定期送上世界各地最新、最地道嘅旅遊資訊!

【短線暑假親子遊】近近哋隨時起行!4大台灣主題樂園、台灣水族館親子樂!

台灣向來都有唔少特色親子景點,而且機程亦都只不過係需要大約2個鐘頭,近近哋啱晒暑假親子遊!小編今次就為你帶嚟台灣暑假親子遊景點推介,帶你玩盡4大台灣主題樂園台灣水族館

 

短線暑假親子遊 | 台灣必到主題樂園、水族館 | 小人國主題樂園

小人國主題樂園
@kimie1688

喺台灣家傳戶曉嘅小人國主題樂園設有「遊世界」、「遊樂園」同埋「水樂園」3個園區,而最受歡迎嘅當然就非「遊世界」園區莫屬啦!

小人國主題樂園_2
@theo5.19

嚟到「遊世界」園區,你可以一次過睇勻世界著名景點好似自由神像、悉尼歌劇院同埋比薩斜塔嘅迷你版本,肯定會令你目不暇給。

小人國主題樂園_3
@easytravel.com.tw

除此之外,你仲可以透過「遊世界」園區嘅手機應用程式進行聲音導航,逐一為你將各個名勝古蹟嘅故事娓娓道來,觀光之餘仲可以增長知識!

小人國主題樂園_4
@happyalicechou

參觀完迷你版景點之後,梗係要同小朋友一齊去「遊樂園」同埋「水樂園」玩返夠本啦!「遊樂園」裡面有唔少特別為兒童而設嘅遊玩設施,好似探險車、旋轉木馬等等,小朋友實會玩到唔捨得走!

小人國主題樂園_6
@hopetrip

至於每逢7至8月先會開放嘅「水樂園」,裡面就有一座做足安全措施嘅巨型水上遊樂場,家長絕對可以放心畀小朋友喺度嬉水玩樂!

 

小人國主題樂園
地址:325台灣桃園市龍潭區高原路891號 (顯示地圖)
開放時間:09:00 – 18:00
門票費用:499新台幣 (成人及6歲以上小童);399新台幣 (3至6歲小童);3歲以下小童免費入場
官網:http://www.woc.com.tw/

 

短線暑假親子遊 | 台灣必到主題樂園、水族館 | 大路觀主題樂園

大路觀主題樂園
@taiwan2go.com

大路觀主題樂園裡面分為4大園區,分別係「大觀河」、「白沙露天泳池」、「仙人掌世界」同埋「星光大草原」。

大路觀主題樂園_2
@abic.com

「大觀河」同埋「白沙露天泳池」設有唔同嘅水上活動等住你嚟玩,當中以划艇嘅人氣最高,不妨落水消消暑!

大路觀主題樂園_3
@dalukuanland.com.tw

而樂園標誌性嘅「仙人掌世界」就展示咗各式各樣嘅仙人掌,當中最特別嘅就一定要數到會喺春天同埋夏天開花嘅「大鳳龍」仙人掌。除此之外,「仙人掌世界」更加係全亞洲面積最大嘅仙人掌植物園,好值得嚟開下眼界㗎!

大路觀主題樂園_4
@dalukuan

想帶小朋友去親親大自然?咁你就一定要去「星光大草原」喇!「星光大草原」佔地遼闊,好適合小朋友喺度奔跑暢玩。

大路觀主題樂園_5
@dalukuan

另外,當地唔少居民都好鍾意喺假日一家大細嚟呢度露營觀星,享受天倫之樂,你又點可以唔試吓?

 

大路觀主題樂園
地址:906台灣屏東縣高樹鄉中正路188號 (顯示地圖)
開放時間:09:00 – 17:00
門票費用:400新台幣  (成人);280新台幣 (小童)
官網:http://www.dalukuanland.com.tw/

 

短線暑假親子遊 | 台灣必到主題樂園、水族館 | 麗寶樂園

麗寶樂園
@lihpaoresort.com

號稱全台灣規模最大嘅麗寶樂園一共設有2大園區,分別係「探索世界」同埋「馬拉灣」。鍾意玩機動遊戲嘅話,就一定唔可以錯過「探索世界」!

