定期送上世界各地最新、最地道嘅旅遊資訊!

【會安自由行】越南峴港會安+順化一日遊景點總整理 (連越南交通攻略)

想去平靚正旅行,除咗泰國同台灣之外,越南都係一個好選擇!峴港(Da Nang)係越南第四大城市,仲係國家地理雜誌推薦人生必去50個地方之一。除咗帶你玩盡市區景點,仲有會安自由行順化一日遊等嘅資料,輕鬆去勻打卡熱點!當然唔少得越南交通攻略,要去峴港會安嘅朋友千祈唔好錯過喇!

 

峴港會安自由行|峴港景點推薦|峴港大教堂

@fayfay.com

峴港大教堂係法國殖民時期興建嘅天主教教堂,建於1923年,係當時越南唯一一間天主教教堂。浪漫嘅哥德式建築風格,配上粉紅色嘅外牆,充滿夢幻嘅感覺,近年更大受遊客歡迎,成為峴港必check打卡熱點,小編都忍唔住少女心大爆發呀!如果想參觀教堂內部,就要參考返彌撒時間,因為彌撒途中係唔比遊客入內㗎!

 

峴港大教堂
地址:156 Đường Trần Phú, Hải Châu 1, Hải Châu, Đà Nẵng 550000, Vietnam (顯示地圖)
入場費用:免費
開放時間:星期一至日及公眾假期 11:30 – 14:00
彌撒時間:星期一至六 05:30, 17:30;星期日05:30, 06:30, 07:30, 15:30,17:30
官網https://www.giaoxuchinhtoadanang.org/

 

峴港會安自由行|峴港必食推薦|越南湯河 Pho 29

@motor0513_carstory

嚟到越南,當然要食碗地道嘅生牛肉河粉啦!因爲越南人晚餐普遍習慣食飯嘅關係,夜晚通常都好難搵到有Pho食。所以早餐或者午餐食就最啱喇!雖然Pho 29好近峴港大教堂,又有英文餐牌,但Pho 29算係平價嘅平民檔口,價錢一d都唔貴!

 

@hohohobbang

款式有生牛肉、牛腩同牛腹可以揀,襯埋個好清嘅湯底,味道唔錯㗎!不過小編提提大家,越南街頭嘅Pho一般份量比較少,驚唔夠飽記得要叫大碗呀!

 

Pho 29
地址:39 Trần Quốc Toản, Phước Ninh, Hải Châu, Đà Nẵng 550000, Vietnam (顯示地圖)
營業時間:06:00 – 21:00
官網http://pho29group.com/

 

峴港會安自由行|峴港景點推薦|美溪沙灘

@oliver.cao

美溪沙灘曾被福布斯雜誌評為「世界六大最美海灘之一」,沙灘又長又白,配上一望無際嘅海岸線真係令人心曠神怡呀!而且佢嘅沙質好幼滑,想踩沙、日光浴或者瞓身影相都冇難度。

 

@lesploretheworld

一望無際嘅白沙,海天一色,點影都得呀!

 

美溪沙灘
地址:Sơn Trà, Da Nang 550000, Vietnam (顯示地圖)

 

峴港會安自由行|峴港cafe推薦|Pendulum Coffee House

@pendulum_coffee_house

越南咖啡店的數目多不勝數,越南人喜愛咖啡的程度,可以話係亞洲之最。Pendulum Coffee House係一間地道嘅咖啡室,雖然唔係傳統嘅越式咖啡專門店,但都吸引咗好多當地嘅打工仔同文青,成為佢哋日常生活嘅聚腳地!

@pendulum_coffee_house

如果點咖啡時冇說明要熱咖啡,店員會自動自覺為你送上一杯冰,同埋煉奶,偏甜嘅煉奶可以中和越南咖啡豆嘅苦澀同酸味,嚟越南一定要試!

 

Pendulum Coffee House
地址48 Lê Đình Dương, Phước Ninh, Hải Châu, Đà Nẵng 550000 (顯示地圖)
營業時間06:30 – 22:00

 

📖延伸閱讀:【胡志明市美食特集】嚴選高汁文青feel!打卡必去越南咖啡室列表 (連西貢必食推介)

 

峴港會安自由行|會安景點推薦|會安古鎮

@bettyshekstudio

嚟到會安又點可以錯過佢嘅古蹟名勝呢?以下就等小編介紹一啲必去嘅古城景點俾大家啦。會安喺16至19世紀係東南亞區非常繁榮嘅貿易港,1999年被列入世界文化遺產,係峴港嘅人氣旅遊景點。會安古鎮距離市區大約30分鐘車程,非常方便。古城唔算好大,大家可以慢慢遊覽。而小編就推薦你租架單車或者租人力三輪車,輕鬆去勻成個會安!留意返會安古城本身係唔需要入場費嘅,但係想參觀佢嘅古屋、會館等等就需要收費喇。

 

