定期送上世界各地最新、最地道嘅旅遊資訊!

【去歐洲必買】西班牙巴塞隆拿哥德區散步+必逛設計師小店!西班牙必買設計師單品 + 古著 + 波鞋!

唔少人去到歐洲都會瘋狂掃名牌,但嚟到西班牙巴塞隆拿呢一個出產咗唔少舉世聞名藝術家,例如畢加索,達利同高第嘅歐洲藝術之都!其實有好多本地品牌同設計師小店更有特色,更能夠帶比大家驚喜!今次就等小編推介幾間位於巴塞隆拿哥德區嘅質感設計師小店,同西班牙必買設計師單品,古著同波鞋比大家!教大家買最特別嘅西班牙手信,仲話埋你知巴塞隆拿必食餐廳!快啲bookmark定以下店鋪同餐廳啦!

 

西班牙必買|哥德區必逛設計師小店|La Talenta

@Facebook

La Talenta係一間將二手舊物,加入店主嘅巧手D.I.Y同修復,令原本已經被遺棄嘅舊物,變成充滿復古味嘅創意產品嘅設計小店!店內嘅貨品應有盡有,傢俬、燈具、太陽眼鏡、飾物、裝飾品等等全部都各具特色!由店鋪嘅擺設同產品,就可以感受到店主係隨性但對生活有品味嘅人!創作大膽,重視原創性同細節!相信比起一式一樣嘅大型連鎖店,La Talenta更容易尋到寶!

 

@Facebook

La Talenta最signature嘅就係粉紅色霓虹燈招牌,令成間店充滿80-90年代嘅風格!即使大家搵唔到心頭好,成間鋪任何一個角落都係影相打卡位,包你一定呃到勁多like!

 

La Talenta
地址:Spanien, Carrer Còdols, 23, 08002 Barcelona, 西班牙 (顯示地圖)

 

西班牙必買|哥德區必逛設計師小店|Mimi Scholer

@mini_scholer

每次去旅行小編最鍾意就係搜羅唔同嘅飾物!好多時襯衫,一對特別嘅耳環,又或者係一條頸鏈,已經可以令成套outfit感覺唔同哂!而Mimi Scholer呢間自家設計嘅手製飾物店,絕對係小編嘅私心推介!Mimi Scholer嘅店主Irina Scholer從事首飾設計超過13年,原本係德國人,後來嚟到巴塞隆拿生活。設計風格揉合唔同嘅文化特色,而且以大自然為靈感,好多首飾都加入天然礦石,非常特別!

 

@mini_scholer

Mini Scholer首飾充滿波希米亞風格,大膽咁採用唔同色調!配上一對誇張少少嘅耳環,已經可以大大提升時尚感!而且每一件首飾都係人手製作,造工精細!大家預返一至兩日時間,仲可以特別訂製首飾㗎!

 

Mimi Scholer
地址:Carrer dels Carders, 6, 08003 Barcelona, 西班牙 (顯示地圖)
營業時間:星期一至六 11:00-20:30

 

西班牙必買|哥德區必逛設計師小店|Holala! Plaza

@OnlyDopeFashion

近年嚟,古著潮流風摩歐美,而巴塞隆拿古著店多不勝數,係歐洲買古著嘅最佳地方!Holala! Plaza就係巴塞隆拿最大型同最有名氣嘅古著店!唔單止有古著,仲有好多懷舊皮具,飾物同家具!最正係價錢唔高,復古迷一定會行到唔捨得走!

 

Holala! Plaza@BarcelonaConnect

Holala! Plaza已經有40年歷史,收集咗好多充滿歐美風格嘅古著,例如牛仔褲、棒球褸、50-60年代嬉皮風格服飾、軍人風格飾品,呢度都可以搵到!就連Madonna、Elton John、Kylie Minogue、Kate Moss等等國際巨星都曾經喺度尋寶㗎!

 

Holala! Plaza
地址:Carrer de Valldonzella, 2, 08001 Barcelona, 西班牙 (顯示地圖)
營業時間:星期一至六 11:00-21:00
網址:http://holala-ibiza.com/

 

西班牙必買|西班牙必買設計師單品|Feners波鞋

@fernersbrand

Feners係巴塞隆拿本地設計嘅帆布鞋品牌。佢哋嘅設計靈感主要來自地中海風情,著重悠閒同優雅嘅感覺,所以設計嘅用色都以素色同柔和為主,非常百搭!Feners呢個牌子喺2016年先至成立,勝在設計親民得嚟夠時尚,而且用料高級,穿著非常舒適,所以好受當地人歡迎!短短成立咗兩年時間,今年就預備進攻國際市場啦!去到西班牙一定要買!