麗寶樂園_2
@lihpaoresort.com

呢度除咗有刺激無比嘅過山車、跳樓機同海盜船之外,仲有唔少適合小朋友玩嘅設施,好似旋轉木馬同埋觀光小火車等等,大人細路嚟到都一定有嘢啱玩!

麗寶樂園_3
@lihpaoresort.com

「馬拉灣」其實亦即係麗寶樂園嘅水上樂園,園區內有超過10款遊樂設施包括「漂漂河」漂流歷險、「阿酋灣」親子嬉水區、「大海嘯」造浪池同埋「彩虹滑道」急流等等。

麗寶樂園_4
@lihpaoresort.com

其中,「大海嘯」更加係全東南亞面積最大嘅露天造浪池,啱晒鍾意刺激嘅朋友!

麗寶樂園_5
@lihpaoracing

麗寶樂園嘅國際賽車場係全台灣唯一一個通過國際汽車聯盟 (FIA) 認證嘅賽車場,賽道規格極高。

麗寶樂園_6
@lihpaoracing

如果你嘅小朋友年滿10歲,不妨順便帶佢去埋麗寶樂園,喺呢個國際賽車場玩卡丁車,風馳電掣一番!

 

麗寶樂園
地址:42145台灣台中市后里區福容路8號 (顯示地圖)
開放時間:09:30 – 20:00
門票費用:900新台幣 (成人);800新台幣 (12歲或以上學生);550新台幣 (6-11歲小童);450新台幣 (3-5歲小童);3歲以下小童免費入場
官網:http://www.lihpaoresort.com/

 

短線暑假親子遊 | 台灣必到主題樂園、水族館 | 國立海洋生物博物館

國立海洋生物博物館
@pattytseng5

國立海洋生物博物館分別設有「台灣水域館」、「珊瑚王國館」同埋「世界水域館」3大展館,自2000年開幕之後,呢度一直都係台灣嘅人氣親子景點,你又點可以錯過?

國立海洋生物博物館_2
@rightgreen7.com

以台灣嘅生態為藍本打造嘅「台灣水域館」,將當地嘅瀑布、河川等一一呈現,令參觀者可以詳盡了解台灣獨特嘅地理同埋生態面貌。

國立海洋生物博物館_3
@journey.tw

而「珊瑚王國館」裡面除咗有唔少珊瑚礁睇之外,裡面仲有一條特製嘅海底隧道,令你彷如置身大海之中,唔少人都好鍾意喺度打卡留念㗎!

國立海洋生物博物館_4
@sij555

至於「世界水域館」就採用咗3D虛擬技術令參觀者有如坐喺潛艇之中漫遊深海,欣賞獨特嘅自然生態。另外,館內仲設有極地展區講解南北極嘅海洋生物,好似企鵝同埋海鸚鵡等等,一定會令小朋友大開眼界!

國立海洋生物博物館_5
@guan16

有興趣嘅話,你仲可以參加「夜宿水生館」活動,同小朋友一齊喺眾多海洋生物包圍之下就寢入睡,感受呢個超級特別嘅住宿體驗!

 

國立海洋生物博物館
地址:944台灣屏東縣車城鄉後灣路2號 (顯示地圖)
開放時間:09:00 – 17:30
門票費用:450新台幣 (成人);250新台幣 (6歲以上學生);6歲以下小童免費入場
官網:https://www.nmmba.gov.tw/

 

📖延伸閱讀:【台東熱氣球】台灣鹿野高台熱氣球嘉年華懶人包總整理!(連鹿野高台住宿推薦)
📖延伸閱讀:【親子墾丁行程】4日3夜高雄墾丁自由行攻略大全 (連墾丁夜市必食推薦)
📖延伸閱讀:【落雨有咩好怕】台北4日3夜親子遊!四大台北室內景點 + 市中心親子酒店推薦
📖延伸閱讀:【台中親子遊】一家大細出遊!台中親子景點大全 + 清境及日月潭溫泉酒店推薦!

 

Hotels.com酒店優惠Hotels.com酒店優惠