@ploypearploy

夜晚嘅會安先係最靚最迷人㗎!成個古城掛滿七彩手工燈籠,入夜後就會亮燈,大街小巷都變得色彩繽紛。仲可以搭小船遊河,一邊欣賞咁靚嘅峴港會安夜色,仲可以放水燈籠祈福添。

 

會安古鎮
地址:Phường Minh An, Hội An, Quang Nam Province, Vietnam (顯示地圖)
營業時間:08:00 – 21:30
官網http://whc.unesco.org/en/list/948

 

 

峴港會安自由行|會安景點推薦|韓市場 (Han Market)

@fayfay.com

韓市場 (Han Market)係鄰近韓江嘅傳統市場,唔只係當地人購物嘅地方,仲成為旅客搜羅手信熱點!同相隔5分鐘路程嘅共市場 (Con Market)唔同,呢度嘅環境明亮乾淨,賣嘅嘢都係多數以觀光手信為主,例如藤編嘅帽、袋,越式香料,布料、木製家品等等。

 

@nami_0117_

一般喺市場內都可以講價,大約可以去到五至七折㗎!

 

@w__s__jung

 

Han Market
地址:119 Trần Phú, Hải Châu 1, Hải Châu, Đà Nẵng 550000, Vietnam (顯示地圖)
營業時間:06:00 – 19:00

 

峴港會安自由行|會安必食推薦|越南法包 Mi AA – Happy Bread

@eunnn_gee

呢間Happy Bread就喺Han Market對面,行完過嚟醫肚就啱曬喇。佢哋雖然主打外賣法式三文治,但餐廳入面都有提供座位,點餐完畢就可以入去坐低等,店員將食物帶到你個位。

 

@_ya_rimm

呢度嘅法式三文治有多款口味選擇,而當中最具人氣嘅,就係呢款夾咗火腿、生菜、蛋卷、淋上番茄醬同蛋黃醬嘅招牌法包啦!非常足料,而且醬汁夠多!好多人都係一啖啤酒一啖法包,好滋味!小編仲意外地發現,呢間店有好多韓國人幫襯㖭!

 

Mi AA – Happy Bread
地址:14 Hùng Vương, Hải Châu 1, Hải Châu, Đà Nẵng 550000, Vietnam (顯示地圖)
營業時間:10:00 – 22:00

 

📖延伸閱讀:【河內自由行】平民價位嘆越南美食!河內3大越南法國菜餐廳及附近住宿推薦!

 

峴港會安自由行|會安景點推薦|美山聖地

@美山聖地官網

如果古蹟觀光係你杯茶,咁就唔可以錯過有「小吳哥窟」之稱嘅美山聖地喇!同樣喺1999年被列入世界文化遺產,美山聖地係占婆王國印度廟遺跡,曾喺越戰中受到戰火摧殘。

 

@theeyeopeningjourney

美山聖地距離會安約40分鐘車程,大約半日時間就已經足夠去參觀。行程緊密的話,有好多人會選擇先去美山半日遊,下晝就去會安古鎮,咁就可以一日遊曬兩個古蹟喇。

 

美山聖地
地址:Duy Phú, Duy Xuyên District, Quang Nam Province, Vietnam (顯示地圖)
營業時間:06:30 – 16:30
官網http://mysonsanctuary.com.vn/

 

峴港會安自由行|順化一日遊景點推薦

@ji_sunieyoo

近年愈嚟愈多人去越南峴港會安,都會選擇去埋順化一日遊,遊覽呢個同為越南世界文化遺產嘅古蹟。順化係越南古都會,係當時阮朝嘅京城,留低咗唔少歷史建築群,包括順化皇城天姥寺順化皇陵等,順化皇城喺1993年被列入世界文化遺產。

 

峴港會安自由行|順化一日遊景點推薦|順化皇城

順化皇城係越南阮朝留下嘅古蹟,亦係越南現存規模最大的古建築群,1994年被聯合國教科文組織認定世界遺產。由於當年清朝同阮朝係宗藩關係,所以阮朝建都亦都仿效咗紫禁城規格,可以話係袖珍版北京紫禁城,有齊太和殿、午門等等!但昔日的華麗殿堂,亦因為無情嘅戰火而受到催殘同破壞,1968年順化戰役後,至今都未修復完成。

 

@tree711218

踏入順化皇城,規模同氣勢唔可以同真正嘅紫禁城比較,但順化皇城嘅感覺就更加似沒落嘅貴族,色彩豐富,氣質尤存,更加有味道!

