定期送上世界各地最新、最地道嘅旅遊資訊!

【東京近郊景點】高尾山一日遊行程 + 景點攻略

去東京旅遊,shopping同埋食好嘢往往都係旅程嘅重點,想有一個與別不同嘅行程?咁你就可以考慮到東京近郊景點觀光遊覽!其中距離東京大概一個鐘車程嘅高尾山,係最受當地人歡迎嘅登高好去處。呢度一年四季嘅景色都相當優美,更加係春天賞櫻、秋天賞楓嘅最佳地點!下次去東京玩,不妨按照以下嘅高尾山行程攻略,嚟一次高尾山一日遊

 

東京近郊景點|高尾山一日遊交通攻略

高尾山位於八王子市,而去高尾山最快捷方便嘅方法就係由新宿車站出發,搭京王電鐵嘅京王高尾線,大約50分鐘左右嘅車程就會到達高尾山口車站。到站之後,你就可以轉搭登山電鐵或者吊椅上山㗎喇! 

 

東京近郊景點|高尾山一日遊行程|京王高尾山溫泉

京王高尾山溫泉
@linshibi

喺登上高尾山之前,一定要去位於高尾山口車站旁邊嘅京王高尾山溫泉!呢度嘅泉水係從高尾山麓天然湧出,清澈到不得了。呢間溫泉館由日本古民居改建而成,絕對係最能夠體現日本傳統溫泉嘅地方!

京王高尾山溫泉_2
@gotokyo.org

溫泉分為室內同埋室外,室內設有以微氣泡清潔皮膚嘅檜湯以及因應季節轉換嘅交替湯,而室外就設有促進新陳代謝嘅碳酸湯以及泉水由地下1,000尺湧出嘅天然溫泉!你可以一邊享受具有美肌功效嘅溫泉,一邊欣賞周邊景致,好寫意㗎!

 

地址:〒193-0844 東京都八王子市高尾町2229番7
營業時間:每日 08:00 – 23:00
電話:+81 42-663-4126

 

東京近郊景點|高尾山必食推薦|UKAI鳥山

UKAI鳥山
@ukai.co.jp

喺高尾山山腳,有一間叫UKAI鳥山嘅隱世日本傳統炭火燒烤店。呢間餐廳無論由外面嘅景色、園林造景、到室內一絲不苟拘嘅和風設計都靚到令人覺得不可思議!好多人都係為咗喺呢個有如仙境一般嘅環境下食飯而慕名而來!浸完溫泉之後,嚟呢度嘆翻餐日式料理,再展開登山之旅都係一個唔錯嘅選擇!

UKAI鳥山_2
@ukai.co.jp

餐廳設有日式傳統建築嘅包廂,喺包廂裡面你仲可以欣賞到外面嘅靚景,大家記得要提早幾日預約,咁就唔怕嚟到會摸門釘啦!呢度嘅食物採用最新鮮嘅本地食材,而且仲有唔同嘅燒烤套餐任君選擇,包括燒和牛、烤魚同埋雞肉等等,配上精製嘅日式小食,肯定會為你帶嚟視覺同埋味覺上嘅大滿足啊!

 

地址:〒193-0846 東京都八王子市南浅川町3426
營業時間:星期三至一 11:30 – 19:30;星期二休息
電話:+81 42-661-0739

 

東京近郊景點|高尾山一日遊行程|高尾山纜車

高尾山纜車
@japan-magazine

由高尾山口徒步上山,行大概90分鐘左右就可以到達山頂。但係既然一場嚟到,又點可以唔搭日本第一陡峭嘅高尾山登山纜車?纜車沿途風光明媚,而且仲會經過斜度接近45度嘅斜坡,非常刺激!另外,每逢秋天呢度四周都會開滿通紅嘅楓葉,絕對會令你畢生難忘!

高尾山纜車_2
@flickr

除咗纜車,呢度仲有登山吊車,等你喺享受著微風同埋清新空氣嘅同時,慢慢攀登上山。小編建議大家可以喺上山嘅時候搭吊車,落山嘅時候就搭纜車,體驗登山嘅樂趣!

 

地址:〒193-0844 東京都八王子市高尾町2205
電話:+81 42-661-4151

 

東京近郊景點|高尾山一日遊行程|高尾山藥王院

高尾山藥王院
@flickr

喺纜車或者吊車站落車之後,可以漫步到山頂附近嘅藥王院。藥王院係一座擁有超過1,200年歷史嘅修道院,相傳由曾經參與興建奈良東大寺大佛嘅行基菩薩所創建,而且更加係日本佛教同埋神道融合嘅代表修道院之一,係一個充滿靈氣嘅地方,唔少高僧都曾經嚟呢度修道㗎!

高尾山藥王院_2
@flickr

喺藥王院附近,正正就係高尾山嘅頂峰大見晴台。你可以喺度遠眺富士山,而且仲有機會喺黃昏時分睇到「鑽石富士山」呢個自然奇景。「鑽石富士山」其實即係黃昏時候嘅陽光直射打落富士山上面,景象金光閃閃,好罕見㗎!

 

地址:〒193-0844 東京都八王子市高尾町2177
電話:+81 42-661-1115

 

東京近郊景點|高尾山必食推薦|高尾山Beer Mount

高尾山Beer Mount
@gotokyo.org

喺每年嘅6月至10月去高尾山嘅話,可以到期間限定嘅Beer Mount,同親朋好友一邊欣賞東京至橫濱一帶嘅景色,一邊享受美酒佳餚!喺日間,呢度可以清楚睇到東京市區高樓大廈林立嘅景致,夜晚更加可以飽覽燈光閃爍嘅迷人夜景!

高尾山Beer Mount_2
@hitosara

Beer Mount除咗有各式各樣來自本地同埋世界各地嘅啤酒,仲提供超過30種中、日、西式食物嘅自助餐,喺高尾山玩完之後不妨嚟呢度大快朵頤,為你嘅旅程劃上一個完美嘅句號!

 

地址:〒193-0844 東京都八王子市高尾町2205
營業時間:每日 13:00 – 21:00
電話:+81 42-665-9943

 

Hotels.com酒店優惠Hotels.com酒店優惠