定期送上世界各地最新、最地道嘅旅遊資訊!

【深圳必食】編輯私心推 — 隱世深圳牛肉火鍋餐廳連必食部位推薦!

 

深圳牛肉火鍋
@meituan

去深圳搵食,好多香港人已經習以為常。深圳地方大,餐廳食店選擇多得嚟又平。講到近年人氣深圳必食必定有潮汕牛肉火鍋份,想喺香港食到新鮮牛肉,選擇真係少之有少,而且又貴好多,難怪咁多人衝去食深圳牛肉火鍋!不過好多人都淨係識得去八合里、潮汕大目、海銀海記等等!今次小編會私心推介另外5間深圳牛肉火鍋連必食部位推薦,俾大家有多幾個選擇揀啦!

 

📖延伸閱讀:【深圳美食攻略】編輯私藏隱世美食!深圳酸菜魚餐廳環境、味道、價格大評比!

 

深圳必食|深圳牛肉火鍋餐廳|幸運牛小黃牛火鍋

幸運牛小黃牛火鍋
@mr_mrs.food

幸運牛小黃牛火鍋裝修走簡單簡約路線,好多傢私都以白色為主。幸運牛用嘅牛同樣係雲貴高原嘅小黃牛現切現食,保證新鮮!小編認為食牛肉火鍋湯底最緊要清先食到牛嘅原汁原味,幸運牛嘅清湯底係牛骨湯,湯底加入咗粟米去熬煮,令到湯頭特別鮮甜,我可以係烚牛肉之前,先喺碗加啲唐芹粒再加湯一齊飲,即刻好開胃呀!

幸運牛小黃牛火鍋
@getreadyhk

喺幸運牛,五花趾係必點嘅部位,即係金錢𦟌,肥瘦適中,烚上6秒就食得,鮮嫩而有嚼頭,可惜每枱只可以點一份。呢間店仲有個特色就係有串燒食,當中要試吓香烤牛脆骨,牛脆骨串的有肥有瘦,非常香口!

 

幸運牛小黃牛火鍋 (海岸城店)
地址:深圳文心五路海岸城西座2樓 (顯示地圖)
營業時間:11:00am – 12:00am

 

深圳必食|深圳牛肉火鍋餐廳|頂真牛肉潮式火鍋

頂真牛肉潮式火鍋
@dianping

頂真牛肉潮式火鍋開咗業都只係3年左右,店內嘅裝修時尚年輕,以黃同橙系色調為主,而且店內嘅環境都十分衛生,感覺舒適現代而有活力。

頂真牛肉潮式火鍋
@yee_anita

頂真牛肉潮式火鍋所採用嘅係雲貴高原土黃牛,由宰牛到運送到餐廳都只係少於三個鐘,保證牛肉新鮮!而頂真所選用嘅牛齡都會係偏小,所以肉質食落會特別細緻嫩滑!餐廳堅持每日用五個鐘去熬煮牛骨牛腩湯底,湯底非常清甜,好適合食牛肉火鍋。

頂真牛肉潮式火鍋_3
@sohu

牛肉方面,有好多牛嘅不同部位選擇,有吊龍伴、五花趾匙仁等,不過特別想同大家推介呢間火鍋店嘅吊龍伴,即係肉眼邊緣部分,只係佔牛嘅1%,只需要烚10秒就食得。由於呢個部份油脂比較多,所以入口甘白嫩滑,令人想一食再食!另外要推介嘅食物,就係即叫即炸嘅腐竹,吸湯能力非常好,而且豆香味十足,絕對係牛肉以外嘅必點食物呀!

 

頂真牛肉潮式火鍋(文創店)
地址:香蜜湖香梅北路2003號特發文創廣場L109-110號 (1979正對面) (顯示地圖)
營業時間:11:00am – 00:00am

 

深圳必食|深圳牛肉火鍋餐廳|原牛道牛肉店

原牛道牛肉店
@cheukeatout

原牛道牛肉店由2016年創立,係北京、深圳、成都都有分店,單單係深圳都已經有4間分店,而每一間分店嘅裝修風格都好一致。原牛道以淡淡田園城市牧場風格為主題,再加入附有復古文藝情調嘅傢俱,例如復古味濃嘅牛皮梳化、深棕色實木櫈同牆身等,裝潢別具一格!

