定期送上世界各地最新、最地道嘅旅遊資訊!

【溫哥華自由行】溫哥華景點、美食、住宿懶人包!

被譽為全球最適合人類居住城市之一嘅溫哥華,四季氣候溫和,好山好水。聽落好似係適合退休老人生活嘅地方?咁樣諗就大錯特錯啦!作為加拿大第三大城市,溫哥華其實係一個多姿多彩,處處帶比人驚喜嘅地方!小編已經整合好一個溫哥華自由行懶人包比大家,帶你玩盡溫哥華景點,食盡溫哥華美食,仲推介埋酒店住宿比你!即刻上Blogshotels.com睇啦!

 

📖延伸閱讀:【香港假期好去處】2019公眾假期請假攻略 (連長短線旅遊地點推薦)

 

溫哥華自由行|溫哥華景點推薦|斯闊米甚 (Squamish)


@Flickr

距離溫哥華市大概四十分鐘車程嘅斯闊米甚 (Squamish),係被稱為全加拿大西海岸最適合野外活動嘅景點,當地人亦都以此地非常自豪!而Squamish係印第安話意思「風之母」,因為靠近海岸,海風不停吹過斯闊米甚而得名。


@604now
海天公路 (Sea to Sky Highway)

斯闊米甚之所以咁值得去,首先係因為會途經被評為世上最佳公路第五名嘅海天公路(Sea to Sky Highway),沿途會經過多個海灣、瀑布、湖泊、森林同峽谷,景色壯闊,海天一色,美不勝收!淨係前往斯闊米甚嘅路途上,大家都已經可以大飽眼福!

@Flickr
海天纜車 (Sea to Sky Gondola)

另一個原因就係海天纜車 (Sea to Sky Gondola)!纜車座落於「黃金三角洲」- 酋長岩 (Stawamus Chief),香農瀑布(Shannon Falls)同仰望豪灣(Howe Sound) 呢三個重要景點嘅中間,乘坐海天纜車就可以一口氣睇哂三個咁宏偉壯觀嘅景點!小編真係諗唔到有咩理由唔嚟呢度!

 

海天纜車 (Sea to Sky Gondola)
地址:36800 BC-99, Squamish, BC V0N 3G0加拿大  (顯示地圖)
營業時間星期日至四 09:30-17:00;星期五及六 09:30-20:00 ※會因季節而有所調整
費用 (只供參考)成人 $41.95CAD;6-12歲小童 $13.95CAD
網址https://www.seatoskygondola.com/

 


@seatoskygondola
The Chief Overlook Viewing Platform

坐海天纜車上到頂點之後,就係另一個重頭戲 – The Chief Overlook Viewing Platform,係一個由懸崖邊延伸出去嘅架空觀景台!企喺觀景台上,有驚心動魄嘅感覺,同時又被周圍嘅風光震懾!淨係呢個景都已經值回票價啦!

 

溫哥華自由行|溫哥華景點推薦|固蘭湖島 (Granville Island)


@granville_island

固蘭湖島原本係溫哥華嘅一個工業區,後來改變成為一個聚集咗藝術中心、工藝品店、劇院等等,充滿童話藝術氣息嘅多功能社區,亦都係溫哥華必到旅遊景點之一!


@Flickr

喺固蘭湖島街上漫步,隨處都會見到藝術館同畫廊,仲會見到好多街頭藝人喺度表演!再加上有好多外牆五顏六色嘅特色商店,整個島就好似一個文創區!喺度渡過一個下午,成個人都沾上文藝氣息!


@Flickr
固蘭湖島市集

 

呢度唔單止有濃厚嘅藝術氣息同歷史建築物,而且聚集咗好多特色美食店,當中最令人期待嘅就係固蘭湖島市集啦!固蘭湖島市集所賣嘅都係當地新鮮出產農作物,有新鮮生果、各式各樣嘅芝士、火腿、新鮮出爐麵包同蛋糕,花多眼亂,每樣試少少,都包你食到攬住個肚!


@Flickr
Lee’s Donuts係固蘭湖島市集最有名氣嘅冬甩,無論係當地人定遊客都會慕名而嚟,大家一定要試下!

 

固蘭湖島市集
地址:1669 Johnston St, Vancouver, BC V6H 3R9加拿大 (顯示地圖)
營業時間09:00 – 19:00 全年無休

 

溫哥華自由行|溫哥華景點推薦|固蘭湖島 (Granville Island) | 固蘭湖島交通攻略


@curiocityvancouver

雖然呢度係一個島,但其實係可以由溫哥華市區搭乘前往U.B.C.(University of British Columbia)、Granville、Arbutus、Cambie、Oak嘅巴士,大概20分鐘車程就到達。


@Flickr

不過嚟到溫哥華,大家不妨坐下佢哋嘅水上巴士(Aquabus)。大家可以喺False Creek碼頭,搭乘水上巴士去到固蘭湖島市集附近碼頭落船。

 

溫哥華自由行|溫哥華景點推薦|煤氣鎮 (Gastown)


@juanolivas

煤氣鎮係溫哥華最古老嘅城區,亦係溫哥華嘅發源地。由十九世紀末淘金熱潮開始發展,旅館、餐廳、酒吧、商店紛紛成立,時至今日仍然保留著當年嘅風貌!雖然叫做煤氣鎮,但其實呢度唔係出產煤礦,而係以溫哥華首任市長嘅別名Gassy而得名!呢度最大特色就係整個城鎮都保留著古老面貌,鍾意懷舊嘅你就一定要嚟行下啦!


