定期送上世界各地最新、最地道嘅旅遊資訊!

【日本溫泉泳衣入浴】怕醜入嚟!三大「可泳衣入浴」東京近郊溫泉推薦!

日本嘅溫泉大部分都係裸湯,有啲仲要係男女混合嘅大眾湯。喺屋企人或者朋友面前全裸都已經覺得好尷尬,仲點夠膽喺陌生人面前一絲不掛呀?怕醜嘅小編好明白呢種感覺,所以搜羅咗3間係東京近郊嘅「可泳衣入浴」溫泉,打破尷尬場面,令大家都可以一齊享受浸溫泉嘅樂趣!

 

東京近郊溫泉|浦安萬華鄉大江戶溫泉物語

浦安萬華鄉大江戶溫泉物語
@moshimoshi-nippon.jp

大家可能比較熟悉嘅係位於東京台場嘅大江戶溫泉物語,但原來仲有另一間更加大型嘅喺千葉縣浦安市。呢間大江戶溫泉物語樓高2層,佔地廣達10,000坪,能夠容納3,000人,堪稱係全日本最大嘅溫泉浴場。千葉縣離成田機場好近,所以好適合喺到留宿一晚,抖足精神第二朝搭飛機。

浦安萬華鄉大江戶溫泉物語_2
@moshimoshi-nippon.jp

大江戶溫泉物語大到好似一座溫泉樂園咁,場內提供唔同療效嘅溫泉浴,溫泉泉水係從地下1,400米湧出。泳衣區為男女混合露天溫泉,有多達16種唔同風格嘅浴池,包括好似城堡嘅「源泉館」、可以欣賞美景嘅「五色之湯」、同可以刺激腳底穴道嘅「遊步之湯」。

浦安萬華鄉大江戶溫泉物語_3
@tokyocheapo.com

除咗溫泉,大江戶溫泉物語以古色古香嘅裝修同佈置將日本舊時溫泉街嘅風華重現。溫泉街上有各式各樣嘅商店、餐廳、SPA、遊戲場,無論大人定小朋友玩足一日都唔會悶!

 

地址:千葉縣浦安市日出7-3-12
營業時間:11:00 – 09:00
電話:+81 47-304-4126

 

東京近郊溫泉|箱根小涌園溫泉樂園Yunessun

箱根小涌園溫泉樂園Yunessun
@箱根小涌園ユネッサン

箱根係日本溫泉名鄉,人氣溫泉樂園箱根小涌園離東京只係90分鐘嘅車程,遊客可以喺東京新宿站搭「浪漫號」特快車,到箱根湯本站落車。箱根小涌園結合主題公園同溫泉設施,係一個極具趣味嘅玩樂天地。

箱根小涌園溫泉樂園Yunessun_2
@箱根小涌園ユネッサン

箱根小涌園喺室外同室內一共提供16種「可泳衣入浴」嘅創意浴池,包括紅酒溫泉、綠茶溫泉、咖啡溫泉同清酒溫泉。當中嘅紅酒溫泉仲可以邊浸邊飲,真係不得不佩服日本人嘅創意!另外室外溫泉仲有刺激嘅滑水道,同埋可以欣賞箱根嘅山景,爽呀!

箱根小涌園溫泉樂園Yunessun_3
@箱根小涌園ユネッサン

浸到肚餓?箱根小涌園入面有多間餐廳,包括自助餐、意大利餐廳、蕎麥麵店、鐵板燒、涮涮鍋等。離開樂園前記得去商店街入貨!箱根嘅必買手信呢到都可以買得到,好似溫泉饅頭、泡湯粉等等。

 

地址:神奈川縣足柄下郡箱根町二之平1297
營業時間:09:00 – 20:00
電話:+81 460-82-4126

 

東京近郊溫泉|江之島天然溫泉ENOSPA會館

江之島天然溫泉ENOSPA會館
@Enoshima Island Spa

江之島天然溫泉ENOSPA會館位於藤沢市,離東京大概1小時車程。自2004年開業以嚟,會館已經被當地居民公認為日本頂級水療中心之一,深受各地遊客歡迎。江之島四面環海,會館嘅最大賣點係「無敵海景」,可以邊浸溫泉,邊飽覽湘南海景。聽聞係好天嘅時候,仲有機會睇到富士山㖭!

江之島天然溫泉ENOSPA會館_2
@Enoshima Island Spa

江之島天然溫泉ENOSPA會館提供16種溫泉設施,泳衣區可以盡享天然溫泉嘅「源泉」同可以玩泡泡嘅「氣泡泉」。另外一樓仲有個洞窟區,喺神秘嘅洞窟內浸溫泉,絕對係另一番風味。全部溫泉都係採用江之島1,500米底下湧出嘅天然溫泉,富含天然礦物質,對身體非常有益!

江之島天然溫泉ENOSPA會館_3
@Enoshima Island Spa

浸完溫泉後,可以享受館內高質按摩,包括精油按摩、日式整體院指壓按摩同氧氣艙。會館入面亦有一間海景海鮮餐廳,可以邊享用美食,邊欣賞美景。另外要留意,星期日只有大人先可以入館,咁就可以避開小朋友嘅吵鬧,過一個寧靜嘅假日啦!

 

地址:神奈川縣藤澤市江之島2-1-6
營業時間:10:00 – 22:00
電話:+81 466-29-0686

 

Hotels.com酒店優惠Hotels.com酒店優惠