定期送上世界各地最新、最地道嘅旅遊資訊!

【首爾按摩特集】韓式養生美容!當地人推薦首爾spa、按摩、facial店!

韓國女仔一向都好重視皮膚保養同身體護理,除咗飲食養生之外,仲成日去做spa同facial,難怪個個皮膚都咁好啦!小編今次就精選咗3間當地人大力推薦嘅首爾spa,體驗一吓韓式首爾按摩同首爾facial,靚住咁返香港。

 

首爾按摩特集|當地人推薦首爾spa、按摩、facial店|SPA 1899


@92misschoi

已經有120歷史嘅正官庄喺1899年創辦,係韓國一個好出名嘅紅蔘品牌。佢地亦都開設咗呢間SPA 1899,使用嘅全部都係正官庄品牌最著名的高麗蔘產品,配合專業嘅團隊,提供面部、頭部同足部護理,另外仲有水療同按摩等服務。

SPA 1899_2
@官網

明洞分店喺正首爾市中心,交通方便之餘,又鄰近百貨公司、地下街等多個景點。時尚嘅店內裝修配上木、竹等嘅元素,營造出一種舒適自然嘅氣氛,而且環境寧靜,喺到可以絕對可以好好放鬆。

SPA 1899_3
@官網

正官庄提供多種專業按摩套餐同護理項目,包括針對面部、身體、足部局部護理,多項組合護理,同埋長達3個鐘嘅全套護理。Budget高嘅仲可以加錢試埋熱石療程,熱力可以令紅蔘精華更深入咁滲透至肌膚底層,令身體變得水潤亮潤,好似剝殼雞蛋一樣。

SPA 1899_4
@runaruna523

店中選用種植達6年、被譽為「百草之王」嘅高麗紅蔘產品,除咗可以抗衰老同促進血液循環之外,仲可以消除疲勞,回復活力。

SPA 1899_5
@正官庄SPA官網

設施方面,個人嘅水療空間非常寬敞,店員會先喺按摩浴池加入高麗蔘精油,幫助加快新陳代謝,舒緩水腫。一邊喺超大嘅按摩浴池享受15分鐘嘅全身水療,一邊聽住柔和嘅音樂,無論係身體定心靈都可以徹底放鬆。

SPA 1899_6

SPA 1899_7
@官網

房間方面除咗係嘅獨立單人房之外,房內仲配備埋化妝室,私隱度極高!而且室內燈光仲會調節到最適合客人休息嘅光度,加埋有安神作用嘅紅蔘香薰,聞住淡淡嘅香氣,真係完全搵唔到地方挑剔。

SPA 1899_9
@官網

正官庄 SPA 1899嘅按摩技師全部都經過專業嘅訓練,利用獨特嘅手法,將紅蔘萃取精華注入皮膚底層,增加皮膚嘅彈性同水份,調節水油平衡,仲有助排出體內毒素,令面色更紅潤亮白。按摩嘅同時,同樣聞住陣陣嘅紅蔘香氣,心情都慢慢平靜落嚟,好似冇晒煩惱咁。

 

正官庄 SPA 1899
地址:KT&G Tower B2F, 1002 Daechi-dong, Gangnam-gu, Seoul (顯示地圖)
營業時間:09:00 – 23:00 全年無休
網址:http://spa1899.co.kr/cn1899/

 

首爾按摩特集|當地人推薦首爾spa、按摩、facial店|雪花秀SPA 

雪花秀SPA @shelly.pan

平時有用開韓國化妝品嘅人,相信都對雪花秀呢個品牌唔陌生,但原來除咗化妝品同護膚品之外,佢哋都有提供面部同身體護理服務,包括facial、spa、按摩、韓國草藥水療等嘅身體護理項目。

雪花秀SPA _2
@cafeota

雪花秀旗艦店位於江南新沙洞,店舖外形吸晴,大玩線條設計,難怪咁多人嚟按摩嘅時候都會順便打埋卡啦!

