定期送上世界各地最新、最地道嘅旅遊資訊!

【榴槤飄香】史上最強馬來西亞榴槤特輯 + 在地榴槤品種攻略

可能有人會覺得榴槤嘅氣味難聞,味道又怪,但係一眾榴槤愛好者就正正鍾意榴槤嘅呢啲特質!自問係榴槤愛好者嘅話,就唔好錯過以下為你介紹嘅馬來西亞榴槤品種、榴槤挑選貼士同埋馬來西亞榴槤檔嘅推薦喇!

 

馬來西亞榴槤品種介紹 | 貓山王

貓山王
@Facebook

貓山王可以話係咁多種榴槤之中,最受歡迎嘅一種。佢嘅味道濃厚,入口嘅時候帶有微微苦澀味,但係餘韻帶啲回甘,層次豐富。此外,貓山王肉厚核小,食起嚟每一啖都係綿密嘅果肉,唔少人都好享受佢獨有嘅香味喺口腔裡面爆發!

挑選貓山王貼士

貓山王_2
@Facebook

要揀一個優質嘅貓山王,第一步當然要從外表入手。正宗貓山王嘅底部會有星形紋路,貌似海星一樣。如果貓山王嘅底部已經爆開咗,就千祈唔好買喇,因為咁樣代表佢嘅果肉可能已經變壞。另外,貓山王嘅刺比其他榴槤品種平坦,亦唔會呈矛狀,而且亦較軟身。你可以輕按刺嘅側面,如果感覺軟身唔棘手,代表佢應該已經熟透。正宗嘅貓山王果肉呈均勻嘅黃色,而且亦唔應該有明顯嘅色差,記住留意喇!

 

馬來西亞榴槤品種介紹 | 山頂XO

山頂XO
@LoveCath

繼貓山王之後,山頂XO係另一種人氣馬來西亞榴槤。由於山頂XO嘅果肉有一種獨特酒香,所以獲得呢個美名。山頂XO肉質幼滑,容易入口。有別於貓山王,山頂XO嘅味道係先甜後苦,所謂嘅酒香其實亦即係呢種微甘嘅餘韻。

 

挑選山頂XO貼士

挑選山頂XO貼士
@YobiBlog

山頂XO嘅外殼呈較淺嘅綠色,果肉則呈奶白色。如果見到果肉係深黃色嘅話,即係代表佢唔係正宗嘅山頂XO。另外,山頂XO嘅刺相對較細,而且較為「拮手」。同揀貓山王一樣,如果佢嘅底部已經爆開咗,就記住唔好買喇!

 

馬來西亞榴槤品種介紹 | 黑刺

 黑刺
@PenangAhTeik

雖然貓山王可以話係最上盛嘅馬來西亞榴槤品種,但其實仲有一種榴槤比佢更加罕有,產量更少,佢就係極為珍貴嘅「黑刺」喇!黑刺價格高昂,即使係當地人都唔係咁容易食到。佢嘅味道濃烈,入口帶甜,餘韻帶微甘,甚至稱得上係苦澀。正正因為黑刺嘅層次咁豐富,所以備受資深榴槤愛好者嘅追捧!

 

挑選黑刺貼士

 黑刺_2
@BeyondFiftyExplorer

由於黑刺非常罕有,所以幾乎唔會有機會畀你揀。話雖如此,最好都記得點樣辨別佢嘅外表同埋果肉顏色,以防畀不法商人呃,買到假黑刺。黑刺嘅刺尖係黑色嘅,而底部則平坦並無大刺,只有一條幼細嘅黑刺。另外,黑刺嘅果肉呈橙黃色,質感幼滑,千祈唔好買錯!

 

 

馬拉西亞榴槤店推薦

要買優質嘅馬來西亞榴槤,梗係要幫襯有信譽同埋貨源靚嘅榴槤檔啦!宜家就為你推薦3間當地人都會幫襯嘅榴槤專門店,等你有機會下次嚟馬來西亞玩嘅時候,可以去買翻啲榴槤嘆吓,甚至帶返香港做手信!

 

馬拉西亞榴槤店推薦 | 阿德榴槤 (Ah Teik Durian)

阿德榴槤 (Ah Teik Durian)
@TheStar

阿德榴槤紮根檳城數十載,老闆阿德更加被譽為係「榴槤達人」。呢間榴槤檔係由佢阿爺所創立嘅,至今已經有50年歷史,而阿德自己亦都足足賣咗30幾年榴槤,所以對馬來西亞唔同嘅榴槤品種都瞭如指掌。阿德榴槤宜家已經拓展到多個流動攤檔,而且仲提供網上買榴槤服務,更有提供真空包裝服務將榴槤空運到港,相當厲害!

 

地址:Lorong Susu, 10450 George Town, Pulau Pinang, Malaysia
營業時間:星期一至日 10:00-22:30

 

馬拉西亞榴槤店推薦 | 榴槤鮮生 (Durian SS2)

榴槤鮮生 (Durian SS2)
@DurianSS2Facebook

榴槤鮮生係馬來西亞嘅人氣榴槤專門店,佢哋最出名嘅係榴槤自助餐,只需大約40至70馬來西亞幣,就可以任食高質馬來西亞榴槤,好似D24貓山王等等,絕對係榴槤愛好者必到嘅天堂。除咗自助餐,你亦可以單買一啲較為高級嘅榴槤品種,例如高級貨號嘅貓山王、紅蝦同埋黑刺等。

 

地址:Lot 7680, Jalan SS2/24, SS 2, 47300 Petaling Jaya, Selangor, Malaysia
營業時間:星期一至日 12:00 – 00:00

 

馬拉西亞榴槤店推薦 | 仙納果榴槤專門店 (Sinnaco Durian Specialist)

仙納果榴槤專門店 (Sinnaco Durian Specialist)
@Steemit

仙納果係另一間人氣馬來西亞榴槤檔,店員出晒名親切有禮,佢哋嘅榴槤品種齊全,主打各種優質貓山王,梗係要去試吓啦!

 

地址:No, 60, Jln 19/3, Seksyen 19, 46300 Selangor, Malaysia
營業時間:星期一至日 12:00 – 00:00

 

Hotels.com酒店優惠Hotels.com酒店優惠