定期送上世界各地最新、最地道嘅旅遊資訊!

【清邁遊記】當地人話你知清邁有咩玩!帶你食盡清邁夜市+特色清邁行程推薦!

清邁係泰國第二大城市,到處充滿住歷史文化嘅氣息,好適合放慢腳步,欣賞古城佛寺同大自然。清邁有咩玩?當然唔少得要去著名景點體驗清邁特色同去清邁夜市掃街掃貨啦,以下就等小編話你知當地人推介嘅清邁行程必check位啦!

首先一定要食盡清邁夜市,小編精選咗最受歡迎嘅三大夜市介紹俾大家,一次過食玩買!

 

清邁自由行景點推薦|清邁夜市|清邁週六夜市

@chiangmai.bangkok.com
週六夜市人流超多,連當地人都成日去!

 

週六夜市位於舊城區南門外嘅窩拉路上,所以又名南門夜市,因為出名小食攤位多而且價格相宜,係好多當地人都會到訪嘅夜市。除咗美食之外,週六夜市亦有好多買純手工製作商品嘅攤販,重覆率唔高,仲有街頭表演同各種特色體驗,係清邁三大必去夜市之一,非常熱鬧㗎。

 

@onlyadayaway.com

夜市入口兩邊以小食攤檔為主,燒烤肉串,烤海鮮等等非常常見,當然亦唔少得必食嘅芒果糯米飯喇!掃完街就可以開始掃貨喇!週六夜市大部分貨品嘅售價都較低,當然亦要視乎大家講價嘅功力啦!

 

@nessilicioustravels

手作商品係呢到嘅一大特色,好似呢啲色彩繽紛嘅手繪,好有泰式風情而且款式超多,揀都揀到手軟!仲有好多其他唔同種類嘅商品好似木製小餐具、銅製器皿、充滿民族風格嘅燈罩等等,買返去做手信一定好受歡迎!

 

@wheresbosconow.com

最特別就係呢到有一排櫈喺路邊,原來係流動按摩攤檔,行到攰不妨考慮過嚟鬆一鬆,按摩師手勢唔錯。小編都係第一次坐喺街邊按摩,嚟到清邁夜市真係要體驗一吓呀!

 

清邁週六夜市
地址:Suk Sathit, Tambon Wiang, Amphoe Mueang Chiang Rai, Chang Wat Chiang Rai 57000, Thailand (顯示地圖)
交通:可搭紅色雙條車或嘟嘟車前往至古城區Wua Lai Road
開放時間:星期六18:00 – 23:00

 

清邁自由行景點推薦|清邁夜市|清邁週日夜市

@expique.com

週日夜市係清邁目前規模最大嘅夜市,由塔佩門橫跨古城,直至帕辛寺門口,佔地接近兩公里。週日夜市以清邁本地特色嘅產品為主,除咗一般嘅手信同工藝品之外,仲有好多清邁年輕設計師作品,好似畫作、明信片、服飾等等。Sunday Market可以話係清邁本地設計師嘅搖籃,唔少設計師喺呢到起家,絕對係買手信嘅最佳選擇!

夜市內好多唔同種類嘅美食,當中最熱門嘅就係烤肉串,好多都係即叫即烤,保證入口新鮮熱辣辣!仲有各款泰式美食,包你搵到心水。

 

@hungryfatties

記得仲有必食嘅牛油果雪糕,兩大球雪糕裝喺開半嘅牛油果上,一啖雪糕一啖果肉,牛油果fans千祈咪錯過!

 

@komsansketch

呢到亦會有藝術家嚟即場為遊客畫掃描,快靚正,同真人有九成似,絕對唔係交行貨。

 

手工香皂花喺夜市入邊曝光率非常高,不過每檔所賣嘅都會有少少分別。香皂花雕刻精緻,味道清香,每朵花都會有特製小木盒裝住,買嚟做手信就最啱喇。相比週六夜市,週日夜市的Rachadamnoen Road週日會封路成步行街較為寬敞,如果你同小編一樣唔鐘意同人迫就啱曬喇。而7點至9點係夜市最熱鬧嘅時段,如果怕人多擠逼建議可以5點左右就去,行得舒服又唔怕部分攤販早收行唔到。

 

清邁週日夜市
地址:ถนน มูลเมือง ซอย Chang Moi, Amphoe Mueang Chiang Mai, Chang Wat Chiang Mai 50200, Thailand (顯示地圖)
交通:可搭紅色雙條車或嘟嘟車前往至塔佩門(Tha Phae Gate)
開放時間:星期日17:00 – 24:00

 

清邁自由行景點推薦|清邁夜市|清邁觀光夜市 Night Bazaar

清邁觀光夜市 Night Bazaar@flickr

清邁夜市有好多,而清邁觀光夜市係每晚開放,唔怕摸門釘。夜市由清邁夜市(Chiangmai Night Bazaar)、卡拉爾夜市(Kalare Night Bazaar)同阿努善市場(Anusarn Market)幾個夜市組合而成,所以亦係眾多夜市之中最多元化嘅!

