定期送上世界各地最新、最地道嘅旅遊資訊!

【宮古島自由行】又開新航線!沖繩宮古島景點行程懶人包 (青之洞窟浮潛Q&A)

暑假遊日好消息!2019年7月中將有新航線直航往返沖繩宮古島,機票亦都已經開賣,以後去宮古島自由行或者沖繩自駕遊就方便好多喇!

 

📖延伸閱讀:【去旅行用日本app】超實用!日本旅遊app + 日本交通app推薦

 

宮古島自由行景點推介 | 卡雅法海岸

卡雅法海岸
@ritoucom

宮古島尚有好多未經開發嘅天然海灣,非常適合潛水或者浮潛,位於中之島卡雅法海岸就係其中之一。卡雅法海岸又稱中之島海岸,人工建築非常少,盡量保持佢嘅天然環境,所以呢度海底景色非常優美,珊瑚都可以健康生長,孕育咗多種熱帶魚。卡雅法海岸水流唔會好急,非常適合初學者浮潛或者潛水。宮古島有好多潛水導賞團,唔少都有識得講英文或者普通話嘅潛水教練,所以絕對可以放心參加,由專業教練陪同下,享受喺宮古島潛水嘅樂趣!

 

卡雅法海岸
地址:〒906-0000 沖繩縣宮古島市伊良部佐和田1725 (顯示地圖)

 

宮古島自由行景點推介 | 與那霸前濱海灘

與那霸前濱海灘
@harusa0222

如果純粹想去海灘輕鬆游吓水,曬住太陽chill吓,可以去鄰近市中心同宮古島機場嘅前濱海灘。呢度幼細嘅白沙連綿足足7公里,所以有東洋第一白色海灘嘅美譽。白沙非常軟綿,踩住幼沙慢慢散步都幾寫意㗎,你仲可以望到對出連接本島與來間島嘅跨海大橋。

 

與那霸前濱海灘
地址:沖繩縣宮古島市下地字與那覇1199-1 (顯示地圖)
開放時間:星期一至日 24 小時

 

宮古島週邊景點推介 | 青之洞窟浮潛

青之洞窟浮潛
@seeuaroundtheworld

去完宮古島玩,可以順便搭內陸機飛去沖繩繼續玩。講到沖繩,重頭戲當然係潛水啦!沖繩潛水好去處有好多,但最出名嘅就一定係青之洞窟。去青之洞窟浮潛或者潛水,可以話係水中活動愛好者嚟宮古島旅遊嘅指定動作。青之洞窟又名藍洞,位於沖繩本島北島真榮田岬,係一個喺珊瑚地形上產生嘅海底洞窟。當陽光透射到水底,會反射出迷人又神秘嘅藍色。潛入水底望返上去,可以發現水色會隨住洞窟唔同位置而改變。喺青之洞浮潛,你可以親近野生熱帶魚,近距離欣賞未受破壞嘅珊瑚礁。

 

青之洞窟
地址:〒904-0417 沖縄県国頭郡恩納村真栄田青之洞窟469−1 (顯示地圖)

 

青之洞窟浮潛Q&A
小編為你精選咗一啲去青之洞窟浮潛嘅常見問題,希望可以幫到一眾浮潛初哥!

Q:去青之洞窟浮潛定潛水好呢?
A:浮潛適合初學者,需要用嘅器材較潛水少好多,亦唔需要任何執照就可以參加。潛水就需要經一定程度嘅訓練後,先可以進行,未必適合新手。無論係浮潛定潛水,你都可以欣賞到迷人嘅水底景色,最緊要係量力而為呀!

Q:一年入面,咩日子最啱去青之洞窟浮潛?
A:其實沖繩四季氣候怡人,平均溫度都有23度,所以無論係夏天定冬天,都適合嚟潛水㗎!