原牛道牛肉店
@kknews

原牛道,指新鮮的牛肉。每日由川黔地區精選嘅新鮮小黃牛運送到深圳,現點現切,確保為每位客人送上新鮮牛肉!原牛道亦以傳統牛肉新門派為核心價值,有提供各種傳統牛肉火鍋應有嘅牛肉不同部位之外,原牛道亦有啲創新嘅菜式,例如松茸牛肉丸,雖然價錢唔平(RMB9一粒),但係松茸係珍貴食材,有抗癌同滋陰補陽等營養價值,而且食落爽口彈牙又多汁,仲會食到一粒粒松茸粒,好味又有特色,絕對價得一試呀!

 

原牛道牛肉店
地址:深圳科技中三路海王銀河大廈二樓 (顯示地圖)
營業時間:11:30am – 9:30pm

 

深圳必食|深圳牛肉火鍋餐廳|解牛派汕頭功夫牛肉火鍋

解牛派汕頭功夫牛肉火鍋
@freewechat

解牛派汕頭功夫牛肉火鍋喺深圳暫時只有一間店,鋪面亦唔算好大,裝修走舒適木系風格。雖然呢間解牛派看似平平無奇冇咩特別嘅火鍋店,但係其實好多當地人同汕頭人都讚呢間牛肉火鍋店嘅牛肉質素好,味道超正宗!

解牛派汕頭功夫牛肉火鍋
@feewechat

去到解牛派汕頭功夫牛肉火鍋,有幾個部位係必點:例如匙柄,即係肩胛小排部位,中間有一條明顯嘅肉筋紋路,食落肉質較柔軟,肉筋又超彈;另外推介部位就係至尊雪花同胸口朥,即係牛前胸肉部位的一塊脂肪,食落爽脆。有好多間嘅牛肉火鍋都有胸口朥,不過唔係間間嘅胸口朥都有爽脆嘅口感,不過呢間刀功一流,質量好好,可以放心食!呢度有提供潮汕特製辣椒醬,帶點甜味,係必試呀!

 

解牛派汕頭功夫牛肉火鍋
地址:深圳市南山區南頭街道常興廣場1-2號  (顯示地圖)
營業時間:11:00am – 11:00pm

 

深圳必食|深圳牛肉火鍋餐廳|大牛火鍋

大牛火鍋
@myuloo

大牛火鍋店開業短短一年多,已經接連開咗14間店,出名品質一流。佢哋選用嘅係秦川黃牛,肉質鮮美、細嫩,含有人體所需脂肪酸,被譽為牛中瑰寶,好巴閉!每日都會運送新鮮牛到深圳,保證新鮮不過夜!

大牛火鍋_2
@myuloo

大牛火鍋店嘅招牌必點係頂級雪花牛肉,雪花細膩,嫩滑得嚟又不失牛味同油甘味,非常值得一試!另外,店內有多達20種醬料供選擇,如紅沙茶醬、青沙茶醬、甜沙茶醬、自製豆瓣醬等,簡直可以滿足到唔同人嘅口味呀

 

大牛火鍋
地址:紅荔西路7018號凱旋豪庭裙樓102127商舖 (顯示地圖)
營業時間:11:00am – 2:00am

 

📖延伸閱讀:【深圳火鍋】深圳打邊爐餐廳推薦 (各大熱門深圳商場大比併)
📖延伸閱讀:【深圳酒店邊間好】深圳酒店邊際泳池大評選!5大深圳靚酒店推介2019!
📖延伸閱讀:【上海好去處】上海文青必到打卡位!6間型格上海cafe連文青住宿推薦!
📖延伸閱讀:【上海酒吧推薦】遊走於上海弄堂間—六大上海新天地、田子坊潮聖打卡點!

 

Hotels.com酒店優惠Hotels.com酒店優惠