定期送上世界各地最新、最地道嘅旅遊資訊!

【深圳美食攻略】編輯私藏隱世美食!深圳酸菜魚餐廳環境、味道、價格大評比!

而家好多香港人都會經常去深圳玩返一兩日,但係上親去都係海底撈、探魚、喜茶,食得多都厭。而今期流行,就一定係酸菜魚嘅天下。酸菜魚原本只屬川菜館其中一道菜品,但近年喺深圳就開設咗大大小小以酸菜魚為主打嘅餐廳,可見佢嘅受歡迎程度。等小編介紹近期最多好評最受歡迎嘅5間深圳酸菜魚俾大家,鍾意食酸辣嘅朋友一定唔可以錯過呢個新版深圳美食攻略

 

📖延伸閱讀:【深圳火鍋】深圳打邊爐餐廳推薦 (各大熱門深圳商場大比併)

 

深圳酸菜魚|太二酸菜魚

太二酸菜魚
@venus_foodholic

太二酸菜魚絕對係大家最熟悉嘅酸菜魚餐廳,聲稱只做全宇宙第二好食嘅酸菜魚,太二更有多條「霸王條款」,不能自選辣度或酸度,4人以上絕不招待,唔做外賣,但依然吸引咗唔少人去排隊,閒閒哋要排幾個鐘,小編就試過要等4個鐘喇。最多香港人去嘅要數位於金光華嘅分店,喺羅湖過去只係搭一個站地鐵就到。

太二酸菜魚_2
@vickylauvickylau

餐廳行簡約型格嘅路線,光線較暗,餐具以白色為主,有不少漫畫圖講述「霸王條款」,貫徹其有性格嘅定位。

太二酸菜魚_3
@dinnerconnoiseur

號稱酸菜比魚好食,好多去過嘅人都同意佢哋嘅酸菜炒得好香好夠味。酸菜醃製時間近一個月,每間太二專營店都會劃分出一個區域專門做酸菜醃製區,可見佢對酸菜嘅重視程度。主打嘅老壇子酸菜魚,魚肉係用鱸魚,全部無骨非常滑。魚肉切得夠薄,輕輕一煮就非常入味,最後會喺魚上灑上菊花瓣,酸辣之中帶有芳香。餐廳內亦有介紹如何正確地食酸菜魚,先盛湯食魚,然後配白飯食酸菜,最後飲埋啲湯,咁就為之完美喇。

 

太二酸菜魚(金光華店)
地址:人民南路2028號金光華廣場6樓 (顯示地圖)
交通:地鐵1號線國貿站B出口
營業時間:11am-9pm
價錢:酸菜魚2人份¥108, 3-4人份¥178, 土豪份¥238

 

深圳酸菜魚|祿鼎記

祿鼎記
@yyi823

祿鼎記同太二均被稱為深圳最好食嘅酸菜魚,同樣係每一間分店都大排長龍。祿鼎記人氣真係唔講得笑,雖然下午5時30分先開始營業,但係如果想第一輪用餐,一定要5點半前到達攞飛等位,特別係假日。品牌於廣州起家,被譽為廣州最好味酸菜魚,據聞老闆好喜歡《鹿鼎記》,因此咁樣命名店名,發展到深圳而家都有幾間分店。

祿鼎記
@delishcindy

強調油只會用一次,辣度同樣係唔可以調整,不過好多人都話符合廣東人口味,屬於容易入口嘅類型。食得出魚肉好新鮮,肉質結實鮮美,入口嫩滑,店員亦非常親切有禮,難怪長期大排長龍。

祿鼎記_3
@narousngai

餐廳以紅、白色為主調,採用財神作為標誌,餐牌、店內都有唔少財神像,上菜時仲會聽到店員講恭喜發財,無論無裝修定氣氛嘅感覺都非常喜慶㗎。

祿鼎記_4
@snapxxsnap

店面面積頗大,座位一部分係梳化位、細枱為主,另外有幾張長枱,人多嘅時候就開始要拼桌,同旁邊客人距離有啲太近,感覺冇咁舒服。廚房係開放式嘅,可以見到拋鍋、熬湯嘅情況。

祿鼎記_5
@mandy_jiro

祿鼎記會為每位食客奉上八寶茶,裡面有杞子、紅棗、桂花等。店員會用長嘴茶壺泡茶,訓練有素,好專業。

 

祿鼎記(來福士店)
地址:南海大道2163號來福士廣場5樓01號 (顯示地圖)
交通:地鐵2號線登良站D出口
營業時間:(星期一至五)11:30am-3pm,5:30pm-10pm、(星期六日)11:30am-10pm
價錢:¥48/條,約一斤,點菜兩斤起

 

深圳酸菜魚|姚酸菜魚

姚酸菜魚
@yuirene

呢到嘅酸菜魚,係可以飲嘅酸菜魚!食魚前飲碗熱湯係呢到嘅規矩。每份魚都會加入以雞骨同豬骨熬成嘅濃湯,加上秘製酸菜,飲落酸酸甜甜的,唔會太辣,非常開胃!一份酸菜魚,必須放足三種辣椒及三種花椒一齊炒,再將辣椒油快速淋到魚肉表面,緊緊鎖住鮮甜嘅肉質。

魚只有兩種選擇:西貢芭莎魚或鱸魚。小編推薦你芭莎魚!每隔兩日就會由越南湄公河運過嚟,標準嘅進口貨!魚肉又大件又厚身,細骨唔多,食落都好嫩滑有彈性,亦冇腥味,滑嫩的魚肉配合醃製90日嘅黃金酸菜,簡直係最佳CP!

