定期送上世界各地最新、最地道嘅旅遊資訊!

【波羅的海自由行】10日畢業旅行 — 波羅的海三小國遊記 + 行程攻略大全!

中世紀童話國度「波羅的海三小國」擁有大片寧靜森林、世上最潔淨空氣,既有歐洲典型嘅小鎮浪漫,亦遺下前蘇聯時代嘅詭譎神祕。波羅的海自由行配套完善,物價更稍低於香港。跟著我哋嘅波羅的海三小國遊記,10日玩轉愛沙尼亞立陶宛拉脫維亞,實地搜羅期間限定深度觀光體驗,附行程攻略大全。

 

📖延伸閱讀:【歐洲上網卡推介】歐洲電話卡大評比2018!邊隻歐洲Sim Card最抵?!
📖延伸閱讀:【Grad Trip好去處】地上最強Grad Trip歐洲攻略!東歐 + 西歐 + 南歐 + 北歐遊玩路線大全!

 

波羅的海三小國自由行|探索中世紀童話國度

波羅的海三小國自由行

合稱波羅的海三小國嘅愛沙尼亞立陶宛拉脫維亞,地理上位於東歐以北,與俄羅斯波蘭等國家接壤,但生活文化更為靠近對岸嘅傳統北歐國家,民風純樸、治安良好、英語通行,加上未被大量觀光團旅客湧入,屬理想嘅自由行目的地。喺舊城區附近穿梭遊走,短短幾日可以一睹宏偉嘅古老教堂、感受中世紀小鎮風情、飽覽森林自然風光、尋訪二戰歷史軌跡。

 

波羅的海三小國自由行|建議行程總覽
愛沙尼亞首都塔林 (2日) > 愛沙尼亞Rakvere Castle (1日) > 愛沙尼亞Lahemaa National Park (1日) > 愛沙尼亞邊境Värska (2日) > 拉脫維亞首都里加 (2日) > 立陶宛首都維爾紐斯 (2日)

 

波羅的海三小國自由行|出發前準備貼士
機票|國際航班轉機須知

國際航班轉機須知
@אלי שני.
由香港出發可乘搭芬蘭航空直達赫爾辛基

目前香港並無直航來往波羅的海國家,但可經由芬蘭、俄羅斯或波蘭等國家前往,並有多種交通工具選擇。假設以愛沙尼亞為行程第一站,就可由香港乘搭直航往芬蘭赫爾辛基或德國法蘭克福,再轉機到愛沙尼亞首都塔林。

另外,赫爾辛基亦有渡輪橫跨波羅的海,約30分鐘可抵達塔林,單程票價約300至400港元。如果咁啱搶到特價機票,亦可考慮經多哈、慕尼黑等城市轉機到赫爾辛基,先遊芬蘭,再遊塔林。至於喺俄羅斯聖彼得堡及波蘭華沙,分別亦有巴士、火車來往三小國,如果有意一併遊覽納入行程,建議訂機票時揀定multi city回程航班。

 

波羅的海三小國自由行|出發前準備貼士
當地交通|遊客優惠套票

遊客優惠套票
@Pjotr Mahhonin
「Bussijaam」係愛沙尼亞語嘅 bus station

跨境巴士係來往波羅的三小國最主要交通工具,由一國前往另一國,大約需4至5個鐘巴士車程,巴士服務由Lux Express同Ecolines兩間公司營運,單程車票約港幣60至80元,提早網上購票可享早鳥優惠。三小國均屬歐盟神根公約地區,持香港護照可免簽證入境,但旅客乘搭跨境巴士時,或需被檢查旅遊證件。

至於三小國首都市內,多數設有遊客優惠套票,例如愛沙尼亞就有Tallinn Card,包含40個主要景點入場門票、限時內無限次乘搭主要公共交通工具。至於套票抵唔抵,就視乎旅客對長時間步行嘅接受程度、行程安排、停留日數,因為三小國景點位置集中,大部份行程可以靠步行應付。

 

波羅的海自由行|出發前準備貼士
行程計劃|地道Walking tour
想用最短時間、最深入咁遊覽哂熱門景點,就要參加當地Walking tour,通常由城市嘅舊城區市政廳出發,唔需要交報名費,鼓勵遊客自發打賞。只要上網搜尋Walking tour就可以搵到詳情,大部份酒店、旅館亦會提供相關資訊同城市地圖。

 

波羅的海自由行|出發前準備及貼士
國際學生證|申請手續及使用須知
學生Grad Trip歐遊,如果有張國際學生證(ISIC)旁身,購買博物館門券、車票通常都有低至半價優惠。特別去到波羅的海,單憑出示香港學生證一般唔受理。ISIC每張申請費用為100港元,郵寄申請需預7天處理,親身辦理可即日取證。出發前記住睇清楚點申請啦!

