定期送上世界各地最新、最地道嘅旅遊資訊!

【東京近郊遊】鎌倉江之島景點、美食、海濱度假攻略地圖!

 

距離東京大概一小時車程嘅鎌倉江之島係一個充滿海濱風情、自然風光同特色美食嘅小島,一向都係東京人最愛嘅度假勝地!今次去日本,不妨探訪吓江之島,嚟一個休閒海濱度假之旅啦!小編已經幫大家搜羅好必去江之島景點同必食江之島美食,快啲bookmark定啦!

 

東京近郊遊|鎌倉江之島景點推薦|江之島岩屋

江之島岩屋
@feelshanon

江之島岩屋係兩個經過6,000年海浪侵蝕而成嘅岩洞,由6世紀開始就已經被視為神聖之地。相傳佛教高僧弘法大師同德川家康大將軍等重要人物都曾經嚟過岩屋祈願,係江之島最有靈氣嘅地方!

江之島岩屋_2
@lazyjapan

兩個岩洞分別有152米同56米深,買入場券嘅時候,大家可以先喺售票處攞蠟燭,然後先入去洞內探險!岩洞入面有好多石雕佛像,記錄咗好多關於岩洞嘅傳說,充滿神秘感!參觀完岩洞,記得要喺洞外觀賞吓宏偉嘅岩壁,仲可以喺海邊睇埋日落㖭!

 

江之島岩屋
地址:〒251-0036 神奈川県藤沢市江の島2丁目5(顯示地圖)
營業時間:每日09:00 – 16:00
入場費用 (只供參考)成人¥500;小童¥200
網址:https://www.fujisawa-kanko.jp/spot/enoshima/17.html

 

東京近郊遊|鎌倉江之島景點推薦|新江之島水族館

新江之島水族館
@livejapan

座落於相模灣旁邊嘅新江之島水族館,有眺望富士山同飽覽江之島海景嘅一流景觀,而且規模龐大,入面養咗超過100種海洋生物,係日本最具人氣嘅水族館之一!

新江之島水族館_2
@wow-j.com

新江之島水族館以相模灣為主題,總共設有有11個展區,包括超巨型相模灣大水槽、水母夢幻廳、海豚表演區Doferia、海龜的海濱等等。喺呢度小朋友同大朋友都可以近距離觀賞海龜、企鵝同海豹,重頭戲就係可以睇到超過14種水母嘅3D水母show!大家記得入場前留意每場show嘅表演時間,咁就唔會錯過每一個精彩表演啦! 

 

新江之島水族館
地址:〒251-0035 神奈川県藤沢市片瀬海岸2丁目19−1 (顯示地圖)
營業時間:每日09:00 – 20:00 ※會因季節而有所調整
入場費用 (只供參考)成 ¥2,400;高中生¥1,500;中小學生¥1,000
網址:https://www.enosui.com/tw/index.html

 

東京近郊遊|鎌倉江之島景點推薦|江之島展望燈台

江之島展望燈台
@backpackers.com

其實江之島展望燈台外型獨特,倒圓錐形嘅設計令佢成為江之島最特別嘅地標之一!因為外形好似屹立喺相模灣中央嘅一支蠟燭,所以又有「Sea Candle」之稱。每到夜晚,展望台嘅夜燈亮起,就更加似蠟燭!展望燈台嘅燈光仲會因應唔同嘅季節而變色,設計好有心思。

江之島展望燈台_2
@facebook

登上燈塔嘅觀景台,大家可以360度全方位將江之島同相模灣嘅美景盡收眼底!不過小編就覺得登上展望台嘅最佳時間係黃昏時分,因為睇完日落,仲可以睇埋夜景㖭! 

 

江之島展望燈台
地址:〒251-0036 神奈川県藤沢市江の島2丁目3−28 (顯示地圖)
營業時間:每日09:00-  20:00 ※會因季節而有所調整
入場費用 (只供參考)成人¥300;小童¥150
網址:https://enoshima-seacandle.com/

 

東京近郊遊|鎌倉江之島美食推薦|江之島小屋

江之島小屋
@lazyjapan

嚟到江之島,梗係要品嚐吓湘南名物 — 吻仔魚啦!唔好睇呢間江之島小屋外觀平平無奇!呢度經常都大排長龍,為嘅就係一碗新鮮嘅吻仔魚刺身丼!