雪花秀SPA _3
@taeasam

官方指出設計靈感嚟自「燈籠」,想好似燈籠咁為顧客帶來溫暖。

雪花秀SPA _4
@5happyday_

4層高嘅店鋪空間寬敞,自然採光充足,店內播放住輕柔嘅音樂,感覺非常舒適。店舖位於島山公園旁邊,環境清幽,邊享受按摩,邊欣賞窗外自然嘅景色,絕對係人生一大享受。

雪花秀SPA _5
@雪花秀SPA官網

雪花秀SPA主打韓式草藥平衡水療,運用亞洲傳統嘅按摩工具,例如翡翠、琥珀、白瓷等等,令精油同護膚品更容易吸收、淨化同滋潤每一寸肌膚,達到最佳療程效果。

雪花秀SPA _6
@appleandroze

療程除咗會用到雪花秀嘅美肌產品之外,仲會加入唔同嘅韓國傳統草藥,幫你改善身體狀況,注入活力。足部護理方面,足湯就加入咗矜貴嘅韓國紅蔘精華,可以徹底緩解雙腳疲勞,啱晒返工成日企嘅朋友。店員仲會好細心咁幫你用人參種子磨砂同按摩腳部,令皮膚變得滑滑溜溜。按摩嘅時候成間房都充斥住草藥精油天然嘅芳香,非常療癒。

 

雪花秀Sulwhasoo SPA
地址:18 Dosan-daero 45-gil, Sinsa-dong, Gangnam-gu, Seoul (顯示地圖)
營業時間:10:00 – 21:00 全年無休
網址:https://www.sulwhasoo.com/int/en/spa/introduction/introduction.html

 

首爾按摩特集|當地人推薦首爾spa、按摩、facial店|松佳軒

松佳軒
@alispring_ch3

如果你想體驗一下當地嘅傳統韓式養生文化,兼感受古代韓屋嘅文化氛圍,位於傳統韓屋內嘅松佳軒就啱哂你喇!

松佳軒_2
@baekjongsuk7

松佳軒由2名專業韓醫開辦,係一間新式嘅草藥治療咖啡館。創辦人運用咗佢哋對韓醫學嘅豐富知識,喺店內供應多種主打不同療效嘅草藥茶同養生小食。除此之外,仲提供足浴、艾灸、足部護理等嘅服務。店主會首先簡單介紹佢哋提供嘅服務,如果唔知邊個療程適合你,醫師仲會即時幫你把脈,推薦最適合你嘅療程。

松佳軒_3
@imagesofseoul

松佳軒足浴非常有人氣,當地唔少電視台都有介紹過。足浴可以選擇室內同室外。如果天氣唔凍嘅話,當地人一般都係建議戶外足浴。一邊享受足浴,一邊坐喺韓屋中庭望住藍天,享受溫暖嘅陽光,絕對係一個特別嘅體驗。

松佳軒_4
@dajoomi

由柏樹製作嘅足浴盤有促進血液循環同新陳代謝嘅功效。足浴除咗可以改善手腳冰冷之外,仲可以舒緩疲勞,改善手腳冰冷嘅問題。

松佳軒_5
@binsasa_

食療方面,佢哋嘅草藥茶雖然係由漢方改良,但係用料上就有好大分別,絕對唔會有平時大家飲中藥嘅苦味。另外仲會附送紅棗片、葵花籽同韓式糕點,你仲可以試埋佢哋用穀物、堅果和水果乾製成,而且有排毒功效嘅曲奇,啱晒減緊肥嘅你。

 

松佳軒 Solgaheon
地址:154 Changseong-dong, Jongno-gu, Seoul (顯示地圖)
營業時間:星期一至六 11:00 – 21:00;星期日1300 – 2100

 

📖延伸閱讀:【首爾超市特集】首爾樂天超市必買手信、零食、特產推薦!
📖延伸閱讀:【首爾早餐推薦】首爾自由行必食!東大門、明洞、弘大早餐店美食推薦!
📖延伸閱讀:【韓國剪髮篇】首爾剪頭髮減齡!三大高CP值首爾Salon推薦!
📖延伸閱讀:【首爾韓牛】牛魔王請進!首爾馬場洞韓牛一條街搵食攻略!

 

 Hotels.com酒店優惠Hotels.com酒店優惠