@curiocityvancouver
蒸氣鐘 (Steam Clock)


煤氣鎮最著名的地標就係有一座巨大嘅蒸氣鐘,亦都係世上第一座由蒸氣推動嘅時鐘!蒸汽鐘每隔十五分鐘就會
出白色嘅蒸氣,仲會發出汽笛鳴聲,唔少人都專登嚟到煤氣鎮朝聖㗎!

@Flickr

煤氣鎮保留咗維多利亞風格嘅紅磚建築物同以鵝卵石鋪成嘅街道,四周圍都係充滿懷舊復古風味嘅古董店、畫廊、手工藝品店,洋溢著一種歐洲古典氣息!大家亦都可以喺煤氣鎮搜羅到各式各樣溫哥華特色手信,真係好行又好買呀!

 

溫哥華自由行|溫哥華景點推薦|卡皮拉諾吊橋公園 (Capilano Suspension Bridge Park)


@Flickr

卡皮拉諾吊橋公園係溫哥華最具代表性嘅景點,距離溫哥華市只需要三十分鐘車程,而且市中心仲有免費穿梭巴士來回溫哥華同公園,非常方便!呢個公園對溫哥華人嚟講就好似一個「森林遊樂場」,有一座聞名世界嘅吊橋,引領大家到充滿神秘感嘅森林!仲有高空叢林探險同懸崖步道!感覺就好似化身成樹林入面嘅小精靈,喺森林探險,刺激又好玩!


@curiocityvancouver
卡皮拉諾吊橋 (Capilano Suspension Bridge)

 

冇行過卡皮拉諾吊橋就等於冇嚟個溫哥華!呢條橋堪稱係全世界最長嘅吊橋,全長137公尺,而且距離橋底下嘅卡皮拉諾河有成70公尺高,亦都係全世界最高嘅吊橋!冇返咁上下膽量都真係會嚇到腳軟! 但一場嚟到,一定要挑戰自己!穿越吊橋,就可以睇到絕美景色!


@curiocityvancouver
懸崖步道 (Cliff Walk)

 

公園內另一個highlight就係懸崖步道(Cliff Walk)!Cliff Walk係一條半圓形,懸空於懸崖旁邊嘅一條步道,雖然唔會好似吊橋咁搖擺,但因為係距離懸崖邊好遠嘅空中,再加上木板之間嘅罅隙可以比你隱隱約約見到底下無盡嘅卡皮拉諾河,一樣都係咁刺激㗎!

 

卡皮拉諾吊橋公園 (Capilano Suspension Bridge Park)
地址:3735 Capilano Rd, North Vancouver, BC V7R 4J1加拿大  (顯示地圖)
營業時間星期一至日 09:30-18:00 ※會因季節而有所調整
費用 (只供參考)成人 $46.95CAD;6-12歲小童 $14.95CAD
網址http://www.capbridge.com/


溫哥華自由行|溫哥華必食推薦|49th Parallel Café & Lucky’s Doughnuts


@luckysdoughnuts

49th Parallel Cafe係溫哥華非常具代表性嘅精品咖啡店,總共有三間分店。佢哋最出名嘅就係自家焙烘嘅咖啡豆,溫哥華好多咖啡店都採用佢哋出品嘅咖啡豆㗎,嚟到溫哥華點可以唔試下佢哋嘅咖啡?


@49th
Lemon Meringue doughnut $3.5CAD

必食推介嘅就一定係instagram上瘋傳,只有49th Parallel Cafe有賣嘅Lucky’s Doughnuts!佢哋嘅冬甩口味創新,餡料豐富,口味唔會太甜,而且非常軟熟,當地人大推!


@curiocityvancouver
soft shell crab burger $12CAD

Thurlow分店最近仲推出咗軟殼蟹漢堡,炸到香脆嘅軟殼蟹配上牛油果,泡菜,特製花生醬加上鬆軟嘅麵包,諗下都流曬口水!

 

49th Parallel Café & Lucky’s Doughnuts – Thurlow
地址:689 Thurlow St, Vancouver, BC V6E 4G2加拿大  (顯示地圖)
營業時間星期一至五 06:30-18:00;星期六及日 07:00-17:00

 

 

溫哥華自由行|溫哥華必食推薦|Mom’s Grilled Cheese

@Facebook

Grilled cheese其實係美國同加拿大人家傳戶曉嘅小食,只係簡單嘅烤芝士三文治,但係溫哥華街頭小食車Mom’s Grilled Cheese,就好成功咁靠著呢一款簡單嘅三文治打出名堂,將Grilled cheese做到美味無窮,令人食到上哂癮!

