定期送上世界各地最新、最地道嘅旅遊資訊!

【韓國櫻花2019】Top 5 韓國釜山賞櫻地點一覽!

釜山位於韓國南部地區,比首爾更早回暖,所以釜山櫻花期較早,大概喺每年三月底至四月初,櫻花全盛綻放時期大概維持7日左右,要去釜山賞櫻就要捉緊時間啦!唔講唔知,其實釜山嘅地鐵非常完善方便,今次小編就帶大家搭地鐵,去釜山各個景點睇韓國櫻花啦!

 

韓國櫻花2019丨釜山櫻花景點推薦丨南川洞櫻花路(남천동벚꽃길)

南川洞櫻花路
@osunsimi

南川洞係位於釜山廣安里一帶嘅住宅區,平時非常幽靜,但每年春天南川洞櫻花路兩邊會開滿櫻花,大量當地人同遊客都會前往賞櫻,係釜山無人不知嘅賞櫻地點!沿住櫻花路一直直走就可以到達釜山著名景點廣安海水浴場,可以望到海景同廣安大橋,入黑後更可以觀賞釜山嘅夜景同賞夜櫻!  

 

南川洞櫻花路(남천동벚꽃길)
地址:釜山廣域市水營區南川洞(부산광역시 수영구 남천동)
交通:釜山地鐵2號線金蓮山站5號出口,需步行15分鐘
            釜山地鐵2號線南川站1號出口,需步行15分鐘
入場費用 (只供參考):免費

 


韓國櫻花2019丨釜山櫻花景點推薦丨大渚生態公園路 (대저생태공원길)

大渚生態公園路
@재빈짱

四月除左係釜山櫻花花期外,同時亦係油菜花盛開嘅時期,難得去到釜山就梗係要賞櫻同賞油菜花啦!大渚生態公園就可以滿足曬你兩個願望啦!


大渚生態公園
@산수청

櫻花花期好短,如果遇上突然改變嘅天氣,分分鐘會睇唔倒櫻花,所有計劃好嘅賞櫻行程就派唔上用場,但如果真係咁唔好彩嘅話,嚟大渚生態公園亦至少能夠睇倒油菜花,呢度嘅油菜花花田係釜山最大嘅,一啲都唔輸櫻花㗎!  

 

大渚生態公園路 (대저생태공원길)
地址:釜山廣域市江西區大渚1洞 (부산광역시 강서구 대저1동)
交通:釜山地鐵2號線沙上站3號出口,需步行15分鐘
電話:+82-051-970-3743
開放時間:24小時開放
入場費用 (只供參考):免費

 


韓國櫻花2019丨釜山櫻花景點推薦丨溫泉川市民公園(온천천시민공원)

溫泉川市民公園
@y0507j

溫泉川市民公園嘅櫻花步道設於河川兩旁,同時係河川兩旁種有油菜花同唔同種類嘅花,畫面非常豐富。除咗行人步道外,更設有單車路,遊客可以憑著護照可於東萊站2號或4號出口對面租借單車,沿住河邊「自駕遊」!

 

溫泉川市民公園(온천천시민공원)
地址:釜山廣域市蓮堤區蓮山洞2056-8 (부산광역시 연제구 연산동 2056-8)
交通:釜山地鐵一號線東萊站1、2號出口,需步行15分鐘
電話:+82-051-554-8411
開放時間:24小時開放
入場費用 (只供參考):免費



韓國櫻花2019丨釜山必食丨東萊老奶奶蔥餅 (동래할매파전)

東萊老奶奶蔥餅
@park_sungwon1229

一場嚟到東萊(溫泉川市民公園所在地)就一定要食釜山特有食物東萊蔥餅(동래파전),係朝鮮時代時東萊府使進貢比國王嘅傳統鄉土風味美食,其中最出名嘅店莫過於東萊老奶奶蔥餅!東萊老奶奶蔥餅宜家已經由第4代人接手經營,但食物、店面仍然維持古早風味,係韓國觀光社都推薦嘅餐廳!

 

地址:釜山廣域市東萊區福泉洞367-2 (부산광역시 동래구 복천동 367-2)
交通:釜山地鐵4號線壽安站5號出口,步行4分鐘
釜山地鐵1號線東萊站2號出口,步行9分鐘
電話:+82-51-552-0792
營業時間:12:00 – 22:00
網站:http://www.dongnaepajeon.co.kr/

 

韓國櫻花2019丨釜山櫻花景點推薦丨三樂生態公園(삼락생태공원)

三樂生態公園@mh21111

三樂生態公園嘅櫻花步道長達七公里嘅行人步道兩旁種植咗超過1200棵櫻花樹,每到花季時就會形成非常壯觀嘅櫻花隧道,亦被選為「韓國最美的100條道路」之一!步道比首爾汝矣島的輪中路更長,沿途更會經過釜山地鐵2號線嘅六個地鐵站(沙上站、德浦站、毛德站、毛羅站、龜南站、龜明站)。由於步道好長,所以人流唔會太集中,可以好輕易咗影倒無人嘅櫻花相打卡!

