定期送上世界各地最新、最地道嘅旅遊資訊!

【首爾市場搵食攻略】首爾廣藏市場美食大全 (當地人推薦首爾生牛肉、生章魚餐廳)

去得韓國首爾旅行又點少得要去傳統市場,韓國有好多傳統市場,當中最具代表性嘅就梗係首爾廣藏市場 (광장시장) 喇!首爾廣藏市場有超過110年歷史,亦係韓國第一個常設嘅市場,超過5000間商店,包括食肆、服飾店、乾貨店、傳統製品等,集飲食同購物於一身!小編今日就介紹廣藏六大好西比大家,當中包括大家都好鐘意嘅生牛肉同生章魚!   

 

首爾廣藏市場必食 | 生拌牛肉 육회

生拌牛肉 육회
@liz_berry

韓國嘅美食就好鐘意集中晒係一條街度開嘅,而廣藏市場入面亦設有生牛肉一條街,冇係度食過生牛肉都唔好同人講你嚟過廣藏呀!呢度嘅生牛肉肉質好鬆軟、充滿肉汁,配以雪梨、生雞蛋、芝麻就已經非常好食,口感多層次之餘,亦好香口,一個字「正」 !

不過如果喺香港有食過生牛肉嘅話,會發現韓國嘅生牛肉同印象中嘅有出入,為咗附合香港人嘅口味,香港嘅生牛肉會放得比較多醃料,相對會比較甜入口,但韓國嘅生牛肉放嘅醃料冇咁多,比較能保持本身嘅牛味!另外,生牛肉店亦會提供生拌牛肉拌飯 (육회비빔밥)、生肝及牛柏葉 (간 천엽) 等美食選擇,生肝同牛柏葉係香港食唔倒㗎!

 

首爾廣藏市場必食 | 生章魚 산낙지

生章魚 산낙지
@adorable_sunny
生牛肉生章魚set

而生牛肉同生章魚好似孖生咁,有生牛肉嘅店就一定有生章魚!可以分開點嘅同時,亦有生牛肉生章魚set (육탕이)可以點,一次過滿足曬你兩個願望!生章魚除咗好食之外,仲係口腔觸感嘅大挑戰,因為章魚即使被切開咗,神經線仍然非常活躍,所以食嘅時好可能會吸住條唎㗎!

 

首爾廣藏市場必食 | 生拌牛肉姐妹家 육회자매집

生拌牛肉姐妹家 육회자매집
@booksky_mwkim  
生章魚、生牛肉刺身

當中生拌牛肉姐妹家係韓國人嘅圈子入面係極受歡迎,總共有3間分店,係即使有3間分店都經常滿座嘅美食店!當你點餐完畢後,呢度會隨即附上辣牛肉湯,辛辣嘅口味非常開胃!另外呢度亦有提供生牛肉刺身 (육회사시미),同生牛肉相比,除咗大大塊,有口感上嘅差異外,亦冇用醃料,牛味非常濃郁!

 

生拌牛肉姐妹家
地址:
1號店 : 首爾市鍾路區鍾路200-4 (鍾路4街) / 電話:+82-2-2274-8344
서울 종로구 종로 200-4
2號店 : 首爾市鍾路區鍾路200-4 (鍾路4街) / 電話: +82-2-2272-3036
서울 종로구 종로 200-4
3號店 : 首爾市鍾路區鍾路208 (鍾路5街) / 電話: +82-2-2272-3036
서울 종로구 종로 208
營業時間:09:00 – 22:50 (每月第一、三個星期一休息)
網頁:http://zamezip.com/

 

首爾廣藏市場必食 | 富村生拌牛肉 부촌육회

富村生拌牛肉 부촌육회
@s_hyunzi
生牛肉、生拌牛肉拌飯、辣牛肉湯

富村生拌牛肉係一間有60年歷史嘅老店,同時亦係外國遊客圈子非常受歡迎嘅生牛肉店,原因係佢被評選為“首爾米其林2017”的“必比登美食店”!呢度除咗有生牛肉外、生章魚外,同時亦有其他食品提供,當中包括比較少見嘅白切牛頭肉 (소머리수육)!

