定期送上世界各地最新、最地道嘅旅遊資訊!

【斐濟自由行】浪漫到盡頭!斐濟蜜月feel住宿酒店 + 求婚必選斐濟景點推薦!

位於南太平洋嘅島國斐濟有全球最靚國家之一嘅美譽!斐濟擁有絕美嘅珊瑚礁群、純樸熱情嘅風土人情、世上最純正嘅水源,而且環景優美,係世上僅有淨土之一,亦被選為全球十大蜜月度假勝地之一,連Bill Gates都揀呢度渡蜜月呀!今次就等小編推薦至Top斐濟蜜月feel嘅住宿酒店同求婚必選斐濟景點比大家啦!

 

斐濟自由行|斐濟蜜月feel住宿酒店推薦|利庫利庫潟湖度假村

利庫利庫潟湖度假村

去到島國旅行,唔少人對水上屋都有情意結!而位於馬洛洛島上嘅利庫利庫潟湖度假村,係斐濟唯一一間設有水上獨立屋嘅高級酒店!絕對係蜜月feel酒店嘅首選!獨立屋四周被珊瑚礁群環繞,有豐富海洋生態,隨時隨地由屋內跳出去,就可以浮潛,同可愛嘅熱帶魚一齊暢泳!屋內部分地板係透明玻璃,可以盡情地欣賞水中世界!

利庫利庫潟湖度假村_2

水上屋設計採用咗斐濟傳統茅草屋為主題,而屋外四周種滿咗綠樹,園林景致、民族風情同海島悠閒嘅感覺完美結合!屋內感覺溫馨雅致,又不失高級奢華感!最重要係每一間屋都有一定嘅距離,確保住客享有最高私隱度!啱哂情侶嚟過吓浪漫二人世界!

利庫利庫潟湖度假村_3

由屋內望出去就係藍天白雲同無盡海岸線,仲有專屬管家照顧一切所需!隨時想食咩飲咩都有專人送上,呢度根本就係天堂!

利庫利庫潟湖度假村_4

酒店仲有私人海灘、全方位SPA、全日開放健身中心,又提供各項活動,想玩直升機觀光、划艇、滑翔傘、滑浪風帆等都應有盡有,包有一種活動啱你玩!

 

利庫利庫潟湖度假村
地址:FJI馬洛洛島Mamanuca IslandsMalolo Island (顯示地圖)
星級 | ★★★★★  
位置 | ★★★☆☆  
設施 | ★★★★☆  
環境 | ★★★★★  
價格 | 查看價格

 

斐濟自由行|斐濟蜜月feel住宿酒店推薦|亞薩瓦島度假村

亞薩瓦島度假村

亞薩瓦島度假村座落於斐濟最偏遠嘅島嶼之一,被11個海灘所環繞,環境優美寧靜!開放比住客隨時享用嘅白色沙灘,更加係斐濟數一數二嘅頂級沙灘!啲沙幼到踩落去軟綿綿、啲水清到唔係有浪真係唔覺有水咁!可能係因為地點偏遠少少,唔係最熱門嘅旅遊島嶼,污染就更少!

亞薩瓦島度假村_2

酒店風格高雅奢華,以簡單嘅黑白色為主色調,重點突出海洋同熱帶叢林嘅原始風貌!嚟到斐濟,點都一定要住對海景嘅單棟小屋,房間一打開門,就係對住白沙灘嘅庭院,庭院設有私人露天淋浴、吊床、同沙灘椅!比你喺完全無人打擾下享受陽光與海灘!

亞薩瓦島度假村_3

如果係嚟度蜜月,就點都豪一次,訂佢地嘅Honeymoon Suite Lomalagi!Lomalagi有天堂嘅意思,真係房如其名!設備極盡奢華,最吸引係有一個私人海景infinity pool!夜晚同另一半喺無盡星空下暢泳,又或者要求酒店送餐到房內,望住個靚海,嘆當地至新鮮海鮮同美酒,仲有比咁樣更浪漫嘅事咩?

