定期送上世界各地最新、最地道嘅旅遊資訊!

【深圳cafe推薦】5大深圳下午茶餐廳及Cafe推薦!(連深圳地鐵景點一日遊路線懶人包)

 

講起「北上」,以前或者只限於揼骨,但近年就多咗人去食好東西或者打吓卡。閨蜜聚會最鍾意去影相食下午茶,如果去厭咗香港cafe又或者覺得消費太高,大家不妨考慮去深圳下午茶。其實深圳有唔少特色cafe,無論你係文青定粉紅粉女心都冇問題。小編精選咗5間深圳cafe俾大家過一個悠閒午後,仲有深圳地鐵景點一日遊路線懶人包𠻹!

 

深圳地鐵景點|深圳cafe下午茶推薦|Chotto等等

Chotto等等
@channnnncy

Chotto等等置身喺花園入面,寧靜嘅環境加上非常有空間感嘅設計,令人覺得好relax,融入大自然當中。一大片茂密嘅樹林就係佢最獨特嘅設計,相當有熱帶風情,唔講以為去咗泰國度假呀!想週末嚟嘅話最好提早訂位,唔係可能就冇曬啲靚靚影相位喇。

Chotto等等_2
@iam_on_the_way

唔好以為呢到淨係食環境呀,餐廳主廚大有來頭,曾經喺澳洲星級名店Attica工作,食物擺盤精緻,每一道菜都係水準之作!

 

Chotto等等
地址:深圳市福田區彩雲路彩田公園水木石藝術館內 (顯示地圖)
交通:深圳地鐵4號線 蓮花北站A1出口 步行約13分鐘
營業時間:星期二至日 12:00 – 20:00

 

深圳地鐵景點|深圳cafe下午茶推薦|槑林書店

槑林書店
@小紅書

「槑」係「梅」嘅異體字,繼「囧」成為咗網民最愛用嘅古文字之一,因為「槑」由兩個「呆」字組成,用嚟形容啲人比呆更呆。「槑林書店」嘅命名除咗因為位於梅林,亦帶住店主希望客人可以好好發呆嘅期許。

Cafe採用和風建築,整體設計用溫暖嘅木色,大面積玻璃窗方便陽光透入室內之餘,亦令佢嘅外觀顯得乾淨透徹,喺鬧市中有一份清新感覺。整體裝修簡潔大方,食品比較簡單,但係價格合理,好適合靜靜哋傾吓偈放鬆吓。

槑林書店_2
@insta9pho.com

書店有兩層,有室外座位,佢同時都係一間咖啡廳,可以俾客人邊閱讀邊享用小食同飲品。全店共有約3000本藏書,都係由店主喺外地蒐羅返嚟,主要圍繞設計、生活、藝術等主題。

 

槑林書店
地址:深圳市福田區上梅林八一路8號海曙凱豐酒店2樓 (顯示地圖)
交通:上梅林地鐵站E出口 步行約4分鐘
營業時間:星期一至日 10:00 – 22:00

 

深圳地鐵景點|深圳cafe下午茶推薦|IH CAFE

IH CAFE
@csysammi

IH cafe喺深圳有三間分店,呢間最新開幕嘅分店就行摩洛哥風格,隨即成為大熱打卡勝地!Cafe總共有7個房間,而每間房有唔同風格陳設,連角落都佈置得非常別緻,小編相信最受歡迎都係摩洛哥風小庭院!藤椅、花磚、波西米亞簾子,簡直係深圳嘅摩洛哥!最吸睛係裝修彷似摩洛哥當地出名嘅泳池酒店,個個都會喺呢個位影靚相㗎!

IH CAFE
@missmimi525

池畔係最有利位置,方便影相又有氣氛,可以同好姊妹過返個摩洛哥風情嘅tea time!

 

IH CAFE
地址:深圳市福田區梅林街道凱豐路28號富國工業區1棟1樓 (顯示地圖)
交通:地鐵上梅林站A出口 進入保安亭後右轉即可
營業時間:星期一至日 10:00 – 00:30

 

深圳地鐵景點|深圳cafe下午茶推薦|枕咖啡Pillow Coffee

枕咖啡Pillow Coffee
@pillow.coffee

Pillow Coffee由兩個香港人開店,全店以白色為主調,走中世紀法式宮廷風。法式宮廷風好有情調,啱曬閨蜜或情侶嚟談心。店內空間唔算好大,但係每個空間同擺設嘅細節都可以感受到店主非常用心設計。

枕咖啡Pillow Coffee_2
@timofat_

餐廳對於食物質素都好重視,每個月轉一次menu

枕咖啡Pillow Coffee_3
@pillow.coffee

小編覺得佢哋嘅甜品最出色,呢個自家製brownie超高質,必試!

