定期送上世界各地最新、最地道嘅旅遊資訊!

【聖彼得堡自由行】俄羅斯聖彼得堡景點、餐廳、住宿推薦大全! (連聖彼得堡地鐵攻略)

聖彼得堡係俄羅斯第二大城市,亦曾經係俄羅斯嘅首都,沙皇同貴族宮殿氣派豪華,例如聞名世界嘅冬宮、夏宮同塔夫利宮都座落於此!除此之外,俄羅斯最著名嘅芭蕾舞劇《天鵝湖》都係喺呢度首演!呢個擁有童話式歐陸建築同豐富人文歷史嘅都市,一定會帶比大家驚喜!小編己經整合好一個聖彼得堡自由行攻略,推薦必玩聖彼得堡景點、餐廳同住宿,仲話埋聖彼得堡地鐵攻略比大家知𠻹!

 

📖延伸閱讀:【歐遊攻略篇】歐洲旅遊必讀!3大歐洲自由行路線及常見問題!
📖延伸閱讀:【歐洲上網卡推介】歐洲電話卡大評比!邊隻歐洲Sim Card最抵?!

 

聖彼得堡自由行|聖彼得堡地鐵遊景點推薦|隱士廬博物館 – 冬宮 (The Hermitage Museum)

隱士廬博物館 - 冬宮 (The Hermitage Museum)
@flickr

充滿巴洛克風格嘅隱士廬博物館,就係鼎鼎大名嘅冬宮!呢度原本係沙皇宮殿,後來喺羅曼諾夫王朝時期,被女皇葉卡捷琳娜改建成為皇家博物館!呢度收藏超過300萬件藝術品,當中包括有古埃及、巴比倫、亞述、土耳其等等嘅重要歷史文物,係世界四大博物館之一!冬宮仲曾經經歷過「十月革命」,列寧帶領黨員闖入冬宮,共產政權亦由此開始!無論喺藝術定歷史上,冬宮對俄羅斯都極為重要!

隱士廬博物館 - 冬宮 (The Hermitage Museum)_2
@Saint-Petersburg.com
約旦 (Jordan Staircase)

一入到冬宮就會見呢條約旦樓梯,係冬宮內最保留到18世紀風格嘅建築,氣勢磅礡,金碧輝煌,加上紅地氈,喺上面行真係會覺得自己係貴族!

 

隱士廬博物館 – 冬宮 (The Hermitage Museum)
地址:Palace Square, 2, Sankt-Peterburg, 俄羅斯190000 (顯示地圖)
交通:乘坐地鐵5號藍線去到Admiralteyskaya站,出站後向涅瓦大街方向,步行約5分鐘。
營業時間:星期二、四,六及日 10:30-18:00;星期三及五 10:30-21:00 ※會因季節而有所調整
入場費用 (只供參考)700RUB
網址http://www.hermitagemuseum.org/

 

聖彼得堡自由行|聖彼得堡地鐵遊景點推薦|滴血救世主教堂 (The Church of the Savior on Spilled Blood)

滴血救世主教堂 (The Church of the Savior on Spilled Blood)
@flickr

滴血救世主教堂係聖彼得堡少有嘅純俄羅斯式建築,亦係呢度最具代表性嘅洋蔥頭教堂,地位同莫斯科嘅聖瓦西里大教堂一樣咁重要!而滴血兩字嘅由來係因為亞歷山大二世就喺係呢度被無政府主義者刺殺,亞歷山大三世為咗紀念佢而建造呢座教堂!

滴血救世主教堂 (The Church of the Savior on Spilled Blood)_2
@flickr

教堂雖然唔大,但入面富麗堂皇,色彩繽紛,比起一般莊嚴嘅教堂氣氛更為溫暖!每一幅圖案都係用馬賽克拼砌而成,係世上最多馬賽克壁畫嘅教堂!雖然教堂名令人覺得好血腥,但親身睇過先知原來係咁有童話feel!

 

滴血救世主教堂 (The Church of the Savior on Spilled Blood)
地址:Griboyedov channel embankment, 2Б, Sankt-Peterburg, 俄羅斯191186 (顯示地圖)
交通:乘坐地鐵2號線去到Nevsky Prospect站,出站後北邊行,步行約10分鐘。
營業時間:每日10:30-18:00 逢星期三休館 ※會因季節而有所調整
入場費用 (只供參考)成人 250RUB;7-18歲學生 50RUB

 

聖彼得堡自由行|聖彼得堡地鐵遊景點推薦|米哈伊洛夫斯基劇院 (Mikhailovsky Theatre)

米哈伊洛夫斯基劇院 (Mikhailovsky Theatre)
@mikhailovsky

建於1833年嘅米哈伊洛夫斯基劇院係俄羅斯最古老嘅劇場之一,同馬林斯基劇院,亞歷山大劇院並稱三大帝國劇院,柴可夫斯基都係呢度嘅常客嚟㗎!劇院有三層高,入面有好多古董鏡同水晶吊燈,仲有彩繪壁畫,非常有氣勢,淨係入去欣賞個劇院都值回票價!

