定期送上世界各地最新、最地道嘅旅遊資訊!

【葡萄牙自由行】里斯本自由行景點路線攻略 (連葡萄牙手信必買推薦)

National好多人去歐洲玩都未必諗到去葡萄牙呢個地方,但其實葡萄牙係一個充滿世界文化遺產嘅浪漫國度!2018年仲被《Lonely Planet》評選為最佳旅遊目的地之一!不如今次就等小編幫大家整合一個葡萄牙里斯本自由行攻略,推介必去里斯本景點同必食地道菜色,話埋比你知葡萄牙必買!等大家可以盡情深度漫遊葡萄牙啦!


葡萄牙自由行|里斯本市內旅遊路線
里斯本係葡萄牙最具代表性嘅城市之一,亦都係西歐歷史最悠久嘅城市,所以淨係喺里斯本市內已經有好多極具歷史意義嘅文化遺產!小編已經幫大家計劃好里斯本市內兩條旅遊路線,玩得順暢之餘,亦包保唔會錯過必去景點!

 

路線1|里斯本市中心建築群
坐28號電車遊覽里斯本市 > 羅西歐廣場 (Rossio Square) > 奧古斯塔街凱旋門 (Arco da Rua Augusta) > > 聖胡斯塔升降機 (Santa Justa Elevator) > 阿爾法瑪 (Alfama) > 聖喬治城堡
(Castelo de Sao Jorge)

羅西歐廣場 (Rossio Square)@Flickr
羅西歐廣場 (Rossio Square) 係里斯本市最熱鬧嘅廣場,好多大型活動同慶典都喺度舉行。

 

奧古斯塔街凱旋門 (Arco da Rua Augusta)@Flickr
奧古斯塔街凱旋門 (Arco da Rua Augusta) 係一座有超過250年歷史嘅石砌拱門,石雕精細,而且非常宏偉有氣勢!

 

聖胡斯塔升降機 (Santa Justa Elevator)@Flickr
聖胡斯塔升降機 (Santa Justa Elevator) 係里斯本最古老嘅升降機,亦係呢度最具代表性嘅建築物之一 。

 

阿爾法瑪 (Alfama)@Flickr
阿爾法瑪 (Alfama) 係舊城區,紅屋頂,五彩磁磚外牆嘅建築物林立,反映摩爾人統治時期嘅建築特色!

 

聖喬治城堡(Castelo de Sao Jorge)@Flickr
聖喬治城堡(Castelo de Sao Jorge) 係里斯本最古老城堡,係里斯本市最高點,可以睇到里斯本市全景。

 

 

路線2|里斯本文化遺產
阿茹達宮 (Ajuda National Palace) > 熱羅尼莫斯修道院 (Monastery of St Jerome) > 發現者紀念碑 (Monument to the Discoveries) > 貝倫塔 (Torre de Belem)

阿茹達宮 (Ajuda National Palace)@Flickr
阿茹達宮 (Ajuda National Palace) 係新古典主義嘅建築物,內部奢華氣派,代表咗葡萄牙皇室!

 

熱羅尼莫斯修道院 (Monastery of St Jerome)
@Flickr
熱羅尼莫斯修道院 (Monastery of St Jerome) 1450年就已經存在,係代表曼努埃爾風格嘅建築,1983年被列入為世界文化遺產。

 

發現者紀念碑 (Monument to the Discoveries)
@Flickr
發現者紀念碑 (Monument to the Discoveries) 係里斯本著名地標,為紀念15-16世紀大航海時代而建。

 

貝倫塔 (Torre de Belem)@Flickr
貝倫塔 (Torre de Belem) 係一座有5層高嘅軍事防禦塔,有超過500年歷史。

 

 

葡萄牙自由行|里斯本景點推介|電車28號線 (Tram 28)

里斯本市電車@Flickr
電車係葡萄牙主要交通工具之一,而里斯本市內嘅電車28號線係非常著名嘅一條觀光路線!因為途經多個必去旅遊景點,例如阿爾法瑪區、聖喬治城堡、加斯河、聖胡斯塔升降機等等!電車由馬琴莫妮斯廣場 (Martim Moniz Square) 出發,開到普拉澤雷斯區 (Prazeres District),全程大概40分鐘,途中仲會轉入好多橫街小巷,大家可以舒服又輕鬆咁飽覽里斯本市之美!