 

順化皇城
地址:越南承天-順化 Thành phố Huế (顯示地圖)
營業時間:星期一至三、五六日 08:00 – 17:30;星期四 08:00 – 22:30
入場門票(只供參考):每人150,000盾

 

峴港會安自由行|順化一日遊景點推薦|順化皇陵 – 啟定陵

@kaewtra

順化入面仲有三大皇陵:嗣德皇陵、啟定皇陵、明命皇陵。啟定陵係阮朝皇帝弘宗(啟定帝)嘅皇陵,歷時 11 年先建成。唔少人覺得啟定陵係當中最靚嘅一座皇陵,因為有別於其他順化皇陵嘅古樸簡約,融合咗中國同法國嘅建築特色,金碧輝煌,色彩繽紛華麗。

 

@tree711218

 

順化皇陵 – 啟定陵
地址: Khải Định, Thủy Bằng, Hương Thủy, Thừa Thiên Huế 530000越南 (顯示地圖)
營業時間:07:00 – 17:30

 

峴港會安自由行住宿推薦|福西安馬亞峴港酒店

@luxurytraveldiary.com

來自荷蘭嘅Spa Villa品牌福西安馬亞峴港酒店最大賣點係Spa All-inclusive,即係Spa放題,每人每日保證可以做兩次Spa!而且想幾點食早餐,喺邊到食早餐都可以,超relax呀!住喺到真係咩都唔想做,淨係想瘋狂做Spa!

 

@luxurytraveldiary.com

房間內部行簡約路線,想更加有私隱嘅旅客可以揀私人泳池Villa!

 

福西安馬亞峴港酒店
地址:VNM峴港Khue My Ward, Ngu Hanh Son DistrictVo Nguyen Giap Street (顯示地圖)
星級 | ★★★★★
位置 | ★★★★☆
設施 | ★★★★★
環境 | ★★★★★
價格 | 查看價格  

 

📖延伸閱讀:【越南自由行】越南芽莊景點、芽莊呃like酒店推介!

 

峴港會安自由行住宿推薦|峴港凱悅麗晶度假村及水療中心

@hyatt.com

Hyatt Regency呢間resort設備齊全,有私人沙灘而且價錢比較相宜,係峴港嘅熱門住宿之一。酒店有兒童設施,仲有375間客房,非常適合一家大細親子遊!唯一要注意酒店距離市區遠少少,而酒店未有提供免費接駁車嘅服務,大家要留意返交通問題喇。

 

@hyatt.com

房間設計以簡約自然為主,好清雅,仲好有親親大自然嘅感覺呀!

 

峴港凱悅麗晶度假村及水療中心
地址:VNM峴港05 Truong Sa Street, Hoa Hai Ward (顯示地圖)
星級 | ★★★★★
位置 | ★★★☆☆
設施 | ★★★★☆
環境 | ★★★★☆
價格 | 查看價格  

 

峴港會安自由行住宿推薦|洲際峴港新半島度假酒店

@danang.intercontinental.com

洲際渡假村嘅室內設計好靚好華麗,時尚奢華嘅設計絕對體現到五星級酒店嘅氣派!Resort自成一國,酒店唔只有私人沙灘,仲有好多活動同課程俾住客參加,好似瑜珈、浮潛、划艇等等,真係可以全日留喺酒店玩都唔會悶㗎!

 

@danang.intercontinental.com

房間設計別樹一格,非常時尚。環境靚,服務周到,基本上住過嘅人都好滿意,想享受豪華旅程就唔好錯過喇!

 

洲際峴港新半島度假酒店
地址:VNM峴港Tho Quang Ward, Son Tra DistrictBai Bac, Son Tra Peninsula (顯示地圖)
星級 | ★★★★★
位置 | ★★★★☆
設施 | ★★★★★
環境 | ★★★★★
價格 | 查看價格 

 

峴港會安自由行住宿推薦|越南中部蘭珂悅榕莊

@robbreport.com.my

酒店房間唔多,只有56間,而且私隱度好高,啱曬夫婦或者情侶嚟過返個浪漫假期。酒店本身有好多節目,除咗水上活動、瑜珈班等,仲有cooking class甚至有教埋越南話!值得一提嘅係,酒店本身仲有個高爾夫球場添,唔出街都玩唔曬呀。而酒店亦有提供shuttle bus去會安、順化等景點,非常貼心。

 

@robbreport.com.my

酒店裝修典雅舒適,情侶專用嘅Spa Villa房都有,配埋個靚景真係冇得彈。

 

越南中部蘭珂悅榕莊
地址:VNM順化Cu Du Village, Loc Vinh Commune (顯示地圖)
星級 | ★★★★★
位置 | ★★★★☆
設施 | ★★★★★
環境 | ★★★★★
價格 | 查看價格  

 

峴港會安自由行|越南交通攻略|Grab

@ underconsideration.com

峴港基本上係冇公共交通工具,搭的士就係最方便嘅,車費唔貴。如果想安心啲就可以下載定叫車apps,避免講價或者兜路等麻煩事。Grab 係東南亞最大嘅叫車公司,去開東南亞玩嘅人可能都用過,好方便,仲可以用現金俾錢。

 

📖延伸閱讀:【越南自由行】峴港行程攻略連峴港必食、必去景點懶人包
📖延伸閱讀:【越南遊記—獨佔迷人海灣】越南下龍灣、卡巴島3日2夜行程攻略
📖延伸閱讀:【越南下龍灣實地考察】包住包食套票二千蚊有找!入住越南郵輪有咩玩?
📖延伸閱讀:【越嚟越舒服】越南按摩邊度有?Top 5 必住越南 Spa Resort!

 

Hotels.com酒店優惠