米哈伊洛夫斯基劇院 (Mikhailovsky Theatre)_2
@flickr
天鵝湖芭蕾舞劇 Swan Lake Ballet

劇院唔可以就咁入場參觀,但每一日都有劇目上演!嚟到俄羅斯,去最古老嘅歌劇院,睇返一場《天鵝湖》芭蕾舞劇,絕對係指定動作!

 

米哈伊洛夫斯基劇院 (Mikhailovsky Theatre)
地址:Ploshchad’ Iskusstv, 1, Sankt-Peterburg, 俄羅斯191011 (顯示地圖)
交通:乘坐地鐵2號線去到Nevsky Prospect站,出站後步行約3分鐘。
網址https://mikhailovsky.ru/en/theatre/

 

聖彼得堡自由行|聖彼得堡地鐵遊景點推薦|俄羅斯博物館 (State Russian Museum)

俄羅斯博物館 (State Russian Museum)
@Saint-Petersburg

俄羅斯博物館雖然唔及冬宮人氣咁大,但藝術同歷史價值絕對唔比冬宮低!俄羅斯博物館原身係米哈伊洛夫宮殿,後來喺1898年先改建為博物館。博物館代表咗俄羅斯新古典主義建築,每一個角落都有精緻壁畫同浮雕,充滿宮廷氣派!博物館本身就已經係一件藝術品!

俄羅斯博物館 (State Russian Museum)_2
@flickr

館內有超過40萬件俄羅斯古典藝術品,涵蓋咗由10世紀到而現世嘅俄羅斯美術史,仲收藏咗好多世界名畫,例如《伏爾加河的縴夫》、《龐貝城的末日》、《基督顯靈》等等,對研究俄羅斯歷史文化極為重要!

 

俄羅斯博物館 (State Russian Museum)
地址:Inzhenernaya St, 4, Sankt-Peterburg, 俄羅斯191186 (顯示地圖)
交通:乘坐地鐵2號線去到Nevsky Prospect站,出站後北邊行,步行約10分鐘,喺滴血救世主教堂旁邊。
營業時間:星期三,五至日 10:00-18:00;星期一 10:00-20:00;星期四 13:00-21:00
入場費用 (只供參考)成人 500RUB;學生 250RUB
網址http://www.rusmuseum.ru/

 

聖彼得堡地鐵攻略

聖彼得堡地鐵攻略
@TripAdvisor

聖彼得堡自由行嘅最佳方法就係坐地鐵!因為聖彼得堡地鐵本身就已經係好值得睇嘅景點,地鐵嘅設計充滿史泰林時期宏偉多柱同巴洛克嘅建築風格,好似一座地下嘅藝術宮殿咁!主要嘅車站亦各有特色,好似全世界最深嘅Admiralteyskaya站,怖滿蘇聯風格華麗浮雕嘅Ploshchad Vosstaniya站同刻有馬阿可夫斯基頭像嘅Mayakovskaya站都係好值得到訪!

聖彼得堡地鐵攻略_2
@backpackers

而最重要係聖彼得堡地鐵四通八達,主要喺市內景點都可以坐地鐵就到達!無論坐幾多個站,單程都係45RUB。另外亦可以買Metro  Travel Card 10次票喺7日內使用係 355RUB,20次票喺15日內使用係 680RUB。

 

聖彼得堡自由行|聖彼得堡餐廳推薦|Tsar

Tsar
@facebook

嚟到聖彼得堡一定要嚟Tsar沙皇餐廳食返一餐傳統俄羅斯皇室菜色!餐廳座落於18世紀嘅古老建築,室內設計每一個細節都充滿沙皇時代嘅皇宮氣派,加上天鵝絨座椅,彩繪地氈同水晶燈,非常華麗!為咗令餐廳更有氣氛,仲會有人不時演唱歌頌沙皇嘅歌曲𠻹!

Tsar_2
@ginza
煙燻鱘魚 (Smoked Sterlet’s back with light mashed potatoes and Rassol sauce) 3490RUB

除咗裝修,食物當然亦都好講究!喺呢度就可以品嚐到沙皇時期嘅傳統美食,例如醃菜列寧格勒湯、羊絞肉助排、魚子醬等等!而必試推介一定係煙燻鱘魚!香嫩滑多汁嘅魚肉配充滿奶油味嘅薯蓉,好食到暈!Tsar連當地人都好鐘意去㗎!記得要預早訂位!

 

Tsar
地址:Sadovaya St, 12, Sankt-Peterburg, 俄羅斯191186 (顯示地圖)
營業時間:每日 12:00-01:00
網址:http://en.ginza.ru/spb/restaurant/tsar

 

聖彼得堡自由行|聖彼得堡餐廳推薦|Ribai

Ribai
@VisitPetersburg

Ribai係聖彼得堡最有名氣嘅扒房!呢度嘅設計融合咗美國牛仔風同俄羅斯民族特色,最吸引人之處係餐廳內嘅員工都才藝兼備,每一晚都會為客人表演,而表演節目非常即興,係由員工自由發揮,每次去都包你有驚喜!

