定期送上世界各地最新、最地道嘅旅遊資訊!

【新加坡美食篇】新加坡牛車水美食街攻略 + 五大必食推薦

 

數到新加坡嘅必去景點,就梗係唔少得新加坡牛車水啦!你除咗可以喺度感受到獨特嘅華人文化,仲有唔少必去景點同埋新加坡美食。小編今次將會為你帶嚟牛車水美食街攻略,介紹五大必食推薦,千祈唔好錯過!

 

新加坡牛車水
@klook.com

牛車水其實即係中國城Chinatown,而史密斯街正正就係今次要介紹嘅牛車水美食街。史密斯街當年其實係一個著名紅燈區,喺新加坡政府嘅大力整頓之下,最後先演變成為今日嘅美食街。搭地鐵紫色線或者藍色線到牛車水站,喺A出口出站再穿過寶塔街就會到達牛車水美食街喇!

集合咗當地24間小食攤檔同埋6間美食餐館,半露天式嘅美食街睇落有啲似夜市,但係食物嘅品質絕對有保證,所有攤檔、餐廳都必須經過旅遊局同埋美食專家嘅嚴格把關同埋測試,先可以喺度做生意㗎!

 

新加坡美食篇|新加坡牛車水美食街推薦|加東加記蠔煎

加東加記蠔煎
@sg.openrice.com

加東加記坐落喺牛車水美食街入口附近,烹煮蠔煎嘅香氣同埋聲音非常誘人,好多人都會因而瞬間被佢吸引。呢度嘅蠔煎同台灣嘅蚵仔煎有啲類似,不過蠔煎就係炒散嘅,師傅會將佢炒成一舊一舊,令蠔仔一粒粒咁獨立出嚟,唔會被粉漿包住,味道又香又辣,一啖接一啖好快就食晒一大盤!

呢度嘅小食攤檔格局類似美食廣場,你可以喺唔同攤檔買各樣美食,然後再坐低慢慢嘆,好適合想試勻各種新加坡美食嘅遊客,方便又好味!

 

地址: Chinatown Food Street, 335 Smith St #5, 050335
交通:地鐵紫色線或藍色線牛車水站A出口,步行5分鐘
開放時間:星期一至日 17:00 – 23:00

 

新加坡美食篇|新加坡牛車水美食街推薦|中峇魯起骨海南雞飯 

中峇魯起骨海南雞飯
@gordy98

新加坡文華酒店嘅海南雞飯向來都非常出名,但係價錢就相對昂貴,難免令人卻步。想用一個親民嘅價錢,享受同樣出色嘅海南雞飯,不妨幫襯中峇魯起骨海南雞飯!

呢度嘅雞肉肥瘦適中,皮滑爽脆,再加上雞油香味相當突出嘅飯同埋地道三色醬,惹味到不得了!雖然牛車水美食多籮籮,但係中峇魯起骨海南雞飯依然好受歡迎,人氣極高。經濟抵食又有水準嘅海南雞飯,絕對係必食嘅新加坡美食

 

地址: Chinatown Food Street, 56 Smith St, 058961
交通:地鐵紫色線或藍色線牛車水站A出口,步行5分鐘
開放時間:星期一至日 10:30 – 23:00

 

新加坡美食篇|新加坡牛車水美食街推薦|陳素珍

陳素珍
@snow_summer

新加坡天氣炎熱,所以凍飲同埋冰品類都特別受歡迎。悶熱嘅天氣令你汗如雨下,呢個時候最好就梗係嚟陳素珍整翻碗酸甜可口嘅雪花冰,消暑一流啊!無論男女老幼,喺呢個天氣之下,似乎都最愛冰凍甜品。陳素珍嘅芒果雪花冰人氣極高,香甜嘅芒果同綿滑嘅雪花冰絕對係最佳拍檔,可以話係鎮店皇牌嚟㗎!

 

地址:25 Trengganu Street, Singapore 058476
交通:地鐵紫色線或藍色線牛車水站A出口,步行5分鐘
開放時間:星期一至日 11:00 – 23:00

 

新加坡美食篇|新加坡牛車水美食街推薦|南洋老咖啡

南洋老咖啡
@ceciizhang

新加坡美食代表,梗係唔少得一杯正宗嘅南洋咖啡啦!同一般咖啡嘅製作方法唔同,南洋咖啡係用大鍋拌炒咖啡豆,喺炒豆嘅同時加入糖同埋牛油,令炒出來嘅咖啡豆結成一大塊,之後將佢敲碎再磨成粉。因此,南洋咖啡味道獨特而且自帶香甜,別有一番風味!

南洋老咖啡喺店外仲好貼心咁附上咗一張新加坡咖啡說明表,介紹Kopi、Kopi O、Kopi C、Kopi Siew Dai、Kopi Gao等嘅區別,非常有趣。除咗咖啡,南洋老咖啡亦有供應咖央多士、半熟蛋等新加坡人成日食嘅早餐美食。佢哋嘅咖央多士烤得非常酥脆,搽滿咖央醬嘅多士加上一大片牛油,邪惡得嚟又好好食!

 

地址:268 South Bridge Rd, Singapore 058817
交通:地鐵紫色線或藍色線牛車水站A出口,步行3分鐘
開放時間:星期一至日 11:00 – 23:00

 

新加坡美食篇|新加坡牛車水美食街推薦|荷蘭村XO魚頭米粉

荷蘭村XO魚頭米粉
@dreamercyrus

雖然未必係最廣為人知嘅新加坡美食,但係識食嘅遊客相信都會認同,嚟到新加坡一定要食荷蘭村XO魚頭米粉!唔少新加坡人都好推薦呢碗魚頭米粉,而且佢仲係好多藝人嘅最愛嚟,你又點可以唔試!

奶白色嘅濃郁湯底係用咗無數嘅魚骨熬出嚟嘅,所以味道十分鮮甜,而且仲帶有淡淡嘅XO酒香,淨喺聞吓都有少少醉意啊!呢度嘅炸魚頭肉質飽滿,搭配香醇嘅湯底同埋粗米粉,真係會越食越上癮,老闆推介加辣椒醬一齊食係最好味嘅食法!另外,唔食魚頭嘅朋友,不妨試下魚肉米粉,同樣都好滋味㗎!

 

地址:17 Smith St, Singapore 058931
交通:地鐵紫色線或藍色線牛車水站A出口,步行3分鐘
開放時間:星期一至日 11:30 – 14:30;17:00 – 22:00

 

Hotels.com酒店優惠Hotels.com酒店優惠