Q:點樣揀選潛水團或者教練?
A:首先要揀有信譽嘅本地潛水團公司或者旅行社,要留意佢地有冇所需嘅牌照。揀潛水教練時都一樣要確保佢地係持有潛水牌嘅專業人士呀!不妨上網爬吓文,睇吓其他人對呢啲local tour嘅評價。

 

宮古島美食推介 | 「火神」宮古牛燒肉店

「火神」宮古牛燒肉店
@火神Facebook

宮古牛係宮古島名物之一,而火神就係當地人氣最高嘅烤肉店,晚飯時段如果冇book位,就隨時要等好耐。所以小編建議你喺開門營業前起碼半個鐘就嚟排隊,避開高峰期嘅人潮。宮古牛肉質細嫩,油花均勻,喺烤爐燒一陣立即香氣四溢,簡簡單單配埋飯一齊食,已經好滿足!雖然呢度嘅店員英文未必好好,但呢度有英文menu,唔識日文都可以輕鬆落單。另外,火神附近有停車位,自駕遊都好方便。

 

火神
地址:〒906-0014 沖繩縣宮古島市平良字松原548-1 (顯示地圖)
營業時間:星期一至三、五至日 17:00 – 23:00、星期四休息
網址:http://kagami.okinawa/meat/

 

宮古島美食推介 | 壽司正 (寿し正)

壽司正 (寿し正)
@宮古島網

嚟到日本又點可以唔去地道壽司店,嘆返餐正宗手握壽司呢!「寿し正」係宮古島人氣最高嘅壽司店,裝潢就好似一間居酒屋,拉近咗壽司師傅同食客嘅距離。呢度嘅捧場客唔只有遊客,仲有一眾當地人,店內成日都非常熱鬧。寿し正嘅必點名物就係宮古牛壽司、多款時令魚生壽司,仲有海葡萄、烤魚等沖繩料理。

 

寿し正
地址:沖繩縣宮古島市平良字西里284 (顯示地圖)
營業時間:17:00 – 23:00 不定期休息

 

宮古島自由行住宿推介 | 上野費利斯別墅酒店

上野費利斯別墅酒店
@613maggiemm

上野費利斯別墅酒店鄰近海灘,附近有唔少餐廳,而且呢度嘅客房都非常寬敞,設計簡約舒適,配套設施亦非常完善,等你潛水潛到攰就可以返嚟叉叉電。

上野費利斯別墅酒店_2
@酒店官網

酒店附近有便利店同餐廳,方便補給旅行用品,亦有大量車位,方便自駕遊嘅遊客。

 

上野費利斯別墅酒店
地址:〒906-0015 沖繩縣宮古島市平良久貝1063 (顯示地圖)
星級 | ★★★☆☆  
位置 | ★★☆☆☆  
設施 | ★★★☆☆  
環境 | ★★★★☆  
價格 | 查看價格  

 

宮古島自由行住宿推介 | 布里薩度假村 (Wellness Villa Brisa)

布里薩度假村 (Wellness Villa Brisa)
@酒店Facebook

想完全感受度假感覺,可以入住臨海嘅布里薩度假村。酒店位於宮古島南部一個海灣,從客房露台,你可以望到一大片無敵海景,悠閒咁欣賞宮古島湛藍嘅海洋。

布里薩度假村 (Wellness Villa Brisa)_2
@酒店官網

客房主要係公寓形式,亦都有部份日式房間,設施都夠曬細心,有齊迷你廚房同露台。從酒店行落山坡,就係一個私人沙灘,唔想周圍去,留喺度chill成日都唔錯呀!

 

布里薩度假村
地址:〒906-0203 沖繩縣宮古島市上野宮國746−20 (顯示地圖)
星級 | ★★★★☆  
位置 | ★★★☆☆  
設施 | ★★★★☆  
環境 | ★★★★★  
價格 | 查看價格

 

📖延伸閱讀:【國際通攻略】沖繩國際通美食特集!(必試抵食國際通燒肉店)
📖延伸閱讀:【沖繩自駕遊】沖繩水族館、沖繩浮潛、沖繩潛水套餐懶人包 (含自駕貼士)
📖延伸閱讀:【石垣島自駕遊】沖繩石垣島景點攻略!必試入口即溶石垣牛!
📖延伸閱讀:【沖繩冬天景點】冬天沖繩行程推介—沖繩賞鯨、賞櫻好去處2018

 

Hotels.com酒店優惠Hotels.com酒店優惠