 

亞薩瓦島度假村
地址:FJI亞薩瓦島Yasawa Island (顯示地圖)
星級 | ★★★★★  
位置 | ★★☆☆☆  
設施 | ★★★★☆  
環境 | ★★★★★  
價格 | 查看價格

 

斐濟自由行|斐濟蜜月feel住宿酒店推薦|納努庫水療渡假村

納努庫水療渡假村

納努庫水療渡假村唔單止係5星級酒店,更加係舉辦婚禮嘅熱門勝地!先講地理位置,酒店距離斐濟首都Pacific Harbour Village只有3分鐘車程,唔洗又轉船,轉小型飛機,夠哂方便。重點係14棟別墅,每一棟都大到不得了,有部份仲有兩層高,別墅私人泳池旁邊已經可以舉辦小型婚禮!而且服務一流,餐廳The Kanavata嘅美食質素又好,新人同賓客都有至高級享受!

納努庫水療渡假村_2

最欣賞係每一棟別墅都盡量做到高級得嚟,比人一種親切感,真係會住到唔捨得走。環境咁靚!辦完婚禮,直接就可以喺過埋honeymoon啦!就算唔係honeymoon,靜雞雞book呢度做送比另一半嘅驚喜禮物,實冧到暈啦!

納努庫水療渡假村_3

淨係呢個私人露台,加埋個對住無敵大海景嘅infinity pool,已經值回票價!

納努庫水療渡假村_4

酒店泳池嘅設計特別用心,無論係房內定公用泳池,都務求做到要同自然環境融合嘅感覺!水天一色,絕對會令人畢生難忘!

 

納努庫水療渡假村
地址:FJI太平洋港11 Nanuku Drive (顯示地圖)
星級 | ★★★★★  
位置 | ★★★★★  
設施 | ★★★★☆  
環境 | ★★★★★  
價格 | 查看價格  

 

斐濟自由行|求婚必選斐濟景點推薦|Tivua Island心型島

Tivua Island心型島
@Lensdrop

講到斐濟求婚勝地,唔洗諗,第一位肯定係Tivua Island心型島!全世界有9個心型島,喺斐濟呢個人間天堂都有一個!Tivua Island係距離斐濟本島90分鐘船程嘅島嶼,雖然船程比較耐,但可以乘坐著名嘅Captain Cook玻璃船去,沿途風光靚到暈,又隨時可以望到水底世界!又或者可以直頭坐直升機去,由高空望落去,清徹嘅海水、色彩繽紛嘅珊瑚礁群、象徵愛情嘅心型島、喺直升機上直接求埋婚,邊有可能會失敗?

Tivua Island心型島_2
@CaptainCookCruisesFiji

小編仲發現Captain Cook Cruise呢間公司唔單止有提供Tivua Island Day Trip,仲好貼心咁提供埋求婚套餐!一對情侶$677FJ起就可以享有度身訂做嘅求婚package!求婚橋段都可以幫你度埋,包無蝦碌事發生!詳情就上返Captain Cook Cruise官網睇啦!

 

斐濟自由行|求婚必選斐濟景點推薦|Natadola Beach

Natadola Beach
@Pinterest

另一個求婚勝地就係Natadola Beach,斐濟有咁多水清沙幼嘅靚沙灘,點解一定要嚟呢度求婚呢?因為呢個沙灘每當潮退嘅時候,就會露出沙州,形成一條水中步道!喺步道上行嘅時候,就有水上行走嘅錯覺!唔單止好多人喺度求婚,就連婚禮都喺度辦!名乎其實嘅海中婚禮!一定夠哂難忘啦!

Natadola Beach_2
@LonelyPlanet

求完婚,仲可以雙雙騎馬漫步沙灘,欣賞日落!呢啲場景,感覺直頭係拍緊浪漫愛情片啦!Natadola Bay Horse Riding & Beach Massage有因應唔同時段提供騎馬活動,因為唔同季節價錢都唔一樣,詳情就可以上佢地嘅官網查詢啦!

 

📖延伸閱讀:【馬爾代夫自由行】一生至少去一次!Top 6天堂級嘆世界馬爾代夫酒店!
📖延伸閱讀:【布吉PoolVilla平靚正】雙泳池、精靈樹屋極浪漫!5大布吉Pool Villa推介
📖延伸閱讀:【越南富國島自由行】又有直航喇!編輯嚴選Top 5富國島酒店,盡享無敵海景!
📖延伸閱讀:【台灣小琉球自由行】五大必去小琉球景點、小琉球潛水攻略 (連小琉球民宿推薦)

 

Hotels.com酒店優惠Hotels.com酒店優惠