 

里斯本市電車_2@Flickr
電車本身已經好吸引人,黃白色嘅車身,車廂內全部都係木製嘅座位,充滿懷舊復古嘅感覺!28號線已經通行咗過百年啦!坐住咁有歷史嘅電車,欣賞住有濃厚中世紀風情嘅建築物同街道,真係好有feel!

 

葡萄牙自由行|里斯本景點推介|里斯本海洋水族館 (The Lisbon Oceanarium)

里斯本海洋水族館 (The Lisbon Oceanarium)@Flickr
除咗喺里斯本市漫遊,里斯本自由行其中一個必去嘅地方就係位於萬國公園 (Parque Das Nacoes) 嘅里斯本海洋水族館 (The Lisbon Oceanarium)。喺呢個充滿世界文化遺產嘅地方,一間極具現代感嘅水族館居然係熱門景點嘅頭幾名!究竟有咩咁巴閉?全因呢個水族館唔單止係係全歐洲最大嘅室內水族館,亦係世界八大水族館之一!

 

里斯本海洋水族館 (The Lisbon Oceanarium)_2@Flickr
入面海洋生物嘅數量超過16000,有成450個物種,除咗魚類,仲可以睇到企鵝同水獺!可愛到暈!水族館亦會不時舉辦唔同嘅展覽,非常精彩!

 

里斯本海洋水族館 (The Lisbon Oceanarium)
地址Esplanada Dom Carlos I s/nº, 1990-005 Lisboa, 葡萄牙 (顯示地圖)
營業時每日 10:00-18:00
入場費用 (只供參考)成人 €18;4-12歲小童 €12
網址:https://www.oceanario.pt/

 

 

葡萄牙自由行|里斯本景點推介|Feira da Ladra市場

Feira da Ladra市場
@Flickr
喺阿爾法瑪舊城區內,每逢星期二及六都會舉行Feira da Ladra市場。呢個市場應有盡有,由高質手工藝品到古董、紀念品、飾物等等,甚至有好多你意想唔到嘅野,呢到都有得賣!

 

Feira da Ladra市場_2@Flickr
最神奇係有好多當地人都會拎屋企唔要嘅野拎出嚟賣,有爛哂嘅傢俬,有已經壞咗嘅遊戲機,連二手內衣都有!就算唔係買,睇吓,笑吓都好有趣!

 

Feira da Ladra市場
地址:Campo de Santa Clara, 1100-472 Lisboa, 葡萄牙 (顯示地圖)
營業時間:星期二及六 09:00-18:00

 

 

葡萄牙自由行|里斯本必食推介|Pasteis de Belem – 葡式蛋撻 (De Belem)

Pasteis de Belem@Flickr
小編喺香港同澳門就食唔少葡撻啦,但講到正宗!梗係要喺葡萄牙呢間Pasteis de Belem葡式蛋撻發源店到食啦!原來葡撻係喺19世紀,由一位修女發明,然後交由Pasteis de Belem售賣,由1837年開始,賣葡撻賣到而家!呢啲先叫正宗呀!

 

葡式蛋撻 (De Belem)
@Flickr
葡式蛋撻 (De Belem) €1.1

因為葡撻極受歡迎嘅關係,所以無論咩時間,都有源源不絕嘅新鮮出爐葡撻!一口咬落去,酥脆無比,外層少少焦香,加上內層滑到不得了嘅蛋餡,一次食3個都唔夠喉!正宗真係唔同啲!


Pasteis de Belem – 葡式蛋撻
地址:R. de Belém 84-92, 1300-085 Lisboa, 葡萄牙 (顯示地圖)
營業時間:每日 08:00-23:00

 

 

葡萄牙自由行|里斯本必食推介|Casa Das Bifanas – 豬扒包 (Bifana)

Casa Das Bifanas@Flickr
小編一直以為豬扒包係亞洲美食,但原來豬扒包都係發源於葡萄牙,仲係呢度嘅國民小食𠻹!雖然里斯本遍佈賣豬扒包嘅餐廳,但識食一定要嚟呢間Casa Das Bifanas嘅豬扒包嘅原祖店!人氣極高,店外經常都大排長龍㗎!

