定期送上世界各地最新、最地道嘅旅遊資訊!

【東京鰻魚飯特集】米芝蓮一星的美味!達人推薦必試Top 5東京鰻魚飯餐廳!

講到日本美食,又點少得鰻魚飯?相信各位嘅東京美食清單一定有佢嘅身影,但係你又有冇食過當地人推薦嘅必食東京鰻魚飯鰻魚飯係正宗和食嘅代表之一,日本人將鰻魚視為極上美味嘅珍品,一路以嚟都係高級美食。佢哋相信鰻魚有助增強體力,夏天食仲可以預防中暑。所以鰻魚飯喺日本非常受歡迎,唔少人氣店都要大排長龍㗎。

 

東京鰻魚飯特集竹葉亭

竹葉亭
@spacehunter13

竹葉亭喺江戶時代後期於銀座創立,使用優質鰻魚白燒,色香味俱全,筷子輕輕一夾已經可以將鰻魚分開,而且價錢唔貴,深受大眾喜愛。而佢嘅殺手鐧就係自家秘製醬汁,用咗超過100年逐步改良嘅配方,同鰻魚簡直係天作之合!

擁有強橫實力嘅佢係米芝蓮一星更加喺地道嘅《庶民米芝蓮》被評為三星,食家蔡瀾都大讚,係必食嘅東京鰻魚飯!地下室同1樓係普通座位,2樓係坐墊式嘅座位,氣氛好舒服,就算一個人食都唔會尷尬。

竹葉亭_2
@ohana.hairsalon.official

除咗鰻魚飯,呢到嘅鯛魚茶泡飯同吞拿魚茶泡飯都係人氣之選。

 

竹葉亭
地址:東京都中央区銀座8丁目14−7 (顯示地圖)
交通:地下鐵「銀座駅」 A5出口步行3分鐘
營業時間:星期一至六 11:30-14:30&16:30-20:00

 

東京鰻魚飯特集五代目野田岩

五代目野田岩
@tako0216

喺東京鐵塔附近嘅五代目野田岩創業至今已經成200年,非常之古色古香。佢哋嘅鰻魚飯多年嚟不斷改良,同時保留傳統味道,難怪係唔少吃貨嘅最愛!呢到每日都門庭若市,真係一位難求㗎,當然都有攞過米芝蓮一星啦。

五代目野田岩_2
@iris.nihao

由於野生鰻魚好難搵,所以市面上好多賣鰻魚嘅餐廳都係選用養殖鰻魚,不過野田岩就一直堅持使用野生鰻魚以提供最高品質。先蒸過再用備長炭反覆燒烤,呢個步驟可以令肉質變得更細緻軟滑,入口即融!

 

五代目野田岩
地址:東京都港区東麻布1丁目5−4 (顯示地圖)
交通:地下鐵大江戸線赤羽橋站 步行約5分鐘
營業時間:星期一至六 11:00-13:30&17:00-20:00

 

東京鰻魚飯特集色川

色川
@agnes_826

淺草出名係鰻魚飯集中地,於1861年創業嘅老店色川,舖仔細細,但係就名氣極大。唔好睇小佢係家庭式經營,色川都攞咗米芝蓮一星㗎!

色川坐落於知名淺草雷門觀光區,距離淺草寺唔洗5分鐘路程,幾乎所有鰻魚愛好者都聽過佢嘅大名。佢哋使用築地直送嘅國產鰻魚,以備長炭蒲燒,一打開個蓋就聞到充滿炭香嘅烤鰻魚香氣。肉質鮮嫩,醬汁香甜,係唔少人心目中嘅No.1東京鰻魚飯

色川_2
@joyful_tiffany

老闆娘會喺吧枱前即場烤鰻魚,離遠都聞到鰻魚嘅香氣,流曬口水。留意返餐廳只係做午市,夜晚冇得食㗎。

 

色川
地址:東京都台東区雷門2丁目6−11 (顯示地圖)
交通:地下鐵淺草站步行約3分鐘
營業時間:星期一至六 11:30-14:00

 

東京鰻魚飯特集尾花

尾花
@ushi_aki

講起東京鰻魚飯,相信冇人唔識尾花尾花其實係高級料理店,但係佢嘅價位就非常之平易近人,所以無論咩時間嚟都大排長龍!

獲得米芝蓮一星尾花,位於南千住民宅嘅小區。雖然唔係喺東京市區,但係憑住實力吸引無數食客,無論係本地人定遊客之間都獲得好高評價。餐廳係古色古香嘅和式老房舍,店內用餐空間亦用咗榻榻米座席,非常有傳統風味。

尾花_2
@bluemoon424

招牌鰻魚飯可以根據自己口味選擇白燒或者蒲燒,豐厚嘅鰻魚放喺備長炭上以慢火細烤,兩種烤法都各有特色。

尾花_3
@koseik

除咗招牌鰻魚飯之外,仲有鰻魚玉子丼、鰻魚日式蛋卷等其他單品,選擇豐富。

 

尾花
地址:東京都荒川区南千住5丁目33−1 (顯示地圖)
交通:地下鐵南千住站步行約4分鐘
營業時間:星期二至日 11:30-13:30&16:00-19:30

 

東京鰻魚飯特集ひつまぶし名古屋 備長

ひつまぶし名古屋 備長
@lauksfamily

ひつまぶし名古屋 備長喺1992年開業,係屬於關西風嘅鰻魚飯。關西鰻魚料理手法唔會先蒸再烤,直接以備長炭不斷反覆燒烤,逼出鰻魚嘅油脂香,同埋燒出香脆嘅外皮。

除咗名古屋之外,目前喺東京、大阪、福岡都有分店,東京分店就位於晴空塔6樓。比較特別嘅係,每一間備長都設有開放式廚房,可以望住師傅烤鰻魚,視覺同味覺都一次過滿足哂!雖然呢間並唔係摘星店,但係名古屋風鰻魚飯喺一眾東京鰻魚飯之中較為特別,非常值得一試!

ひつまぶし名古屋 備長_2
@lukson

呢到仲可以食到名古屋地區非常流行嘅「鰻魚飯三吃」,喺東京比較少見。第1重:品嘗原味烤鰻魚;第2重:拌入芥末、辛香料與小菜佐料;第3重:倒入茶製成茶泡飯。3種不同食法,將鰻魚飯嘅美味發揮到極致,鰻魚控過足癮!

 

ひつまぶし名古屋 備長
地址:東京都墨田区押上1丁目1−2 東京ソラマチイーストヤード6階 (顯示地圖)
交通:地下鐵押上站步行約3分鐘
營業時間:星期一至日 11:00-22:00

 

📖延伸閱讀:【日本拉麵篇】十大日本米芝蓮拉麵推介2019!
📖延伸閱讀:【日本必食】終極嚴選京都、大阪、沖繩、東京必食特集2018!
📖延伸閱讀:【日本和牛任食攻略】5大東京燒肉放題+自助餐餐廳推薦!
📖延伸閱讀:【東京海鮮之旅】三大新興東京魚市場連回本必食推薦!

 

Hotels.com酒店優惠Hotels.com酒店優惠