 

波羅的海三小國自由行|第一日
愛沙尼亞首都塔林舊城區 (Tallinn)

愛沙尼亞首都塔林舊城區 (Tallinn)
@travelinestonia

愛沙尼亞全國面積約為4萬多平方公里,相等40幾個香港,當中有47%都係森林,擁有世上最潔淨空氣。愛沙尼亞亦係來頭唔惹小嘅科技巨頭,大家常用嘅Skype,就係由愛沙尼亞人創辦!首都塔林被譽為係歐洲現存最完整嘅中世紀城市,舊城區分為上城區、下城區,各種奇趣怪誕嘅中世紀黑魔法、古老傳說等待大家去發掘。

塔林舊城區車仔檔擺賣「炒杏仁」
塔林舊城區車仔檔擺賣「炒杏仁」

據傳當地著名小食「炒杏仁」就係世上唯一能夠治癒情傷嘅靈藥。愛沙尼亞旅遊發展完善,亦係三小國旅遊核心地帶,推薦可以預留2至3日遊覽塔林。

 

波羅的海三小國自由行|第一日
愛沙尼亞首都塔林舊城區 | 塔林市政廳廣場

塔林市政廳廣場
由塔林市政廳廣場行去主要景點非常方便

喺塔林舊城區內,由市政廳廣場步行往亞歷山大‧涅夫斯基大教堂、瑞典之門等多個著名地標只需約10分鐘,最快大半日可以快速行一轉上城區、下城區,然後可以從中再揀幾個景點、博物館慢慢深入參觀。

 

塔林市政廳廣場
地址:Raekoja plats 1, 10114 Tallinn (顯示地圖)
交通:A. Laikmaa巴士站
營業時間:24小時
入場費用 (只供參考):免費

 

波羅的海三小國自由行|第一日
愛沙尼亞首都塔林舊城區 | 大基爾特之屋(Lielā ģilde)

大基爾特之屋(Lielā ģilde)
@mmmjas

特別推薦市政廳廣場旁邊嘅大基爾特之屋,外表平平無奇,但放滿奇趣互動展品,由愛沙尼亞民族起源講起,令你認識中世紀黑暗時代,顛覆你對博物館嘅悶蛋印象!

 

大基爾特之屋
地址:Pikk 16, 10123 Tallinn (顯示地圖)
交通:舊城區塔林市政廳廣場旁 ※星期一休館
營業時間10:00 – 18:00
入場費用 (只供參考):成人 €8.00學生及小童 €6.00
網址https://www.ajaloomuuseum.ee/visiting/buildings/great-guild-hall

 

波羅的海三小國自由行|第二日
愛沙尼亞首都塔林舊城區 | Vabamu Museum of Occupations and Freedom

Vabamu Museum of Occupations and Freedom
Vabamu Museum of Occupations and Freedom

喺一片純樸寧靜嘅氛圍背後,設於舊城區外圍嘅Vabamu Museum of Occupations and Freedom 充滿神秘戰爭歷史色彩,館內設多個重大戰爭展覽,揭示二戰時期前蘇聯同納粹德國嘅軍事角力,軍事迷、歷史愛好者切勿錯過。

 

Vabamu Museum of Occupations and Freedom
地址:Toompea 8, 10142 Tallinn (顯示地圖)
交通:Tõnismägi巴士站
營業時間:11:00 – 18:00 ※星期一休館
入場費用 (只供參考):成人 €11.00;學生及小童 €6.00
網址:https://www.vabamu.ee/en/

 