姚酸菜魚_2
@new.rushi.net/

店舖用上Tiffany Blue為主色調,唔講都睇唔出係川菜店,一邊食魚一邊影靚相,滿足女孩子們嘅少女心。好味嘅酸菜魚加上浪漫環境,已經喺吃貨圈迅速走紅啦!相比太二,呢間就唔需要瘋狂等位,冇耐性排隊嘅不妨試試姚酸菜魚,相信質素都唔會令你失望。

 

姚酸菜魚(Coco Park店)
地址:福田區福華三路福田星河cocopark商場三樓L3C-002a號商鋪 (顯示地圖)
交通:地鐵購物公園站G出口
營業時間:周一到周五11:00-14:00,17:00-21:30;周六周日11:00-21:30
價錢:酸菜魚小份¥98,中份¥128,大份¥189

 

深圳酸菜魚|漁語魚酸菜魚專門店

漁語魚酸菜魚專門店
@kateyanyan

漁語魚嘅餐牌有別於其他酸菜魚品牌,唔只有魚食,菜品選擇比較豐富,皆因當初創立時其實係川菜品牌,後來先轉型主打酸菜魚,所以保留咗部份菜單。酸菜魚分原味、麻辣,即使平時唔食辣嘅朋友仔都可以一試。另外有唔少川菜餐點選擇,較為多樣化,照顧到唔食魚嘅朋友,係佢嘅優勝之處。

漁語魚酸菜魚專門店_2
@shing.wong

小編去咗皇庭廣場嘅分店,位置頗多,仲有線上訂位功能,非常方便。

 

漁語魚酸菜魚專門店(皇庭廣場店)
地址:福華3路118號皇庭廣場L1層 (顯示地圖)
交通:地鐵會展中心站C出口
營業時間:星期一至日11:00am – 9:30pm
價錢:酸菜魚小份¥98,大份¥158

 

深圳酸菜魚|鱘龍記酸菜魚

鱘龍記酸菜魚
@mr_mrs.food

鱘龍記原本只有一間舖喺寶安區,最出名就係用鱘龍魚嚟做酸菜魚,曾經喺網上被稱為寶安川菜榜之首,不過因為太遠所以好多人都唔會過去試。最近呢間熱店喺福田區車公廟開咗新分店,距離地鐵車公廟站不遠,旁邊就是譚鴨血老火鍋,位置完全適合香港人。

鱘龍記號稱係現點現撈,酸菜、辣椒、蒜等都係老壇子私家醃製。而最吸引嘅係佢哋會將辣椒同炸蒜粒一齊炒,出味之後先淋上鱘龍魚上面,令到鱘龍魚十分香口。湯底濃稠,以蔥花點綴,不至於泛油,適合廣東人口味,微辣幾乎冇麻辣。而魚都切得很薄身,肉質滑嫩,不過就較難用筷子夾起。

另外,鱘龍記亦有其他受歡迎嘅川菜,好似麻辣牛肉、香辣蝦同口水雞等,都好適合愛辣之人。

鱘龍記酸菜魚_2
@大眾點評

車公廟店的裝修很有中國風,店面以紅、木色為主調,企理簡約。入面空間感唔錯,大部份係卡位,另設有三間房,建議提前預約。

餐牌主打魚類,鱘龍魚、鱸魚、鯇魚,定價每份RMB¥128/ 118/ 98,由客人自選,除咗最受歡迎嘅酸菜煮法,亦可以選擇水煮或烤魚,自由度大。

 

鱘龍記酸菜魚(車公廟店)
地址:泰然六路泰然工業園213棟1B-1 (顯示地圖)
交通:地鐵車公廟站C出口
營業時間:星期一至日11:00 – 14:00, 17:00 – 23:00
價錢:鱘龍魚¥128、鱸魚¥118、鯇魚¥98

 

📖延伸閱讀:【香港宵夜推介】勁抵食!尖沙咀宵夜自助餐廳 +必食Item懶人包!
📖延伸閱讀:【香港米芝蓮2019】好食又抵食!香港米芝蓮三星餐廳推介大全 (500蚊有找!)
📖延伸閱讀:【情人節靚景餐廳】Top 10香港浪漫餐廳大全 (情人節大餐 + 約會指南)
📖延伸閱讀:【深圳過夜】高顏值高CP—嚴選6大深圳機場酒店!連最新深圳地鐵遊玩文青秘點推介!

 

Hotels.com酒店優惠Hotels.com酒店優惠