江之島小屋_2
@wow-j.com
吻仔魚刺身丼 ¥940

吻仔魚一打撈上岸之後,鮮度就會立即下降,一般只可以保存半日,所以只有喺盛產吻仔魚嘅湘南一帶,先有機會食到最新鮮嘅吻仔魚刺身!吻仔魚嘅魚肉非常嫩滑,入口即溶!每日新鮮打撈,所以一啲腥味都冇!不過,想喺湘南地區食到吻仔魚刺身都唔係咁容易,因為要視乎當日嘅漁獲,吻仔魚仲會好快賣哂,所以大家最好喺午餐時間去食喇! 

 

江之島小屋
地址:〒251-0035 神奈川県藤沢市片瀬海岸2丁目20−12 江ノ島小屋1階 (顯示地圖)
營業時間:每日08:00 – 15:00;16:30 – 21:30
網址:http://enoshima-koya.com/

 

東京近郊遊|鎌倉江之島美食推薦|Egg ‘n Things

Egg 'n Things
@japantravel

來自夏威夷嘅鬆餅店Egg ‘n Things係江之島上非常之出名嘅人氣打卡cafe!Egg’n Things其實喺日本其他地方都有分店,不過經常都要大排長龍,但江之島呢度人潮就相對較少。而且喺江之島嘅海濱風情襯托下,品嚐夏威夷風味嘅早餐同鬆餅,真係零舍有feel! 

Egg 'n Things_2
@lazyjapan
士多啤梨奶油塔鬆餅 ¥1,080

講到必食item,就一定係佢哋嘅招牌奶油塔鬆餅,淨係睇到層奶油塔,都已經覺得好邪惡!不過出奇地感覺唔會太膩,加上有澳洲夏威夷果仁碎同水果中和一下,食落都唔會太heavy!佢地嘅鬆餅鬆軟得嚟又有少少彈牙嘅口感,亦帶有濃濃嘅牛油香,真係好味到暈!份量夠哂大,一份兩個人食都好夠!

 

Egg ‘n Things
地址:〒251-0035 神奈川県藤沢市片瀬海岸2丁目17−23 1F the BEACH HOUSE (顯示地圖)
營業時間:每日09:00 – 22:30
網址:https://www.eggsnthingsjapan.com/shonan/

 

東京近郊遊|鎌倉江之島美食推薦|章魚煎餅 あさひ本店

章魚煎餅 あさひ本店
@murasaki-imo

喺小編心目中,江之島第1位必食名物係吻仔魚,第2位就一定係章魚煎餅!呢間章魚煎餅 あさひ本店位於弁財天仲見世通,基本上係江之島必經嘅步行街!只要踏入步行街,遠遠就已經見到門外大排長龍,仲會聞到陣陣嘅香味!

章魚煎餅 あさひ本店_2
@tsunagujapan
章魚煎餅 ¥350

佢哋嘅章魚煎餅係用咗原隻章魚配上特製麵糊,即場用高溫鐵板壓製而成嘅煎餅,亦即係著名嘅日式小食仙貝。即整即食,熱辣辣、脆卜卜、加上超濃烈嘅章魚味,唔洗講都知好食啦!另外仲有原隻黑虎蝦同水母仙貝㗎!食完仲可以買包裝好嘅仙貝做手信㖭! 

 

章魚煎餅 あさひ本店
地址:〒251-0036 神奈川県藤沢市江の島1丁目4−10 (顯示地圖)
營業時間:每日09:00 – 18:00
網址:http://www.murasaki-imo.com/

 

📖延伸閱讀:【日本必買的東西】東京零食特集 — 東京必買零食、手信、小物!
📖延伸閱讀:【富士山景點】東京出發!河口湖一日遊景點懶人包 (連靚景富士山酒店推介)
📖延伸閱讀:【日本家品控】文青必逛!嚴選六大東京家品店、雜貨店!
📖延伸閱讀:【東京近郊好去處】鎌倉一日遊行程交通攻略!連必去鎌倉景點精選!

 

 

Hotels.com酒店優惠Hotels.com酒店優惠