 

清邁觀光夜市 Night Bazaar@flickr

Kalare Night Bazaar 裡面有個食品中心,係搭棚興建嘅空間,大約有200個座位,係搵小食宵夜嘅好去處呀。夜市內有好多唔同種類嘅美食,大路嘅有各類肉串、小炒、新鮮果汁等等,另外亦有比較罕見嘅烤鱷魚肉,烤駝鳥肉咁,味道方面同一般食開嘅紅肉相似,唔駛驚有怪味。如果膽生毛嘅可以試埋唔同種類嘅昆蟲,不過小編實在冇辦法衝破心理關口去嘗試,所以口味就留返比試有膽試嘅你地去評價喇!

 

@jengcj

記得要試吓大受遊客歡迎嘅鳳飛飛豬腳飯,就喺Changpuek Gate附近,又平又好味,醫肚一流!傳說老闆娘每日都戴呢頂帽開工,係佢嘅招牌裝束,大家認住喇!

 

@boasdegarfo

必食椰子雪糕!夠曬冰凍而且好重椰香味,一放入口簡直係透心涼,滿足感爆燈!

 

清邁觀光夜市 Night Bazaar
地址:Chang Moi, Mueang Chiang Mai District, Chiang Mai 50100, Thailand (顯示地圖)
交通:可以從古城東門的Loi Kroh Rd往東走,遇到Chang Klan Rd左轉就可到達。
開放時間:18:00 – 24:00

 

清邁自由行必買|清邁必買手信|ChaTraMue

@flook_fuji

除咗上面推介嘅夜市手作係清邁必買手信,小編仲搜羅咗幾樣必買產品推介俾大家,全部都可以喺MAYA百貨入面搵到,超方便!ChaTraMue Brand 泰國手標茶,係泰國好出名嘅奶茶品牌,奶香味好重,飲完之後齒頰留香,仲可以買包裝奶茶返去同朋友分享呢份泰式美味!

 

ChaTraMue, Maya
地址:44 Huaykaew Rd、Tambon Su Thep Huaykaew Rd, Tambon Chang Phueak, Amphoe Mueang Chiang Mai, Chang Wat Chiang Mai 50300, Thailand (顯示地圖)
交通:Maya百貨B1層
營業時間:11:00 – 22:00

 

清邁自由行必買|清邁必買手信|Herb Basics

@lilithchan720

呢到仲有清邁最出名,未用過都聽過嘅清邁本土草本香薰品牌Herb Basics。所有產品都係以天然成分製作,而且價錢好平,真係好抵買,最適合做手信呀!如果大家趕時間,機場都仲有分店,大家就可以最後衝刺去掃貨,用曬啲泰銖啦。

 

Herb Basics, Maya
地址:55/5 อาคาร เม-ญ่า ไลฟ์สไตล์ ช้อปปิ้ง เซ็นเตอร์ ห้องเลขที่ C104/2 ชั้น G หมู่ 5 ช้างเผือก เมือง Chang Wat Chiang Mai 50300 (顯示地圖)
交通:Maya百貨G層
營業時間:11:00 – 22:00
官網:https://www.herbbasicschiangmai.com/

 

要感受清邁特色,又點可以唔去最著名嘅寺廟朝拜一下呢,相信以下介紹嘅佛寺會係你清邁遊記中嘅亮點之一。

 

清邁自由行景點推薦|特色清邁行程推薦|清曼寺

@peerapong_prisont

清曼寺係清邁三大寺廟之一,位於清邁古城區嘅北面,係清邁現存最古老嘅寺廟,已經有成700幾年嘅歷史!由蘭納王國第一任國王孟萊王(King Mengrai)親自監督興建,融合咗斯里蘭卡嘅建築風格,金碧輝煌。一座白底金頂嘅佛塔(The Sacred Elephant Encircled Stupa)就最為特別,佛塔底部有十五隻石雕大象,而佢嘅尺寸係對照真實大象嚟雕刻,規模相當宏偉壯觀!

 

@ifollowislands

跟住真實大象尺寸雕刻嘅大象,即使經過歲月洗禮亦依然相當有氣勢。

 

清曼寺
地址:171 Ratchapakhinai Rd, Tambon Si Phum, Amphoe Mueang Chiang Mai, Chang Wat Chiang Mai 50200, Thailand (顯示地圖)
交通:清邁古城北側的Ratchaphakhinai路上,可搭紅色雙條車、嘟嘟車前往。
費用:免費入場
開放時間:06:00 – 18:00

 

清邁自由行景點推薦|特色清邁行程推薦|白廟

@rolling_pandas

白廟,又稱為靈光寺或者白龍寺,離清邁大概20公里。

白廟由1996年開始到現在都未完工,據聞整個建築時期要100年,係一件浩大嘅藝術品!雖然要多年後先可以欣賞佢嘅全貌,但係修建完成嘅主廟已經足以俾大家見識到佢嘅壯觀。白廟外層係極為繁複精緻嘅雕刻花紋,以全白做底色,銀鏡鑲邊,喺陽光下特別奪目耀眼。進入白廟前要赤腳通過一條橋,過咗橋就正式進入白廟。主殿裏面係佛像同壁畫,嚴禁拍照。

 

@gailsnape

白色代表住純潔,而閃爍嘅玻璃片就係智慧嘅象徵,繁複嘅花紋巧奪天工,可以話係最靚最精緻嘅寺廟之一,點影都影唔夠!

