定期送上世界各地最新、最地道嘅旅遊資訊!

【英國超市必買】香港冇得賣!英國必買化妝品、零食、手信逐個數!

去旅行除咗食玩瞓,shopping當然都唔少得啦。英國除咗Burberry、Jo Malone、茶葉、朱古力,其實都仲有大把嘢買㗎!小編最鍾意就係去超市掃貨,夠曬平靚正,一於等小編介紹英國超市必買items俾大家,仲有英國必買化妝品、護膚品、零食等等。全部都係香港未有得賣,自己用或者做手信都得!

 

📖延伸閱讀:【倫敦自由行】三大必去倫敦美食市集連必食精選推介!

 

英國超市必買零食|Lotus焦糖餅乾抹醬

唔知大家有冇試過嚟自比利時嘅LOTUS焦糖餅乾?如果有試過嘅朋友,相信一定會深深咁愛上佢。而家仲出咗焦糖餅乾抹醬,濃郁嘅焦糖味配上淡淡肉桂香氣,一打開成陣焦糖甜味撲埋嚟,真係流曬口水!買定兩樽喺屋企看門口,可以搽麵包食,或者用嚟整甜品都得,點食都咁滋味。

Lotus焦糖餅乾抹醬
@lotusbiscoff

呢個香港暫時未有得賣,英國有好多cafe都會用佢嚟整甜品,有粗粒同滑身兩款揀,而且價錢好平,買多幾樽都冇問題!

 

Lotus焦糖餅乾抹醬
英國售賣點:一般英國超市Tesco, Asda, Sainsbury’s等
價錢:約£2.38一樽
官網:www.lotusbiscuits.co.uk

 

英國超市必買零食|麥維他消化餅

呢款經典小食相信大家一定唔陌生,麥維他餅乾始於1830年,然後喺1892研製出第一塊消化餅,至今一直廣受歡迎,風靡全球。而100多年來,麥維他一直都係英國皇室指定供應商,可以話係英國嘅國民餅乾!

麥維他以自然健康為原則、採用高品質嘅原料、全程以植物油烘培、含13%全麥粉、無人工色素及香料、可以成為英國歷代皇室嘅指定御用茶點當然有品質保證啦。

麥維他消化餅
@fungkeke

雖然香港都有進口麥維他消化餅,但係味道就冇英國咁多元化喇,有好幾款都係香港買唔到㗎。小編就最鍾情焦糖味,喺朱古力同餅乾之間夾左層焦糖,唔會太過甜,食嗰陣仲會有焦糖拖肥拉絲添!

 

麥維他消化餅
英國售賣點:一般英國超市Tesco, Asda, Sainsbury’s等
價錢:約£1.5
官網:http://www.mcvities.co.uk/products/digestives

 

英國超市必買零食|Butterkist爆谷

除咗睇戲食爆谷,英國人平時都好鍾意食爆谷當零食㗎。Butterkist已經有過百年歷史,1914年Hoke和Holburn帶住佢哋嘅Butterkist爆谷機行勻曬大大小小嘅戲院去推銷而開始為人熟悉,直到90年代,呢個廣受歡迎嘅爆谷品牌開始搵工廠製作,打入零食市場。

Butterkist爆谷
@butterkistuk

Butterkist嘅爆谷有幾種不同口味,例如係Cinama Salted、Cinama Sweet、 Cinama Sweet & Salted同埋Crunchy Toffee等等。小編最推薦Sweet & Salted,平時喺戲院買嘅甜鹹口味爆谷,就係直接將甜爆谷同鹹爆谷溝埋,但係Butterkist嘅Sweet & Salted爆谷,每一粒爆谷都同時包裹住甜味同鹹味,而且口感酥脆,一啖接一啖好快就解決一包喇!

 

Butterkist爆谷
英國售賣點:大間嘅Tesco、Sainsbury’s等超市或戲院
價錢:約£1.59
官網:http://www.butterkist.co.uk/

 

英國必買零食|Little’s精品即溶咖啡

Little’s精品即溶咖啡
@wearelittles

有別於大部分大大罐嘅即溶咖啡品牌,Little’s係名副其實好little,包裝小巧可愛,五顏六色。品牌賣點係將各式各樣嘅aroma加入100% Arabica嘅即溶黑咖啡之中,唔同顏色代表住唔同香氣。

Little’s嘅誕生源自一段歐美異地戀。姓Little嘅美國男除喺瑞典戀上一位芬蘭女子,兩人結婚後開始學習烘培咖啡豆,95年更舉家移居至英國,繼續研發咖啡產品。直至兒子Will Little長大,2010年起與妻子接手家族業務。夫婦二人將Little’s定位為「精品即溶咖啡」,重新包裝及推廣,開始建立一系列“Flavour Infused Instant Coffee” 即溶風味咖啡產品。