波羅的海三小國自由行|第二日
愛沙尼亞首都塔林舊城區 | KUMU藝術館

KUMU藝術館
@Pinterest

如果想更立體了解愛沙尼亞民族,可以乘搭輕軌電車去KUMU藝術館,從愛沙尼亞傳統風格畫像以至現代盞鬼漫畫,側面了解當地人嘅生活同內心世界。

 

KUMU藝術館
地址:A. Weizenbergi 34, 10127 Tallinn (顯示地圖)
交通:Kadriorg輕軌電車站
營業時間:10:00 – 18:00 ※星期一休館
入場費用 (只供參考):成人 €8.00;學生及小童 €6.00
網址:https://kumu.ekm.ee/en/

 

波羅的海三小國自由行|愛沙尼亞餐廳推薦 | Kuldse notsu kõrts

Kuldse notsu kõrts
@b4_8

愛沙尼亞飲食文化受瑞典、芬蘭、俄羅斯影響,以肉類及馬鈴薯為主食,Kuldse notsu kõrts係當地一間有名嘅餐廳,烤豬係佢哋嘅招牌菜,嚟到當然要試吓啦!

Kuldse notsu kõrts_2
@oldfashionfed
愛沙尼亞烤豬腿配薯仔及酸椰菜

Kuldse notsu kõrts_2
@bluejays71
愛沙尼亞Black Bread配大蒜及sour cream

 

Kuldse notsu kõrts餐廳
地址:Dunkri 8, 10123 Tallinn (顯示地圖)
交通:A. Laikmaa巴士站/塔林市政廳旁邊
營業時間 (只供參考):07:30-10:00;12:00-23:00

 

波羅的海三小國自由行|愛沙尼亞餐廳推薦 | III Draakon

III Draakon
@marydovgalenko

III Draakon位於愛沙尼亞首都塔林市政廳1樓,餐廳充滿中世紀感覺,好有feel!

III Draakon_2
@tucotuti

喺呢度人人都只會叫一款招牌菜,就係用傳統陶碗盛載嘅麋鹿湯(Elkmeat soup)喇!餐廳仲會跟足傳統,配上自製肉餡餅,風味十足。

III Draakon_3
@wisebaby.tw

愛沙尼亞係合法狩獵嘅歐盟國家,而Elkmeat soup熱湯就係當地家傳戶曉嘅wild game recipe,睇落貌似港人俗稱嘅紅湯,不過傳統製法會加入麋鹿肉。

 

III Draakon
地址:Raekoja plats 1, 10146 Tallinn (顯示地圖)
交通:A. Laikmaa巴士站/塔林市政廳旁邊
營業時間 (只供參考):09:00 – 23:00

 

波羅的海三小國自由行|第三日
愛沙尼亞達拉克韋雷 |  古堡遺址 Rakvere Castle

古堡遺址 Rakvere Castle
@tony_tony_mm

想進一步體驗中世紀騎士生活,由塔林往北出發,到拉克韋雷就可以親睹有達800多年歷史嘅古堡遺址Rakvere Castle。

古堡遺址 Rakvere Castle_2
@Centauri63

Rakvere Castle曾被丹麥、瑞典、波蘭佔領,歷盡炮火摧殘但幸保留下古堡主要結構,現改建為小型樂園,有射箭、劍擊等活動,有巫師示範炮製魔法草藥,城堡入面仲養咗好多羊仔!

古堡遺址 Rakvere Castle_3
@catherei_

Rakvere Castle以小型規模經營,入場客主要係當地家庭。一般遊客可以喺塔林參加由當地旅行社開辦嘅一日遊,多數包含交通接送服務,或自行由塔林Tallinna bussijaam乘搭巴士,約一個半鐘可到達。當地巴士服務班次比較疏落,建議出發前先查清楚巴士時間表。

 

Rakvere Castle
地址:Vallimägi, Rakvere, 44307 Lääne-Viru maakond (顯示地圖)
交通:Teater巴士站步行7分鐘
營業時間:星期三至星期日10:00 – 16:00
入場費用 (只供參考):成人 €9.00;學生及小童 €7.00
網址:http://www.rakverelinnus.ee/en

 