 

豬扒包 (Bifana)
@Flickr
豬扒包 (Bifana) €2.3

正宗葡式豬扒包唔會放好多醬汁,比較乾身一啲,但豬扒份量好多,一個豬扒包有2-3片豬扒,都只係 €2.3,大件夾抵食!而用嘅麵飽同一般食到比較軟身嘅麵包唔同,外層係硬身少少,但好有咬勁,內層就好軟熟,而且吸哂豬扒嘅肉汁,食落好有層次!

 

Casa Das Bifanas – 豬扒包
地址:Praca da Figueira 6, 1100-373 Lisboa, 葡萄牙 (顯示地圖)
營業時間:星期一至六 06:30-00:00

 

 

葡萄牙自由行|里斯本必食推介|Joao do Grao – 葡萄牙海鮮飯 (Arroz de Marisco)

Joao do Grao
@BecodasBarrelas
原來除咗西班牙有海鮮燉飯,葡萄牙都有特式海鮮飯!葡萄牙係一個沿海國家,海產當然係非常豐富!所以嚟到葡萄牙就一定要食海鮮啦!Joao do Grao嘅葡萄牙海鮮飯喺里斯本出哂名,無論係當地人的旅客都慕名而嚟㗎!

 

葡萄牙海鮮飯 (Arroz de Marisco)
@Stlab
葡萄牙海鮮飯 (Arroz de Marisco) €14.9/半份


葡萄牙海鮮飯
最特別嘅地方係用鍋上,汁料比較多,飯比較軟綿,感覺其實有少少意大利飯,入面會有蝦、蟹、魷魚、石班等等海鮮,食起嚟有好濃烈嘅海鮮味,諗吓都流口水!

 

Joao do Grao – 葡萄牙海鮮飯 (Arroz de Marisco)
地址:R. dos Correeiros 222, 1100-422 Lisboa, 葡萄牙 (顯示地圖)
營業時間:星期二至日 12:00-22:00;星期一 12:00-15:30,18:00-22:00

 

 

葡萄牙自由行|里斯本住宿推介|巴伊薩別墅

巴伊薩別墅@hotel.com
巴伊薩別墅係一間位於里斯本舊城區嘅4星級酒店,酒店係公寓型式,有客廳又有廚房,仲提供微波爐,煮食用具、雪櫃等等嘅廚房用品,比人一種家嘅感覺!而且仲有免費BB床同歐陸早餐,最識合一家大細入住!最重要係位置方便,行去好多主要景點,聖胡斯塔升降機同羅西歐廣場都只係5分鐘內路程!

 

@hotel.com
小編最欣賞係酒店設計溫馨,而且著重採天然光!成間房都好光猛!仲有露台,可以望到街景!試想吓朝早一邊嘆住杯咖啡,一邊欣賞里斯本舊城區嘅景色,真係以為自己走咗入電影場景呀!

 

巴伊薩別墅
地址:PRT里斯本Rua de Santa Justa 45 (顯示地圖)
星級 | ★★★★☆
位置 | ★★★★★
設施 | ★★★★☆
環境 | ★★★★☆
價格 | 查看價格  

 

 

葡萄牙自由行|里斯本住宿推介|布朗斯中心酒店

布朗斯中心酒店@hotel.com
布朗斯中心酒店係一間將懷舊復古同現代風格完美融合嘅一間精品酒店,一行入間酒店就覺得無論係裝修,定係擺設都充滿歐陸風情,但又不失時尚感,設計好獨特!而且位於里斯本市中心,被歷史悠久嘅建築群包圍,令人感覺彷彿穿越到以前嘅時代!

 

布朗斯中心酒店_2@hotel.com
不過風格係壞舊,但就有最好嘅現代設備!房間內唔單止空間大,而且設備齊全,所有裝潢用料都好講究,就連麵包機都要用SMEG呢個高級品牌!

 

布朗斯中心酒店
地址:PRT里斯本Rua da Assuncao, nº75 (顯示地圖)
星級 | ★★★★☆
位置 | ★★★★★
設施 | ★★★★☆
環境 | ★★★★★
價格 | 查看價格  

 

 

葡萄牙自由行|里斯本住宿推介|雷福特精品酒店

雷福特精品酒店
@hotel.com
座落於里市本市最熱鬧嘅R.Aurea大街嘅雷福特精品酒店,旁邊就係聖胡斯塔升降機,地理位置無得輸!而酒店以藍色同灰色為主,風格帶有童話嘅感覺,無論係酒店內外,都係影instagram呃like相位!而且價錢又唔貴,設施完善,有免費機場接駁車同早餐供應,CP值高!

