定期送上世界各地最新、最地道嘅旅遊資訊!

【另類濟州自駕】最新濟州好去處!濟州重力賽車公園玩樂全攻略!

濟州島除咗有好多令人嘆為觀止嘅自然風光之外,其實仲有唔少觀光景點都好值得去!而講到近嚟人氣最高嘅濟州好去處,就一定係2019年6月先正式開幕嘅濟州重力賽車公園。小編今次就為你帶嚟濟州重力賽車公園玩樂全攻略,一次過話你知公園裡面有咩好玩,等你可以好好享受另類濟州自駕!

 

另類濟州自駕 | 最新濟州好去處 | 濟州重力賽車公園交通攻略

濟州重力賽車公園交通攻略
@namu.wiki

打算去濟州重力賽車公園玩嘅話,可以選擇喺當地嘅交通樞紐濟州市外巴士站乘搭251、253、254或者282號巴士,搭到去國學院車站落車,然後行大約15分鐘就去到㗎喇!濟州巴士近年進行咗唔少更新,好似喺車廂內設置免費WiFi同埋新增咗中文報站提示等等,咁就唔洗再怕因為睇唔明韓文而落錯車啦!

 

另類濟州自駕 | 最新濟州好去處 | 濟州重力賽車公園玩樂攻略

濟州重力賽車公園玩樂攻略
@Korea Plaza

濟州重力賽車公園裡面嘅遊樂設施多不勝數,而最受歡迎嘅當然就係重力賽車啦!同一般設有加速器嘅賽車唔同,重力賽車係依靠賽道嘅斜度同埋重力嚟加速,所以車廂內只係設有軚盤同埋剎車腳踏,操作控制非常簡單。

濟州重力賽車公園玩樂攻略_3
@Korea Plaza

為咗確保遊客嘅安全,濟州重力賽車公園一律嚴禁穿著涼鞋、拖鞋同埋長裙等有機會阻礙駕駛嘅服飾進場。另外,公園亦規定所有賽車駕駛員必須年滿14歲,而且身高亦需達到150厘米,符合晒以上條件就可以喺呢度頭搖又尾擺喇!

濟州重力賽車公園玩樂攻略_4
@iro_dad

呢度嘅重力賽車一共有3款選擇,分別為GR-E、GR-D同埋GR-X。如果你冇駕駛執照或者駕駛經驗唔係咁豐富嘅話,專門為初學者而設嘅GR-E就啱喇!GR-E時速最高只達40公里,而且安全措施齊全,絕對可以放心。至於打算喺濟州重力賽車公園親子遊嘅朋友,就不妨選擇設有雙座位嘅GR-D,同小朋友一齊享受天倫之樂!

濟州重力賽車公園玩樂攻略_5
@behance.net

假如你嘅單圈賽車時間達到相應標準並且年滿18歲,濟州重力賽車公園就會向你發出有效期為一年嘅GR-X駕駛許可證。有別於其餘兩款重力賽車,GR-X設有推進器,大大減低加速所需嘅時間,所以對駕駛技術嘅要求相對亦會較高。成功獲發GR-X駕駛許可證,你就可以喺度挑戰呢款規格最高、設計最精密嘅重力賽車,感受風馳電掣嘅無比快感!

濟州重力賽車公園玩樂攻略_6
@poortravellers.com

除咗重力賽車,濟州重力賽車公園其實仲有一啲新穎有趣嘅室內遊樂設施,適合大人細路一齊參與!

濟州重力賽車公園玩樂攻略_7
@with_yeonwoo

呢度嘅VR遊樂設施種類包羅萬有,由足球、籃球、射擊到賽車遊戲等等都一應俱全,嚟到一定唔會有悶場!

 

另類濟州自駕 | 最新濟州好去處 | 濟州重力賽車公園美食、購物攻略

濟州重力賽車公園美食、購物攻略
@by_poing

賽車玩到攰,不妨到濟州重力賽車公園嘅Table 981美食廣場休息一陣。Table 981美食廣場供應各式各樣嘅濟州地道菜式,好似豬肉湯麵、特製漢堡包同埋炸雞等等,總有一樣會啱你胃口!

濟州重力賽車公園美食、購物攻略_2
@by_poing

數到呢度嘅必食推介,就當然係濟州著名嘅豬肉湯麵啦!Table 981美食廣場嘅豬肉湯麵唔單止用上豬骨熬製,而且每片豬肉都層次分明,超有質素!另外,由於濟州本地嘅豬隻身型較細,所以脂肪相對較少,而且肉味亦更濃,絕對值得一試!

濟州重力賽車公園美食、購物攻略_3
@dim.wstm

濟州重力賽車公園設有一間名為Garage 981嘅紀念品店,店內有唔少以重力賽車公園為主題嘅產品,設計相當精美。除此之外,呢度仲有一啲充滿濟州風情嘅手信,好似漢拿峰朱古力等等,臨走之前不妨嚟睇下有冇心頭好!

 

濟州重力賽車公園
地址:880-24 Cheondeok-ro, Aewol-eup, Cheju, Jeju-do, 南韓 (顯示地圖)
開放時間:10:00 – 18:00
入場費用:
18000韓圜(包含駕駛GR-E款式重力賽車)
24000韓圜(包含駕駛GR-D款式重力賽車)
20000韓圜(包含駕駛GR-X款式重力賽車)
官網:https://www.981park.com/

 

📖延伸閱讀:【快閃濟州】濟州島4日3夜自駕遊行程!
📖延伸閱讀:【濟州自駕遊】濟州景點推薦 (無邊海景GD Cafe, 濟州神話世界)
📖延伸閱讀:【濟州手信特集】濟州特產推薦!濟州必買、必逛手信集合地!
📖延伸閱讀:【韓國手信】韓國超市必買零食手信推介!韓國芝士腸都榜上有名!

 

Hotels.com酒店優惠Hotels.com酒店優惠