@ferners

除咗帆布鞋,小編最欣賞嘅係男裝系列嘅皮鞋!休閒波鞋款色,但用真皮裝作,成件事高級哂!而且鞋墊用咗記憶棉,所以著起嚟柔軟舒服!無論係男士定女士,都對Feners嘅鞋愛不惜手!

 

西班牙必買|西班牙必買設計師單品|Oysho內衣

@Oysho

Oysho係西班牙嘅知名內衣同家居服品牌,主打甜美性感嘅風格。佢地嘅設計大多採用蕾絲,印花圖騰同繡花,無論係年輕定成熟嘅女性,都一定搵到適合自己風格嘅內衣!最重要係用咗優質亞麻同天然棉嘅面料!咁貼身嘅衣著,除咗靚,就梗係要舒適啦!其實女士揀貼身衣物嘅時候都一定會好高要求,但想買到又靚又舒服嘅內衣,價錢真係唔平!呢個品牌就做到高質,但價錢大眾化!西班牙必買之選!

 

@Oysho

Oysho除咗有內衣同家居服,就連運動服同泳衣都有!設計型格,著重承托力同彈性,做運動都可以又靚又舒適!不得了!已經燒到著哂火,好想買呀!

 

西班牙必買|西班牙必買設計師單品|Iriarte Iriarte皮具

@iriarteiriarte_

Iriarte Iriarte係由當地設計師Carolina Iriarte所創嘅皮具品牌,所有嘅皮具都係用咗當地出品皮革,喺巴塞隆拿全人手製作!Carolina Iriarte嘅設計將復古同現代風格融合,製作嘅皮袋亦以實用為主!作品實而不華,款式較為中性,著重剪裁多過花巧配搭,而且好有質感!雖然價格係稍為高,不過絕對係經得起時代變遷嘅長青款色!好值得投資!

 

@iriarteiriarte_

Iriarte Iriarte嘅皮袋因應各種場合而設計出唔同嘅款式,無論係男士定女士,由返工、休閒,到旅行,都會搵到合適嘅皮袋!

 

西班牙必食|巴塞隆拿必食推介|Gelaaati Di Marco雪糕

@Facebook

除咗行街shopping,梗係要食吓地道美食啦!Gelaaati Di Marco係被譽為巴塞隆拿最好食嘅意式雪糕店!佢地嘅雪糕全部採用天然食材,香濃軟滑得嚟,絕對無添加任何油份同反式脂肪!仲好貼心,提供不含鮮奶同低糖雪糕,連素食者都可以食!而且有成30款唔同味道,可以比大家試食完,揀啱口味先買!

 

@gelaaati
Pistacchio di bronte

小編強烈推介必試加錢Pistacchio di bronte開心果味,因為店員話呢隻開心果係每2年先收割一次,比起其他每年收割一次嘅開心果濃好多,nutty好多!

@gelaaati
Mandorla Affogata

如果鐘意飲咖啡嘅朋友,就一定唔可以錯過Affagato味!香滑嘅雲呢拿,配上濃郁嘅咖啡,香脆果仁同鹽味焦糖,真係天衣無縫嘅配搭!呢個口味仲拎過“Gelato World Tour 2014”嘅大獎㗎!

 

Gelaaati Di Marco
地址:Carrer de la Llibreteria, 7, 08002 Barcelona, 西班牙 (顯示地圖)
營業時間:每日 10:00-00:00
網址:http://www.gelaaati.com/

 

西班牙必食|巴塞隆拿必食推介|Be Chocolat

@Facebook

Be Chocolat係由有22年製作朱古力經驗嘅Michel Clement大師所創辦。佢地嘅朱古力每日新鮮人手製作,用料完全來自最頂級同天然嘅可可豆,口味大膽創新,深受朱古力迷歡迎!成間店一行入去就充滿浪漫朱古力香氣,選擇花多眼亂,無論係買嚟自己食,定係做手信都一流!

 

@Tripadvisor
Iced choco shake

大家記得要試下佢地嘅Iced choco shake,有原味,士多啤梨同檸檬三個口味,全部都以香濃朱古力製成,口感厚潤,而且非常creamy順滑,必飲!