 

富村生拌牛肉 부촌육회
地址:首爾特別市鐘路區鐘路4街165-11
電話:+02-2267-1831
營業時間:
星期一至六 09:00 – 23:00 (午休時間 – 星期一至五 16:00 – 17:00;點餐截至 22:00)
星期日 09:00 – 22:00 (點餐截至 21:00)
每月第2、4個星期日休息

 

首爾廣藏市場必食 | 綠豆煎餅 녹두전

綠豆煎餅 녹두전
@choizzi_34

韓國有好多煎餅,有泡菜煎餅、海鮮蔥餅、薯仔煎餅等,而喺首爾廣藏入面最有名嘅就係綠豆煎餅,外層煎到金黃酥脆,入面包住綠豆蓉同芽菜,做到內脆外軟嘅效果,口感會類似薯餅!另外,韓國人有落雨食煎餅同飲米酒 (막걸리) 嘅傳統,如果嚟到韓國咗啱又撞正雨神,不防試下食煎餅加米酒,感受吓韓國人嘅情懷!

 

首爾廣藏市場必食 | 血腸 순대

血腸 순대
@frank_jaeng

血腸顧名思意,係豬腸入面灌入豬血,再加韓國粉絲制作而成嘅韓國小食,口感有類似食脆皮腸咁,外面包咗層有咬口嘅外皮,入面就係鬆軟嘅,一般會點調味鹽進食!不過呢一款小食唔係個個外國人都接受到,又有內臟啦、仲帶有少少肉腥味,係一樣鐘意食就好鐘意食,討厭就完全食唔到嘅嘢食,所以大家要考慮下自己嘅接受能力先叫呀!比個貼士大家,如果點咗之後真係食唔到,間小食店又有賣辣炒年糕,可以叫佢比啲辣炒年糕醬(떡볶이 소스) 你,除咗可以除腥味外,亦係韓國人食血腸嘅習慣之一。

 

首爾廣藏市場必食 | 麻藥紫菜包飯 마약김밥

麻藥紫菜包飯 마약김밥
@jeonggeunhye70

「麻藥紫菜包飯」飯如其名,就好食到會令人上癮嘅小食,算係紫菜包飯嘅迷你版,一般用紫菜同飯包住菠菜、紅蘿蔔絲同醃黃蘿蔔,再係面掃上麻油同芝麻就已經好好食!同埋佢份量唔多,啱晒鐘意掃街嘅朋友,可以留番個肚食其他嘢;如果已經食到好飽嘅話仲可以打包拎番酒店做消夜或第二日嘅早餐𠻹!另外,價格大概係₩2500 – ₩3000,啱曬小資旅行嘅朋友!

 

首爾廣藏市場必食 | 紅豆粥 팥죽

紅豆粥 팥죽
@moony_choi

紅豆粥、南瓜粥 (호박죽)、綠豆粥 (녹두죽) 係三款傳統市場常見嘅粥品,通常都會放埋一齊賣嘅!而韓國人認為紅豆有驅鬼同去惡運嘅想法,係冬至時紅豆粥係必食嘅食品,祈求新一年有好運嘅到來!不過作為外國人冇呢個諗法嘅法,紅豆粥都係值得一試嘅韓國食品,因為當你以為佢好似紅豆沙係甜嘅,其實佢係咸㗎!而紅豆粥入面亦加入咗由糯米做嘅小丸子,非常有咬口!    

 

📖延伸閱讀:【首爾咖啡店特集】5大首爾弘大、梨泰院Cafe!(浣熊Cafe超得意!)
📖延伸閱讀:【獨遊首爾】首爾一個人吃飯冇有怕!獨樂樂首爾餐廳推薦!
📖延伸閱讀:【韓國滑雪自由行】首爾近郊一日遊!2019 大熱首爾滑雪場、韓國滑雪溫泉推薦
📖延伸閱讀:【首爾米芝蓮2018】實測五大首爾米芝蓮餐廳食物水準!首爾美食餐廳推薦逐個數!

 

 Hotels.com酒店優惠 Hotels.com酒店優惠