 

白廟
地址: ตำบล ป่าอ้อดอนชัย อำเภอเ มืองเชียงราย Chiang Rai 57000, Thailand  (顯示地圖)
交通:建議包車前往
費用:50泰銖
開放時間:09:00 – 18:00

 

清邁自由行景點推薦|特色清邁行程推薦|黑廟

@olivia_chang

好多人睇到佢個名都會誤會咗,其實黑廟並唔係廟宇,而係一座由泰國著名藝術家Thawan Duchanee設計,以死亡同地獄為主題嘅博物館,足足花費咗36年去設計同建造。入面展示咗各樣古董、標本及當代藝術等。由於博物館本身係黑色系建築物,被當地人稱為「清萊地獄」,因而有咗黑廟呢個稱號喇。

由於距離白廟只係大概半小時車程,面且個名又黑白呼應,好多人都會喺清邁行程入面一次過參觀黑廟同白廟。黑廟使用柚木搭建,外層由尖銳牛角形狀裝飾而成,屋簷支架處有精細雕花,入口仲有兩尊守護雕像,內外都係黑色,超有氣勢。

 

@rosiek32

博物館係藝術家用嚟放置自己嘅蒐藏品同作品,並開放俾民眾參觀。入面擺放住數量眾多嘅動物皮、骨骸、標本及捕獵工具等收藏品,加上黑色裝潢,令人有毛骨悚然嘅感覺。

 

黑廟
地址:333 หมู่ 13 Tambon Nang Lae, Amphoe Mueang Chiang Rai, Chang Wat Chiang Rai 57100, Thailand (顯示地圖)
交通:建議包車前往
費用:成人80泰銖;12歲或以下小童及殘疾人士免費
開放時間:09:00 – 17:00
官網:http://www.thawan-duchanee.com/

 

清邁自由行景點推薦|特色清邁行程推薦|Asia Scenic Thai Cooking School

@asiascenic

近年去泰國旅行學做泰國菜已經成為咗一個潮流,清邁行程就當然唔少得要學做泰北菜啦!清邁嘅cooking class同曼谷最大嘅分別係可以選擇自己想做嘅菜式,唔需要大家同一時間做同一個餸㗎。小編推介大家去位於古城東北方嘅Asia Scenic Thai Cooking School,清邁市區有免費接送服務。Asia Scenic嘅課程有半日(五道菜) 或者一日(七道菜) 可以揀,當中包括好多種類嘅菜式:春卷、沙律、湯類、炒粉麵、咖哩醬、咖哩湯同甜品。

 

@giulibonazzi

Asia Scenic Thai Cooking School環境唔錯,空間夠大,仲有自己嘅菜園。正式開始之前,老師會帶大家參觀菜園,認識一啲泰國菜常用嘅材料,仲會帶大家去附近嘅傳統市場參觀,認識一下泰國菜嘅食物材料。睇啱嘅話仲可以順便買啲香料、調味品、生果等等㗎。

 

@jordancasey

喺曼谷上堂,學校通常已經將要用嘅份量分好擺喺到,大家只需要放落去就得。呢到老師會講份量,但係要自己親手倒調味料,唔會過於簡單,感覺更加有挑戰性,小編就比較喜歡呢種教學方式喇。

 

Asia Scenic Thai Cooking School
地址:31 Rachadamnoen Rd Soi 5, Tambon Si Phum, Amphoe Mueang Chiang Mai, Chang Wat Chiang Mai 50200, Thailand (顯示地圖)
交通:清邁市區有免費接送服務
費用:每位800 – 1,200泰銖
營業時間:09:00 – 21:00
官網:http://www.asiascenic.com/

 

📖延伸閱讀:【清邁自由行】Top 10 全新開業清邁酒店推介 (四大必試清邁SPA)
📖延伸閱讀:【冷門清邁景點大全】清邁自由行必去5大隱世清邁cafe!
📖延伸閱讀:【清萊自由行】清萊景點懶人包 + 清萊白廟附近隱世住宿推薦
📖延伸閱讀:【曼谷海鮮特集】Central World美食推薦大全 (兼食大熱曼谷龍蝦麵)

 

Hotels.com酒店優惠