定期送上世界各地最新、最地道嘅旅遊資訊!

【珀斯自由行】西澳自駕遊必睇!珀斯景點交通攻略大全 (連西澳景點打卡必備影相APP推薦)

珀斯西澳嘅首府,亦係澳洲第四大城市!而且靠近印度洋海岸,唔單止氣候溫和怡人!仲有好多超靚沙灘!而獨特嘅沙漠地形,令呢度形成咗好多大自然奇觀,絕對係澳洲必到之地!小編今次就整合咗一個西澳自駕遊連交通攻略比大家,介紹必到珀斯景點同必食推介,仲教埋你下載珀斯自由行打卡必備影相APP!

 

📖延伸閱讀:【香港假期好去處】2019公眾假期請假攻略 (連長短線旅遊地點推薦)
📖延伸閱讀:【香港聖誕搵食攻略】Top 5 香港米芝蓮餐廳搵食指南 2018

 

珀斯自由行|珀斯景點|羅特尼斯島 (Rottnest Island)


@Flickr

嚟到位於西澳珀斯,一定要將羅特尼斯島 (Rottnest Island)列入必到景點!羅特尼斯島有媲美馬爾代夫嘅超靚海灘之外,亦都可以零距離接觸「最開心嘅動物」- 澳洲短尾袋鼠(Quokka)!就連澳洲本地人都好鐘意嚟㗎!


@Flickr

羅特尼斯島有成63個海灘,大家記得帶定游泳用品同防曬,嚟呢度玩各式各樣嘅水上活動!呢度啲水清澈見底,而且有好多唔同嘅海洋生物,唔少人都專程嚟浮潛!小編建議大家可以去湯森灣 (Thomson Bay)海灘,因為大部分水上活動都集中喺呢到!

@rottnestislandwa

短尾袋鼠之所以有「最開心嘅動物」呢個稱號,除咗因為佢哋非常友善溫馴,最可愛嘅地方係佢哋識笑㗎!羅特尼斯島亦以短尾袋鼠遍怖成個島而聞名,而且佢地都好習慣同人類相處,大家一定可以搵到佢地,同佢地影返張selfie!

 

羅特尼斯島 (Rottnest Island)
地址:Rottnest Island WA 6161 (顯示地圖)
交通:先自駕去到弗里曼特爾碼頭,喺碼頭泊車一日收費係$12AUD,然後再坐船去,大概30-40分鐘就會到達。為咗保育,島上禁止車輛通行,大家可以租單車代步游覽。
網址:http://www.rottnestisland.com/

 

珀斯自由行|珀斯景點|尖峰石陣 (Pinnacles)

@Flickr

珀斯另一個人氣景點就係尖峰石陣 (Pinnacles)。尖峰石陣係位於南本國家公園 (Nambung National Park)內嘅一個天然沙漠地貌!其實係有無數嘅石灰岩,經過千萬年風化,而形成高高低低嘅尖峰石陣。呢到嘅石頭奇形怪狀,有部分石柱高達50公尺、有啲係平頭、有啲係蘑菇形,就好似外星人喺地球嘅基地,好有神秘感!

@livingyourjourney

南本國家公園座落喺印度洋旁邊,所以除咗尖峰石陣,都可以欣賞到絕美嘅大海!去完尖峰石陣,可以去公園內以白色沙灘聞名嘅宿醉灣 (Hangover Bay) 游吓水,玩吓沙!旁邊仲有枱櫈同燒烤設施,一邊欣賞大海,一邊野餐,真係勁 chill!

 

尖峰石陣 (Pinnacles)
地址:Pinnacles Dr, Cervantes WA 6511 (顯示地圖)
開放時間:每天07:15-17:30
交通:珀斯市中心沿住Indian Ocean Drive去,大概2.5小時車程。沿途一路都係海景,所以車程完全唔會悶!
網址:https://parks.dpaw.wa.gov.au/site/pinnacles-desert-lookout-and-drive

 

珀斯自由行|珀斯景點|蘭斯林滑沙 (Lancelin Sand Dunes)


@Flickr

蘭斯林 (Lancelin) 係去尖峰石陣必經之地,所以識玩就一定將呢兩個行程編埋一齊!蘭斯林係印度洋嘅海邊小鎮,亦係西澳好出名嘅滑沙勝地!因為附近一帶地方都係沙漠地形,有好多連綿不絕嘅沙丘,最岩玩滑沙!因為近海嘅關係,呢度嘅沙都係非常幼細,而且係白色,靚到不得了!

