定期送上世界各地最新、最地道嘅旅遊資訊!

【東京近郊溫泉】東京周邊好去處 — 五大河口湖日歸溫泉推薦

嚟到東京除咗shopping之外,都不妨去東京近郊溫泉感受遠離煩囂嘅愜意。如果你想飽覽富士山嘅美景,就必定要嚟一個河口湖日歸溫泉之旅喇!河口湖位於東京周邊山梨縣, 屬於「富士五湖」之一,從東京市區搭JR或者高速巴士只需大約兩個鐘左右就能夠到達,即日來回都完全無問題。望住蔚藍恬靜嘅湖水,映襯氣勢磅礡嘅富士山,可以話係最佳嘅溫泉體驗,就等我地一齊探索東京周邊嘅新面貌啦!

 

河口湖日歸溫泉推薦|富士眺望之湯Yurari

富士眺望之湯Yurari
@www.fuji-yurari.jp

講到河口湖嘅日歸溫泉,富士眺望之湯Yurari絕對係數一數二嘅好去處。呢度嘅溫泉種類五花八門,包括露天風呂、碳酸溫泉、芳香溫泉、洞窟浴以及蒸汽浴等總共有16種咁多,每個溫泉都各有治療功效。置身喺露天風呂之中,富士山嘅景致同埋林木互相輝映,令人賞心悅目。每當夜幕低垂,露天風呂嘅燈光着起之後會營造出迷幻氣氛,別有一番風味!

富士眺望之湯Yurari_2
@yamanashi-kankou.jp

浸完溫泉之後,你可以揀喺客房用膳,一嚐地道嘅山梨縣料理。而最有趣嘅係,食物會由小火車直接送到門口,玩味十足!

富士眺望之湯Yurari_3
@navitime.jp

如果係一家大細去旅行嘅話,不妨畀多少少錢租用私人包廂溫泉,同家人共享天倫之樂!

 

地址:日本山梨縣南都留郡鳴澤村8532-5
營業時間:10:00 – 22:00 ※最終入場時間 21:00
電話:0555-85-3126

 

河口湖日歸溫泉推薦|若草之宿丸榮旅館

若草之宿丸榮旅館
@maruei55.com

若草之宿丸榮旅館自昭和時代一直營業至今,係當地家喻戶曉嘅老字號。旅館位置同酒店集中嘅區域有一段距離,所以環境格外寧靜清幽,而且門外嘅裝潢亦別具日本風情。

若草之宿丸榮旅館_2
@ryokan100

旅館裡面有幾個溫泉,其中佢哋嘅頂樓設有露天風呂,空間夠晒廣闊,而且仲採用咗傳統嘅和式建築設計,可以將河口湖嘅景色盡收眼底,彷彿伸手就能夠掂到呢座日本第一嘅名山!

若草之宿丸榮旅館_3
@ozmall.co.jp

旅館嘅膳食亦十分精緻,而且仲只會選用時令蔬果同埋新鮮魚生作食材。

 

地址:日本山梨縣南都留郡富士河口湖町小立498
電話:0555-72-1371

 

五大河口湖日歸溫泉推薦|山田屋旅館

山田屋旅館
@shoujiko.com

同樣喺河口湖町嘅山田屋旅館,位處「富士五湖」中最細嘅精進湖旁邊。比起熱鬧嘅河口湖,精進湖帶畀人靜謐嘅氣氛,而且仲可以一窺著名嘅「抱子富士」,由露天風呂放眼望出去,富士山同埋前面較矮嘅大室山重疊埋一齊,就好似媽媽抱著BB一樣,絕對係獨一無二嘅自然奇景!精進湖嘅面積雖然細,但係四周都同樹林相連,春櫻、夏綠、秋楓、冬雪,呢度一年四季嘅景致變化萬千,充分展現出大自然嘅魅力。值得一提嘅係,住客可以攜同寵物進出山田屋旅館,啱晒養毛孩嘅奴才!

 

地址:日本山梨縣南都留郡富士河口湖町精進478
營業時間:10:00 – 15:00(溫泉開放時間)
電話:0555-87-2311 

 

五大河口湖日歸溫泉推薦|美富士園酒店

美富士園酒店
@mifujien.co.jp

如果你嘅預算有限,又想喺浸溫泉嘅時候一睹富士山風釆,美富士園酒店就肯定係你嘅不二之選!酒店毗鄰富士山,露天風呂同埋大浴場都採用從地下1500米湧出嘅天然泉水,仲設有按摩池、多功能淋浴設施等,一定可以將疲勞一掃而空。大浴場設有巨型落地破璃,恍如將富士山同埋河口湖嘅景色鑲嵌其中,構成一幅絕美嘅風景畫。由於浸完溫泉之後會消耗大量體力,呢度亦設有休息室,等客人補充水份同埋稍作休息,服務相當貼心!

 

地址:山梨縣南都留郡富士河口湖町淺川207
營業時間:13:00 – 21:00
電話:0555-72-1044

 

五大河口湖日歸溫泉推薦|湖樂御宿富士吟景

湖樂御宿富士吟景
@ctt.tw

喺咁多間東京近郊溫泉旅館之中,湖樂御宿富士吟景一直人氣高企,呢度咁受歡迎嘅原因在於環境開揚寬敞,而且並無任何遮擋,等你可以欣賞無邊無際嘅醉人景色。富士吟景嘅泉水源自「靈水之湯」,含有豐富嘅鈣、鈉等元素,據講對治療肌肉、關節痠痛非常有效。沿住樓梯行到頂樓,你就會見到一個勁大嘅露天風呂。喺裊裊炊煙之中,眺望著對岸嘅富士山,波平如鏡嘅水面呈現「逆富士」倒影,難怪人人都話呢度擁有令人畢生難忘嘅溫泉體驗啦!

 

地址:山梨縣南都留郡富士河口湖町淺川132
電話:0555-72-0010

 

Hotels.com酒店優惠Hotels.com酒店優惠