定期送上世界各地最新、最地道嘅旅遊資訊!

【澳洲零食篇】澳洲超市手信特集 — 編輯嚴選十大必買澳洲薯片!

 

澳洲超市

講到必買澳洲手信,除咗保健品同藥妝,就係澳洲零食啦!而最人氣必買嘅零食,就係薯片!薯片既佔行李空間,又唔容易運送,但居然可以吸引一眾旅客嚟澳洲瘋狂掃薯片,可見澳洲薯片真係唔簡單!今次就等住喺澳洲嘅小編為大家嚴選十大必買澳洲薯片啦!以下推介嘅薯片全部都可以喺兩大澳洲超市Coles同Woolworths搵到㗎!

 

📖延伸閱讀:【塔斯曼尼亞必食】五大必食塔斯曼尼亞美食餐廳推介!(連荷伯特美食推介)

 

十大必買澳洲薯片|Red Rock Deli Sweet Chilli and Sour Cream

Red Rock Deli Sweet Chilli and Sour Cream
Red Rock Deli Sweet Chilli and Sour Cream $4.49aud

一講到澳洲最好食嘅薯片,Red Rock Deli絕對係澳洲人心中嘅No.1!Red Rock Deli標榜以葵花籽油烘烤而成,飽和脂肪含量比一般薯片低75%,而且不含人造色素,淨係健康啲呢一點都已經好吸引!但最重要都係口感同味道!Red Rock Deli薯片比較厚身,脆口而唔油膩!而調味絕對唔係一食落去成口味精粉嘅感覺,味道夠真,食完又唔會好口渴,可能係小編食過最好食嘅薯片!強烈推介Sweet Chilli and Sour Cream味,酸酸甜甜,但又有少少奶油香!正!

 

📖延伸閱讀:【悉尼美食天書】悉尼必食Cabramatta區越南餐廳推薦!(必試飛船牛肉河、街邊越南咖啡)

 

十大必買澳洲薯片|Smith’s Thinly Cut Salt and Vinegar

Smith’s Thinly Cut Salt and Vinegar
Smith’s Thinly Cut Salt and Vinegar $3.29

對於薯片,有人鐘情厚實,亦有人鐘意薄脆。如果鐘意薄脆薯片,就一定要試吓澳洲另一個人氣薯片品牌出品嘅Thinly Cut系列!Thinly Cut極薄但食落唔會好似食咗陣風咁,反而有多咗種酥脆感!因為食落唔覺得太heavy,一唔小心就會食哂成包!大家不妨試吓Salt and Vinegar口味,一食落去醋嘅酸味可能會覺得有啲刺激,但隨之而來嘅淡淡鹹味同薯仔香又會平衡返,非常特別!

 

📖延伸閱讀:【澳洲自由行】Top 3 澳洲墨爾本必去人氣Cafe!

 

十大必買澳洲薯片|Kettle Sensations Camembert and Fig

Kettle Sensations Camembert and Fig
Kettle Sensations Camembert and Fig $3.5aud

Kettle其實係同Red Rock Deli好相似,不過口感就偏硬,比Red Rock Deli失色一點,但就以創新口味成功吸引人注目!小編私心推介大家必試Camembert芝士配無花果口味,一開頭見到呢個配搭,其實都有少少卻步,但一打開包薯片,濃烈嘅Camembert芝士味湧出嚟,唔係講笑,聞落都覺得有種creamy嘅感覺,一食落去果然有芝士奶油香,加上無花果獨特嘅甜味,中和芝士嘅膩感,好食到不得了!

 

📖延伸閱讀:【塔斯曼尼亞遊記】Hobart必食 + 塔斯市集Salamanca Market必食Item!(兼參觀MONA博物館)

 

十大必買澳洲薯片|Kettle Sweet Potato Sea Salt

Kettle Sweet Potato Sea Salt
Kettle Sweet Potato Sea Salt $4.39aud

除咗千奇百怪嘅口味,Kettle仲推出咗蕃薯片!蕃薯有豐富嘅纖維,所以口感比起薯仔豐厚,而原本已經有一種香甜嘅味道,製作出嚟嘅蕃薯片唔需要太多調味,只需加上海鹽,就已經好足夠!而Kettle蕃薯片用慢煮烘烤而成,無添加任何味精同防腐劑,係食得安心又健康嘅零食!不過買嘅時候就要留意有效日期啦,因為無防腐劑,相對食用期限會較短!

 

📖延伸閱讀:【塔斯曼尼亞自駕遊】當地人介紹!必去塔斯曼尼亞景點、必食、酒莊行程全攻略

 

十大必買澳洲薯片|Vege Chips

Vege Chips
Vege Chips $3.6aud

澳洲有唔少人都對麩質過敏,而且澳洲人重視健康飲食,好多食品都以無麩質、素食、無添加、無防腐劑為賣點。如果怕食薯片唔健康,100%天然材料製成嘅Vege Chips就啱哂大家!唔好以為健康就等如唔好食!呢款Vege Chips嘅風味絕不低於一般薯片!外貌同蝦片一樣,但口感就比夠厚實,而味道就係淡淡嘅蔬菜香,一食落去冇濃烈嘅香料味,但食完一片又會忍唔住拎下一片,令人欲罷不能!