 

滑沙板租借|Lancelin Sandboarding Rental – Have a chat general store

@Facebook

滑沙係需要租借滑沙板,而蘭斯林只係一個好細嘅小鎮,租借滑沙板嘅商店唔多。小編建議最好就預早上網借定滑沙板,以防萬一比人借哂就無得玩。

 

滑沙板租借|Lancelin Sandboarding Rental – Have a chat general store
參考費用:$12AUD/2.5小時
網址:https://www.lancelin.com.au/product/sandboard-rental-bookings/

 

蘭斯林滑沙 (Lancelin Sand Dunes)
地址:Beacon Rd, Lancelin WA 6044 (顯示地圖)
交通:珀斯市中心出發沿住Indian Ocean Drive,向尖峰石陣方向大概1.5小時車程。可以去完尖峰石陣,回程途經蘭斯林先滑沙。
網址:https://www.lancelin.com.au/

 

珀斯自由行|珀斯景點|倫敦閣 (London Court)

@londoncourtperth

倫敦閣 (London Court) 係位於珀斯市中心Hay Street Mall徒步區內嘅一個開放式購物中心。呢度最大特色係充滿傳統英倫建築風格,已經有成80年以上歷史,同四周圍現代化嘅建築物形成強烈對比!行入去就好似去咗另一個世界,猶如《哈利波特》入面嘅「斜角巷」!成個倫敦閣每一個角落都係instagram影相打卡位!

@londoncourtperth

倫敦閣有各式各樣嘅特色商店,例如有古董店、朱古力店、懷舊理髮店、咖啡店等等,比起行大型商場,小編就對呢啲精緻復古小店更有興趣啦!

 

倫敦閣 (London Court)
地址:647 Hay St, Perth WA 6000 (顯示地圖)
網站:https://www.londoncourt.com.au/

 

珀斯自由行|珀斯景點|弗里曼特爾 (Fremantle)


@Flickr

弗里曼特爾 (Fremantle)係一個保留著19世紀風情嘅古老小鎮,成個小鎮被列為古跡,所以四周圍都係歷史建築物!漫步喺街上,就會感受到濃烈嘅古典風情!而且呢到聚集咗好多街頭藝人,充滿藝術氣息,所以亦都被稱為「文青小鎮」!


@Flickr

大家亦都可以坐吓呢度嘅觀光電車!好舒服咁漫遊弗里曼特爾。

 

弗里曼特爾市集 (Fremantle Market)

@fremantlemarkets

嚟到弗里曼特爾,一定要行吓傳統市集!弗里曼特爾市集 (Fremantle Market) 有好多本地新鮮蔬果!仲有好多特色手信店,復古精品店、藝術廊、手作店等等,應有盡有!包你買到停唔到手!

 

弗里曼特爾市集 (Fremantle Market)
地址:South Terrace &, Henderson St, Fremantle WA 6160 (顯示地圖)
開放時間:星期五 09:00-20:00;星期六至一 09:00-18:00
網址:https://www.fremantlemarkets.com.au/

 

弗里曼特爾 (Fremantle)
地址:Fremantle WA 6160 (顯示地圖)
交通:珀斯市中心出發沿住Canning Highway,大概30分鐘車程就會到達。

 

📖延伸閱讀:【塔斯曼尼亞遊記】本地人大推必去特色市集、景點- MONA博物館
📖延伸閱讀:【塔斯曼尼亞自駕遊】當地人推薦!尋找最好食嘅塔斯曼尼亞生蠔!(連塔斯曼尼亞租車攻略)

 

珀斯自由行|珀斯景點|波浪岩 (Wave Rock)


@Flickr

波浪岩係一塊夾雜唔同顏色嘅巨浪形花崗岩!呢一個奇景係經過27億年嘅天然同化學侵蝕而形成,真係唔簡單!難怪每年都吸引超過千萬嘅遊客,嚟到呢度一暏大自然嘅鬼斧神工!波浪岩有成15米高,長110米,大家除咗可以由下而上感受巨石嘅壯觀,亦可以走上岩石嘅頂部望返落嚟,全方位欣賞呢一塊「被凍結嘅波浪」。

@Flickr

呢一個奇景吸引咗好多來自世界各地嘅攝影師慕名嚟影相,《國家地理雜誌》都曾經用波浪岩嚟做封面!喺度扮滑浪咁影相就梗加係指定動作!大家不妨發揮創意,扮下嘢擺唔同pose影相,瘋狂呃like!

 

波浪岩 (Wave Rock)
地址:Wave Rock Rd, Hyden WA 6359 (顯示地圖)
交通:波浪岩位於西南部嘅一個小鎮Hyden,由珀斯市中心沿住Great Eastern Highway去,大概4小時車程就會到達。沿途都會有凹凸不平嘅路段同有機會遇上跑出車路嘅袋鼠,所以一定要小心!大家出發前亦可以去呢個網站http://www.kondinin.wa.gov.au/查吓當日路面情況!
網址:http://waverock.com.au/

 

珀斯自由行|珀斯景點|天鵝谷 (Swan Valley)

@Facebook

天鵝谷(Swan Valley)係西澳最古老,亦都係最大嘅葡萄酒產地,呢度足足有成40間酒莊!沿住天鵝谷美食路徑(Swan Valley Food and Wine Trail),有超過150間商店,包括酒莊、咖啡店、芝士廠、蜂蜜廠 、朱古力廠等等,每一個地方都咁精彩!包你玩到唔捨得走!

