定期送上世界各地最新、最地道嘅旅遊資訊!

【大阪隱世景點】日本秘境逐個捉!編輯嚴選Top 6大阪近郊一日遊好去處!

 

唔少朋友周不時都會飛翻轉大阪,去shopping或者食好西。不過除咗食買玩之外,其實大阪仲有好多隱世景點值得你去觀光遊覽㗎!小編今次就為你帶嚟Top 6大阪近郊一日遊好去處,玩盡日本秘境!

 

📖延伸閱讀:【日本必食】終極嚴選京都、大阪、沖繩、東京必食特集2018!

 

日本秘境 | 大阪近郊一日遊好去處 | 竹田城跡

竹田城跡
@fastjapan.com

攞唔到長假期去秘魯馬丘比丘朝聖?唔緊要,其實近近地去日本都可以搵到「馬丘比丘」㗎!被譽為「日本馬丘比丘」嘅竹田城跡,多年嚟都深受日本當地人歡迎,唔少日本人更加話竹田城跡係「一生人一定要去一次嘅地方」,景緻美不勝收!

竹田城跡_2
@city.asago.hyogo.jp

竹田城跡畀人嘅感覺相當夢幻,喺雲霧嘅包圍之下有如一座天空之城,令你彷如置身仙境一樣,如詩如畫。

竹田城跡
@LaVie行動家

想去竹田城跡嘅朋友,除咗可以從大阪搭JR到竹田站轉乘巴士直達之外,你亦可以選擇沿著登山徑行大約1個鐘左右前往竹田城跡,別有一番風味㗎!

 

竹田城跡
地址:Hyōgo Prefecture, Asago, 和田山町竹田古城山169番地669-5252 日本 (顯示地圖)

 

日本秘境 | 大阪近郊一日遊好去處 | 琵琶湖

琵琶湖
@minipakujoy.com

琵琶湖係全日本面積最大嘅淡水湖,更加係日本嘅國家公園,自然環境清幽,好啱嚟放鬆一下!從大阪乘搭JR到大津站再轉乘京阪電鐵至濱大津站就可以去到琵琶湖享受自然風光㗎啦!

琵琶湖_2
@colatour

如果你想更全面地欣賞琵琶湖迷人嘅景緻,你仲可以乘搭號稱全日本最快嘅纜車登上琵琶湖山谷,喺瞭望台上面俯瞰琵琶湖嘅湖光山色,好壯觀㗎!

琵琶湖_3
@elisetime.to

嚟到琵琶湖,你當然要去埋白髭神社呢個近江地區最古老嘅神社啦!白髭神社嘅鳥居非常有特色,整個鳥居樹立喺琵琶湖嘅湖面上,帶畀人一種好奇幻嘅感覺,唔少人都會特登嚟打卡朝聖,你又點可以錯過啊!

 

琵琶湖
地址:Muto 1547-1, Otsu City, Shiga Prefecture (顯示地圖)

 

日本秘境 | 大阪近郊一日遊好去處 | 有馬溫泉

有馬溫泉
@japan-guide

有馬溫泉貴為日本「三古湯」之一,係日本最古老嘅溫泉景點。由大阪前往有馬溫泉嘅方法非常簡單,你只需喺JR大阪站乘搭有馬Express高速巴士,坐大約1個鐘就可以直達有馬溫泉,絕對係大阪近郊一日遊嘅好去處!

有馬溫泉
@kobecco.hpg.co.jp

有馬溫泉嘅泉水喺日本響負盛名,分為金湯同埋銀湯。金湯即係指含有鐵嘅鹽化泉,對於皮膚有保濕嘅作用。至於銀湯即係碳酸泉,可以去水腫同埋幫助新陳代謝,對身體好有益處㗎!


三津森本@shimashimaseikatu.com

如果你鍾意日本美食嘅話,就千祈唔可以錯過位於有馬溫泉街嘅元祖三津森本舗啦。元祖三津森係炭酸煎餅嘅始創店舖,嚟到當然要試下最正宗嘅炭酸煎餅啦!

炭酸煎餅
@eonet

除咗炭酸煎餅,呢度仲有好多傳統嘅日式糕點選擇,浸完溫泉去食翻啲地道美食就最好不過啦!

 

有馬溫泉
地址:Arimacho, Kita, 神戶市兵庫 651-1401日本 (顯示地圖)

 

📖延伸閱讀:【日本冬季溫泉提案】京都溫泉旅館+大阪溫泉旅館一泊二食套餐大比併2018!(話埋你知邊間有私人風呂!)

