【難波美食特集】難波地下街必食美食餐廳逐個數！(連附近住宿推薦)

難波地下街全長約715米，足足橫跨3個鐵路站，入面有多間餐廳同商店，最啱買完就食，食完再買！難波美食就出名花多眼亂，係引發選擇困難症嘅高危地方，就等小編為你嚴選5間難波必食餐廳啦！

📖延伸閱讀：【大阪必食2019】Top 5 大阪必食餐廳推介！

難波地下街美食推介 | 江戶川鰻魚飯

江戶川係日本鰻魚飯名店之一，相信一眾鰻魚控都唔會感到陌生。鰻魚飯固然係必點菜式，鰻魚表面搽滿燒汁，由人手炭火燒製，微微脆口，但肉質仲保持鮮嫩，真係食到停唔到口。林林總總嘅鰻魚定食有多種配搭，除咗鰻魚飯，江戶川仲有鰻魚玉子、肝吸付(由鰻魚肝熬製嘅湯)同埋茶碗蒸等傳統日本美食，包你大飽口福。

江戶川鰻魚飯
地址：〒542-0076 大阪府大阪市中央区難波２丁目１−14 なんばウォーク (顯示地圖)
營業時間：星期一至日 11:00-22:00
網址：https://k170045.gorp.jp/

難波地下街美食推介 | 串かつ料理活

@reikoyang_gogo

喺難波，美食唔一定好貴，串かつ料理活係一間有七十幾年歷史嘅炸物店，價錢好親民，呢度嘅炸物都係以串燒形式奉上，所有又稱為串炸。串炸材料包括牛肉、蝦、魚同埋蔬菜，新鮮脆口，食之前記得點一點沾醬。原來串かつ料理活創立於二戰後，當時日本經濟狀況差，而串炸平價兼飽肚，就成為人們最愛，一直到宜家都有好多當地人捧場！

串かつ料理活
地址：〒542-0074 大阪府大阪市中央区千日前１丁目５−７なんばウォーク (顯示地圖)
營業時間：星期一至日 11:00-22:00
網址：https://kushikatsuryori-katsu-namba.com/

難波地下街美食推介 | 富士屋蕎麥麵

@xo2_yu2

富士屋蕎麥麵歷史都算悠久，難波地下街分店唔算大，但位與位之間都夠空間，比食客舒舒服服咁品嚐傳統蕎麥麵。富士屋提供嘅蕎麥麵大致分為湯蕎麥麵同冷蕎麥麵兩大類，另外仲可以食到烏龍麵、天婦羅等美食。每逢夏天，富士屋都會推出夏日限定嘅檸檬蕎麥麵，唔好見到一塊塊檸檬浮喺面就覺得伏，食過嘅人都表示微酸嘅湯底非常醒胃，炎炎夏日食就更加覺得清新，可謂喜出望外呀！

富士屋蕎麥麵
地址：〒542-0074 大阪府大阪市中央区千日前１丁目なんばウォーク3番街 (顯示地圖)
營業時間：星期一至日 11:00-21:00
網址：http://www.soba-fujiya.com/

📖延伸閱讀：【大阪拉麵2019】最新大阪道頓堀、心齋橋拉麵店美食地圖！

難波地下街美食推介 | 豚晴

@mori_vb0v0dv_

如果血拼完想簡簡單單食餐飯醫肚，可以試下呢間炸豬扒店。呢度嘅食物種類唔算多，大部份菜式嘅主角都係炸豬扒。最受歡迎嘅款式就係味噌蔥花炸豬扒同埋咖喱炸豬扒，份量亦都絕對唔細，男仔都一定夠飽。正因為豬扒份量大，食食下都難免覺得有啲滯，不過呢度跟餐附送嘅生菜絲都非常大份，能夠中和油膩感。

豚晴
地址：〒542-0074 大阪府大阪市中央区千日前２丁目１−15 なんばウォーク１番街南通り (顯示地圖)
營業時間：星期一至日 11:00-22:00
網址：http://www.tonharu.co.jp/

📖延伸閱讀：【日本拉麵篇】十大日本米芝蓮拉麵推介2018！

難波地下街美食推介｜正起屋

@moni0827

正起屋提供多種串燒，全部新鮮炮製，款式包括雞翼、雞軟骨、豬肉、牛肉、蔬菜等。你可以揀要定食或者散叫串燒。小編就建議選擇定食，因為沙律可以解膩，一路食串燒一路飲啤酒真係一流。呢度店面唔大，多數都要等位，不過成條地下街大把嘢行，一路行一路等，時間都好快過姐。

正起屋
地址：〒542-0074 大阪府大阪市中央区千日前１丁目４虹の街5-11号三番街北通り(顯示地圖)
營業時間：星期一至日 11:00-22:00
網址：http://www.masakiya-c.com/

📖延伸閱讀：【日本必食】終極嚴選京都、大阪、沖繩、東京必食特集2018！

難波地下街附近住宿推介｜大阪難波紅屋頂普拉斯酒店

@酒店官網

酒店位於難波地下街上方街道，地理位置非常優越，而且設施齊備，房間設計富時尚感，以這個價錢嚟講，絕對係超值。酒店亦都鄰近日本橋站，同埋黑門市場、道頓堀等景點，非常方便。

大阪難波紅屋頂普拉斯酒店
地址： 〒542-0074 大阪府大阪市中央区千日前１丁目９ 1 Chome-9-8 千日前通 (顯示地圖)
星級 | ★★★☆☆
位置 | ★★★★★
設施 | ★★★★☆
環境 | ★★★★☆
價格 | 查看價格