定期送上世界各地最新、最地道嘅旅遊資訊!

【札幌美食攻略】北海道必食!Top 5 人氣特色札幌居酒屋推薦!

講起北海道旅行,除咗諗起滑雪、浸溫泉、觀光等指定動作之外,當然唔少得去埋北海道必食餐廳一飽口福!北海道咁大,今次小編就集中搜羅札幌美食。居酒屋係最具日本特色嘅餐廳,一場嚟到日本,無理由唔去居酒屋盡情享受地道美食嘅!以下,小編會介紹頭5位超人氣又各具特色嘅札幌居酒屋。

 

札幌美食攻略 | CP值超高嘅地道居酒屋 | 炭火居酒屋 炎

炭火居酒屋 炎
@sumibiizakaya_en_oomiya

炭火居酒屋 炎係一間深受當地人歡迎嘅居酒屋,原因係CP值超高!一般日本人嚟到居酒屋主要係為咗飲酒,而炎竟然提供「無限任飲」,一個價錢就可以盡情暢飲日本酒、梅酒、啤酒、威士忌等酒精飲品,即使唔飲酒嘅客人都可以任飲汽水同埋招牌嘅雞肉丸湯,真係超抵!

炭火居酒屋 炎_2
@sumibiizakaya_en_oomiya

雞肉丸正正係炎嘅獨家招牌菜,店家嚴格選用北海道自家雞隻,並加入8種香料,研製左十幾款特別口味嘅雞肉丸,包括柚子胡椒味、芝士火鍋醬味、顆粒芥末味、自家熟成味噌味、泡菜味等,肉質鮮嫩多汁,製作相當用心!

 

地址:北海道札幌市中央区北3条西2丁目8-3 エナビル1階(札幌駅北3条店)
營業時間:星期日至星期四 11:30 – 翌日 1:00;星期五至六 11:30 – 翌日4:00
交通:地下鐵札幌站步行4分鐘

 

札幌美食攻略 | 隱身巷弄的深夜食堂 | 味百仙

味百仙
@yamatier

味百仙係一間老字號嘅札幌居酒屋,創立於1985年,吸引不少當地人同埋遊客過嚟朝聖!

味百仙_2
@Chiaki6138

味百仙唔單止提供北海道本地酒,亦有從日本各地不同縣市搜羅返嚟嘅美酒,酒品菜單眼花撩亂,非常吸引一眾好酒之人。

味百仙_3
@yaki89898989

味百仙_4
@dailynewsonline.jp

而令大眾慕名而來嘅招牌菜就係奶油燉薯仔,味百仙加入奶油同上湯,用慢火將薯仔燉煮足足5個鐘而製成,可謂誠意十足!爽口嘅薯仔,伴隨住濃郁嘅奶油上湯,兩者絕配,絕對係北海道必食,難怪呢道招牌菜仲畀日本著名漫畫《美味大挑戰》取材加入內容!

 

地址:札幌市北区 北七条西 4 宮澤興業ビル B1F
營業時間:星期一至五 17:00 – 23:00;星期六及公眾假期前夕 17:00 – 22:00
交通:JR札幌站步行2分鐘

 

札幌美食攻略 | 平價串燒宵夜之選 | 串鳥

 串鳥
@sachi0268

串鳥係一間連鎖嘅串燒居酒屋,賣點係價格非常親民,所以深受大眾歡迎,堂食食客以及買外賣嘅客人同樣絡繹不絕!串鳥使用炭燒方法煮食,所以全店都係香噴噴嘅炭燒味,未入座就已經流曬口水!

 串鳥_2
@_0513_m _

串鳥有多款出色串燒,除咗經典嘅串燒,例如雞肉串、雞軟骨串、燒雞全翼、烤牛肉,仲有較少見嘅煙肉年糕串、泡菜豬肉串燒等。串燒唔會燒得太燶,只有小小香脆可口嘅焦,肉脆多汁,師傅嘅燒烤功夫真係非常到家!而且串燒唔會落太多嘅醬料調味,只係落咗少量嘅鹽嚟提味,就已經非常惹味!

 

地址:札幌市中央区南4条西3丁目3ススキノビルB2F(札幌本店)
營業時間:每日11:00 – 14:00;16:30 – 翌日 00:30
交通:地下鐵薄野站步行3分鐘

 

札幌美食攻略 | 懷舊情懷嘅海鮮居酒屋 | 大漁居酒屋てっちゃん

大漁居酒屋てっちゃん
@sachi0268

大漁居酒屋てっちゃん係開業30年嘅傳統老店,店內放滿日本昭和年代嘅懷舊玩具,牆上亦貼滿懷舊嘅歌曲唱片,再播埋懷舊歌曲,充滿日本舊日情懷!

大漁居酒屋てっちゃん_2
@Mardigras216

大漁居酒屋嘅招牌料理係刺身船(舟盛り),名副其實係用模型船容器裝住多達20種海鮮刺身,例如螃蟹、三文魚、吞拿魚、海膽、帶子、紅蝦、魷魚、章魚等,全部都係即日由漁市場入貨嘅新鮮海產。章魚上碟嘅時候依然好生猛咁扭動,點豉油嘅時候仲啜實隻碟添呀!刺身船不單止新鮮可口,份量仲多到令人好滿足!

居酒屋嘅特別之處係如果食唔曬嘅話,店家可以免費將淨低嘅魚生炒熟帶返屋企,享受另一種鮮味,咁樣做唔單止唔會浪費食物,將食物炒熟仲確保到食物質素,真係非常貼心!

 

地點:北海道札幌市中央区南3条西4丁目9
營業時間:星期一至二、星期四至六 17:00 – 21:30
交通:地下鐵薄野站步行2分鐘

 

札幌美食攻略 | 氣氛極好的「邪惡」居酒屋 | ろばた居心地

ろばた居心地
@flickr

ろばた居心地嘅「居心地」日文意思係令人舒適安心嘅地方,店家喺料理同埋居酒屋嘅氣氛方面的確放咗唔少心機。ろばた居心地有唔少受歡迎嘅菜式,其中一個非常吸晴嘅名物係階梯生魚片。7級階梯放住7種當季時令嘅刺身,由下而下依次有:吞拿魚、三文魚、魷魚、章魚、秋刀魚、鱲魚、鹿肉,每款刺身要點返配對好嘅醬料,例如吞拿魚要點黑胡椒醬油、三文魚要點洋蔥醬油、章魚要點麻油鹽、鱲魚要點昆布醬油、鹿肉要點特製嘅橙醋等,食法非常專業講究。

ろばた居心地_2
@ximg.retty.me

日本常見嘅海膽喺度亦有另一個食法,要先用紫菜包住海膽,再點上生蛋黃,口感豐富,食法超邪惡!而ろばた居心地嘅精髓一定係食三文魚海膽親子丼!因為上呢度料理嘅時候,成間餐廳嘅燈光同音樂都會轉變,侍應會換上鮮豔嘅禮服,同食客一齊嗌口號,一邊將三文魚籽一羹一羹咁倒落米飯上面,份量浮誇到滿瀉喺碗邊,將氣氛推上高潮!

 

地址:北海道札幌市中央区南2西4-10-2 清水ビル B1F
營業時間:星期一至六 11:30 – 14:30; 17:00 – 翌日1:00
                  星期日及公眾假期 11:30 – 14:30; 17:00 – 翌日00:00
交通:地下鐵薄野站步行3分鐘

 

Hotels.com酒店優惠Hotels.com酒店優惠