 

日本秘境 | 大阪近郊一日遊好去處 | 友島

友島
@japatabi

位於大阪西南部嘅友島,自明治時期直到二次大戰都係日本重要嘅軍事要塞據點,以往由於軍事需要所以喺地圖上面並唔會搵得到嘅,非常神秘㗎!

友島_2
@walkota_

由於友島荒廢咗嘅第三炮台同宮崎駿名作「天空之城」入面嘅飛行島嶼拉普達非常神似,所以呢度成為近年大熱嘅大阪近郊隱世景點,好多當地人都會趁著假日去友島一日遊打卡留念!

友島_3
@joshitabi

除咗第三砲台之外,友島仲有唔少當年嘅軍事遺跡保留咗喺度,你可以深入秘道尋幽探秘,如果你係軍事迷就一定唔可以錯過啊!前往友島嘅方法非常方便,乘搭南海電鐵前往加太站之後於加太港轉乘往來友島嘅渡輪就去到㗎啦!

 

友島
地址:Kada, 和歌山市和歌山 640-0103日本 (顯示地圖)

 

📖延伸閱讀:【日本德島自由行】大阪近郊德島一日遊!德島景點、美食、酒店住宿懶人包!

 

日本秘境 | 大阪近郊一日遊好去處 | 妙見山

妙見山
@noseden.hankyu.co.jp

想遠離煩囂,洗滌一下心靈?小編推薦你去妙見山呢個恬靜而神聖嘅日本秘境!你可以選擇乘坐妙見山嘅登山吊椅上山,沿途兩旁遍佈燦爛茂盛嘅花卉樹木,喺妙見山與別不同嘅美景陪襯下,一定可以為你帶來片刻嘅寧靜,舒緩壓力。

妙見山_2
@osaka.letsgojp.com

妙見山據講係祭祀當地嘅北極星守護神妙見菩薩嘅地方,唔少人都會慕名而來參拜開運。此外,妙見山更加係日本關西嘅賞櫻好去處,每逢賞櫻時節呢度嘅江戶彼岸櫻都會開滿整個山頭,唔想同人迫住睇櫻花不妨考慮下妙見山啊!


@musee-pla.sakura.ne.jp

如果你打算前往妙見山,你可以乘搭阪急電鐵到川西能勢口站然後轉乘能勢電鐵,喺妙見口站落車就去到㗎啦!

 

妙見山
地址:Okuyama Kurokawa, 川西市兵庫 666-0101日本 (顯示地圖)

 

📖延伸閱讀:【大阪櫻花2019】大阪櫻花花期 + Top 5 大阪賞櫻景點攻略大全!

 

日本秘境 | 大阪近郊一日遊好去處 | 明治之森箕面公園

明治之森箕面公園
@flickr

當年為咗紀念明治天皇登機一百週年而興建嘅明治之森箕面公園係日本其中一個最為歷史悠久嘅國家公園,公園入面有相當多不同種類嘅動植物,好值得嚟開開眼界㗎!

明治之森箕面公園_2
@minohfalls.com

嚟到明治之森箕面公園一日遊,除咗珍稀嘅動植物之外,仲有箕面瀑布呢個必到嘅景點!被選為「日本瀑布百選」嘅箕面瀑布,氣勢磅礡之餘,同周邊嘅自然環境亦毫無遺和感,拼湊成一幅妙不可言嘅圖畫,令人不禁讚嘆大自然嘅奇妙!要留意嘅係由於明治之森箕面公園並無公共交通工具到達,你可以先乘搭阪急電鐵喺箕面站落車,然後步行前往箕面公園,沿途體驗日本秘境風光!

 

明治之森箕面公園
地址:1-18 Minookoen, Minoh, Osaka Prefecture 562-0002日本 (顯示地圖)

 

📖延伸閱讀:【Hotels.Com大使推介】日本大阪近郊-箕面景點行程懶人包!
📖延伸閱讀:【大阪二手店】大阪二手名牌邊度買?大阪中古店、古著店特集!
📖延伸閱讀:【大阪拉麵2019】最新大阪道頓堀、心齋橋拉麵店美食地圖!
📖延伸閱讀:【窮遊大阪-平價住宿篇】Top 5 大阪膠囊酒店!

 

 Hotels.com酒店優惠 Hotels.com酒店優惠