定期送上世界各地最新、最地道嘅旅遊資訊!

【赤柱美食篇】港島南區風情!赤柱餐廳美食推薦 連三大必去赤柱景點!

赤柱可以話係香港嘅一個世外桃源,獨特嘅異國風情同悠閒氛圍非常吸引,除咗受到遊客歡迎,唔少香港人假期都鍾意去赤柱玩返日。呢到有古蹟、歷史建築、海灘、市集、各式餐廳同酒吧,啱曬大家一日遊。小編精選咗三大必去赤柱景點同三間赤柱餐廳,就算冇時間出埠都可以喺赤柱感受寫意渡假feel!

 

赤柱景點推薦|赤柱海濱長廊

赤柱海濱長廊
@216yeon

喺赤柱海濱散步係遊赤柱嘅指定動作,赤柱大街其中一段同海濱相傍,一路行都有開揚海景同陣陣海風,夠曬寫意。沿途有好幾間歐陸風露天餐廳,好多人都會喺到坐低飲杯啤酒食吓嘢。除咗當地居民之外,仲有唔少外籍人士都選擇居住喺赤柱,所以會見到好多外國人喺呢到散步或者食飯,亦有唔少係帶埋狗狗嚟添。

赤柱海濱長廊_2

赤柱海濱長廊係赤柱海濱工程嘅一部份,喺2008年完成,時尚而獨特嘅設計仲喺當年榮獲三項建築界獎項!無論係海景定海傍巨石都啱曬影靚相,唔少情侶同攝影愛好者都鍾意。

 

赤柱海濱長廊
地址:赤柱大街13號 (顯示地圖)
營業時間:24小時開放

 

赤柱景點推薦|美利樓

美利樓
@sohongkong

美利樓係歷史建築物,建於1844年 ,原本位於中環嘅中國銀行大廈,係英軍辦公大樓,係當時政府評定嘅一級歷史建築。後來因為建築工程要被拆除,政府就將美利樓嘅一樑一柱、一磚一瓦都編上號碼並妥善保存,然後喺1998年於赤柱重建復原。

美利樓_2
@derek_tch

呢座融合咗東西方建築特色嘅仿希臘復古式建築,充滿住維多利亞時代色彩,已經成為咗赤柱地標。日頭同夜晚嘅美利樓都有唔同美態,獨特嘅異國風情吸引唔少人嚟打卡,有啲新人仲會選擇喺到影婚紗相添。

 

美利樓
地址:赤柱大街96號 (顯示地圖)
營業時間:24小時開放

 

赤柱景點推薦|卜公碼頭

卜公碼頭
@ipearena

除咗美利樓之外,赤柱仲有另一個復原建築物,就係卜公碼頭喇。「卜公」係第12任香港總督卜力 Henry Blake嘅敬稱,卜公碼頭原本係位於中環畢打街嘅公眾碼頭,喺皇后碼頭啟用之前,係政府嘅禮賓碼頭。碼頭喺1965年隨維港填海工程而清拆,上蓋被遷往公園作為休憩場所,直到 2006年再將篷頂移到赤柱,恢復碼頭功用。

卜公碼頭_2
@thevanessahung

卜公碼頭同一般碼頭唔同,碼頭上蓋以鑄鐵建造,設計型格美觀,吸引唔少遊人嚟影相。

 

卜公碼頭
地址:赤柱卜公碼頭 (顯示地圖)
營業時間:24小時開放

 

赤柱美食推薦|Stanley Cave

Stanley Cave
@nigel.mak

Stanley Cave嘅設計非常吸晴,用磚頭將門口砌成一個山洞,餐廳則設於地底,係主打甜品嘅cafe輕食店。 

Stanley Cave_2
@stanleycavehk

店內嘅牆磚真係用石磚製成,營造一個好似喺洞穴入面嘅環境,遠離繁囂嘅感覺。開設店舖嘅餅廚,出身自君悅、香格里拉等五星級酒店,來頭好猛。麵包、糕點、甜品每日新鮮製造,有酒店級水準,難怪連Trip Advisor都推介啦!

Stanley Cave_3
@gerrary

Stanley Cave嘅食品以甜品、包類、沙律等為主,價位唔高,以赤柱物價嚟講算係好親民。呢到嘅frozen yogurt好唔錯, 配埋nutella crepe就更滋味!

 

Stanley Cave
地址:赤柱市場道25號地庫 (顯示地圖)
營業時間:8am – 7:30pm

 

赤柱美食推薦|The Boathouse 

The Boathouse
@hongkongthrumyeyes

漫步於赤柱大街,呢間鮮黃色嘅小屋非常搶眼,一定唔會錯過。其實以前The Boathouse係以獨特嘅彩藍色外牆聞名,成為赤柱地標之一。但係2015年3月,餐廳外牆突然轉做黃色,據說係因為風水問題。大家唔好睇小佢,唔止有鮮豔嘅色調,本身仲係一幢被評為具三級歷史價值嘅建築物𠻹。

The Boathouse_2
@jijiji101

The Boathouse唔止外觀靚,坐喺餐廳靠窗或者開放式露台嘅位置,食客就可以飽覽一望無際嘅赤柱海景。望住咁靚嘅海景食嘢寧舍放鬆,仲好有歐陸風情添。

The Boathouse_3
@christy.choii

呢到主打西餐,海鮮、漢堡同牛扒都好受歡迎,叫返杯cocktail或者啤酒就perfect喇!

 

The Boathouse
地址:赤柱大街88號 (顯示地圖)

營業時間:星期日至四 11:30 – 22:00 星期五至六 11:30 – 23:00

 

赤柱美食推薦|泗益

泗益
@chinshihon

咪以赤柱呢個咁有外國渡假feel嘅地方,淨係得酒吧同西餐,其實呢到都有懷舊茶記㗎!泗益係五十年老字號,入口暗藏喺生果檔入面,係識食之人先識路嘅隱世小店。

泗益_2
@lermi402

免糖漿咖央西多士係呢到嘅名物,每件都係老闆親自即場製作。

泗益_3
@moannaxdessire

西多士用泡沫狀嘅蛋白代替蛋漿,外皮炸得香脆,內裡口感超軟綿,自家製咖央甜而不膩,一咬落去充滿椰香,yummy!碎牛肉蛋菠蘿包同樣係店家名物,手快有手慢冇。另外仲有份量十足嘅蛋牛治、豬扒包、魚柳包同絲襪奶茶都值得一試㗎。

 

泗益
地址:赤柱市場道2號 (顯示地圖)
營業時間:06:00 – 16:00 (逢星期二休息)

 

📖延伸閱讀:【香港拍拖好去處】情侶必睇!本地週末好去處排行榜!
📖延伸閱讀:【香港兩日一夜好去處】隱世香港渡假屋、酒店連本地遊玩攻略!
📖延伸閱讀:【香港文青必去】美荷樓青年旅舍住宿報告 (連四十一冰室必點美食推薦)
📖延伸閱讀:【香港郊遊樂】香港行山路線懶人包(西貢、大嶼山、港島區) (連超抵住香港郊區酒店推薦)

 

Hotels.com酒店優惠Hotels.com酒店優惠