 

天鵝谷必去|Yabava Koffee Works


@Flickr

Yabava Koffee Works係天鵝谷好出名嘅咖啡專門店,呢度自家焙烘咖啡豆有超過12種口味!每一款豆,都有唔同嘅焙烘方式同時間,務求做到最好飲嘅咖啡!真係完全感受到店主對咖啡嘅專業同執著。呢度仲有得免費試飲咖啡,大家可以試完先買最啱口味嘅咖啡!

 

Yabava Koffee Works
地址:4752 W Swan Rd, West Swan WA 6055 (顯示地圖)
網站:http://www.yahava.com.au/

 

📖延伸閱讀:【復活節活動】悉尼自由行—復活節假期3日2夜品味咖啡文化之旅!
📖延伸閱讀:【澳洲自由行】Top 3 澳洲墨爾本必去人氣Cafe!

 

天鵝谷必去|Lancaster Winery

@myswanvalley

天鵝谷40幾間酒莊當中以Lancaster Winery最有名氣,酒莊旁邊有一片一望無際嘅葡萄園,加上藍天白雲,真係好莊觀,有好多人都專程嚟影婚紗相㗎!就算唔係特別鐘意飲酒,淨係景色都已經夠哂吸引!而呢度除咗有靚酒,仲有美味無比嘅芝士,絕對係必試!

 

Lancaster Winery
地址:5228 W Swan Rd, West Swan WA 6055 (顯示地圖)
網站:http://lancasterwines.com.au/

 

📖延伸閱讀:【紐西蘭自由行】復活節奧克蘭2日1夜手工啤酒旅行團

 

珀斯自由行|珀斯必食推薦|Amberjacks Fish & Chip


@Flickr

嚟到澳洲一定要食炸魚薯條!位於科特索海灘(Cottesloe Beach)附近嘅Amberjacks Fish & Chip,就有號稱西澳最頂級嘅炸魚薯條啦!

@Facebook
Seafood Combo $16.50AUD

佢地嘅魚非常新鮮,魚肉大大塊又鮮甜!最正喺炸粉比例拿捏到恰到好處,唔會一咬落去勁厚粉!外層酥脆,但魚肉保持到多汁又滑溜! 仲有得對住個無敵大海景嘆美食,一個字!爽!

 

Amberjacks Fish & Chip
地址:28/94 Marine Parade, Cottesloe WA 6011 (顯示地圖)
營業時間每天 11:00-20:00
網址:https://amberjacks.com.au/

 

珀斯自由行|珀斯必食推薦|Alfred’s Kitchen

@Alfred’sKitchen

Alfred’s Kitchen係名震西澳,經營超過65年嘅漢堡店!呢間漢堡店任何時間都大排長龍,有時誇張到未開門都已經有人係店外排隊!雖然每日下晝5點開店至零晨,但其實好多時,漢堡包開鋪幾個鐘就賣哂!所以真係要早啲嚟搶!

@Alfred’sKitchen
Cheese and Bacon Hamburger $11.10AUD

漢堡包之所以咁有名氣,係因為利用咗炭烤去煮!因為用炭嘅熱力好夠,所以一烤就鎖實漢堡啲肉汁,而且會帶有香烤味,再加埋新鮮爽脆嘅蔬菜同秘製醬汁,一咬落去啲肉汁係噴出嚟!好味到暈!

 

Alfred’s Kitchen
地址:James St & Meadow St, Guildford WA 6055 (顯示地圖)
營業時間星期一至四 17:00-00:00;星期五 17:00-02:00;星期六及日 12:00-02:00
網址:https://www.alfredskitchen.com.au/

 

珀斯自由行|珀斯必食推薦|Corica Pastries

@coricapastries.id

無食過Corica Pastries嘅Apple Strudel就等於無嚟過珀斯!Apple Strudel其實係Corica Pastries所創嘅甜品,由1957年開始,憑著Apple Strudel而闖出名堂,繼而成為傳遍珀斯嘅地道甜品,好多人都專程嚟朝聖!

@coricapastries.id
Apple Strudel $24AUD

Apple Strudel其實係超長型嘅蘋果批,而小編就覺得好似拿破崙crossover蘋果批!因為佢係一層層酥皮,包住超濃郁嘅蘋果餡料,食起嚟口感係拿破崙,但味道就係蘋果批,非常特別!最正嘅係佢有別於一般蘋果批,入面暗藏香滑吉士,食起嚟好有滿足感!