 

地址:釜山廣域市沙上區洛東大路1224 (부산광역시 사상구 삼락동)
交通:釜山地鐵2號線沙上站3號出口,需步行15分鐘
電話:+82-051-310-6011
開放時間:06:00~21:00
入場費用 (只供參考):免費
網站:http://www.busan.go.kr/nakdong/samrakpark01

 

 

韓國櫻花2019丨釜山櫻花景點推薦丨海雲臺迎月路 (해운대달맞이길)

海雲臺迎月路
@켄싱턴호텔앤리조트

海雲臺迎月路有湛藍嘅大海、白沙灘、山茶樹及松樹嘅景緻因此自古就被列入釜山八景之一,到櫻花盛開嘅時候,景色就更加優美。迎月路沿路有多個觀景臺可以遙望海雲臺嘅景色;同時亦有多個古色古香嘅涼亭可以休息外!迎月路相比起其他公園步道較短,大概45鐘就可以行完全程,比較適合行程緊張嘅朋友行!附近更有海雲臺、東柏公園等景點。

 

地址:釜山廣域市海雲臺區迎月路 (부산광역시 해운대구 달맞이길)
交通:釜山地鐵2號線中洞站7號出口,需步行10分鐘至迎月路入口
入場費用 (只供參考):免費

 

韓國櫻花2019丨釜山必食丨七岩生烤盲鰻 (칠암산곰장어)

七岩生烤盲鰻
@parkland00

去到海雲臺就一定要去海雲臺傳統市場(해운대정통시장)食烤盲鰻(꼼장어),七岩生烤盲鰻嘅鰻魚非常生猛,係即劏即烤!因為鰻魚非常新鮮,鹽烤就已經好鮮甜同爽脆!另外,小編係好怕魚腥味同食有骨嘅嘢,但小編認為呢度嘅烤盲鰻完全冇腥味,而且挑骨做得好仔細,大人細佬可以放心食用!

 

地址:釜山廣域市海雲台區中洞1394-298 (부산광역시 해운대구 중동 1394-298)
交通:釜山地鐵2號線海雲台站5號出口,需步行7分鐘
電話:+82-051-742-8218
營業時間:12:00 – 00:00

 
韓國櫻花2019丨釜山住宿推薦丨Mini By Uniqstay

Mini By Uniqstay

Mini By Uniqstay 位於西面站,距離西面地站同西面商圈大約需要5-8分鐘時間,但勝在價格非常實惠,同埋清潔得非常乾淨,係小編住過最滿意嘅平價住宿之一!房間雖然唔大,但雪櫃、風筒、電視、良好WI-FI都齊備,雙人床房更可以開倒兩個大喼,廁所亦寬敞,係窮遊釜山唔錯嘅選擇!  

 

Mini By Uniqstay
地址:47283KORBusan釜山115, Sincheon-daero 162beon-gil (查看地圖)
星級 |  ★★☆☆ ☆
位置 |  ★★★☆ ☆
設施 |  ★★★☆☆
環境 |  ★★★★☆
價格 | 查看價格

 

韓國櫻花2019丨釜山住宿推薦丨Lion Hotel

Lion Hotel

Lion Hotel位處於西面商圈內,步行到樂天百貨只需6分鐘,酒店樓下有唔少食肆、酒館,附近亦有Club,處於靜中帶旺嘅地段,半夜肚餓都唔愁會餓親!房間內設施齊備,熱水、地熱、WI-FI非常穩定。另外,更提供直髮夾,貪靚嘅朋友可以帶少樣必須品,買多啲嘢番香港啦!  

 

Lion Hotel
地址:47287KOR釜山Busanjin-gu14-7, Jungang-daero 691beonga-gil(查看地圖
星級 |  ★★☆☆☆
位置 |  ★★★★☆
設施 |  ★★★☆☆
環境 |  ★★★★☆
價格 | 查看價格

 

 

韓國櫻花2019丨釜山住宿推薦丨釜山海灘飯店

釜山海灘飯店

釜山海灘飯店雖然距離最近嘅札嘎其地鐵站較遠,需要步行這分鐘時間,但係係性價比較高嘅海景酒店!海景房設有落地玻璃同露台,眺望大橋、漁港燈塔,朝早更可以睇倒日出美景!酒店更設有天台花園,可以睇曬成個釜山景色,又提供免費望遠鏡使用!另外,距離甘川洞文化村只要15分鐘嘅車程,可以比其他人早一步同小王子合照!

 

釜山海灘飯店
地址:49264KOR釜山113, Deungdae-ro, Seo-gu (查看地圖
星級 |  ★★★☆☆
位置 |  ★★☆☆☆
設施 |  ★★★★☆
環境 |  ★★★★☆
價格 | 查看價格

 

 

📖延伸閱讀:【釜山景點】釜山行程、住宿懶人包 2019! (連甘川洞文化村交通指南)
📖延伸閱讀:【釜山去大邱】釜山近郊 — 大邱一日遊景點行程攻略!
📖延伸閱讀:【釜山自由行】韓國釜山自駕遊必食、必玩、必去景點!
📖延伸閱讀:【快閃濟州】濟州島4日3夜自駕遊行程!

 

 

Hotels.com酒店優惠Hotels.com酒店優惠