定期送上世界各地最新、最地道嘅旅遊資訊!

【東京親子好去處】小朋友最開心!東京池袋Sunshine City水族館睇可愛企鵝、水獺、海獅!

講起東京嘅親子好去處,不得不提位於池袋Sunshine City嘅水族館。池袋一向都係東京必去景點之一,而Sunshine City更加係集娛樂、購物、美食於一身嘅熱門商場。今日就等小編帶你同小朋友去水族館睇可愛企鵝、水獺、海獅啦!

 

Sunshine City水族館|交通介紹

交通介紹
@Facebook

Sunshine City水族館位於池袋,地點方便,可以喺池袋車站 (35號出口) 穿過陽光60大道到達,或者由東池袋車站 (6.7號出口)嘅地下通道直通太陽城。Sunshine City水族館以「天空綠洲」為概念,充分利用屋頂同高空嘅特點打造出非一般嘅水族館觀看模式同氣氛。水族館內展示多達37,000種魚類,一共有750種生物,當中包括超級可愛嘅企鵝、水獺同紅鶴!

 

Sunshine City水族館|常設展覽

常設展覽
@Facebook

Sunshine City水族館設有3個常設展覽,1樓嘅主題係「海洋之旅」,主要展示喺海岸、海灣、海面、遠洋等區域五花八門嘅魚類。呢個主題嘅亮點包括「水母隧道」同一個超級巨型嘅「陽光岩礁水槽」。潛水員每日都會喺陽光岩礁水槽進行多次嘅水中表演,喺水中用咪向遊客介紹各種魚類。

常設展覽_2
@flickr 

2樓嘅「水濱之旅」展示咗喺河流、湖泊、海岸居住嘅各種蛙類、龜類同哺乳類動物。當中嘅亮點就係長期係冰塊下生活嘅貝加爾海豹喇!另外展館內嘅珊瑚礁種類豐富,色彩艷麗,仲有好多同珊瑚共生嘅小丑魚穿梭其中㖭!

常設展覽_3
@Facebook

3樓係最吸晴嘅「天空之旅」,抬頭向上望,就可以見到好多隻超萌嘅黑腳企鵝係天花水槽入面游嚟游去。呢個特別嘅高空設計會令人有種企鵝喺天空上面飛緊嘅錯覺,小朋友一定會睇得好開心!呢到喺夜晚時分仲會亮起燈光,場面非常夢幻!除咗水中企鵝之外,呢到仲係欣賞草原企鵝、海獅、水獺同白鵜鶘嘅好地方!

 

Sunshine City水族館|必睇活動

Sunshine City
@flickr 

Sunshine City水族館每日都會舉辦各種嘅動物表演,例如企鵝餵食、海獅餵食、海獅同鵜鶘表演等等。當中千祈唔好錯過每日一場嘅「水獺親密接觸」環節,大家可以近距離欣賞水獺嘅可愛神情!另外,鍾意企鵝嘅朋友就一定要去睇「企鵝療癒Show」,喺優美嘅樂曲伴奏下觀賞企鵝。另外嘅「企鵝潛水Show」仲設有問答環節,等觀眾可以打探企鵝嘅有趣生活小細節!

Sunshine City_2
@Facebook

除咗動物表演,水族館舉辦嘅探險導覽活動亦非常值得參加,因為可以進入水族館嘅幕後,了解更多關於水族館嘅運作,仲可以參加埋專門為導覽活動而設嘅生物講座。飼養員除咗會介紹生物同飼料方面嘅知識,仲會分享自身嘅飼養趣聞同故事,係一個難得嘅體驗!提提大家,出發前記得先上水族館嘅官方網站睇睇當日嘅表演時間表,咁就唔怕會錯過任何一個表演環節啦!

Sunshine City_3
@Sunshine City

行完水族館之後,相信好多小朋友都會睇到唔捨得走。如果唔捨得水族館入面啲動物,不妨到2樓嘅「Aqua Pocket」商店,揀返啲得意嘅動物精品返屋企!日本手信嘅設計真係冇得輸,每樣精品,無論係公仔定係餅乾同糖都設計得超級精美,當中小編就推薦大家可以入手限定版扭蛋、海洋公仔造型擦膠、保護充電線公仔等。

 

Sunshine City水族館
地址:東京都豐島區東池袋3-1 太陽城 World import Mart 大樓 頂樓 (顯示地圖)
營業時間:9:00 – 22:00 (年中無休) ※最終入場時間21:00
入場費用 (只供參考):成人¥2,200;兒童¥1,200;幼兒¥700
網址:https://sunshinecity.jp/zh-tw/aquarium/

 

📖延伸閱讀:【東京親子遊】最新Top 6東京近郊親子景點推薦 — 交通、住宿、在地美食總整理!
📖延伸閱讀:【東京親子遊】東京聖誕必到主題樂園:Sanrio Puroland、讀賣樂園行程攻略!
📖延伸閱讀:【快閃旅行】必去東京新景點—東京MIDTOWN日比谷 (連東京4日3夜行程推薦)
📖延伸閱讀:【日本家品控】文青必逛!嚴選六大東京家品店、雜貨店!

 

Hotels.com酒店優惠Hotels.com酒店優惠