定期送上世界各地最新、最地道嘅旅遊資訊!

【香港隱世美食】地道香港大排檔推薦 + 必點美食推薦!

要體驗最地道嘅港式美食,又點少得香港大排檔?大排檔嘅大部分菜式都係港式小炒,最講求鑊氣,唔係間間食店都做得到港式嘅獨有風味!但因為牌照問題,傳統大排檔已經買少見少,小編今次就精心挑選咗3間必食香港大排檔推薦俾大家,千祈唔好錯過呀!

大排檔,亦即係港式路邊攤,又叫做「大牌檔」,因為以前嘅檔攤都有一張好大嘅飲食牌照。喺50年代全盛時期,全港有成40間大排檔,但由於政府已經停發大排檔牌照,傳統大排檔買少見少,而家只係淨返20幾間咋。大牌檔嘅港式小炒,通常係由家常小菜演變而成,最講求鑊氣,送啤酒一流!雖然唔係山珍海味,但係就風味十足。

 

香港隱世美食|盛記

盛記
@vernmei

中環俾人感覺係較為高尚,多數都係高級食肆,但其實呢到都有香港隱世美食㗎。喺士丹利街閣麟街一帶就有好幾個已經幾十年歷史嘅香港大排檔,全部都好有人氣,而其中小編推介嘅就係盛記!

而家嘅盛記已經傳到第2代,價廉物美又夠鑊氣,招牌下面掛住一個「蔡瀾推薦」 嘅牌。喺高樓之間嘅狹縫食嘢夠哂特別,除咗本地人,仲吸引唔少遊客嚟潮聖㖭!盛記仲係好多附近嘅上班族嘅食堂,一到食飯時間就坐爆,行遲半步都要等位。

盛記_2
@michaelhuii

快靚正係大排檔小炒嘅不二法門,檔主三兩下手勢就炒起一碟,夠哂鑊氣!見住一碟一碟小菜即場炒出嚟,熱辣辣,胃口特別好!

盛記_3
@gyeorany

必叫菜式當然係豉汁炒蜆同生炒骨啦!炒蜆夠鑊氣,蜆肉肥美,配埋個汁好香口。生炒骨外脆內軟,酸甜汁均勻上色,撈飯送酒都非常好呀!仲有煎釀三寶都係呢到嘅人氣之選,個個食完都大讚,記得要叫一份嚟試吓喇!

 

盛記
地址:中環士丹利街82號地舖 (顯示地圖)
交通:港鐵香港站E1出口步行約7分鐘
營業時間:星期一至日 11:00 – 15:00;17:00 – 23:00
電話:2541 5678

 

香港隱世美食|天祥飯店

天祥飯店
@miccc_hael_ 
從外型就感受到嗰陣懷舊香港味,典型嘅鐵皮檔地踎格局,行過都感受到嗰種港式風味!

深水埗同樣係香港大排檔集中地,講起食小菜大家都不期然會諗起呢區。天祥飯店係好有歷史嘅傳統大排檔,名氣拍得住對面嘅愛民生,以前深水埗仲有碼頭嘅年代,就係呢2間大排檔最風光嘅時候。直到而家,天祥飯店同樣係咁受歡迎,食飯時間都係座無虛席㗎!

天祥飯店_2
@taksekin

大排檔就最啱多人飯局,各式海鮮小炒、煲類、炒粉麵、小食都可以叫勻哂,每款試啲最滋味。

天祥飯店_3
@searuby

椒鹽鮮魷係呢到嘅必食item,香口兼夠惹味,外皮酥脆肉質彈牙,非常高水準,係啤酒嘅好朋友!

 

天祥飯店
地址:深水埗石硤尾街醫局街98號利德昌大廈側 (顯示地圖)
交通:港鐵深水埗站A2出口步行約8分鐘
營業時間:星期一至日 18:00 – 02:00
電話:6176 9703

 

香港隱世美食|東寶小館

香港隱世美食|東寶小館
@ctunglee

位於北角渣華道街市嘅東寶小館,被譽為香港大排檔名店,雖然入咗市政大廈熟食中心,但係風味依舊,人氣爆燈。早前「奇異博士」Benedict Cumberbatch嚟香港宣傳電影嗰陣,都嚟到東寶食飯,可見東寶小館嘅威力!除咗地道鑊氣小菜,東寶仲有比較特別新穎嘅選擇,而且每到夜晚氣氛就非常熱鬧,好啱一大班人嚟聚餐。呢到招牌就當然係「戰鬥碗」啦,俾客人大啖大啖飲啤酒、汽水,好有懷舊特色。一場嚟到當然要啤啤佢啦,飲勝!

東寶小館_2
@littlemsfoodie 

風沙雞係東寶名物,基本上係每枱必食。外皮炸到金黃香脆,再灑上脆卜卜嘅蒜泥風沙,入面嘅雞肉keep到嫩滑多汁,超高質!但係佢嘅定價比一般大排檔高,成隻雞要五百幾蚊,多人飯局就會化算啲。除此之外,黃金蝦同墨汁墨魚丸意粉都係必食推薦!

東寶小館_3
@dadahoyt

東寶小館咁有人氣晚晚爆場,除咗係因為食物高質,氣氛一流,最緊要係呢到嘅老闆Robby非常鬼馬好客,可以話老闆先係呢到嘅鎮店之寶呀!通常去到夜少少嘅時間,老闆就會開始同大家熱烈交流,行埋嚟同你飲兩杯不在話下,仲會唱K跳舞咁,popping同moonwalk都出埋,興起嘅時候仲會即席表演劈個一字馬㖭!

 

東寶小館
地址:北角渣華道99號渣華道市政大廈2樓 (顯示地圖)
交通:港鐵北角站A1出口步行約3分鐘
營業時間:星期一至日 17:30 – 00:30
電話:2880 5224 / 2880 9399 (只於14:30 – 17:30接受電話訂座)


📖延伸閱讀:【香港宵夜推介】勁抵食!尖沙咀宵夜自助餐廳 +必食Item懶人包!
📖延伸閱讀:【香港食海鮮】一篇帶你食盡鯉魚門、西貢、流浮山海鮮美食!
📖延伸閱讀:【西貢好去處】入西貢必食!人氣西貢海邊餐廳、西貢cafe推介!
📖延伸閱讀:【香港燒鵝推薦】中環燒鵝 vs 灣仔燒鵝價錢、味道大比併!
📖延伸閱讀:【堅尼地城好去處】一篇帶你食盡隱世港島美食:西環、上環、中環、西營盤美食大全

 

Hotels.com酒店優惠Hotels.com酒店優惠