Little’s嘅酸苦味道平衡得好好,就算係少飲開黑咖啡嘅人都好容易接受。佢嘅咖啡成份好單純,卡路里亦極低,每一杯只係4個卡路里,平時飲開二合一或者三合一即溶咖啡嘅話,不妨試吓香氣爆燈嘅Little’s,可能會一試愛上!買厭咗茶包,不妨送呢款咖啡俾朋友做英國手信,有新鮮感得嚟價錢都好合理。

 

Little’s精品即溶咖啡
英國售賣點:大型百貨公司或健康食品店,包括:Sainsbury’s, Waitrose, Whole Food Markets, Selfridges, Booths, Harvey Nichols, Holland & Barrett等
價錢:每樽£2 – £2.99(低因系列每樽£3.2)
官網:www.wearelittles.com

 

📖延伸閱讀:【倫敦景點—倫敦市集精選】南倫敦布里克斯頓活化市集遊玩攻略
📖延伸閱讀:【倫敦必食精選】三大靚景倫敦餐廳推介!

 

英國必買化妝品|SUQQU

SUQQU
@suqqu_uk_official

SUQQU係日本知名多年嘅貴婦級化妝護膚品牌,有留意開日本美妝雜誌嘅朋友肯定知道佢旗下嘅產品曾經獲得好多項大獎,亦都有多款明星產品。而佢嘅魅力唔只風靡亞洲,喺荷里活都一樣咗受歡迎!好似係知名女星Kim Cattrall、Emma Watson,電影「穿Prada的惡魔」化妝師Nicki Ledermann等都係SUQQU嘅粉絲。

雖然SUQQU係日本牌子,但係佢嘅英國限定系列反而係最多人關注嘅,連日本都冇得賣㗎,每次一推出都會好快被搶購一空。好似剛剛過去嘅2018聖誕英國限定系列都非常受歡迎,靈感來自於地球、月亮、火星、宇宙,運用夢幻嘅神秘色彩與質感,發掘生活與對美的熱情,期待下一個未知嘅旅程。

多款產品都好有人氣,例如以太陽為意象呈現紅色系與橘色系嘅胭脂,以冬季嘅地球為主題搭配落日夕陽嘅黄金色系眼影。

 

SUQQU
英國售賣點:大型百貨公司如:Selfridges、Harrods等
價錢:眼影£46,胭脂£32
官網:https://www.suqqu.com/

 

英國必買化妝品|The Inkey List

The Inkey List
@theinkeylist

之前傳聞會停產嘅The Ordinary又有傳會繼續營業,不過小編留意到英國最近一個新品牌同The Ordinary行嘅路線好相似,只係推出咗幾個月就吸引咗大批粉絲!由Colette Newberry同Mark Curry所創辦嘅全新保養品牌The Inkey List,係以專業皮膚保養成分所研發出嘅全新產品,以最簡單純淨嘅元素為肌膚打造出最具療效嘅保養品,包括透明質酸,視黃醇,維生素C,咖啡因,薑黃,Q10等等。The Inkey List嘅品牌觀念係將每一種保養品都視為食材原料,針對肌膚不同需求,提供適當保護,就好似食譜嘅概念,為每種不同膚質提供適當應用。

The Inkey List採用最簡約的包裝設計,將成本集中投資喺每一項產品品質上,帶俾用家更實質直接嘅效果;另外,Curry提到The Inkey List之所以價格咁親民,係因為品牌直接同原料供應商接洽,因此唔單止能夠攞到第一手同高品質原料,也能夠維持較低成本。

 

The Inkey List
英國售賣點:於Cultbeauty, Feelunique, Sephora等網站發售
價錢:約£4.99-£11.99
官網:https://linktr.ee/theinkeylist

 

英國必買化妝品|No7

No7
@boots官網
Instant Radiance Highlighter (£10.00)

No7係英國Boots嘅自家品牌,平價好用,喺英國好多人用。Boots 係英國 No.1 嘅藥妝店,已經超過150年歷史,就咁喺英國都有過千間分店,嚟英國一定要去Boots掃貨!No7作為佢最受歡迎嘅品牌,唔單止化妝品豐富,護膚品系列都非常熱賣,好多知名Youtuber都介紹過㗎。Instant Radiance Highlighter喺Boots官網上評價超好,光澤感非常自然,可以快速上妝。

Beautiful Skin Hydration Mask
@boots官網
Beautiful Skin Hydration Mask (£10)

Beautiful Skin Hydration Mask好似雪糕咁嘅面膜都係小編至愛,佢嘅主要成分係天然甘油同可可油,非常適合秋冬季節補水滋潤㗎。

 

No7
英國售賣點:各大Boots分店
價錢:約£5-£50
官網:https://www.boots.com/

 

英國必買手信|Miller Harris

Miller Harris
@millerharris

講到英國香水,相信大家都識Jo Malone,而香港亦都好多地方有得買喇。其實Miller Harris都係英國著名嘅香水品牌,佢仲係少數可以進駐頂級貴婦百貨公司Le Bon Marché嘅品牌,質素絕對有保證!