波羅的海三小國自由行|第四日
愛沙尼亞一日導賞團 | Lahemaa National Park

Lahemaa National Park
@Aleksandr Abrosimov
藍天、樹影、白雲,係愛沙尼亞具代表性景物,亦係國旗顏色

愛沙尼亞壓軸一站,點少得享受原野森林嘅自然風光,呼吸世上最清新空氣,伸手追逐波羅的海嘅浪花!Lahemaa National Park森林覆蓋率超過70%,有鹿、野豬、棕熊、狐狸等多種動物居住,樹木生長至幾層樓高。

Lahemaa National Park
@simonsnopek

唔小心走入風景如畫嘅沼澤、懸崖、森林更可能隨時盪失路,建議參加當地一日導賞團,由導遊帶領前往。

 

Lahemaa National Park
地址:Viitna | Laane-Virumaa, Vihula 2128, Estonia (顯示地圖)
交通:建議參加當地一日團
營業時間:24 小時
入場費用 (只供參考):免費
網址:https://www.visitestonia.com/en/lahemaa-national-park-and-information-point

 

波羅的海三小國自由行|第五六日
愛沙尼亞邊境小鎮 | Seto原著民聚居地Värska

遇上Seto Folk節慶可以喺森林入邊chill返一日

東南部小鎮Värska係Seto原著民聚居地,由塔林Tallinna bussijaam乘搭巴士約4小時可到達。每年6月最後一個週末,森林裏面都會舉行大型節慶活動Seto Folk,有跳舞、大型音樂會、手作市集,可以話係啱啱好撞正Grad trip期間先有機會遇上嘅限定觀光體驗!

Seto原著民聚居地Värska_2

不過要買到Seto Folk門票唔容易,網上有平台供來自芬蘭、三小國嘅遊客購票。其他旅客只能去到當地旅行社或遊客中心碰運氣,或提早經網上向大會查詢購票詳情。不過,即使買唔到活動門票,都可以參觀Värska嘅Seto博物館。

Seto原著民聚居地Värska_3
手作市集包羅萬有,例如織布、打鐵、木工

 

Seto Farm Museum/Setomaa Tourist Information
地址:12 Pikk, Värska, 64001 Võru maakond (顯示地圖)
交通:Värska巴士站
營業時間:10:00 – 16:30  ※星期六、日、一休館
入場費用 (只供參考):成人 €5.00;學生 €2.00;小童免費
網址:https://www.visitsetomaa.ee/en

 

波羅的海三小國自由行 | 愛沙尼亞酒店推介 | 安格勒特雷公寓

安格勒特雷公寓

愛沙尼亞舊城區有唔少北歐風格民宿,多人共用房間每晚床價低至約60至70港幣。當然,如果預算充足而且行李較多,入住公寓或酒店就最方便。歐洲唔少旅館由老建築改建,只有樓梯,如有需要,訂房前要問清楚有無電梯。至於冷氣方面就唔駛擔心,三小國踏入夏季後天氣仍然清爽涼快,完全無開冷氣嘅需要。

安格勒特雷公寓_2

位於塔林舊城區內嘅安格勒特雷公寓,步行前往塔林市政廳、海事博物館、胖瑪格麗特塔等觀光點,都喺10分鐘步程內,而且房價水平同香港普通賓館差唔多,夠哂抵住。

 

安格勒特雷公寓
地址:EST塔林Mere Puiestee 8 (顯示地圖)
星級 | ★★★☆☆
位置 | ★★★★★
設施 | ★★★★☆
環境 | ★★★★☆
價格 | 查看價格  

 

波羅的海三小國自由行|第七日
拉脫維亞首都里加舊城區

拉脫維亞首都里加舊城區
@lettersoftravel
里加被稱為「頭頂金雞」城市

拉脫維亞首都里加二戰後展開工業化,為波羅的海地區內最大首都城市,舊城區內嘅黑頭宮係最具代表性地標。里加雖然有唔少地方都曾被二戰炮火徹底炸毀,更令城市氣息添上滄桑感,但里加嘅命運就如黑頭宮門外嘅拉脫維亞諺語所言,「若消失殆盡,必浴火重生」。目前里加市內仍保留咗前蘇聯情報機關KGB嘅遺址,並以原貌保留改為博物館,展覽導賞內容震撼,值得遊覽。

