定期送上世界各地最新、最地道嘅旅遊資訊!

【Hotels.com大使推介】日本大阪近郊-箕面景點行程懶人包!

大阪心齋橋同道頓堀,相信大家就去得多喇!唔知大家有冇去過大阪近郊呢?等Hotels.com大使帶大家深入大阪箕面,去探索大阪嘅自然風光啦!

第一站:明治之森箕面國定公園

@Flickr

明治之森箕面國定公園係大阪市內賞櫻同賞楓嘅熱點,係日本嘅國家公園,亦喺1986年入選為「森林浴之森100選」。每逢到春天同秋天,都會吸引好多人嚟睇風景!公園位於大阪近郊嘅箕面市,以本地人為主,冇咩遊客,少咗市區嘅繁囂感,取而代之嘅係一份輕鬆自在嘅悠閒,嚟呢到感受吓當地人嘅生活就最啱啦!

公園入面種咗超過1000種植物,公園入亦設有步行徑,俾遊客可以近距離接觸大自然。好多本地人都鐘意嚟呢到行山,有啲仲會帶埋野食嚟野餐,一路欣賞風景一路野餐,不知幾寫意呀!行入去公園途中會有好多唔同嘅商店,販賣唔同嘅特色小食同手信。其中最特別嘅一定係呢個秋天限定嘅楓葉天婦羅


@gissgassgoss

叫得楓葉天婦羅,緊係有楓葉喺入面啦!楓葉天婦羅係將食用紅葉鹽漬,醃完之後將紅葉去鹽、灑上白糖、麵粉同芝麻,再拎去炸,就成為可以食落肚嘅楓葉天婦羅!大家嚟到記得去試下啦!

 

明治之森箕面國定公園
地址:大阪府箕面市箕面公園 (顯示地圖)
交通:阪急箕面站歩行5分鐘

 

 

第二站:川床音羽山莊

@chikachikaseriseri

 

坐喺位於河川上嘅茶屋或可以睇到河川嘅茶屋度食飯,就叫做川床料理喇。川床料理喺京都好出名,而喺箕面公園附近嘅川床音羽山莊都有得試㗎!每年嘅四月至十月,箕面國定公園入面嘅川床音羽山莊都會開放。遊客可以喺度一邊聽住潺潺流水聲、欣賞河谷風景,一邊享用美味嘅川床料理,好嘆!但係大家要記住川床料理係夏季限定,想試嘅朋友就要夏天嚟試,同埋要記得預約呀!

 

川床音羽山莊
地址: 大阪府箕面市箕面公園1-3 (顯示地圖)
交通:阪急箕面站歩行9分鐘

 

第三站:箕面瀑布
@Flickr

箕面公園除咗可以賞櫻同賞楓,公園入面仲有另一個大亮點,就係高33米嘅箕面瀑布喇!每年11月中旬至12月上旬,公園入面嘅楓葉開始泛紅,加上呢個瀑布景觀,就好似一幅識郁嘅山水畫!喺唔同嘅角度望過去,都有唔同嘅感覺。只要調好角度,就可拍影到瀑布穿過紅葉嘅絕景,攝影迷必到呀!

 

由箕面站行到去箕面瀑布大概需時45分鐘,沿途亦會經過好多景點,好似西江寺、昆蟲館、瀧安寺、野口英世像、唐人戾橋等等。


箕面瀑布
地址: 大阪府箕面市箕面公園 (顯示地圖)

 

第四站:大江戶溫泉物語
@Flickr

行完山咁攰,緊係要去浸番個溫泉,relax吓啦!大江戶溫泉物語嘅分店遍布全日本,每一間溫泉物語都會根據當地嘅地理位置去設計溫泉嘅類型,保證每個都獨一無二!而箕面館嘅溫泉種類主要係碳酸泉,浸完皮膚會好光滑,貪靚嘅你就唔好錯過喇!

@Flickr

大江戶溫泉物語嘅特點就係除咗有得浸溫泉,仲有好多唔同嘅娛樂設施可以玩。有卡拉OK,唔同嘅攤檔,射擊、夾公仔等等,仲有商店街可以買手信,就好似行夜市咁,好熱鬧㗎!另外,喺天台仲有一個露天溫泉,可以一邊睇夜景,一邊浸溫泉,爽呀!

 

大江戶溫泉物語
地址: 大阪府箕面市溫泉町1-1 (顯示地圖)

 

住宿攻略
伊爾蒙特酒店 (Hotel Il Monte)
伊爾蒙特酒店, 大阪, 雙人房, 1 間臥室, 非吸煙房, 客房

呢間酒店地理位置好好,行一分鐘左右就可以到達梅田同東梅田地下鐵,去邊都方便!附近仲有好多食肆同便利店,而大阪掃貨必去、24小時營業嘅「驚安之殿堂」就係酒店對面,幾點去掃貨都得啦!部分酒店房間仲可以見到梅田HEP摩天輪𠻹!

 

伊爾蒙特酒店 (Hotel Il Monte)
地址:
JPN大阪Kita-ku7-13 Doyama-cho (顯示地圖)
星級 | ★★★☆☆
位置 | ★★★★★
設施 | ★★★☆☆
環境 | ★★★☆☆
價格 | 查看價格 

 

Hotels.com 酒店優惠