 

Corica Pastries
地址:106 Aberdeen St, Northbridge WA 6003 (顯示地圖)
營業時間星期一至五 08:00-17:30;星期六 08:00-12:30
網址:https://www.coricapastries.com.au/

 

📖延伸閱讀:【塔斯曼尼亞遊記】塔斯曼尼亞五大必食美食、餐廳推介!
📖延伸閱讀:【澳洲Pho越南河粉天書】悉尼美食特集!Cabramatta區必食越南餐廳指南2018

 

珀斯自由行|打卡必備影相APP推薦|Snapseed

@wireprime

西澳咁多靚景,梗係要download返個影相神app,瘋狂影靚相啦!小編推介大家下載Snapseed呢個免費影相app!呢個app第一厲害之處就係可以影raw!Raw其實係一般專業攝影師都會用到嘅相片格式,最大好處係後製嘅彈性高!例如有時啲相曝光過渡都仲可以靠後製救得返!

@techieans

Snapseed除咗可以令你嘅相片質素拍得住DSLR,仲有超強大嘅後製工具!比你用手機都可以做到執走路人、改變構圖、局部修圖同製造景深效果!咁勁嘅app居然係免費!仲唔即刻下載?

 

珀斯酒店住宿推介|珀斯宜必思酒店

珀斯宜必思酒店

宜必思旗下酒店一向都係CP值高嘅酒店之選!而珀斯宜必思酒店位於珀斯市中心,隔離就係珀斯火車站,四周圍都係食肆,地理位置無得輸!價錢亦都係好優惠,最啱想窮遊嘅旅客!

珀斯宜必思酒店2

房間整齊乾淨,有電視亦有免費wifi,設備整全!仲可以望到珀斯市景!真係平靚正!

 

珀斯宜必思酒店
地址:AUS伯斯334 Murray Street (顯示地圖)
星級 | ★★★☆☆  
位置 | ★★★★★  
設施 | ★★★☆☆  
環境 | ★★★☆☆  
價格 | 查看價格  

 

珀斯酒店住宿推介|伯斯旅館酒店 – 8 號酒店管理

伯斯旅館酒店 - 8 號酒店管理

呢間酒店位於珀斯購物中心地帶,無論係購物、搵食定係娛樂,都好方便!行5分鐘就已經去到Swan River,去海爾街購物中心都係2分鐘路程!最緊要係有得泊車,自駕遊旅客必選!

伯斯旅館酒店 - 8 號酒店管理2

酒店設計以摩登簡約風為主,多以黑白灰為主調,有一種型格嘅感覺!房間擺設同掛畫都好有格調!

 

伯斯旅館酒店 – 8 號酒店管理
地址:AUS伯斯70 Pier Street (顯示地圖)
星級 | ★★★☆☆  
位置 | ★★★★★  
設施 | ★★★☆☆  
環境 | ★★★☆☆  
價格 | 查看價格  

 

珀斯酒店住宿推介|巴達維亞公寓酒店

巴達維亞公寓酒店

 

想有家嘅感覺?咁就要入住巴達維亞公寓酒店啦!呢間酒店係公寓形式,有房有客廳,仲有廚房,出門在外太耐,都可以玩吓煮飯仔,搵返家嘅感覺!而且地點方便,揸車去市中心都只係7分鐘!仲有燒烤設備同泳池,最啱家庭樂!

巴達維亞公寓酒店2

酒店傢俬好齊全,完全比到家感覺大家!而且2017先至新裝修好,所有野又都新又靚!一定住到唔捨得走!

 

巴達維亞公寓酒店
地址:AUS伯斯166 Palmerston Street (顯示地圖)
星級 | ★★★☆☆  
位置 | ★★★☆☆  
設施 | ★★★☆☆  
環境 | ★★★☆☆  
價格 | 查看價格  

 

珀斯酒店住宿推介|泛太平洋珀斯酒店

泛太平洋珀斯酒店

泛太平洋珀斯酒店係一間位於Swan River旁邊嘅5星級酒店!酒店時尚豪華,服務一流!設有健身室同室內泳池!最正係以5星級酒店嚟講,價錢唔貴!值得入住!

泛太平洋珀斯酒店2

酒店房種夠多,無論情侶定一家大細,都一定有適合嘅房間!而且床褥夠大又軟熟,玩完一日咁攰,返到咁舒服嘅酒店休息一晚,實可以差爆電啦!

 

泛太平洋珀斯酒店
地址:AUS東伯斯207 Adelaide Terrace (顯示地圖)
星級 | ★★★★★  
位置 | ★★★★☆  
設施 | ★★★★☆  
環境 | ★★★★☆  
價格 | 查看價格  

 

 

Hotels.com酒店優惠