 

枕咖啡 Pillow Coffee
地址:深圳市南山區桃園街道留仙大道眾創產業園B52棟107戶 (顯示地圖)
交通:地鐵塘朗站D出口 轉坐的士到眾創產業園
營業時間:星期五至日 11:00-21:00、星期一至四 11:00-20:00

 

深圳地鐵景點|深圳cafe下午茶推薦|La Moda

La Moda
@tris.fa

La Moda總店喺上海,而家有埋分店喺深圳,唔駛搭飛機都可以體驗到花花世界喇!一行入cafe,就可以見到好多鮮花。

La Moda_2
@manchingyung

最欣賞呢到唔限時,鍾意坐幾耐都冇問題!Cafe有好多唔同座位,有窗邊位、梳化位,全部都好舒服好好影。

La Moda_3
@dddddarry

唔止環境佈置充滿鮮花,就連食品同飲品都用鮮花嚟裝飾,一上枱大家都嘩嘩聲,冇諗過靚得咁誇張。

 

La Moda
地址:深圳南山區萬象天地NL167 (顯示地圖)
交通:地鐵1號線高新園站A出口
營業時間:星期一至日 10:00 – 00:00

深圳地鐵景點一日遊路線懶人包

嚟到深圳除咗飲飲食食,其實仲有大把景點可以去行吓㗎,小編整理咗幾個喺地鐵沿線嘅景點俾大家參考,咁就唔駛擔心交通問題啦!

 

深圳地鐵景點|深圳大學

深圳大學
@qqcutelam

深圳大學自1983年成立至今已經有35年歷史,建築物相當有設計感,景色優美,吸引咗唔少人嚟參觀影相,位列中國十大最美校園。其中南區理工樓最受歡迎,全白設計點影都靚!校園占地甚廣,徒步行一圈都要成個鐘㗎,學校好貼心地提供類似旅遊景區嘅觀光車,一蚊人仔就搭得!

 

深圳大學
地址:深圳市南山區南海大道3688號 (顯示地圖)
交通:地鐵1號線深大站C出口
開放時間:07:30 – 23:30

 

深圳地鐵景點|華僑城創意文化園

華僑城創意文化園
@fhiruby

前身係工業區,2011年翻新後變身做創意文化區。好似上海有田子坊、香港有JCCAC、PMQ咁樣,華僑城創意文化園可以話係深圳嘅「華山1914」,融合咗創意設計嘅文化產業基地,吸引唔少市民去觀賞一番。周圍都有好多打卡位,weekend仲會有小市集,鍾意文青手作嘅話就唔好錯過喇!

 

華僑城創意文化園
地址:深圳市南山區南海大道3688號 (顯示地圖)
交通:地鐵1號線僑城東站A出口
開放時間:24小時

 

深圳地鐵景點|萬象天地

萬象天地
@kamfun.kwok

2017年9月開幕嘅萬象天地,集多間文青cafe、人氣網紅店、美食、購物商場於一身,有成300間店舖,加埋上年12月開幕嘅首間深圳誠品旗艦店,夠你玩足一日呀!而最正嘅打卡位當然係正門標誌性嘅設計,大象藝術裝置「Bubblecoat Elephant」啦。提提大家,好多人都將萬象天地同羅湖區嘅萬象城搞錯錯,記得唔好去錯地方喇!

 

萬象天地
地址:深圳市南山區深南大道9668號 (顯示地圖)
交通:地鐵1號線高新園站A出口
開放時間:10:00 – 22:30

 

深圳地鐵景點|深業上城

深業上城
@janwww

深業上城上年先至開幕,已經迅速成為網紅商場。商場有超過300個品牌,劃分為生活體驗街、最啱打卡嘅Loft小鎮、時尚購物街等,室外室內都有舖頭,最多人留意嘅一定係全球首家無印直營MUJI Hotel!而整個商場可以話處處都係影相位,大家要預返啲時間慢慢影相喇。

 

深業上城
地址:深圳市福田區皇崗路5001號 (顯示地圖)
交通:地鐵3號線蓮花村站
開放時間:10:00 – 22:00

 

📖延伸閱讀:【深圳過夜】高顏值高CP—嚴選6大深圳機場酒店!連最新深圳地鐵遊玩文青秘點推介!
📖延伸閱讀:【深圳火鍋】深圳打邊爐餐廳推薦 (各大熱門深圳商場大比併)
📖延伸閱讀:【深圳酒店邊間好】深圳酒店邊際泳池大評選!5大深圳靚酒店推介2019!
📖延伸閱讀:【深圳美食攻略】編輯私藏隱世美食!深圳酸菜魚餐廳環境、味道、價格大評比!
📖延伸閱讀:【深圳必食】編輯私心推 — 隱世深圳牛肉火鍋餐廳連必食部位推薦!

 

Hotels.com酒店優惠Hotels.com酒店優惠