但係論餐廳室內環境,呢度擁有室內超高嘅樓底,裝修成空中花園,仲有個噴水池。而且空間感大,枱與枱之間有充夠嘅距離,唔會好逼。再加上暖色嘅燈光,感覺非常舒適!

帝苑酒店雅苑座_2
@The Royal Garden 香港帝苑酒店

帝苑酒店嘅宵夜自助餐周不時都會推出唔同特色美食主題,會隨住季節而提供最時令嘅美食。呢度嘅宵夜自助餐好多時都會有一系列嘅冷熱海鮮菜式供應,亦係推介菜式,例如有長腳蟹、鹽焗鱸魚、避風塘瀨尿蝦等等。另一推介菜式就係爐端燒嘅串燒同食品,最啱就係宵夜時份食!帝苑酒店嘅甜品都好出名,所以唔可以錯過呢度一系列嘅星級甜品呀!

 

帝苑酒店雅苑座
地址:尖沙咀麼地道69號帝苑酒店3樓 (顯示地圖)
宵夜時段:星期五、六、公眾假期前夕 10:15pm – 12:15am
價錢 (只供參考):星期五、六、公眾假期前夕 $268 / 小童 $208 (設加一服務費)

 

香港宵夜推介|尖沙咀宵夜自助餐餐廳|香港金域假日酒店Bistro on the Mile

香港金域假日酒店Bistro on the Mile
@Holiday Inn Golden Mile

香港金域假日酒店嘅宵夜自助餐亦係喺尖沙咀區另一抵食同CP值高嘅宵夜自助餐。呢間酒店宵夜驚喜嘅部份,就係以唔洗三百蚊呢個價位可以食到好多唔同種類嘅海鮮,包括有長腳蟹、生蠔、蝦、青口等等。凍食仲有刺身、壽司呢啲受歡迎嘅食品。熱食有燒牛肉、燒海鮮、仲有其他中西式食物。

香港金域假日酒店Bistro on the Mile_2
@Holiday Inn Golden Mile

另一亮點就係甜品區!宵夜會有任食haagen-dazs雪糕,仲會有好多唔同口味嘅精緻蛋糕、窩夫、pancake等等!總括嚟講,如果你係海鮮控同甜品控,呢度嘅宵夜自助餐絕對係值得一試!

 

香港金域假日酒店Bistro on the Mile
地址:尖沙咀彌敦道50號金域假日酒店1樓 (顯示地圖)
宵夜時段:星期一至日 9:30pm – 11:30pm
價錢 (只供參考):星期日至四 成人$279 / 長者 $223 / 小童 $195 ;星期五、六 成人 $309 / 長者 $246 / 小童 $216 (設加一服務費)

 

香港宵夜推介|尖沙咀宵夜自助餐餐廳|香港百樂酒店 Park cafe

香港百樂酒店 Park cafe
@OpenRice Hong Kong

香港百樂酒店最近翻新咗之後,餐廳環境都舒服咗好多。香港百樂酒店嘅宵夜自助餐逢星期五、六先有,以港式海鮮盛宴同埋生蠔做主題,去吸引一眾深夜食客。

香港百樂酒店 Park cafe_2
@OpenRice Hong Kong

雖然宵夜自助餐嘅種類同款式都唔算好多,但係勝在提供嘅食物好多都係受大家喜愛嘅食物。推介大家食嘅包括有生蠔、各種凍海鮮、XO醬避風塘炒三文魚腩、炒蟹等等。

 

香港百樂酒店 Park cafe
地址:尖沙咀漆咸道南61-65號香港百樂酒店 (顯示地圖)
宵夜時段:星期五、六 10:00pm – 12:00mn
價錢 (只供參考):成人$228 / 小童$178 (設加一服務費)

 

香港宵夜推介|尖沙咀宵夜自助餐餐廳|香港喜來登酒店 The Cafe

香港喜來登酒店 The Cafe
@Sheraton Hong Kong Hotel Towers Official

香港喜來登酒店推出嘅宵夜自助餐同樣都唔係每日有得供應,逢星期五同星期六先有。宵夜嘅食物款式唔係太多,但係最值得留意嘅係海鮮嘅部份。海鮮冷盤都好豐富,係必食推介!大多數時間會有凍蟹、蝦、翡翠螺螺、蜆、瀨尿蝦等等,呢個係非常受歡迎嘅部份!

香港喜來登酒店 The Cafe_2
@Sheraton Hong Kong Hotel Towers Official

熱食都有唔少東南亞食物同埋西式食物,仲有麵檔!另一個吸引嘅地方就有甜品區,甜品選擇比較多,Häagen-Dazs™雪糕都有6種味道咁多呀!

 

香港喜來登酒店 The Cafe
地址:尖沙咀彌敦道20號香港喜來登酒店2樓 (顯示地圖)
宵夜時段:星期五、六 10:00pm – 12:00mn
價錢 (只供參考):成人 $248 / 小童 $124 (設加一服務費)

 

📖延伸閱讀:【香港聖誕搵食攻略】Top 5 香港米芝蓮餐廳搵食指南 2018
📖延伸閱讀:【堅尼地城好去處】一篇帶你食盡隱世港島美食:西環、上環、中環、西營盤美食大全
📖延伸閱讀:【情人節靚景餐廳】Top 10香港浪漫餐廳大全 (情人節大餐 + 約會指南)
📖延伸閱讀:【香港文青Cafe精選】想搵間香港靚Cafe飲嘢兼打卡?五間必去香港Cafe推薦!

 

Hotels.com酒店優惠Hotels.com酒店優惠