 

@Tripadvisor
Churros

西班牙其中一樣最出名嘅地道小食就係「西班牙油炸鬼」Churros,Be Chocolat嘅churros香脆而唔油膩,配上佢地嘅濃厚古力醬,真係冇得輸!

 

Be Chocolat
地址:Carrer dels Banys Nous, 17, A, 08002 Barcelona, 西班牙 (顯示地圖)
營業時間:每日 10:30-21:30

 

西班牙必食|巴塞隆拿必食推介|Cal Pep正宗Tapas

@Facebook

Tapas係西班牙人嘅餐前下酒菜,傳統Tapas多數係有一小塊麵包,然後上面鋪滿唔同嘅食材。西班牙有數之不盡嘅Tapas店,而巴塞隆拿嘅Cal Pep就係無論任何時候都大排長龍嘅超人氣Tapas店!呢間Tapas店非常特別,店內並冇提供餐牌,係根據每一日新鮮供應嘅海鮮,嚟去製定當日餐單!由店員塊推介美食,日日都比到驚喜大家!

 

@TastyEating

Cal Pep傳統嘅方法去製作Tapas,口味地道,夠哂正宗!餐廳仲設有吧枱,食客可以一邊嘆美食,一邊欣賞食物製作過程!

 

@Facebook

每一道菜都採用咗最新鮮嘅海鮮,加上廚師嘅精心炮製,包你食到舐舐脷!

 

Cal Pep
地址:Plaça de les Olles, 8, 08003 Barcelona, 西班牙 (顯示地圖)
營業時間:星期二至六 13:00-15:45,19:30-23:30;星期一 19:30-23:30

 

巴塞隆拿酒店住宿推介|The Serras

 

The Serras一間位於哥德區,鄰近蘭布拉大道嘅5星級酒店,地理位置方便,行去好多主要景點都係10-15分鐘路程。而且喺海邊附近,有海景之餘,靜中帶旺!比人一種悠閒舒適嘅感覺!酒店款時尚高瑞路線,比人一種奢華得嚟又不失優雅嘅感覺!係巴塞隆拿數一數二嘅人氣精品酒店!

 

 

房間設計用心,著重細節,有梳化同書枱,設備齊全,務求令住客有最舒適嘅享受!而且夠哂寬敞,製飾現代化,用色簡樸,比人一種溫暖嘅感覺!

 

The Serras
地址:ESP巴塞隆拿Passeig de Colom, 9查看地圖
星級 | ★★★★★  
位置 | ★★★★☆
設施 | ★★★★★  
環境 | ★★★★★
價格 | 查看價格

 

巴塞隆拿酒店住宿推介|巴塞隆拿環球酒店

 

巴塞隆拿環球酒店於巴塞隆拿心臟地帶,附近就係Paral-lel地鐵站,距離蘭布拉大道只係600米!地理位置無得輸!酒店有健身房,室外泳池同頂樓露台,住客可以一邊嘆美酒,一邊俯瞰巴塞隆拿市景!真係好chill! 最正係價錢唔貴,CP值高!

 

房間以木色同黑色為主,有一種型格現代感!木質地板更加令成間房感覺溫暖厚實!獨立浴室寬敞乾淨,仲提供免費梳妝用品!一個字!爽!

 

巴塞隆拿環球酒店
地址:ESP巴塞隆拿Del Paral.lel, Del 76-78查看地圖
星級 | ★★★★☆  
位置 | ★★★★★
設施 | ★★★★☆  
環境 | ★★★★☆
價格 | 查看價格

 

📖延伸閱讀:【米蘭購物狂】必去米蘭景點—米蘭Outlet血拼全攻略!(連必買意大利名牌推薦)
📖延伸閱讀:【西西里島自由行】帶你去意大利行街市!連西西里手信攻略!
📖延伸閱讀:【佛羅倫斯自由行之食軟雪糕】佛羅倫斯三大必食特色 Gelato 意大利雪糕!
📖延伸閱讀:【遊葡萄牙首都】4日3夜玩盡里斯本電車沿線景點攻略!
📖延伸閱讀:【窮游歐洲】法國巴黎景點、巴黎博物館慳錢大法!
📖延伸閱讀:【西班牙自由行】巴塞隆拿自由行必去人氣街區Las Ramblas、Gothic Quarter連住宿推薦

 

Hotels.com酒店優惠