定期送上世界各地最新、最地道嘅旅遊資訊!

【日本家品控】文青必逛!嚴選六大東京家品店、雜貨店!

唔知有無人同小編一樣都係家居控,平時已經好鐘意行吓啲家品店同雜貨店,去旅行就梗係唔會例外。日本東京絕對係搜羅雜物嘅勝地,各式各樣嘅雜貨店實在令人行到無法自拔!如果你同我一樣都咁鐘情於日本家品果種簡約、唯美嘅風格嘅話,去到東京就千奇唔好錯過以下呢六間非常有特色嘅家品店同雜貨店!

 

家品控必去|Today’s Special

Today’s Special@Today’s Special Facebook

Today’s Special絕對係東京人氣no.1嘅家居雜貨店,喺自由之丘、新宿同澀谷都有分店。當中自由之丘嘅店鋪最大,一共有三層。店內風格以簡約為主,除咗日式家品之外,亦都有歐美風格嘅雜貨,絕對係女士們嘅購物天堂!

Today’s Special_2@Today’s Special Facebook

Today’s Special賣嘅野包羅萬有,從布料、裝飾品、廚房用具、園藝用具、文具到零食都應有盡有。係日本大流行嘅My Bottle亦係出自Today’s Special,可以買番幾個做手信!

 

Today’s Special
地址:東京都目黒区自由が丘 2-17-8 (顯示地圖)
營業時間:11am-11pm
網址:https://www.todaysspecial.jp/

 

文具控必去|Think of Thinks

Think of Thinks@Thinkg of Thinks Facebook

Think of Thinks坐落於東京原宿車站附近,係日本百年文具品牌KOKUYO嘅實體生活概念店,結合文具、咖啡同藝術,目的係打造一個能夠「引發思考」嘅空間,希望客人可以重新反思文具對生活嘅重要性。

Think of Thinks_2@Thinkg of Thinks Facebook

Think of Thinks嘅商品以高質同簡約為主,普遍都係以較沈穩嘅單色設計,如淺灰、卡其同黑色。去到Think of Thinks當然要買返本經典嘅Campus筆記簿,店入面仲提供即場燙金印字服務,可以創造一本屬於自己獨一無二嘅筆記簿。

Think of Thinks嘅咖啡同樣好出色,咖啡豆嚟自知名咖啡店Obscura Coffee Roathers,品質絕對有保證。除咗咖啡,店內亦提供輕食,包括各種甜鹹嘅日式麵包。Think of Thinks仲會周不時搞藝術展覽,例如之前有插畫家Noritake嘅作品展、雨傘展同北歐小物展等,絕對係文青必逛!

 

Think of Thinks
地址:151-0051東京都渋谷区千駄ヶ谷3-62-1 (顯示地圖)
營業時間:10:00-20:00
網址:https://think-of-things.com/

 

鄉村控必去|BROCANTE

BROCANTE@BROCANTE Facebook

位於係自由之丘車站附近嘅BROCANTE係一間法式雜貨店。一去到就會見到店鋪被各種植物、藤蔓包圍住,令人感覺就好似去到南法鄉村一樣,完全唔覺得自己係日本。BROCANTE喺法文嘅意思為「舊物」,聽聞店主松田行宏非常鐘情於法式鄉村嘅生活,經常飛去南法採購古董,希望帶俾客人原汁原味嘅法國風情家具品。

BROCANTE_2@BROCANTE Facebook

松田先生唔單只對於揀古董有眼光,係園藝方面亦都非常講究。佢幾度赴法國學習當地嘅庭園造景,務求將法式精緻嘅園景藝術帶到日本。店內嘅每一個角落都經過松田先生用心嘅設計。大家去到記得要放慢腳步,仔細欣賞。

 

BROCANTE
地址:東京都目黒区自由が丘3-7-7 (顯示地圖)
營業時間:13:00-18:00
網址:http://brocante-jp.biz

 

民族控必去|House of Lotus

House of Lotus@House of Lotus Facebook

House of Lotus係一間具有民族特色嘅品牌,喺東京有四間分店。House of Lotus嘅服裝以舒適為主,希望客人著上身可以放鬆心靈同身體,真真正正咁「be yourself」!

House of Lotus_2@House of Lotus Facebook

店內同時賣各式各樣嘅手工藝品,包括:抱枕、圍巾、手帕、地氈同其他藤織品同刺繡品。店內工藝品上繽紛嘅色彩代表各式各樣嘅文化。除咗賣手工藝品之外,House of Lotus有時亦會舉辦展覽,例如之前係青山店舉辦嘅印度服裝及工藝品展,介紹印度代代相傳嘅工匠技術,非常具教育意義。

 

House of Lotus
地址:東京都港区南青山3-18-4 (顯示地圖)
營業時間:11:00-20:00
網址:https://houseoflotus.jp

 

天然控必去|FreshService

FreshService@FreshService Facebook

FreshService係一間集合生活用品同服飾嘅雜貨店,擁有一套好特別嘅營運概念--將店鋪打造成「假想的貨運公司」。FreshService嘅店鋪多數係以快閃形式登場,而名古屋嘅旗艦店仲命名為Fresh Service Stockroom,成間店鋪就好似一個倉庫咁,帶俾客人唔一樣嘅購物樂趣!

FreshService_2@FreshService Facebook

FreshService嘅貨品來自世界各地,主張實而不華,強調有品質的生活。當中有好多崇尚天然嘅品牌,例如:蒙特利爾嘅美容品牌Balsem、瑞典嘅有機護膚品牌L:A Bruket等等,啱哂啲專用有機同天然產品嘅朋友。

 

FreshService
地址:東京都渋谷区神宮前2-13-14 (顯示地圖)
營業時間:12:00-19:00
網址:http://freshservice.jp/

 

藝術控必去|Brick & Mortar

Brick & Mortar@Brick & Mortar Facebook

Brick & Mortar係村上美術公司旗下嘅雜物店,由藝術家村上周本人打理。佢搜羅世界各地嘅生活用品,以超越國界、創造新價值為理念;相比起其他純日本製嘅雜貨店,Brick & Mortar係相對國際化同個性化。

Brick & Mortar_2@Brick & Mortar Facebook

店內物品嘅種類可以話係無限制,有文具、盆栽、家具、廚具、書籍、布料、石器、木頭、銅器、瓷器,乜都有!大家嚟到東京不妨到Brick & Mortar尋寶,可能會有意外嘅驚喜!

 

Brick & Mortar
地址:東京都目黒区中目黒1-4-4 (顯示地圖)
營業時間:12:00-20:00
網址:http://www.brickandmortar.jp/

 

📖延伸閱讀:【平買東京潮牌】編輯推薦Top 5必逛東京古著店、二手店 + 必入Items!
📖延伸閱讀:【東京文青】想搵東京Cafe、咖啡店?東京Blue Bottle Coffee潮聖攻略地圖
📖延伸閱讀:【日本必買的東西】東京零食特集 — 東京必買零食、手信、小物 2019!
📖延伸閱讀:【東京必買】東京購物篇之必去東京市集、東京跳蚤市場買物攻略 2019

 

Hotels.com酒店優惠Hotels.com酒店優惠