 

波羅的海三小國自由行|第七日
拉脫維亞首都里加舊城區 | 里加中央市集

 里加中央市集
@pimg.tw

由舊城區步行約12分鐘可以到達歷史悠久嘅里加中央市集,市集內售賣各種平靚正嘅地道食材,更有港人喜愛嘅士多啤莉、魚子醬夾餅乾、香腸等。

 

里加中央市集
地址:Nēģu iela 7, Latgales priekšpilsēta, Rīga, LV-1050 (顯示地圖)
交通:Zvejniekciems巴士站
營業時間:07:00 – 18:00
入場費用 (只供參考):免費

 

波羅的海三小國自由行|第七日
拉脫維亞首都里加舊城區 | 黑頭宮

黑頭宮

黑頭宮又名為「黑頭兄弟會館」,塔林黑頭兄弟會組建於1399年,係中世紀波羅的海沿岸一個未婚單身男子嘅商會組織,15世紀時由信奉黑人守護神嘅「黑人頭公會」接手管理。黑頭宮整座建築有哥德式與荷蘭文藝復興風格,但二次大戰時被德國炸為廢墟,現今嘅黑頭宮喺1995-1999年重建,係里加人民嘅心目中,黑頭宮可謂佢哋嘅精神所在。  

 

黑頭宮
地址:Rātslaukums 7, Centra rajons, Rīga, LV-1050拉脫維亞 (顯示地圖)
交通:Grēcinieku iela輕軌電車站
營業時間:11:00 – 18:00
入場費用 (只供參考):€2.00

 

波羅的海三小國自由行|第七日
拉脫維亞首都里加舊城區 | 阿爾伯特街

阿爾伯特街
tom_raider92

附近嘅阿爾伯特街有大量新藝術運動風格建築,將線條圓滑分明嘅大型人體雕塑融入大樓外部支柱,每棟樓房都有人體雕塑作為裝飾,係影相嘅好地方。

阿爾伯特街_2
@varkentin
連樓梯係IG打卡位!

 

阿爾伯特街
地址:Centra rajons, Rīga, LV-1010 (顯示地圖)
交通:Medicīnas muzejs巴士站
營業時間:24小時
入場費用 (只供參考):免費

 

波羅的海三小國自由行|拉脫維亞餐廳推薦 | 餃子專賣店 Pelmeņi XL

餃子專賣店 Pelmeņi XL
@blogspot

餃子專賣店Pelmeņi XL係拉脫維亞著名連鎖快餐店,Pelmeņi XL顧名思義,係專賣俄羅斯餃子(Pelmeņi)嘅餐廳,以快餐自助按重形式收費。

餃子專賣店 Pelmeņi XL_2

100g約六粒嘅餃子只售約港幣$10,認真大件夾抵食!

 

Pelmeņi XL
地址:Kaļķu iela 7, Centra rajons, Rīga, LV-1050 (顯示地圖)
交通:Grēcinieku iela輕軌電車站/由里加市政廳步行約3分鐘
營業時間 (只供參考):09:00 – 23:00

 

波羅的海三小國自由行 |拉脫維亞酒店推介 | 紅鼻子青年旅舍

紅鼻子青年旅舍

紅鼻子青年旅舍位於里加舊城區,喺聖約翰教堂、聖彼得教堂、市政廳隔離,極之方便。而且步行約10分鐘可以到里加中央市場,購買各式各樣特產、平價水果、食物。

 

紅鼻子青年旅舍
地址:EST塔林Mere Puiestee 8 (顯示地圖)
星級 | ★★☆☆☆
位置 | ★★★☆☆
設施 | ★★★☆☆
環境 | ★★★★☆
價格 | 查看價格  

 

波羅的海三小國自由行|第八日
立陶宛首都維爾紐斯 (Vilnius)

立陶宛首都維爾紐斯 (Vilnius)
@intrepidtravel

立陶宛同毗鄰嘅波蘭都係教堂林立,單喺立陶宛首都維爾紐斯,教堂就有超過40座。維爾紐斯舊城區附近有一個自稱為「國中國」嘅「Užupio對岸共和國」,設有「憲法」授予人民自由戀愛權利,自由奔放氣息同恪遵禮教嘅教堂群形成強烈對比。