Ribai_2
@TripAdvisor
Black Angus Beef 3290-4190RUB

呢度嘅食物同美式餐廳一樣,全部都大大份!而且餐廳最著重食物嘅質素,所採用嘅黑安格斯牛更加係至頂級!菜色大膽創新,利用世界各地唔用嘅煮食方式去炮製牛肉,務求做出最完美牛扒!

 

Ribai
地址:Kazanskaya Ulitsa, 3A, Sankt-Peterburg, 俄羅斯191186 (顯示地圖)
營業時間:星期日至三 12:00-01:00,星期四至六 12:00-02:00
網址:https://ginza.ru/spb/restaurant/ribai

 

聖彼得堡自由行|聖彼得堡餐廳推薦|Cafe Suliko

Cafe Suliko
@TripAdvisor

俄羅斯有好多個少數民族,而當中喬治亞美食喺最受眾多俄羅斯人歡迎,嚟到聖彼得堡,不妨去吓Cafe Suliko食喬治亞菜!呢間Cafe細細間,設計充滿田園風格,好似入咗去一間cottage咁!

Cafe Suliko_2
@sulikospb
Khinkali 350RUB

喬治亞菜式重視細節,炮製方法繁複,多用香料同醃製嘅蔬菜或海鮮!其實有啲菜色同亞洲菜都幾相似㗎!好似Khinkali俄羅斯餃子就同小籠包好似啦!不過外皮就厚而煙韌,入係豬肉同牛肉混合嘅餡料,同小籠包最相似嘅地方就係入面都有好多湯汁!大家一定要試吓,睇吓有咩分別!

 

Cafe Suliko
地址:Ulitsa Vosstaniya, 7, Sankt-Peterburg, 俄羅斯191036 (顯示地圖)
營業時間:每日 11:00-00:00
網址:https://www.sulikospb.ru/

 

聖彼得堡自由行|聖彼得堡住宿推薦|普斯卡客棧酒店

普斯卡客棧酒店

普斯卡客棧酒店前身係一間建於18世紀嘅大豪宅,雖然經過翻新,但仍然保留著復古嘅牆身同傢俬,充滿俄羅斯風情!酒店位於聖彼得堡中心地帶,行過去冬宮都只係幾分鐘!而且喺Moyka River河畔之上,無論喺酒店本身,定係望出去嘅風景都一樣令人著迷!

普斯卡客棧酒店_2

房間設計帶有濃厚嘅中世紀歐陸風情,設備完善,仲有迷你吧!大部分房間都可以望到河景,一邊嘆住美酒,一邊欣賞河岸嘅醉人景色,絕對係一流享受!

 

普斯卡客棧酒店
地址:RUS聖彼得堡Moyka Embankment, 14 (顯示地圖)
星級 | ★★★★☆  
位置 | ★★★★★  
設施 | ★★★☆☆  
環境 | ★★★★☆  
價格 | 查看價格  

 

聖彼得堡自由行|聖彼得堡住宿推薦|亞瑟精品酒店

亞瑟精品酒店

亞瑟精品酒店係一間位於聖彼得堡市中心嘅5星級酒店,去多個著名景點例如涅瓦大街同喀山大教堂都只係需要步行15分鐘內就去到,而且鄰近Mayakovskaya同Vladimirskaya地鐘站,交通便利!而最正嘅係5星級酒店嘅享受,但價錢優惠,CP值高!

亞瑟精品酒店_2

酒店豪華氣派,仲有唔同嘅主題房間,每間房嘅設備都奢華高級,高床軟枕不得止,仲有按摩浴缸!玩完一日,返到咁正嘅酒店relax吓,一定叉足電啦!

 

亞瑟精品酒店
地址:RUS聖彼得堡9 Vladimirsky Prospect (顯示地圖)
星級 | ★★★★★  
位置 | ★★★★☆  
設施 | ★★★★☆  
環境 | ★★★★★  
價格 | 查看價格  

 

📖延伸閱讀:【莫斯科自由行】莫斯科景點大全連市內住宿推薦 (莫斯科地鐵IG攝影攻略)
📖延伸閱讀:【俄羅斯手信特集】世界盃熱潮!Top 6必買俄羅斯手信 (連俄羅斯美食推介)
📖延伸閱讀: 【聖彼得堡遊記】7日6夜俄羅斯聖彼得堡自由行景點行程攻略
📖延伸閱讀:【歐洲自由行】東歐自由行10日懶人包+東歐電話卡推介 (包括布達佩斯景點、維也納行程推薦)

 

Hotels.com酒店優惠Hotels.com酒店優惠