定期送上世界各地最新、最地道嘅旅遊資訊!

【西班牙特產篇】西班牙超市必買零食、手信!教埋你揀靚西班牙火腿!

 

去旅行買手信,識買就一定係去當地超市,買最地道嘅零食同特產!嚟到西班牙旅行,面對超市花多眼亂嘅貨品,又唔知邊樣係最好同最具代表性嘅手信,真係頭都大!今次就等小編為大家介紹6款西班牙超市必買零食、手信同3個最正嘅西班牙火腿品牌,仲教埋你揀靚西班牙火腿!睇完呢篇文章,包你唔洗再頭痛要買咩西班牙特產

西班牙超市
@albertgood

以下介紹嘅零食、特產,全部都可以喺西班牙最大型嘅連鎖超市Mercadona搵到㗎!

 

西班牙特產篇|西班牙超市必買零食、手信|Hornimans花草茶

Hornimans花草茶
@YourSpanishCorner

西班牙人好鍾意飲花草茶,而Hornimans呢個花草茶牌子係已經有接近200年歷史嘅老字號,採用咗天然有機草本植物製茶,絕對有信心保證,係手信最佳首選!無論去到西班牙任何超市都可以搵到Hornimans花草茶㗎!當中最受歡迎嘅峰蜜洋甘菊花茶,唔單止可以寧神同舒緩緊張情緒,蜂蜜令到花茶飲落清甜順口,唔好淨係買嚟做手信,記得掃返一堆自己嘆!

 

西班牙特產篇|西班牙超市必買零食、手信|Rabitos Royale Dark Chocolate Fig Bonbons

Rabitos Royale Dark Chocolate Fig Bonbons
@LaTienda

想送一啲矜貴得嚟又唔會太貴嘅手信,Rabitos Royale無花果酒心朱古力絕對係不二之選!每一粒朱古力都用咗一整粒新鮮無花果製作,喺果肉入面注入咗松露同埋白蘭地,果肉外層淋上一層香濃黑朱古力,食起嚟混合咗無花果帶微酸、朱古力帶微苦嘅甜味、加上酒香,好有層次!完全唔似係普通超市就可以買到嘅朱古力!CP值高!

 

西班牙特產篇|西班牙超市必買零食、手信|Gik Blue Wine藍色葡萄酒

Gik Blue Wine藍色葡萄酒
@CavaDiapon

白色同紅色嘅葡萄酒就飲得多,但藍色葡萄酒你又飲過未?Gik Blue Wine其實係萃取咗葡萄皮嘅天然靛藍花青素,再以葡萄酒色素沉澱技術製作而成嘅藍色葡萄酒,而葡萄嘅產地主要來自西班牙嘅La Rioja、Zaragoza、Leon、Castilla-La Mancha等。酒味清新而帶微酸,用嚟配三文魚、Carbonara、墨西哥脆片都好啱!其實味道就唔算好新奇,但勝在夠吸睛,送禮一定可以令人有深刻印象!

 

西班牙特產篇|西班牙超市必買零食、手信|西班牙限定火腿味Pringles薯片

西班牙限定火腿味Pringles薯片
@biqui

Pringles薯片相信都唔洗小編特別介紹,可以稱得上係陪伴所有人成長嘅薯片!但大家又知唔知,其實Pringles喺世界各地都有唔同嘅限定口味薯片㗎!嚟到西班牙就梗係唔可以錯過火腿口味Pringles啦!呢隻火腿味薯片味道濃郁,鍾意重口味嘅朋友就啱哂!小編就覺得偏鹹咗少少,但用嚟配酒或汽水就一流啦!

 

西班牙特產篇|西班牙超市必買零食、手信|Ines Rosales橄欖油手工脆餅

Ines Rosales橄欖油手工脆餅
@YummyBazaar

西班牙出名生產橄欖油,而Ines Rosales就係專以橄欖油為基底,製作出西班牙傳統風味餅乾嘅零食品牌。Ines Rosales堅持採用100%特級初榨橄欖油同天然食材,用傳統嘅技術製作,而且冇添加防腐劑,每一片都香脆無比,食到停唔到口!係西班牙人家傳戶曉嘅零食,無論係原味定海鹽、肉桂、香橙味,全部都咁受歡迎! 