Miller Harris由1998 年創立至今,佢嘅商品包裝都係以植物花卉印花為主,強調所有香氛採用天然原料製作,品牌一開始係以訂製香水為主,Victoria Beckham同Jane Birkin都係佢嘅fans。而當中嘅「調香師之香氛圖書館 (Perfumer’s Library)」系列係最與眾不同亦都係最為人熟悉嘅,一直有「對原物料的致敬」嘅美譽。調香師 Lyn Harris 渴望跳出單一的特色香氣概念,佢認為一個人唔應該只被一款香氣定義,就好似我哋唔會每日著同一件衫咁,我哋需要擁有衣櫃,當然都需要一個「香氛衣櫥」。

小編會推薦大家2017年推出嘅第五款「調香師之香氛圖書館」系列-LE CÉDRE雪松,黑蘭花同雪松交織嘅香味,顯得沉穩知性,味道亦比較中性,好啱平日使用。

 

Miller Harris
英國售賣點:Miller Harris Westfield London, Westfield Shopping Centre, Ariel Way
London, England W12 7GD, United Kingdom (顯示地圖)
交通:倫敦地下鐵Wood Lane站
開放時間:10AM – 10PM
價錢:£75 – £170
官網:https://www.millerharris.com/

 

英國必買手信|E45 Cream 萬用超級潤膚膏

E45 Cream
@boots官網

呢個同樣喺Boots買得到,係英國王牌No.1 嘅萬用超級潤膚膏,好多英國人居家旅行必備㗎。E45係英國乾性皮膚保養品銷量第一名,仲係英國兒科醫生推薦嘅護膚產品,對乾性或者缺水嘅皮膚特別有效,全家人都啱用包括1個月以上嘅嬰兒。

佢嘅潤膚劑能夠快速地被皮膚吸收,冇人造香料,通過不致敏測試,有效又唔油膩,適用於乾燥、敏感、牛皮癬、濕疹、皮膚炎同其他類型嘅乾性皮膚症狀。E45 Cream 能取代皮膚角質層失去的脂質成分,再造一個保護屏障,鎖住水分,保濕功效非常顯著!

香港人無論大人細路好多時都被乾燥、敏感或者濕疹等皮膚問題困擾,買返支看門口真係好必須呀。最緊要係價錢咁平,買多幾支益吓親戚朋友都唔會肉痛!

 

E45 Cream 萬用超級潤膚膏
英國售賣點:各大Boots分店
價錢:£2.35 (50g)
官網:https://www.e45.co.uk/

 

英國必買手信|Soap & Glory

Soap & Glory
THE BREAKFAST SCRUB 身體磨砂 (£8/300ML)

Soap & Glory係英國本土開架品牌,雖然都有出化妝護膚品,但係佢嘅沖涼同身體護理產品最出名。品牌包裝行復古風,粉紅色為主色調,特點好似香水咁甜,迷到一眾少女芳心!而且Soap & Glory價錢非常平,喺Boots仲經常有減價活動好抵買,通常一做減價就好快會俾人買到缺貨㗎喇!

呢款身體磨砂好好用,係佢哋嘅皇牌人氣產品,網上review長期高分,仲攞過唔少獎添。有效去除角質之餘又唔會太過刺激,富含香蕉、杏仁同蜂蜜提取物,快速恢復滑溜嘅皮膚,而且一打開就好香,做磨砂都開心啲。

 

Soap & Glory
英國售賣點:各大分店及Boots有售
價錢:約£2-£15
官網:https://www.soapandglory.com/

 

📖延伸閱讀:【倫敦酒店推介】$600蚊有找!英國倫敦Zone 2至抵住宿推薦!
📖延伸閱讀:【倫敦景點地圖】倫敦遊玩必備London Pass攻略 (連London Pass景點大全)
📖延伸閱讀:【英國自由行】廢棄公廁改造人氣倫敦餐廳酒吧
📖延伸閱讀:【英國必買品牌】Oxford Street購物攻略連英國退稅須知 (Harrods, Liberty London, Poundland, Primark)

 

Hotels.com酒店優惠Hotels.com酒店優惠