@Facebook
Mom’s Classic $5.5CAD

佢哋嘅Grilled cheese採用Cheddar、Havarti、Pepper jack同Provolone四種芝士,大家可以自由配搭。麵包係會先用牛油煎到金黃酥脆,然後夾著多到滿瀉嘅芝士,一口咬落去絕對可以做到拉絲嘅效果!外酥內軟,充滿牛油同芝士嘅香味,好食到不得了!

 

Mom’s Grilled Cheese
地址:Robson St, Vancouver, BC V7Y 1K8加拿大  (顯示地圖)
營業時間星期一至五 11:30-15:00;星期六及日 12:00-17:00

 

溫哥華自由行|溫哥華必食推薦|La Casa Gelato

@Facebook

La Casa Gelato係一間已經經營咗35年嘅老字號意式雪糕店,溫哥華人都一定聽過La Casa Gelato!呢間雪糕店之所以咁出名就係因為有超過218種口味比你揀!一日食一個口味都差唔多食足大半年呀!佢哋開業至今已經研發超過600款口味,就連辣椒、芥末,泡菜呢啲咁奇怪嘅口味都有,大家一定要嚟挑戰味蕾!


@lacasagelato

除咗有千奇百怪嘅口味,呢間雪糕店嘅用料非常認真,所有雪糕都係用天然嘅食材製作,務求要做到最新鮮,口感最滑嘅雪糕,絕對值得一試!

 

La Casa Gelato
地址:1033 Venables St, Vancouver, BC V6A 3R9加拿大  (顯示地圖)
營業時間星期一至日 11:00-23:00

 

 

溫哥華自由行|溫哥華酒店推介|溫哥華交換酒店

@Facebook

溫哥華交換酒店喺今年嘅7月先至剛剛落成,所有嘅設施都係全新之餘,每一個房間都提供平板電腦,仲可以收睇Netflix!玩完成日,返到酒店享受咁正嘅設施,都真係幾relax!酒店位於溫哥華市中心,行去加大拿廣場同海洋大廈都只係5分鐘之內,非常方便!

酒店嘅設計以摩登時尚風格為主,唔同嘅房間仲有唔同設計主題,別樹一格!

 

溫哥華交換酒店
地址:CAN溫哥華475 Howe Street (顯示地圖)
星級 | ★★★★☆  
位置 | ★★★☆☆  
設施 | ★★☆☆☆  
環境 | ★★★★☆  
價格 | 查看價格  

 

溫哥華自由行|溫哥華酒店推介|煤港海岸 APA 酒店


@Facebook

呢間酒店位於溫哥華嘅煤港區,可以望到北岸山脈嘅景色!地理位置亦都好方便,行去溫哥華市中心最旺嘅Robson Street只需10分鐘!附近仲有好多嘅食肆同商店,隨時隨地都可以shopping搵食!

酒店設備齊全,有健身室,仲有室內泳池同露天暖水泳池!而且房間設計簡單舒適,仲有落地玻璃,大部分房間都可以睇到海景,又或者係溫哥華市景!


煤港海岸 APA 酒店
地址:CAN溫哥華1180 Hastings Street W (顯示地圖)
星級 | ★★★★☆  
位置 | ★★★★☆  
設施 | ★★★☆☆  
環境 | ★★★★☆  
價格 | 查看價格  

 

溫哥華自由行|溫哥華酒店推介|費爾蒙環太平洋酒店

@Facebook

費爾蒙環太平洋酒店係一間位於溫哥華市中心嘅超豪華五星級酒店,室內設計由非常著名嘅Chil Interior Design負責,設計講求與自然風光融合,所以酒店嘅窗大部分都已落地大玻璃為主!務求可以比住客充分欣賞到溫哥華西海岸嘅迷人景色!

酒店房間設備豪華,海景房設有大理石溫泉浴室,浴室內重要係落地大玻璃,大家可以一邊浸浴,一邊全方位欣賞西海岸景觀!如果夜晚配埋杯香檳,浸著浴咁樣睇夜景,真係一流嘅享受!

 

費爾蒙環太平洋酒店
地址:CAN溫哥華1038 Canada Place (顯示地圖)
星級 | ★★★★★
位置 | ★★★★☆  
設施 | ★★★★☆  
環境 | ★★★★★  
價格 | 查看價格  

 

溫哥華自由行|溫哥華酒店推介|洛登酒店

洛登酒店係溫哥華係好有口碑嘅一間酒店,無論係位置、設施,定係服務嘅質素都非常優質!酒店好重視客人能夠有一個舒適嘅體驗,所以設計都以簡單同柔和為主,仲暖色為設計主調,再配合綠色嘅襯托,比人一種和諧嘅感覺! 酒店內有健身室,又有SPA同房間內按摩服務!最啱想放鬆身心嘅住客享用!

@Facebook

酒店房間非常寬敞,而且著重要有自然光透入,令到整體感覺更加有空間感!喺呢度瞓一覺,包你成個人都身心舒暢!

 

洛登酒店
地址:CAN溫哥華1177 Melville Street (顯示地圖)
星級 | ★★★★☆  
位置 | ★★★★☆  
設施 | ★★★☆☆  
環境 | ★★★☆☆  
價格 | 查看價格  

 

 

 

Hotels.com酒店優惠