定期送上世界各地最新、最地道嘅旅遊資訊!

【柬埔寨手信】超市尋寶!十大柬埔寨必買特色手信大全

唔少人為咗一睹世界文化遺產吳哥窟而慕名到柬埔寨旅遊,觀光過後就梗係要買手信啦!不過你又知唔知柬埔寨有咩值得買嘅手信呢?唔知?咁就等小編為你介紹可以喺當地超市買得到嘅十大柬埔寨必買特色手信啦!

 

柬埔寨手信 | 十大柬埔寨必買特色手信 | 貢布胡椒

貢布胡椒
@177milkstreet.com

貢布胡椒係柬埔寨嘅特產,同香檳以及大吉嶺紅茶等一樣都被歐盟列為PGI (Protected Geographical Indication) 產品,只有喺貢布省嘅特定環境下生長嘅胡椒先有資格叫做貢布胡椒。貢布胡椒係一種極為罕見嘅胡椒,佢嘅味道辣中帶有一啲花香,所以唔少大廚都鍾意用佢作為調味料㗎!

 

柬埔寨手信 | 十大柬埔寨必買特色手信 | 棕櫚糖

棕櫚糖
@sinaimg

以棕櫚樹嘅花汁烹煮而成嘅棕櫚糖由於並無經過任何加工程序,係近年人氣越嚟越高嘅有機食品。另外,棕櫚糖味道清香,而且比白糖、紅糖同蔗糖嘅甜度低,相對健康,可以話係柬埔寨嘅必買手信!

 

柬埔寨手信 | 十大柬埔寨必買特色手信 | 吳哥啤酒

吳哥啤酒
@mr-angkor.com

吳哥啤酒喺柬埔寨家傳戶曉,係一個深受當地人喜愛嘅啤酒品牌。唔少曾經到柬埔寨旅遊嘅旅客試過吳哥啤酒之後都讚好,絕對值得一試!吳哥啤酒嘅製作過程一絲不苟,除咗採用天然泉水同埋來自德國嘅啤酒花作為原材料,仲會用上二度發酵技巧務求令啤酒更為順口,水準勁高!

 

柬埔寨手信 | 十大柬埔寨必買特色手信 | Cafe Mondulkiri即沖咖啡粉

Cafe Mondulkiri即沖咖啡粉
@mondulkiri-coffee.com

Cafe Mondulkiri嘅即沖咖啡粉喺當地響負盛名,佢哋嘅產品標榜絕無加入任何食物添加劑,一定能夠令你品嚐到咖啡最天然嘅味道。另外,Cafe Mondulkir嘅產品一律採用低溫烘培技術處理,大大減低咗咖啡嘅苦澀同埋酸味,絕對係柬埔寨手信嘅好選擇!

 

柬埔寨手信 | 十大柬埔寨必買特色手信 | 蓮花油

蓮花油
@h5.youzan.com

柬埔寨獨有嘅蓮花油喺當地街知巷聞,佢嘅功效主要為紓緩蚊蟲叮咬、頭暈以及肌肉疼痛等症狀。此外,由於蓮花油帶有陣陣嘅蓮花香味,氣味幽香,所以亦有一啲人會將佢當做按摩精油,藉此紓緩肩頸酸痛,買嚟送禮自用就最好不過啦!

 

柬埔寨手信 | 十大柬埔寨必買特色手信 | 榴槤糖

榴槤糖
@impoca.com

柬埔寨盛產榴槤,而且質素絕對唔會比泰國榴槤差,嚟到就梗係要買翻啲榴槤產品做手信啦!小編特別推薦榴槤糖,柬埔寨嘅榴蓮糖唔單止榴槤果香濃郁,而且仲加入咗牛奶令糖果更有層次,鍾意食榴槤嘅你又點可以錯過?

 

柬埔寨手信 | 十大柬埔寨必買特色手信 | 柬埔寨咖喱粉

柬埔寨咖喱粉
@Sunrise Cambodia

想喺屋企都煮到柬埔寨嘅必食菜式Amok?咁你就一定要去超級市場買柬埔寨咖喱粉喇!Amok其實係味道偏甜而且椰汁味濃嘅咖喱,配搭唔同肉類都相當合適。另外,由於柬埔寨咖喱粉裡面含有檸檬草、高良薑同埋青檸皮等成份,所以香味與別不同,相當有特色!

 

柬埔寨手信 | 十大柬埔寨必買特色手信 | 水果乾

水果乾
@cambodianharvest

一入到柬埔寨嘅超級市場,相信你一定會被琳瑯滿目嘅水果產品所吸引,當中水果乾係大受旅客歡迎嘅柬埔寨手信。柬埔寨嘅水果乾種類選擇繁多,芒果乾、菠蘿乾同木瓜乾等等都一應俱全,梗係要嚟掃貨啦!

 

柬埔寨手信 | 十大柬埔寨必買特色手信 | 吳哥餅

吳哥餅
@angkorcookies_official

吳哥餅係柬埔寨嘅一款特色小食,口感鬆脆可口,而且帶有淡淡嘅椰子味,肯定會令你食到停唔到口。另外,由於佢嘅造型好似吳哥窟嘅高塔造型,所以大受旅客歡迎,絕對係其中一樣柬埔寨必買手信!

 

柬埔寨手信 | 十大柬埔寨必買特色手信 | 帶皮腰果

帶皮腰果
@SCP Cashew Nuts

一般喺市面上買到嘅腰果由於剝咗外皮嘅關係,所以都一定需要經過烘焗等程序處理,但係腰果嘅營養喺過程中亦會因而有所流失。由於帶皮腰果並無經過太多加工程序處理,所以保留咗更多維他命A等嘅營養素,想食得健康啲嘅朋友不妨試一試!

 

Hotels.com酒店優惠Hotels.com酒店優惠