 

雷福特精品酒店_2
@hotel.com
房間設計夢幻,帶女朋友嚟,一定心心眼!用雲石嘅傢俬嚟平衡可愛童話風,整體感覺浪漫而優雅!最正係每間房嘅露台都有枱櫈,大家可以喺到嘆返個寫意嘅早餐!

 

雷福特精品酒店
地址: (顯示地圖)
星級 | ★★★☆☆
位置 | ★★★★★
設施 | ★★★☆☆
環境 | ★★★★☆
價格 | 查看價格

 

 

葡萄牙自由行|葡萄牙手信必買推薦|Conserveira de Lisboa 沙甸魚罐頭

Conserveira de Lisboa 沙甸魚罐頭@conserveira_de_lisboa
地理位置沿海嘅葡萄牙海產量咁豐富,喺到食完海鮮,係咪都好想將呢一份大海嘅感覺帶返屋企呢?里斯本就有一間專賣沙甸魚罐頭嘅老店Conserveira de Lisboa!唔講唔知,葡萄牙原來有好多呢啲只賣海產罐頭嘅商店,真係好特別!而Conserveira de Lisboa所賣嘅沙甸魚罐頭都非常高質,仲有好多唔同嘅口味!同一般喺超市買到嘅好唔同㗎!

 

Conserveira de Lisboa 沙甸魚罐頭_2@conserveira_de_lisboa
除咗好食,包裝亦都非常精緻!用嚟做手信就夠哂好睇!

 

Conserveira de Lisboa 沙甸魚罐頭
地址:Rua dos Bacalhoeiros 34, 1100-321 Lisboa, 葡萄牙 (顯示地圖)
營業時間:星期一至六 09:00-19:00

 

 

葡萄牙自由行|葡萄牙手信必買推薦|麝香葡萄酒 (Moscatel Wine)

麝香葡萄酒 (Moscatel Wine)@Flickr
好多人去到葡萄牙都一定會買砵酒(Port Wine),但其實真正識買嘅梗係買麝香葡萄酒啦!麝香葡萄其實仲有另一個好浪漫嘅名叫玫瑰香葡萄!呢種葡萄帶有濃烈嘅花果香,係歷史最悠久嘅葡萄品種,好多葡萄酒都係由此衍生出嚟㗎!而葡萄牙嘅麝香葡萄主要來自塞爾巴圖,品質極高,做出嚟嘅葡萄酒都係香濃柔滑嘅甜酒,好易入口!必買!

 

葡萄牙自由行|葡萄牙手信必買推薦|軟木製品

軟木製品@Flickr
葡萄牙係全球最大嘅軟木生產國,所以軟木係葡萄牙最有特色嘅天然產品!葡萄牙人亦都好善用軟木,發揮創意,用軟木製作成好多唔嘅產品!喺里斯本好容易就見到各式各樣軟木製品,例如明信片、杯墊、鞋、手袋、圍裙等等,軟木完全係葡萄牙人生活嘅一部份!用軟木製品嚟做手信,就一定最具葡萄牙特色!

 

📖延伸閱讀:【遊葡萄牙首都】4日3夜玩盡里斯本電車沿線景點攻略!
📖延伸閱讀:【莫斯科自由行】莫斯科景點大全連市內住宿推薦 (莫斯科地鐵IG攝影攻略)
📖延伸閱讀:【奧地利自由行】音樂‧藝術‧咖啡館—3日2夜慢活維也納景點行程、美食懶人包
📖延伸閱讀:【土耳其自由行】9日8夜土耳其景點行程攻略 (連遊覽土耳其安全小貼士)
📖延伸閱讀:【杜拜自由行】Top 6特色杜拜手信購買攻略+杜拜旅遊注意事項
📖延伸閱讀:【阿布扎比自由行】阿布扎比超豪景點逐個數!(阿布扎比羅浮宮、法拉利世界、華納兄弟電影世界)

 

Hotels.com酒店優惠