 

西班牙特產篇|西班牙超市必買零食、手信|La Vieja Fabrica果醬

La Vieja Fabrica果醬
@Degustabox

La Vieja Fabrica源自西班牙南部Sevilla,專門生產純手工天然果醬。所有製作果醬嘅水果都經過嚴格挑選,全部都係最頂級同最新鮮!最正係每一瓶果醬都會有粒粒果肉!當地人都好鍾意食呢款果醬,經常都冇貨㗎!最受歡迎就係士多啤梨味,因為入面嘅果肉好大粒,食起嚟好有滿足感,如果見到有貨就唔好諗,即掃!

 

西班牙特產篇|西班牙火腿挑選指南

西班牙火腿挑選指南
@Navarretinto

每次入到西班牙火腿店,見到林林總總嘅火腿,究竟揀邊款先係最好食同最頂級呢?以下指南就可以幫到大家啦:

  • 西班牙火腿主要分為豬後腿Jamon同前腿Paleta,第一樣要知嘅就係要揀Jamon,因為後腿肉質好,油質亦較高。 
  • 然後就要睇豬嘅品種,市面上普遍嘅火腿都係由白豬或混種豬Serrano製成,但其實最頂級嘅係由黑毛豬製成嘅伊比利亞Iberico火腿。
  • 最後係飼養等級,普通以蔬菜同飼料圈養嘅就叫Cebo、Pienso、Campo,然後混合普通飼料同橡果放養嘅就係Recebo,最後,以橡果放養到一定期限嘅就係Ballota,亦係用嚟製作最頂級,最肥美,肉質充滿榛子香嘅火腿!
  • 簡單嚟講,一見到Jamon Iberico de Ballota就知道係最靚嘅火腿啦!

 

西班牙特產篇|西班牙火腿品牌推介|Joselito Gran Reserva

Joselito Gran Reserva
@SpainishShopOnline

Joselito Gran Reserva係全西班牙最有名氣嘅火腿製造商,製作嘅火腿只會採用100%伊比利亞血統黑毛豬,就連法國名廚Joel Robuchon同多間高級餐廳都專用呢個火腿品牌,雖然價錢偏貴,但品質有絕對保證,貴得有道理!

 

西班牙特產篇|西班牙火腿品牌推介|Cinco Jotas Reserva

Cinco Jotas Reserva
@sharemedoc

Cinco Jotas Reserva產自Jabugo地區,由於Jabugo嘅氣候適合種植橡果,所以Jabugo火腿味比較濃郁,更重棒子味,比較受亞洲人歡迎。Cinco Jotas Reserva每年火腿產量相對高,價錢屬中位。

 

西班牙特產篇|西班牙火腿品牌推介|10 Vetas Sierra Mayor de Jabugo

10 Vetas Sierra Mayor de Jabugo
@IbericosSensacion

最後就係最親民,西班牙人家庭長備嘅10 Vetas Sierra Mayor de Jabugo啦!佢地嘅火腿同樣來自Jabugo,豐富嘅棒果味,最適合就係用嚟配生果又或者係入饌,係高CP值之選! 

 

📖延伸閱讀:【西班牙自由行】巴塞隆拿必去人氣街區Las Ramblas、Gothic Quarter連住宿推薦
📖延伸閱讀:【巴塞隆拿景點】巴塞隆拿足球Fans必去—魯營球場Camp Nou懶人包!
📖延伸閱讀:【西班牙手信特集】巴塞隆拿自由行攻略之西班牙必買手信 (連西班牙outlet推薦)
📖延伸閱讀:【去歐洲必買】西班牙巴塞隆拿哥德區散步+必逛設計師小店!西班牙必買設計師單品 + 古著 + 波鞋!

 

Hotels.com酒店優惠Hotels.com酒店優惠