 

📖延伸閱讀:【澳洲自由行】Top 5 澳洲跳傘地點連套餐價格懶人包及常見問題

 

十大必買澳洲薯片|Tyrrells Mature Cheddar Cheese and Chive

Tyrrells Mature Cheddar Cheese and Chive
Tyrrells Mature Cheddar Cheese and Chive $4.99aud

Tyrrells其實係源自英國嘅高檔薯片品牌,係一款厚切薯片,唔少人都對一咬落去果種硬脆嘅衝擊感非常著迷!加上採用嘅薯仔都係Tyrrells自家農場所種植,確保有至高品質,係小編食過薯味最濃郁嘅薯片!無論係任何調味,都唔會蓋過原本嘅薯味,絕對係真材實料!

 

📖延伸閱讀:【追蹤粉紅極光】塔斯曼尼亞南極光地點、時間、季節攻略2018!

 

十大必買澳洲薯片|Sunbites Grain Waves Sour Cream and Chives

Sunbites Grain Waves Sour Cream and Chives
Sunbites Grain Waves Sour Cream and Chives $3aud

Sunbites Grain Waves雖然唔係薯仔製成,但實在太好食,無辦法唔推介比大家!Grain Waves係由全麥製成嘅脆片,唔好以為全麥就係乾柴兼無味!Grain Waves有薯片嘅口感,加上係波浪形狀,咬落去時更有層次!Sour Cream and Chives口味薯片就食得多,但Grain Waves呢款絕對比到你驚喜,味道唔會過濃,香草味同酸忌廉嘅平衝拿捏得剛剛好!其他味道一樣咁出色,一定要買哂嚟試!

 

📖延伸閱讀:【悉尼藍山一日遊】悉尼藍山國家公園自駕遊行程攻略 2018

 

十大必買澳洲薯片|Infuzions Prawn Cracker

Infuzions Prawn Cracker
Infuzions Prawn Cracker $3.49aud

記得初到澳洲,真係好掛住香港嘅零食!喺澳洲超市見到Infuzions Prawn Cracker時,就諗起明輝蝦片,但一試過之後就會覺得佢嘅美味完全超越明輝蝦片!蝦片原本嘅蝦味已經無比香濃,再加上BBQ調味,令蝦片更加惹味!而且唔係油炸,食起嚟爽脆而不油膩!食到停唔到口!

 

📖延伸閱讀:【塔斯曼尼亞手信篇】當地人推薦!第一次去塔斯曼尼亞必買特色手信 (教你揀正宗塔斯曼尼亞蜜糖!)

 

十大必買澳洲薯片|Doritos Cheese Supreme

Doritos Cheese Supreme
Doritos Cheese Supreme $3.29aud

如果你問澳洲人,有咩零食推介,佢地除咗會推薦Red Rock Deli、同Grain Waves,仲會推介Doritos粟米脆片。玉米脆片比較厚身,但非常脆口,一咬落去咔嚓咔嚓聲,過癮到不得了!而且每一塊脆片上面都鋪滿厚厚嘅芝士粉,鐘意芝士嘅人絕對無法抗拒!Doritos另外仲出咗唔同口味嘅沾醬,配埋一齊食味道更有層次!

 

📖延伸閱讀:【珀斯自由行】西澳自駕遊必睇!珀斯景點交通攻略大全 (連西澳景點打卡必備影相APP推薦)

 

十大必買澳洲薯片|Coles Cheese Tubes

Coles Cheese Tubes
Coles Cheese Tubes $1.5aud

平時買嘢總會覺得超市home brand無咁吸引,但澳洲超市home brand出哂名平靚正,小編成日都會試佢地自家出品嘅零食!而呢隻Cheese Tubes就係最近喺Coles發掘到嘅珍寶啦!Cheese Tubes有經典嘅時興隆芝士圈嘅濃香芝士味,但呢隻就標榜係用真正芝士製造,味道並唔係用化學劑調製出嚟!而且無人造色素,唔會整到成隻手指變橙色,仲要$1.5aud就有大大包!又平又好食!

 

📖延伸閱讀:【昆士蘭自由行】布里斯本自由行 — 布里斯本美食餐廳推薦指南2019
📖延伸閱讀:【黃金海岸沙灘】澳洲黃金海岸美食、景點、自駕遊手冊大全 (連黃金海岸餐廳推薦)
📖延伸閱讀:【墨爾本自由行】全家出遊必去墨爾本景點 — Phillip Island企鵝島行程攻略!
📖延伸閱讀:【去澳洲行山】艾爾斯岩 (烏魯魯Uluru) 玩法行程大解構!

 

Hotels.com酒店優惠Hotels.com酒店優惠