定期送上世界各地最新、最地道嘅旅遊資訊!

【神戶美食特集】神戶必食!4大「 入口即化」神戶牛推薦餐廳!

貴為「日本三大和牛」之一嘅神戶牛係但馬牛嘅一種,當中只有能夠通過「神戶肉流通推進協議會」血統、紋理同埋色澤等多方面嘅官方認證,先可以稱得上為神戶牛,所以非常矜貴㗎!今次就等小編帶你到4必食神戶牛推薦餐廳,食盡神戶美食無難度!

 

神戶美食特集 | 必食神戶牛推薦餐廳 | Mouriya

Mouriya
@armm_kanchanid

喺神戶屹立超過一個世紀嘅Mouriya係當地一間名氣響噹噹嘅神戶牛餐廳,唔少名人、明星都曾經係呢度嘅座上客,水準當然有保證啦!Mouriya對於食材選擇相當講究,佢哋會同牧場合作自家養殖神戶牛,務求確保質素,同埋令食客可以用一個更相宜嘅價錢品嚐到呢款地道美食。

Mouriya_2
@annie_leung926

Mouriya_3
@kobebeef_mouriya

Mouriya主打鐵板燒,食客可以先點選自己喜歡嘅神戶牛扒種類,好似肉眼、西冷同埋菲力牛扒等等,然後廚師就會按照你要求嘅生熟程度即席烹調。Mouriya嘅廚師個個經驗豐富,火候控制恰到好處,所以呢度嘅神戶牛扒外層帶點焦香之餘,內裏肉質依然嫩滑多汁,必試!

Mouriya_4
@mouriya.co.jp

除咗神戶牛,Mouriya仲有提供新鮮伊勢海蝦、鮑魚同埋帆立貝等等嘅海鮮,食完神戶牛都仲未夠飽嘅話不妨試一試!另外,由於Mouriya經常滿座嘅關係,所以小編建議打算去一嚐神戶牛鐵板燒嘅各位,記得一定要預先喺官網訂位,咁就唔洗怕嚟到有排等啦!

 

Mouriya
地址:2 Chome−1−17, Shimoyamatedori, Chuo Ward, Kobe, Hyogo (顯示地圖)
營業時間:11:00 – 21:00
官網:https://www.mouriya.co.jp/

 

神戶美食特集 | 必食神戶牛推薦餐廳 | 廣重

重
@ccshih.com

牛肉丼係日本其中一樣標誌性嘅食物,對於唔少日本人嚟講,更加係佢哋嘅「comfort food」!想食碗有質素嘅牛肉丼?小編就推薦你去位於神戶三宮車站附近嘅廣重啦!

廣重_2@tabelog

廣重_3
@tabelog

廣重旨在為食客炮製出最高品質嘅牛肉丼,所以佢哋選用咗油花紋理都呈大理石狀嘅神戶牛肩肉作為食材,徹徹底底咁將一碗看似平凡嘅牛肉丼昇華到另一個層次!除咗醬油、味醂等平時煮牛肉丼必需嘅調味料外,佢哋仲會用一款特別嘅辣椒粉作調味,令神戶牛肉嘅味道更為濃郁!

廣重_4
@matcha-jp.com

而每碗牛肉飯仲會附上一碗超級足料嘅雜菜湯,食完一定好滿足!另外,神戶牛肉丼嘅價錢只係需要2000日圓有找,CP值簡直爆哂燈!

 

廣重
地址:1 Chome−22−21 前川ビル 1F, Nakayamatedori, Chuo Ward, Kobe, Hyogo (顯示地圖)
營業時間:11:00 – 15:00;18:00 – 23:00

 

神戶美食特集 | 必食神戶牛推薦餐廳 | 舌龍

舌龍
@tammykhoo

要食最靚嘅神戶牛,你又點可以唔去舌龍?舌龍呢間餐廳不時都會喺「神戶牛品評大會」搜羅品質至為上乘嘅神戶牛,當中更包括榮獲「最優秀賞」嘅牛隻,所以呢度嘅牛肉質素絕對可以稱得上係頂級!

舌龍_2
@jamroll

舌龍_3
@yfl-kelvin.com

無論你鍾意以鐵板燒、Shabu Shabu、抑或壽喜燒嘅方式烹煮神戶牛肉,舌龍都一一可以滿足到你。呢度仲設有多款唔同嘅套餐,套餐基本包括神戶牛、白飯同沙律。佢哋嘅白飯採用兵庫縣本地出產嘅有機米,飯粒圓渾煙韌,而且飯香十足,配埋神戶牛嚟食真係勁match㗎!

舌龍_4
@koubegyuu.com

如果你想品嘗到神戶牛嘅鮮味,不妨試埋呢度嘅生牛肉壽司。包住壽司飯嘅神戶牛肉油脂分佈平均,入口即化,加幾滴醬油更加有提鮮嘅效果,值得一試!

 

舌龍
地址:1 Chome-3-24 Shimoyamatedori, Chuo Ward, Kobe, Hyogo (顯示地圖)
營業時間:12:00 – 15:30;17:00 – 00:00
官網:https://www.koubegyuu.com/shop/tanryu-higashi/

 

神戶美食特集 | 必食神戶牛推薦餐廳 | 八坐和

八坐和
@travelearth.com

八坐和_2
@koubegyuu.com

嚟到神戶自由行,鍾意食拉麵嘅朋友就一定唔可以錯過八坐和呢間人氣神戶牛拉麵店喇!八坐和嘅拉麵湯底用上A5等級嘅神戶牛牛骨同埋新鮮蔬菜熬製而成,每一煲湯足足熬製超過16個鐘,味道梗係無與倫比啦!

八坐和_3
@auntie.tw

八坐和_4
@gnavi.com

每一碗拉麵都會附上3款唔同嘅小食,包括神戶牛腩片、燉神戶牛肉同埋神戶牛肉味噌,味道同清甜嘅神戶牛骨湯底互相輝映!另外,神戶牛肉餃子亦係八坐和另一道好出名嘅招牌菜,餃子外層煎到香脆可口,而且裡面嘅牛肉餡料肉汁豐富,絕對係必食推介!

 

八坐和
地址:2 Chome−11−1 センター プラザ 西館, Sannomiyacho, Chuo Ward, Kobe, Hyogo (顯示地圖)
營業時間:11:00 – 14:30;17:00 – 22:00
官網:https://www.koubegyuu.com/shop/yazawa-ramen/

 

📖延伸閱讀:【大阪甜品】潮聖超鬆軟大阪pancake店 + 必點items!
📖延伸閱讀:【大阪海鮮】點止黑門市場?Top 3必去大阪魚市場連必食之選
📖延伸閱讀:【大阪餐廳推薦】嚴選Top 6大阪大阪燒、大阪章魚燒!
📖延伸閱讀:【大阪居酒屋特集】最新大阪串燒、心齋橋居酒屋推薦 (必試美食Item逐個數)

 

Hotels.com酒店優惠Hotels.com酒店優惠