立陶宛首都維爾紐斯 (Vilnius)_2
Užupio以蒙娜麗莎像為邊界

據指,Užupio喺1997年嘅愚人節由一班藝術家宣布成立,內有藝術畫廊、藝術家工作坊、文青咖啡館,「國民」仲自己設計埋嘅國旗、貨幣、總統、憲法,並曾經成立一支12人「軍隊」。

 

Užupio對岸共和國
地址:Užupio Respublikos konstitucija (顯示地圖)
交通:Vilnios st.巴士站
營業時間:24小時
入場費用 (只供參考):免費

 

波羅的海三小國自由行|第八日
立陶宛首都維爾紐斯 | 聖安妮教堂 (Anne’s Church)

聖安妮教堂 (Anne’s Church)
@r_san_huang

由Užupio步行5分鐘可到珊瑚色嘅聖安妮教堂,據聞靚到連拿破侖都想原幢帶返法國!

聖安妮教堂 (Anne’s Church)_2
經過聖安妮教堂後可以見到Gediminas Tower

聖安妮教堂 (Anne’s Church)_3
從Gediminas Tower小山坡上俯瞰市貌

 

聖安妮教堂
地址:Maironio g. 8, Vilnius 01124 (顯示地圖)
交通:Dailės akademija巴士站/由Užupio步行5分鐘
營業時間:11:00 – 18:00
入場費用 (只供參考):免費

 

Gediminas Tower
地址:Arsenalo g. 3, Vilnius 01143, Lithuania (顯示地圖)
交通:Bernardinų sodas巴士站/由Užupio步行15分鐘
營業時間:10:00 – 18:00
入場費用 (只供參考):成人 €5.00;學生及兒童半價
網址:http://www.vilnius-tourism.lt/en/what-to-see/museums/gediminas-tower-2/

 

波羅的海三小國自由行|立陶宛餐廳推薦 | Forto Dvaras

Forto Dvaras
@sergiiprovotorov

Forto Dvaras係立陶宛好出名嘅連鎖傳統餐廳,唔貴而且餐廳環境氣氛好好,日日都會爆場,所以想去嘅朋友就記得提早去排隊!

Forto Dvaras_2
@Yury_taruts

由馬鈴薯製成嘅立陶宛國家名菜Cepelinai,意思即係飛船。Forto Dvaras餐廳嘅Cepelinai外層口感黏韌,包裹免治豬肉,最啱配搭國民啤酒Svyturys,啤酒除咗有原味,仲有蜂蜜味、百花蜜味任君選擇。

 

Forto Dvaras
地址:Pilies g. 16, Vilnius 01123 (顯示地圖)
交通:由聖安妮教堂步行約3分鐘
營業時間 (只供參考):11:00 – 00:00

 

波羅的海三小國自由行 | 立陶宛酒店推介 | 市中心森林旅館及營地

市中心森林旅館及營地

由市中心森林旅館及營地前往主要景點需步行約15分鐘,綠悠悠環境配上小清新風格房間,可以令人感受片刻寧靜。

市中心森林旅館及營地_2

旅館提供兩人房、四人房、多人房,適合唔同類型旅客。

 

市中心森林旅館及營地
地址:EST塔林Mere Puiestee 8 (顯示地圖)
星級 | ★★☆☆☆
位置 | ★★★☆☆
設施 | ★★★☆☆
環境 | ★★★★☆
價格 | 查看價格  

 

📖延伸閱讀: 【聖彼得堡遊記】7日6夜俄羅斯聖彼得堡自由行景點行程攻略
📖延伸閱讀:【奧地利自由行】音樂‧藝術‧咖啡館—3日2夜慢活維也納景點行程、美食懶人包
📖延伸閱讀:【布拉格自由行】布拉格市內散步地圖連布拉格景點一覽 (布拉格必買小物推介)
📖延伸閱讀:【聖誕去邊度旅行】最強歐洲火車路線!歐洲之星巴黎 – 倫敦 – 布魯塞爾景點懶人包! (連票務行李全攻略)

 

Hotels.com酒店優惠Hotels.com酒店優惠